Verdad cashcata yachai

¿Huaquincunaca imamantataj mana allita juzgancuna?

Achca gentecunami panda yuyaicunata uyashpalla shujtajcunataca yangamanta juzgancuna. Por ejemplo:

Huaquin jefecunaca, ‘huarmicunaca sinchi trabajocunataca mana rurai tucuncunachu. Maquinacunata, computadorata utilizashpa mana trabajai tucuncunachu’ nishpami pandata yuyancuna.
Ñaupa punllacunapi Europapi causaj judiocunataca ‘paicunami yacuta venenashpa gentecunataca unguchirca’ nishpami juchachircacuna. Nazi politicocuna mandai punllacunapipish ‘judiocunamantami Alemaniapica cullquimanta problemacuna tiyan’ nishpami juchachircacuna. Chashnami judiocunataca mana allita tratarcacuna. Cunancamami maipica chashna tratancuna.
Achca gentecunami ‘ima discapacidadta charijcunaca llaquilla, colerami causancuna’ nishpa yuyancuna.

Cai laya panda yuyaicunata charijcunaca shujtajcunapish paicuna laya yuyajpimi razonta charishcata crincuna. Cutin shujtajcuna mana paicuna laya yuyajpica ‘yuyai illajmi can’ nincunami.

Bibliamanta consejo

“Yachaita mana charij runaca urmanllami” (PROVERBIOS 19:2).

¿Imatataj nisha nin? Mana verdadta yachashpaca shujtajcunamantami pandata yuyashun. Shujtajcuna ima nishcallata uyashpaca pitapish yangamantami juzgai tucunchij.

¿Bibliapica shujtajcunata yanganchinalla cashcatachu yachachin?

Huaquin gentecunaca ‘Bibliapimi shujtajcunata yanganchinataca yachachin’ nincunami. Pero, ¿ciertochu Bibliapica chaita yachachin?

Tucuicunami shuj runallamanta shamunchij. ‘Diosca shuj runallamantami tucui cai pachapi causajcunata rurarca’ (Hechos 17:26, QC, 1989).
Diospajca tucuicunami igual canchij. “Pi cashpapish Taita Diospaj ñaupajpica tucuicuna chai shinallataj cashcatami cunantajca yachani. Maijan llajtapi causaj cashpapish Taita Diosta manchashpa allita rurajtami Taita Diosca alli nin” (Hechos 10:34, 35).
Diosca ñahuillata ricunapaj randica, ñucanchij shungutami ricun. “Runaca ñahui ricushcallatami ricun. Ashtahuanpish Jehová Diosca shungutami ricun” (1 Samuel 16:7, NWT ).a

a Bibliapica Diospaj shutica Jehová cashcatami ricuchin.

¿Imamantataj verdadta yachana canchij?

Shujtajcunata alli rijsishpaca paicunamanta pi llullata nijpica mana crishunchu. Shuj grupo gentecunamanta llullacunata nishcata yachaj chayashpaca, shujtaj grupo gentecunamanta imata nijpica cierto o mana cierto cashcatarajmi yachanata munashun.

Experienciacuna: Yovitsa (Europa ura ladomanta)

Punta yachaipi parlashca Yovitsa runaca noticiapi, televisionpi o vecinocuna shuj grupo gentecunamanta mana allita parlashcata uyashpami huiñarca. Paica: “Chai gentecunamanta mana allita yuyashpami incluso pꞌiñaj carcani. Chashna yuyangapajca razontami charini nishpami yuyaj carcani”.

“Pero cuartelpi cashpaca chai grupomanta soldadocunahuanmi causana carcani. Chaimi tiempohuanca paicunata alli rijsishpa catircani. Hasta paicunapaj shimita yachashpa, paicunapaj llajtamanta musicatapishmi uyaj carcani. Sumajtami pasaj carcani. Chaimi paicunamanta mana allita yuyanata saquircani. Pero chai gentecunamanta ama cutin mana allita yuyangapajca paicunamanta mana allita parlaj noticiacunata, burlarij peliculacunata, programacunatapish mana ricunichu. Shujtajcunata mana allita juzgashpami paicunata pꞌiñai callari tucunchij” ninmi.

¿Imatataj rurai tucungui?

Shuj grupomanta shuj persona imapi mana alli cajpica tucuicunami igual canga nishpaca ama yuyaichu.
Shujtajcunamanta mana tucuita yachashcata yuyari.
Verdadta yachangapajca imata ricunata, imata uyanata alli agllai.