Jesusca Diospaj huasitami limpiarca

Huata 30-pimi Jesusca Jerusalenman rirca. Abril quillami cashcanga. Achca gentecunapishmi Pascuata yuyaringapaj Jerusalenman rircacuna. Chaipimi Diospaj huasipi ofrendata cungapaj animalcunata apamurcacuna. Huaquincunaca paicunapaj animalcunatami apamujcuna carca. Shujtajcunaca chai llajtallapitajmi animalcunata randijcuna carca.

Diospaj huasiman chayashpaca huaquin gentecuna animalcunata cꞌatucushcatami Jesusca ricurca. Chai gentecunaca Diosta adorana huasipimi negociocunata ruracurcacuna. ¿Chaita ricushpaca Jesusca imatataj rurarca? Achcata pꞌiñarishpami azotina anguta rurashpa ovejacunata, huagracunata azotishpa llujshichishpa cacharca. Cullquita cambiajcunapaj mesacunatapish vueltachishpami tucuita pambaman shitarca. Palomacunata cꞌatujcunatapish Jesusca: ‘¡Caicunata caimanta anchuchichij! ¡Ñuca Yayapaj huasitaca cꞌatuna randina ucutaca ama ruraichijchu!’ nircami.

Jesús imata ruracujta ricushpaca gentecunaca achcatami mancharircacuna. Chai ratomi paita catijcunaca Mesiasmanta parlaj profeciata yuyarircacuna. Chai profeciapica: ‘Diospaj huasitaca achcatami respetasha’ nircami.

Huata 33-pica cutinmi Diospaj huasita Jesusca limpiarca. Paica paipaj Yayapaj huasita tucuicuna respetachunmi munarca.