¿Ima shinataj alli consejocunata cui tucunchij?

1. ¿Imamantataj tucuicuna alli consejanata yachana canchij?

¿CANCA consejanata munanguichu? Consejanaca maijancunapajca jahuallami can. Cutin shujtajcunapajca sinchimi ricurin. Sinchi cajpipish tucuicunami alli consejanata yachana canchij. ¿Imamantataj chashna ninchij? Ñucanchij huauqui panicunata minishtishca horaspi consejashpaca paicunata shungumanta cꞌuyashcatami ricuchishun (Juan 13:35). Paicunahuanpishmi ashtahuan alli apanacushun (Proverbios 27:9).

2. ¿Ancianocunaca imamantataj alli consejanata yachana cancuna? (“Chaupi semana tandanacuipi alli consejashpa ayudai” nishca recuadrotapish ricui).

² Jehovapish, Jesuspish ancianocunatami huauqui panicunata pushachun, cuidachun churashcacuna (1 Pedro 5:​2, 3). Chaimantami ancianocunaca alli consejanataca yachanataj can. Chaita pajtachingapajca imallatataj rurana cancuna? Paicunaca shuj conferenciata cucushpaca Bibliapaj consejocunamantami alli intindichincuna. Cada huauqui panicunatapishmi cꞌuyaihuan consejancuna. Shinallataj congregacionmanta caruyashca huauqui panicunatapish cꞌuyaihuan consejashpami congregacionman tigrachun ayudancuna. ¿Ancianocunapish, ñucanchijpish alli consejanata yachangapajca imatataj rurana canchij?

3. a) ¿Alli consejanataca pimantataj yachai tucunchij? (Isaías 9:6; “Jesús shina consejangapaj esforzarishunchij” nishca recuadrotapish ricui). b) ¿Cai yachaipica imacunallatataj yachashun?

³ ¿Alli consejanataca picunamantataj yachai tucunchij? Bibliapi tiyaj Diosta sirvijcunamanta yachashpami alli consejanataca yachai tucunchij. Por ejemplo, Jesusmi tucuimanta yalli “alli consejaj” can (Isaías 9:​6-ta liyipai). Cai yachaipica paimantapish, shujtajcunapaj ejemplocunamantapishmi yachashun. Shinallataj pi consejachun mañajpi imata rurana cashcata o consejota mana mañajpipish ima shina consejanatami yachashun. Tucuripica minishtishca horaspi consejana cashcata, cꞌuyaihuan consejana cashcatami yachashun.

¿PI CONSEJACHUN MAÑAJPICA IMATATAJ RURANA CANCHIJ?

4, 5. ¿Imatapish rato consejanapaj randica imapitaj yuyarina canchij? Shuj ejemplomantapish parlapai.

⁴ Pi ñucanchijman shuj consejota mañajpica cushillami sintirinchij. Shinapish ima yuyashcataca mana chai rato ninallachu canchij. Ashtahuanpish paita ayudai tucushcata o mana ayudai tucushcatami alli yuyarinaraj canchij. Ima shina consejanata mana yachashpaca chai yuyaimanta ashtahuan yachajcunata, experienciata charijcunata mashcachunmi consejana canchij.

⁵ Caipi yuyashunchij cambaj alli amigochari ancha ungushca can. Chaimi ancha ungüimanta ima shina jambirina cashcata o imalla tratamientocunata mashcacushcata ninga. Shinallataj “¿Canca imatataj ruranguiman?” nishpachari canta tapunga. Ñucanchij imata ruranata alli yachashpapish “caita o chaitami rurana cangui” nishpaca mana rato consejanallachu canchij. Chaipaj randica shuj alli doctor paita ayudai tucushcatami yuyana canchij. Chaimantami chai ancha ungüimanta ima shina jambirina cashcata yachachun shuj alli doctorta mashcashpa ayudana canchij.

6. ¿Manaraj shuj consejota cushpaca puntapica imataj ruranaraj canchij?

