Sauloca Jesustami cati callarirca

Sauloca Tarso llajtapimi huacharirca. Fariseo cashcamantami judiocunapaj leycunataca alli yacharca. Paica Jesusta catijcunata pꞌiñajmi carca. Chaimantami huasicunapi yaicushpa cꞌaricunata, huarmicunatapish sirijta aisashpa carcelpi churarca. Shuj cutincarin pꞌiñaj gentecuna Jesusta catij Estebanta rumicunahuan shitashpa huañuchicujpimi Sauloca ricushpalla saquirirca.

Sauloca Jerusalenpi Jesusta catijcunata llaquichishca jahuapish sacerdotecunata jatun mandajtaca: ‘Damasco pueblopi Jesusta catijcunatapish llaquichingapaj cachahuayari’ nircami. Chaiman chayagricujpimi ñapish paipaj muyundijpi achijlla ricurirca. Chaimi Sauloca pambaman urmarca. Qꞌuipaca: ‘Saulo, ¿ima nishpataj ñucataca catiracunguiyari?’ nishcami uyarirca. Sauloca: ‘¿Pitaj cangui?’ nishpami tapurca. Chai rimashcaca: ‘Ñucaca Jesusmi cani. Damascoman ri. Chaipimi can imata ruranata huillanga’ nircami. Chai ratomi Sauloca ciego saquirirca. Chaimantami paitaca maquimanta aisashpa puebloman pusharcacuna.

Damascopica Jesusta catij Ananías shuti runami causarca. Ananiasmanmi Jesusca: ‘Recta shuti ñanta rishpa Judaspaj huasipi Saulo runata mashcagri’ nirca. Chaimi Ananiasca: ‘Amito, chai runaca canta catijcunataca prezupi churacushcatami uyashcani’ nirca. Pero Jesusca: ‘Rilla, achca llajtacunapi Diosmanta predicachunmi paitaca agllarcani’ nircami.

Chashna nijpimi Ananiasca Saulopajman rishpa: ‘Saulo ñuca huauqui, Jesusmi can cutin ricuchun ñucataca cacharca’ nirca. Sauloca chai ratomi cutin ricurca. Paica Jesusmanta yachashpami cati callarirca. Qꞌuipaca bautizarishpami sinagogacunapi Jesusta catijcunahuan huillai callarirca. Saulo Jesusmanta yachachicujta ricushpaca judiocunaca: ‘¿Manachu cai runaca Jesusta catijcunata llaquichij carca?’ nishpami tapurircacuna.

Damascopica quimsa huatacunatami Sauloca predicarca. Judiocunaca paita pꞌiñashcamantami huañuchinata yuyarircacuna. Chaita yachaj chayashpami huauquicunaca Saulota canastapi churashpa pircapi tiyaj jutcuta uriyachishpa cacharcacuna.

Jerusalenman chayashpaca Sauloca huauquicunahuanmi tandanacusha nirca. Pero paicunaca mancharcacunami. Chaimi Jesusta catij Bernabeca Saulota apostolcunapajman pushashpa alli runa cashcata parlarca. Qꞌuipaca Jerusalenpi caj huauqui panicunahuan tandanacushpami cushicuihuan predicai callarirca. Qꞌuipaca Saulotaca Pablo nijcunami carca.