JESÚS SHINA CAUSASHUNCHIJ
Catirashpa llaquichishca huauquicunamanta panicunamanta Diosta mañashunchij
Diosta servijcuna ama huillachunca Satanás llaquichina cashcatami Bibliapica huillarca (Jn 15:20; Ap 12:17). ¿Catirashpa llaquichishca huauquicunamanta panicunamantaca imataj rurai tucunchij? Diostami paicunamanta mañana canchij. Bibliapica: ‘cashcata ruraj runa Diosta mañajpica imatapish rurai tucunmi’ ninmi (Snt 5:16).
¿Ima shinataj paicunamantaca Diosta mañana canchij? Mana manchashpa llaquicunata chꞌimbapurachunmi Diosta ayudachun mañana canchij (Isa 41:10-13). Mandajcuna huillangapaj ama jarcachunpishmi Diosta mañana canchij, chashnami tucui imapipish llaqui illaj, sumajta causashpa catishun (1Ti 2:1, 2).
Pablotapish Pedrotapish catirashpa llaquichicujpica Diosta servijcunaca paicunapaj shutita nishpami mañarcacuna (Hch 12:5; Ro 15:30, 31). Catirashpa llaquichishca huauquicunapaj panicunapaj shuticunata mana tucuita yachashpapish, congregacionpaj shutita, llajtapaj shutita o pueblopaj shutita nishpami Diosta mañai tucunchij.