¿Imamantataj consejocunata minishtinchij?

1. ¿Alli decidingapajca imatataj rurana canchij? (Proverbios 13:10; 15:22).

TUCUICUNAMI alli decisioncunata agllanata munanchij. Ñucanchij decidishcacunapish alli llujshichunmi munanchij. Bibliapica ñucanchij decidishcacuna alli llujshichunca shujtajcunata consejocunata mañachunmi animan (Proverbios 13:10; 15:​22-ta liyipai).

2. ¿Jehová Diosca ñucanchijtaca ima shinataj ayudasha nin?

² Jehová Diosllami ñucanchijmanca alli consejocunata cun. Chaimantami paitaca alli yachaita cuhuai nishpa mañana canchij. Paica: “Ñucami yachachisha. Ñuca ñahuitaca canmanta manataj anchuchishachu” nishpami ayudasha nin (Salmo 32:8). Jehová Diosca cada unomanta preocuparishpami ñucanchij minishtishca horaspi consejocunata cusha nin. Chai consejocunata pajtachingapajpishmi ayudasha nin.

3. ¿Cai yachaipica ima tapuicunatataj cutichishun?

³ Cai yachaipica chuscu tapuicunatami cutichishun. 1) ¿Consejocunata chasquingapajca ima shinataj cana canchij? 2) ¿Alli consejocunataca pitaj cui tucun? 3) ¿Ñucanchij munashcallata consejachunca imamantataj mana mashcana canchij? 4) ¿Shujtajcuna ñucanchijmanta decidichunchu saquina canchij?

¿CONSEJOCUNATA CHASQUINGAPAJCA IMA SHINATAJ CANA CANCHIJ?

4. ¿Consejocunata chasquingapajca imamantataj humildadta ricuchina canchij?

⁴ Alli decisioncunata agllangapajca shujtajcunapaj ayudata minishtishcatami alli intindina canchij. Shinallataj tucuita mana yachashcatapishmi cuentata cuna canchij. Chashnami shujtajcuna consejajpica humildadhuan chai consejocunata chasquishun. Pero mana humildes cashpaca Bibliapi tiyaj consejocuna ñucanchijpaj mana valishcatami yuyashun. Chaimantami Jehová Diosca ñucanchijtaca mana ayudanga (Miqueas 6:8; 1 Pedro 5:5). Ashtahuancarin humildes cashpaca Bibliapi tiyaj consejocunatami ñucanchij causaipi pajtachishun.

5. ¿Davidca imamantataj jatun tucushca cai tucunman carca?

⁵ Davidmanta yachashun. Davidca manaraj rey tucushpaca musicata alli tocaj cashcamantami rijsishca carca. Reypajpishmi tocashpa trabajaj carca (1 Samuel 16:​18, 19). Jehová Diosca Davidtami rey cachun agllarca. Shinallataj Davidca espíritu santota chasquishcamantami poderyuj tucurca. (1 Samuel 16:​11-13). Goliat jatun filisteo runata huañuchishcamanta, shujtaj contracunatapish huañuchishcamantami tucuicunapaj ñaupajpica rijsishca carca (1 Samuel 17:​37, 50; 18:7). Chai tucuita alli ruraj cashcamantami Davidca jatun tucushpa shujtajcunapaj consejotaca mana uyanman carca. Shinapish Davidca humilde cashcatami ricuchirca.

6. ¿Davidca consejocunata uyangapaj listo cashcataca ima shinataj ricuchirca? (Página 1-pi caj fotomantapish parlapai).

⁶ Davidca cꞌari cajpipish, huarmi cajpipish alli consejocunata uyangapajmi listo carca. Abigailpi yuyashun. Paipaj cusa millai cajpipish Abigailca alli yuyaiyuj huarmimi carca. Chaimi Davidca Abigaíl consejashcata cazushpa humilde cashcata ricuchirca. Paita uyashcamantami shujtajcunata mana yangamanta huañuchirca (1 Samuel 25:​2, 3, 21-25, 32-34). Davidca rey tucushpacarin alli consejocunata cuj runacunahuanmi apanacuj carca (1 Crónicas 27:​32-34).

7. ¿Davidmantaca imatataj yachanchij? (Eclesiastés 4:13). (Fotocunamantapish parlapai).

⁷ ¿Davidmantaca imatataj yachanchij? Ñucanchijpish David shinachari imatapish alli ruranchij. Chaimantachari shujtajcunaca ñucanchijta respetancuna. Chashnapish tucuita yachajcuna cashcata, pi mana ñucanchijta consejana cashcataca mana yuyanachu canchij. Chaipaj randica ñucanchijta pi alli consejajpica humildadhuanmi chasquina canchij (Eclesiastés 4:​13-ta liyipai). Chai consejocunata uyashcamantami mana allicunamantapish jarcarishun, shujtajcunatapish mana llaquichishun.

¿PITAJ ALLI CONSEJOCUNATACA CUI TUCUN?

8. ¿Davidca imamantataj Jonatán consejachun mañarca?

