Jerusalén llajtaca tucuchishcami carca

Judá llajtapi causajcunaca achca cutinmi Diosmanta caruyashpa yanga dioscunata adorarcacuna. Chai huatacunapica Jehová Diosca achca profetacunatami paicunata ayudachun cacharca. Pero paicunaca mana cazurcacunachu. Ashtahuanpish paicunamantami burlarircacuna. ¿Gentecuna yanga dioscunata ama adorashpa catichunca Jehová Diosca imatataj rurarca?

Babiloniamanta rey Nabucodonosorca tucui llajtacunatami dueñoyacurca. Jerusalenta dueñoyashpaca rey Joaquinta, mandajcunata, alli soldadocunata, alli trabajajcunatapishmi Babiloniaman aparca. Diospaj huasipi tiyaj achca valij cosascunatapishmi apashpa rirca. Qꞌuipaca Nabucodonosorca Judá llajtata mandachunmi Sedequiasta churarca.

Callaripica Sedequiasca Nabucodonosorta tucuipimi cazurca. Qꞌuipaca llullashpa huillaj profetacuna, cꞌuchulla llajtacunapi causajcunaca Sedequiastaca: ‘Nabucodonosorta ama cazuichu’ nircacunami. Chaimi Jeremiasca Sedequiastaca: ‘Can mana cazujpica Judá llajtapica yaricai, ungüi, huañuimi tiyanga’ nirca.

Ocho huatacuna qꞌuipaca Sedequiasca Babiloniapaj reyta mana cazushpami egipcio soldadocunapaj ayudata mañarca. Chaimantami Nabucodonosorca Jerusalenpi cajcunata llaquichichun soldadocunata cacharca. Chai soldadocunaca Jerusalén muyundijpimi carpa huasicunata shayachircacuna. Chaimi Jeremiasca Sedequiastaca: ‘Yaya Diosca: “Babiloniocunata cazushpaca quishpiringuichijmi. Pero mana cazujpica cai llajtata rupachishpami cantapish prezu apangacuna” ninmi’ nirca. Chashna nijpipish paica: ‘¡Manataj cazushachu!’ nircami.

Shuj huata chaupi qꞌuipaca babiloniocunaca Jerusalén pircacunapaj shuj partetami urmachircacuna. Chaita yaicushpami achca gentecunata huañuchishpa, achcacunata prezu apashpa Diospaj huasitapish, Jerusalentapish rupachircacuna.

Sedequías miticushpa rijpipish babiloniocunaca Jericó cꞌuchullapi paita japishpami Nabucodonosorpajman aparcacuna. Nabucodonosorca Sedequiaspaj ñaupajpimi paipaj churicunata huañuchichirca. Qꞌuipaca ñahuicunata llujshichishpami Sedequiastaca prezupi churarca. Chaipimi paica huañurca. Pero Jehová Diosca Judapi causajcunataca: ‘70 huatacuna pajtajpimi cancunataca Jerusalenman tigrachimusha’ nircami.

¿Babiloniaman apashca jovencunahuanca imataj tucurca? ¿Jehová Diosta shungumantachu cazushpa catircacuna?