⁶ Huaquinpica ñucanchijca alli consejajcuna cashcatachari yuyanchij. Shinapish Proverbios 15:​28-pi ima nishcatami alli ricunaraj canchij. Chaipica “cashcata ruraj runaca imata tapujpipish, shungupiraj alli yuyashpami cutichin” ninmi. Caipi ricushca shinaca ¿alli consejajcuna cangapajca imatataj rurana canchij? Puntapica manaraj consejashpami Yayitu Diosta mañanaraj canchij. Qꞌuipaca chꞌican chꞌican publicacioncunapi investigashpami chaicunapi cutin, cutin yuyana canchij. Chaita rurashpallami Yayitu Dios munashca shina consejashun. Cunanca profeta Natanhuan ima tucushcata ricushun.

7. ¿Natanmantaca imatataj yachanchij?

⁷ Rey Davidca Jehová Diospaj shuj templota shayachisha nishcatami profeta Natanman huillarca. Chaita uyashpami Natanca: “Chaita ruranaca allimi can” nishpa rato cutichirca. Shinapish ¿Natanca chaita manaraj cutichishpaca imatataj ruranaraj carca? Paica Jehová Dios imata yuyashcatami tapunaraj carca. Jehová Diosca David paipaj templota shayachichunca mana munarcachu (1 Crónicas 17:​1-4). ¿Natanmantaca imatataj yachanchij? Imatapish alli yuyashpa consejangapajca “mana utca rimajcunachu” cana canchij (Santiago 1:19).

8. ¿Shuj consejota cungapajca imamantataj alli yuyanaraj canchij?

⁸ Ñucanchijcuna piman mana alli consejajpica paicuna mana alli decisioncunatami japingacuna. Paicuna llaquipi urmashcamantami ñucanchijpish culpayuj tucushun. Chaimantami shuj alli consejota cungapajca alli yuyanaraj canchij.

¿CONSEJACHUN MANA MAÑAJPIPISH IMA SHINATAJ CONSEJANA CANCHIJ?

9. ¿Ancianocunaca manaraj consejashpaca imatataj alli ricunaraj can? (Gálatas 6:1).

⁹ Huaquincunaca manaraj juchapi urmashpapish mana alli ñanta puricuj shinami mana allicunata rurai callarincuna. Chaimi ancianocunaca mana alli ñanta puricujcunata consejana can. Paicunataca huiñai causaiman apaj ñanta cutin purichunmi ayudana can (Gálatas 6:​1-ta liyipai, Santiago 5:​19, 20). Shinapish ¿ancianocunaca manaraj consejashpaca imatataj alli ricunaraj can? Jehová Diosca cada uno chꞌican chꞌican decisioncunata agllachunmi saquin (Romanos 14:​1-4). Chaimi ancianocunaca cai huauquica: “¿Ñuca munashca shina mana rurashpapish ciertotajchu pandarishca?” nishpa alli ricunaraj can. Qꞌuipaca chai huauqui consejachun minishtishcata cuentata cushpaca ¿ancianocunaca ima shinataj consejana can?

10-12. ¿Consejota mana mañajpipish ancianocunaca consejangapajca imatataj rurana can? Shuj ejemplomantapish parlapai. (Fotomantapish parlapai).

¹⁰ Huaquincunaca pandaricushcata mana cuentata cushpachari consejota mana mañangacuna. Chaimi ancianocunapajca paicunata consejanaca sinchi canga. Shinapish ¿ancianocunaca jahualla consejangapajca imatataj ruranaraj can?

¹¹ Caita yuyashun shuj tarpujca manaraj tarpushpaca allpata ñutujllata saquingapajmi allichin. Chashnallatajmi shuj ancianoca huauqui panicuna siempre alli sintirichunca cꞌuyaihuan tratana can. Chaita rurashpami chai ancianopajca huauqui panicunata consejanaca ashtahuan jahualla canga. Qꞌuipa chai ancianoca ima hora consejanatami alli ricuna can. Ña consejagrishpaca: “Canmantami preocuparini. Chaimantami cai consejota cusha nini” nishpami parlashpa callarina can. Chai anciano cꞌuyaita ricuchishcamantami huauqui panicunaca chai consejota jahualla chasquingacuna.

