¿Diospaj Mandanaca imataj can?

BIBLIACA NINMI

‘Jahua pacha Taita Diosca nunca pi mana chingachina mandanatami churanga’ (Daniel 2:​44, Biblia en Quichua Chimborazo, 2010).

‘Ñucanchijmanca churitamari cushca. Paipaj maquipimari mandanataca churashca’ (Isaías 9:⁠6).

CAITA CRINACA ¿IMA SHINATAJ AYUDAN?

• Churica alli mandaj cashcamantami cada unota ayudanga (Isaías 48:​17, 18).

• Ñallami paraíso Allpapi cushilla, ungüicuna illaj causachun ayudanga (Apocalipsis 21:​3, 4).

¿BIBLIA YACHACHISHCATA CRINACHU CANCHIJ?

Ishqui yuyaicunata ricushun:

• Diospaj Mandana imata ruranatami Jesusca ricuchirca. Jesusca paita catijcunamanca, Diospaj Mandana shamuchun, Diospaj munai cai Allpapi pajtarichun nishpa mañanguichij nircami (Mateo 6:​9, 10). Shinallataj Diospaj Mandana imata ruranatami ricuchirca.

  Jesús Allpapi cashpaca yaricaihuan cajcunamanmi micunata cararca, ungushcacunatami jambirca, huañushcacunatapish causachircami (Mateo 15:​29-​38; Juan 11:⁠38-​44). Chashnami Jesusca Diospaj Mandanapi mandacushpa imallata ruranata ricuchirca (Apocalipsis 11:15).

• Cai pachapi tiyaj llaquicunaca Diospaj Mandana ñalla mandai callarinatami ricuchin. Jesusca cashnami nirca: Diospaj Mandana cai Allpata mandai callaringapajca, jatun macanacuicuna, yaricaicuna, allpa chujchuicunami tiyanga nircami (Mateo 24:​3, 7).

  Chai llaquicunataca cunanmi ricucunchij. Chaimantami Diospaj Mandana ñalla tucui llaquicunata tucuchina cashcata yachanchij.