Israel llajtapaj punta rey

Jehová Diosca israelitacunata pushachunca juezcunatami churarca. Pero israelitacunaca shuj mandajta charisha nishpami Samueltaca: ‘Shujtaj llajtacuna shinami ñucanchijpish shuj mandajta charisha ninchij’ nircacuna. Chaica Samuelpajca mana alli ricurircachu. Chaimantami Diosta mañarca. Diosca: ‘“Mana cantachu mana chasquisha nishcacuna. Ñucatami paicunapaj rey cachunca mana chasquincuna. Shuj reytami cusha. Pero paica achca cosascunatami mañanga” ningui’ nircami. Chaita nijpipish israelitacunaca: “¡Ima cajpipish ñucanchijca shuj reytami charisha ninchij!” nircacunami.

Jehová Diosca Saúl shuti runata punta mandaj cachun agllagrishcatami Samuelmanca huillarca. Saulca Ramá llajtapimi Samuelta visitarca. Chaipimi Samuelca Saulpaj umapi aceiteta churashpa rey cachun agllashcata ricuchirca.

Qꞌuipaca Samuelca mushuj reyta ricuchingapajmi israelitacunata tandachirca. Pero Saulca ni maipi mana ricurircachu. Paica jatun maletacuna huashapimi miticushca carca. Paita mashcashpa ña japijpica israelitacunapaj chaupipimi shayarirca. Paica tucuicunamanta ashtahuan jatun, sumajmi carca. Samuelca: ‘Jehová Dios agllashca runata ricuichij’ nircami. Chaimi gentecunaca: “¡Viva rey Saúl!” nishpa caparircacuna.

Callaripica Saulca Diostapish, Samueltapish tucuipimi cazurca. Pero shuj punllaca Samuelca Saultaca: ‘Diosman sacrificiocunata cungapaj shuyangui’ nircami. Saulca sacerdotecunalla sacrificiocunata rupachina cashcataca allimi yacharca. Shinapish Samuel mana utca shamujpimi Saulca paillataj sacrificiota rupachirca. Chaimi Samuelca: ‘Jehová Diostami cazuna carcangui’ nirca. Shina nijpica, ¿Saulca Diosta tucuipi cazuna cashcataca intindircachu?

Qꞌuipaca Saulca amalequitacunahuanmi macanacunaman rirca. Samuelca tucui amalequitacunatami tucuchina cangui nishca carca. Shinapish Saulca mandaj Agagtaca mana huañuchircachu. Chaimi Jehová Diosca Samueltaca: ‘Saulca ñucataca mana cazushcachu’ nirca. Dios shina nijpimi Samuelca achcata llaquirishpa Saultaca: ‘Jehová Diosca paita mana cazushcamantami shujtaj mandajta agllagrin’ nirca. Samuel tigraricujpica paipaj churana puntapimi Saulca japirirca. Chaimi Samuelpaj churanaca lliquirirca. Chaimantami Samuelca: ‘Chashnami Jehová Diosca rey canamanta cantaca anchuchinga’ nirca. Chaica Israelpaj shujtaj rey tiyana cashcatami ricuchirca. Chai reyca Diosta cꞌuyaj, cazuj runami cana carca.