¿Jacobpaj tucuri shimicunamantaca imatataj yachanchij? (parte 1)

1, 2. ¿Jacobca ñalla huañugrishcata yachashpaca imatataj rurarca? (Callari paginapi tiyaj fotota ricui).

17 HUATACUNA huashamanca Jacobca paipaj familiahuanmi Canaanmanta Egiptoman rirca (Génesis 47:28). Egiptoman chayashpaca paipaj cꞌuyashca churi Joseta ricushpami achcata cushicurca. Chashnami cutin tigra tucui familia tandalla carcacuna. Shinapish Jacobca ñalla huañugrishcamantami paipaj churicunata tandachirca. Paicunahuan ima tucuna cashcatami huillagrirca (Génesis 49:28).

² Jacobpaj punllacunapica familiata pushaj ña huañugricujpica tucui familiata consejangapajmi tandachij carca (Isaías 38:1). Mana cashpaca familiata alli pushachun pita agllashcatami huillaj carca.

3. Génesis 49:​1, 2-pi nishca shinaca ¿Jehová Diosca Jacobmanca imatataj huillachirca?

³ (Génesis 49:​1, 2-ta liyipai). Chai shinallatajmi Jacobca ñalla huañugricushpaca paipaj churicunahuan tandanacurca. Paica Jehovapaj profetami carca. Chaimi Jehová Diosca paipaj churicunahuan, paicunapaj familiacunahuan shamuj punllacunapi imalla tucugrishcata huillachirca.

4. ¿Cai yachaipica imallatataj yachashun? (“Jacobpaj familia” nishca recuadrotapish ricui).

⁴ Cai yachaipica Rubenman, Simeonman, Leviman, Judaman Jacob ima nishcatami ricushun. Cutin catij yachaipica paipaj ocho churicunamanpish imata nishcatami ricushun. Jacobpaj nishcacunaca paipaj churicunapi, churicunapaj familiacunapimi pajtarirca. Paicunamantami Israel jatun llajta llujshigrirca. Cunanca Jacob nishcacuna ima shina pajtarishcatami ricushun. Shinallataj paipaj churicunamanta imata yachai tucushcatami ricushun.

RUBENMANTA YACHASHUN

5. ¿Rubenca ima allicunatataj chasquinata yuyashcanga?

⁵ Jacobca puntapica Rubenhuanmi parlarca. Paitaca: “Canca ñuca punta churimi cangui” nircami (Génesis 49:3). Rubenca punta churi cashcamantami paipaj huauquicunata yalli herenciata chasquinata yuyashcanga. Shinallataj paipaj yaya huañushca huashaca paipaj yayapaj randi familiata pushaj canapimi yuyashcanga. Paipaj huahua huahuacunapish familiata pushajcuna canapimi yuyashcanga.

6. ¿Rubenca punta churi canataca imamantataj chingachirca? (Génesis 49:​3, 4).

⁶ Rubenca punta churi canatami chingachirca (1 Crónicas 5:1). ¿Imamanta? Paica huaquin huatacuna huashamanca paipaj yayapaj huarmi Bilhahuanmi huainayashca carca. Bilhaca Raqueltami sirvij cashcarca (Génesis 35:​19, 22). ¿Imamantataj Rubenca Bilhahuan huainayarca? Jacobca caishuj huarmicunata yallimi Raquelta cꞌuyashca carca. Shinapish Raquelca ñami huañushca carca. Chaimi Rubenca paipaj yaya Bilhata pꞌiñachun, paipaj mama Leata ashtahuan cꞌuyachun Bilhahuan huainayashcanga. Mana cashpaca Bilhá sumaj huarmi cashcata ricushpami paihuan huainayashcanga. Chaita rurashcamantami Jehovapish, Jacobpish achcata pꞌiñarircacuna (Génesis 49:​3, 4-ta liyipai).

7. ¿Rubenpish, paipaj huahua huahuacunapish imataj tucurca? (“Jacob nishcacuna” nishca recuadrota ricui).