⁸ ¿Davidca paita alli consejachunca pitataj mashcarca? Davidca Jehová Dioshuan alli apanacujta, achca experienciata charijta, paita alli rijsijtami mashcarca. Por ejemplo, Saulca Davidtami huañuchisha nirca. Chaimi Davidca Saulpaj churi Jonatanta consejachun mañarca. ¿Imamantataj Davidca Jonatán consejachun mañarca? Jonatanca Jehová Dioshuanmi alli apanacuj carca. Paipaj yaya Saúl imata ruragrisha nishcatapish paillami alli yachai tucurca (1 Samuel 20:​9-13). ¿Ñucanchijpish David shinallataj pi consejachuntaj mañana canchij?

9. ¿Ñucanchijta alli consejachunca pitataj mashcana canchij? (Shuj ejemplomantapish parlapai). (Proverbios 13:20).

⁹ ¿Ñucanchijpish ñucanchijta alli consejachunca pitataj mashcana canchij? Jehová Dioshuan alli apanacujta, achca experienciata charijta, ñucanchijta alli rijsijtami mashcana canchij (Proverbios 13:​20-ta liyipai).a Cazarasha nij jovenpi yuyashun. ¿Paitaca pitaj ashtahuan alli consejanga? Shuj soltero amigoca Bibliapaj alli consejocunahuanmi consejai tucun. Shinapish Diosta alli sirvij, paita alli rijsij shuj cusa huarmimi paimanca ashtahuan alli consejota cui tucun. Paicunaca experienciata charishcamantami Bibliapaj consejocunata ima shina practicapi churai tucushcata parlangacuna.

10. ¿Cunanca imatataj yachagrinchij?

¹⁰ Caicamaca humildecuna cana cashcata, alli consejota cujcunatapish mashcana cashcatami yachashcanchij. Cunanca ñucanchij munashcacunallata consejachun mana mashcana cashcatami yachagrinchij. Qꞌuipaca shujtajcuna ñucanchijmanta imata decidichun mana mañana cashcatami yachashun.

¿ÑUCANCHIJ MUNASHCALLATA CONSEJACHUNCA IMAMANTATAJ MANA MASHCANA CANCHIJ?

11, 12. a) ¿Maijancunaca imata nichunllataj shujtajcunaman consejota mañancuna? b) ¿Rehoboamca consejota mañashpapish imata cutichichuntaj munarca?

¹¹ Caipi yuyashun. Maijancunaca imata ruranatami ña decidincuna. Chai huashaca paicuna decidishca alli cashcata nichunllami consejota mañancuna. Mandaj Rehoboamca chaitami rurarca. Cunanca pai shina mana cana cashcatami yachashun.

¹² Israel llajtaca Salomón mandacui horasca achca cullquitami charirca. Shinapish israelitacunaca Salomón achcata trabajachishcamantami quejarircacuna. Salomón huañushca huashaca paipaj churi Rehoboammi rey tucurca. Chaimi paicunaca Rehoboamtaca paipaj yaya shina ama yallitaj trabajachichun mañarcacuna. Chaita uyashpami mandaj Rehoboamca: ‘Imata ruranata ñami yuyarisha’ nirca. Chashna nishpapish israelitacunata ashtahuan trabajachinapichari yuyacurca. Chaimi pai munashca shina consejanata yuyashpa consejota mañanaman rishcanga. Puntapica israelitacunata pushajcunatami consejota mañanaman rirca (1 Reyes 12:​2-7). Pai munashca shina mana consejajpimi chaitaca mana cazurca. Chaimantami paihuan igual huiñai jovencunaman consejota mañanaman rirca. Paipaj amigocuna pai munashca shina cutichijpimi chaita ruranata decidirca (1 Reyes 12:​8-14). Chaita decidishcamantami achca israelitacunaca Rehoboamta apoyanata saquircacuna. Paipaj gobierno tucuringacamapish achca llaquicunatami charirca (1 Reyes 12:​16-19).

13. ¿Rehoboam shina ama cangapajca imatataj mana rurana canchij?

¹³ ¿Rehoboam shina ama cangapajca imatataj mana rurana canchij? Ñucanchij imata ña yuyashca, ña decidishca alli cashcata nichunllaca mana consejocunata mañanachu canchij. Chaipaj randica ñucanchij munashca shina mana consejajpipish pajtachina munaihuanmi uyana canchij. Cunanca shuj ejemplopi yuyashunchij.

14. ¿Cai parrafopi tiyaj ejemplomantaca imatataj yachai tucunchij? (Fotomantapish parlapai).

¹⁴ Shuj huauquimanca alli pagashca trabajotachari cusha nicun. Chai trabajopi alli pagana cajpipish paipaj familiata saquishpami caruman rina can. Shinapish paica achca cullquita japisha nishcamantachari chaipi trabajanata ña decidishcanga. Chai huashaca pai munashca shina consejanata yuyashcallamantachari ancianocuna consejachun mañanga. Shuj ancianoca: “Bibliapi nishca shinami cambaj familiataca mana saquina cangui. Paicuna Diosta alli sirvichunmi ayudana cangui” nishpami consejan (Efesios 6:4; 1 Timoteo 5:8). Shinapish chai huauquica ancianopaj consejota mana munashpami shujtaj huauquicunapaj consejota mashcashpa catin. Paica pai munashca shina consejachunllami mashcacun. Chaimi pai munashca shina chai trabajota japichun pi aconsejajpica chai huauquica pai ima decidishcallatataj ruranga. Chaita rurashcamantami llaquicunapi urmanga. ¿Cai ejemplomantaca imatataj yachai tucunchij? Ñucanchij munashcallata ruranapaj randica alli consejocunatami pajtachina munaihuan siempre uyana canchij (Jeremías 17:9).