⁷ Jacobca Rubenmanca: “Cambaj huauquicunata yallica ña mana canguichu” nircami. Chai shimicunaca pajtarircami. Rubenpaj huahua huahuacunaca profetacuna, sacerdotecuna, mandajcunapish mana carcacunachu. Shinapish Jacobca Rubenmanca shuj herenciatami curca. Paipaj huahua huahuacunapish Israel llajtapaj partemi carca (Josué 12:6). Rubenca maipica allicunatami rurashca carca. Huainayana juchapipish ña mana urmashcachu canga (Génesis 37:​20-22; 42:37).

8. ¿Rubenmantaca imatataj yachanchij?

⁸ ¿Rubenmantaca imatataj yachanchij? Huainayana juchapi ama urmangapajmi esforzarina canchij. Mana alli munaicuna shamujpica ima tucunatarajmi alli yuyana canchij. Juchapi urmashpaca Jehová Diostapish, ñucanchij familiacunatapish, shujtajcunatapish llaquichinapimi yuyana canchij. Gálatas 6:7​pica: “Maijan runapish imata tarpushpaca chaillatatajmi japinga” ninmi. Shinallataj Rubenta perdonashcamantami Yayitu Dios cꞌuyaj cashcata ricui tucunchij. Ñucanchijca juchapi urmashpaca llaquicunatami charinchij. Shinapish allita rurangapaj esforzarijpi, ñucanchij juchacunamanta arrepintirijpica Yayitu Diosca bendiciangami.

SIMEONMANTA, LEVIMANTA YACHASHUN

9. ¿Jacobca Simeontapish, Levitapish imamantataj paicunahuan mana cushilla cashcata nirca? (Génesis 49:​5-7).

⁹ (Génesis 49:​5-7-ta liyipai). Qꞌuipaca Jacobca Simeonhuan, Levihuan parlashpaca paicunahuan mana cushilla cashcatami nirca. ¿Imamantataj chashna nirca? Huaquin huatacuna huashamanca Canaanmanta Siquem shuti runaca Jacobpaj ushushi Dinatami japirishca carca. Chaimantami Jacobpaj churicunaca yallitaj pꞌiñarishca carcacuna. Chaita rurashcamantami Simeonpish, Levipish Siquemta llaquichinallapi yuyarcacuna. Paicunaca umashpami Siquemtapish, paipaj runacunatapish: “Ñucanchijhuan alli causangapajca circuncisiontami rurana canguichij” nishpa mandarcacuna. ‘Pero ña quimsa punlla tucujpi, chai runacuna nanaihuan cajpirajmi Jacobpaj ishqui churicuna Levipish, Simeonpish cada uno shuj espadata japishpa, pi mana yuyashcapi chai llajtaman yaicushpa tucui cꞌaricunata huañuchircacuna’ (Génesis 34:​25-29).

10. ¿Simeonmanta, Levimanta Jacob nishcacunaca ima shinataj pajtarirca? (“Jacob nishcacuna” nishca recuadrotapish ricui).

¹⁰ Jacobca paipaj ishqui churicuna millai huañuchijcuna cashcamantami dimastij pꞌiñarirca. Chaimi: “Cancunaca Israel llajtapica caita chaitami cachashcacuna canguichij” nirca. Chai nishcacunaca 200 huatacuna qꞌuipami pajtarirca. Dios cusha nishca allpaman chayashpaca herenciatami chaupircacuna. Chaimi Simeonpaj familiapaj herenciaca Judapaj familia japishca herencia chaupipi carca (Josué 19:1). Cutin Levipaj familiacunaca tucui Israel llajtapi chꞌican chꞌican 48 llajtacunatami japircacuna (Josué 21:41).

11. ¿Simeonpaj, Levipaj familiacunaca ima allicunatataj rurarcacuna?

¹¹ Simeonpaj, Levipaj huahua huahuacunaca paicunapaj yayacuna shinaca mana pandarircacunachu. Levipaj familiacunaca tucui israelitacuna Jehová Diosta adorachunmi ayudarcacuna. Shuj cutinca Moisesca Sinaí urcupi cashpami Diospaj mandashcacunata chasquirca. Shinapish achca israelitacunaca orohuan rurashca bizitami adorai callarircacuna. Cutin levitacunaca chaita mana rurarcacunachu. Ashtahuanpish Moisés mandashca shinami chai yanga diosta adoranata saquichun ayudarcacuna (Éxodo 32:​26-29). Chaimantami Jehová Diosca levitacunataca paipaj huasipi sacerdotecuna shina sirvichun agllarca (Éxodo 40:​12-15; Números 3:​11, 12). Simeonpaj familiacunapish allitami rurarcacuna. Paicunaca mana manchashpami Judapaj familiacunahuan shuj shinalla tucushpa contracunahuan macanacurcacuna. Chashnami Dios munashca shina paicunaman cusha nishca allpata japircacuna (Jueces 1:​3, 17).

12. ¿Simeonmanta, Levimantaca imatataj yachanchij?

¹² ¿Simeonmanta, Levimantaca imatataj yachanchij? Maijanpish ñucanchijta llaquichijpi o ñucanchij familiata o shuj amigota llaquichijpipish mana yallitaj pꞌiñarinachu canchij (Salmo 4:4). Jehová Diosca ñucanchij nishcacunahuan, rurashcacunahuan shujtajcunata tigra llaquichichunca mana munanchu (Santiago 1:20). Chaimantami shuj huauqui o shuj pani o maijanpish ñucanchijta llaquichijpipish Dios yachachishcacunata cazuna canchij (Romanos 12:​17, 19; 1 Pedro 3:9). Shinallataj cambaj yaya mamaca Simeón y Leví shinachari mana allicunata ruracuncuna. Shinapish ¿paicunapaj mana alli ejemplotachu catina cangui? Mana. Jehovapaj ayudahuanmi canpish pai munashca shina causai tucungui. Jehová Diosta cazungapaj esforzarijpica paica achcatami bendicianga.

JUDAMANTA YACHASHUN

13. ¿Judaca imamantataj preocuparishca cashcanga?

¹³ Jacobca Judapaj punta huauquicunahuan parlashca huashaca Judahuanmi parlagrirca. Judapish juchacunapi urmashcamantami, “¿ñuca yayituca ñucamantaca imatashi ninga?” nishpa preocupado cashcanga. ¿Paica ima juchacunallapitaj urmashca carca? Judaca paipaj huauquicunahuanmi Siquem llajtamanta tucuita apashpa rishcarca (Génesis 34:27). Josetapish esclavota shina cꞌatuchunmi paipish ayudarca. Qꞌuipaca “Joseca huañushcami” nishpami paipaj yayaman llullarca (Génesis 37:​31-33). Qꞌuipacarin Judaca paipaj nuera Tamarhuanmi huainayarca. Mana paipaj nuera cashcata, huainayaj huarmi cashcata yuyashpami paihuan huainayarca (Génesis 38:​15-18).

14. ¿Judaca ima allicunallatataj rurarca? (Génesis 49:​8, 9).

¹⁴ Shinapish Jehová Diosca Judata felicitachun, allicunallata nichunmi Jacobmanca huillachirca (Génesis 49:​8, 9-ta liyipai). Judaca paipaj yuyajlla yayamanta preocuparishcatami ricuchirca. Shinallataj paipaj qꞌuipa huauqui Benjamintami cuidarca (Génesis 44:​18, 30-34).

15. Jacob nishca shinaca ¿Judapaj familiacunaca imallatataj rurarcacuna?

¹⁵ Jacobca paipaj churicunata Judá pushanatami nirca. Pero chai nishcacunaca 200 huatacuna qꞌuipami pajtarirca. Israelitacunaca Egipto llajtamanta llujshishpami Dios cusha nishca allpata japinaman ricurcacuna. Chaquishca pambata ricushpaca Judapaj familiarajmi puntapi rirca (Números 10:14). Asha huatacuna qꞌuipaca Judapaj soldadocunaca paicunaraj ñaupashpami Dios cusha nishca allpata japingapajca cananeo soldadocunahuan macanacurcacuna (Jueces 1:​1, 2). Achca huatacuna qꞌuipacarin Judamantami reycuna llujshina carca. Judamanta punta reyca Davidmi carca. Pero Jacob nishcacunaca pajtarishpami catina carca.