¿SHUJTAJCUNA ÑUCANCHIJMANTA DECIDICHUNCHU SAQUINA CANCHIJ?

15. ¿Consejachun mañashpapish imatataj mana rurana canchij?

¹⁵ Jehová Diosca cada uno imata ruranata agllachunmi munan (Gálatas 6:​4, 5). Shinapish imata manaraj decidishpami Bibliapaj consejocunata alli ricuna canchij, experienciata charij huauqui panicunapaj consejocunatapishmi mashcana canchij. Consejachun mañashpapish ñucanchijmanta decidichunca mana mañanachu canchij. “¿Canca imatataj ruranguiman?” nishpapish mana tapunachu canchij. Paicuna rurashca shinapish mana ruranallachu canchij. Chaipaj randica ñucanchijllataj alli yuyashpami imatapish alli decidina canchij.

16. ¿Corintopi causaj Jesusta catijcunaca imata ruranatataj cada uno decidina carcacuna? (1 Corintios 8:7; 10:​25, 26).

¹⁶ Apostolcuna causashca tiempopica Corinto llajtapi causaj Diosta mana sirvij gentecunaca yanga dioscunamanmi ofrendata shina animalcunapaj aichata cujcuna carca. Maipica chai aichataca mercadocunapi o yanga dioscunapaj huasicunapimi cꞌatujcuna carca. Chaipimi Jesusta catijcunaca chai aichata randishpa micunata o mana micunata decidina carcacuna. Apóstol Pabloca: “Rurashcalla diosca cai pachapica ima mana canchu. Shujlla Diosmi tiyan. Chaitaca ñucanchijca yachanchijmi” nircami (1 Corintios 8:4). Pablo ima nishcata yuyarishpami huaquin huauqui panicunaca mercadopi cꞌatushca aichata randishpa micunata decidircacuna. Cutin shujtajcunaca chai aichata mana micunatami decidircacuna (1 Corintios 8:7; 10:​25, 26-ta liyipai). Apóstol Pabloca cada uno alli yuyashpa alli decidichunmi yachachirca. Shujtajcuna rurashcata catishpalla decidichunca mana nircachu (Romanos 14:​10-12).

17. ¿Shujtajcuna rurashcata catishpalla ama decidingapajca imatataj rurana canchij? (Shuj ejemplomanta, fotocunamantapish parlapai).

¹⁷ ¿Shujtajcuna rurashcata catishpalla ama decidingapajca imatataj rurana canchij? Cunan punllacunapipish Diosta sirvijcunaca cada unomi yahuarmanta uchilla partecunata chasquinata o mana chasquinata decidina canchij (Romanos 14:4).b Huaquinpica yahuarmanta uchilla partecuna ima cashcata mana intindishcamantami chaita decidinaca sinchi can. Chaimantachari ñucanchijpish shujtajcuna rurashca shina ruranata yuyashun. Shujtajcuna rurashcallata catishpaca yuyai illaj shinami tucushun. Chaimi alli decisionta agllangapajca ñucanchij publicacioncunapi chaimanta alli investigana canchij. Bibliapaj consejocunata catishpami imatapish alli decidishun (Hebreos 5:14). Chaicunata manaraj alli intindishpaca Dioshuan alli apanacuj shuj huauquita o shuj panitami consejota cuchun mañana canchij.

ALLI CONSEJOCUNATA MASHCASHPA CATISHUNCHIJ

18. ¿Jehová Diosca ñucanchijcuna alli decidichunca imallatataj ñucanchijman cushca?

¹⁸ Jehová Diosca shuj cꞌuyaj yaya shinami ñucanchijpi confian. Chaimantami cada uno imata ruranata alli decidichun saquin. Shinapish shuj cꞌuyaj yaya shinami ñucanchijta ayudangapaj listo can. Alli decidichunmi paipaj Shimitapish, achca experienciata charij huauqui panicunatapish ñucanchijman cushca (Proverbios 3:​21-23). Jehová Dios shuj cꞌuyaj Yaya cashcamantami agradicina canchij. ¿Chaipajca imatataj rurana canchij?

19. ¿Ñucanchijcuna imata rurajpitaj Yayitu Diosca cushilla sintirin?

¹⁹ Yaya mamacunaca paicunapaj huahuacuna Diosta alli sirvij cajta, shujtajcunata cꞌuyaihuan ayudacujta ricushpami cushilla sintirincuna. Shinallatajmi Yayitu Jehová Diospish ñucanchijcuna paita alli sirvijcuna cajpi, chasquishca consejocunata cazujpi, paita cꞌuyashcamanta alli decidijpica cushilla sintirin.