16. ¿Génesis 49:​10-pi nishcacunaca ima shinataj pajtarirca? (“Jacob nishcacuna” recuadrotapish ricui).

¹⁶ Jacob nishca shinaca tucui gentecunata huiñaipaj Mandajca Judapaj familiamantami llujshina carca (Génesis 49:​10-ta liyipai). Jacobca chai Mandajtaca Siló nishpami shutichirca. Paica Jesusmi can. Jesusmanta parlashpaca shuj angelca: “Jehová Diosmi paitaca ñaupa yaya Davidta shina mandajta ruranga” nircami (Lucas 1:​32, 33). Apocalipsis 5:​5-pica Jesustaca: ‘Judapaj familiamanta caj Leonmi can’ ninmi.

17. ¿Ñucanchijpish Jehová Dios shinaca imatataj rurana canchij?

¹⁷ ¿Judamantaca imatataj yachanchij? Judaca huaquin cutincunami pandarirca. Shinapish Jehová Diosca paipaj allicunallata ricushpami bendiciarca. Chaimantami Judapaj huauquicunaca “¿Jehová Diosca paipica imatashi ricushca canga?” nishpa sorprendidos saquirishcangacuna. Sorprendidos saquirishca cajpipish Jehová Diosca siempremi paita sirvijcunapaj alli ruraicunallata valoran. ¿Ñucanchijpish Jehová shinaca imatataj rurana canchij? Ñucanchij huauqui panicunapaj alli ruraicunatami valorana canchij. Shuj huauqui o shuj pani valishca mingashcata chasquijpica paipaj pandarishcacunallataca mana ricunachu canchij. Chaipaj randica Jehová Dios paita valorashcata, paihuan cushilla sintirishcatami yuyarina canchij.

18. ¿Judamantaca ima shujtaj yuyaitataj yachai tucunchij?

¹⁸ ¿Judamantaca ima shujtaj yuyaitataj yachai tucunchij? Jehová Diosca pai nishcacunataca tucuitami pajtachin. Chaimantami Dios cusha nishcacuna ñucanchij munashca shina, ñucanchij munashca horaspi mana pajtarijpipish pacienciahuan shuyashpa catina canchij. Judapaj familiaca mana callarimantachu Diospaj pueblota mandai callarirca. Callaripica Levipaj familiamanta Moisés, Efrainpaj familiamanta Josué, Benjaminpaj familiamanta rey Saulpishmi Diospaj pueblota pusharcacuna. Chashna cajpipish Judapaj huahua huahuacunaca Dios churashca pushajcunatami apoyarcacuna. Ñucanchijpish cunan punllacunapi Jehová Dios churashca pushajcunata apoyashunchij (Hebreos 6:12).

19. ¿Cai yachaipica Jehová Diosmantaca imatataj yachashcanchij?

¹⁹ ¿Paipaj chuscu churicunata Jacob ima nishcamantaca imatataj yachanchij? 1 Samuel 16:​7-pi nishca shinaca “Diosca gentecunataca runa ricushca shinaca mana ricunchu”. Paica perdonaj, achca pacienciata charij Diosmi can. Shinallataj mana allita rurachunca mana munanchu. Shinapish imapi nunca mana pandarichunca mana shuyanchu. Ashtahuanpish jatun juchapi urmashcamanta shungumanta arrepintirijpica paica perdonangapajmi listo can. Allita rurangapaj esforzarijpicarin paica bendicianmi. Catij yachaipica Jacob paipaj shujtaj churicunaman imata nishcatami ricushun.