¹² Shinallataj chai ancianoca manaraj consejashpaca: “Tucuicunami pandarinchij. Chaimi maipica consejachun tucuicuna minishtinchij” nishpami parlana can. Chashna parlashpaca allpata allichicuj shina chai huauqui o pani alli sintirichunmi ayudanga (Romanos 3:23). Qꞌuipaca “muyuta tarpucuj” shinami chai ancianoca cꞌuyaihuan, respetohuan imapi pandarishcata ricuchina can. Chai huashaca mejorangapaj imata rurana cashcatapishmi Bibliahuan alli intindichina can. Parlanata tucuchingapajca “yacuta churacuj” shinami chai ancianoca allita rurashcamanta, chai huauquita o chai panita felicitana can. Shinallataj paimanta Yayitu Diosta mañashpami tucuchina can (Santiago 5:15).

13. ¿Ancianocunaca consejota chasquij alli intindishcata yachaj chayangapajca imatataj rurana can?

¹³ Maipica huauqui panicunaca ancianocuna consejashcataca mana alli intindincunachu. Chaimanta ¿ancianocunaca consejota chasquij alli intindishcata o mana intindishcata cuentata cungapajca imatataj rurana can? Consejota cushca huashaca cꞌuyaihuanmi chꞌican chꞌican tapuicunata rurana can. Por ejemplo, ¿cai consejomantaca imataj yuyangui? ¿cai consejotaca ima shinataj pajtachisha ningui? nishpami tapuna can (Eclesiastés 12:11).

MINISHTISHCA HORASPI CꞌUYAIHUAN CONSEJASHUNCHIJ

14. ¿Colerahuan huañucuj horas imamantataj mana consejana canchij?

¹⁴ Juchayujcuna cashcamantami maipica shujtajcunata llaquichishun. Mana cashpaca shujtajcunata llaquichijpimi pꞌiñarishun (Colosenses 3:​13, Efesios 4:26). Shinapish colerahuan huañucuj horas pita mana consejanachu canchij. ¿Imamantataj chashna ninchij? Colerahuan cai horas shujtajcunaman consejashpaca paicunata ayudanapaj randica ashtahuanmi llaquichishun (Santiago 1:20). Chaimantami colera pasangacama shuyanaraj canchij. Mana colerahuan cashpaca ima shina sintirishcatami tranquilos parlai tucushun. Minishtirijpicarin alli consejotapishmi cui tucushun. Cunanca Jobta Elihú ima shina consejashcata ricushun.

15. ¿Elihumantaca imatataj yachai tucunchij? (Fotomantapish parlapai)

¹⁵ Jobpaj mana alli amigocunaca paita yangamanta juchachishpami rimacurcacuna. Chaimi Jobca difindirishpa Yayitu Jehová Diosmanta mana allicunata parlarca. Elihuca Job chashna llaquicunata charishcamantami llaquirirca. Shinapish Elihuca Yayitu Jehová Diosmanta Job mana allicunata parlashcamantami pꞌiñarirca. ¿Chai qꞌuipaca Elihuca imatataj rurarca? Elihuca colera pasangacamami pacienciahuan shuyarca. Qꞌuipacarin pai parlana horas chayajpica, cꞌuyaihuan, respetohuanmi Jobta consejarca (Job 32:2; 33:​1-7). ¿Elihumantaca imatataj yachai tucunchij? Ñucanchijpish colera pasangacamami shuyanaraj canchij. Chai huashaca alli horaspimi cꞌuyaihuan, respetohuan consejana canchij (Eclesiastés 3:​1, 7).

CONSEJOTA CUNATA, CONSEJOTA CHASQUINATAPISH AMATAJ SAQUISHUNCHIJ

16. ¿Salmo 32:​8-mantaca imatataj yachangui?

¹⁶ Salmo 32:​8-pica Jehová Diosca:”Ñucami yachachisha, ñuca ñahuita canmanta manataj anchuchishachu” ninmi (Salmo 32:​8-ta liyipai). ¿Cai shimicunaca imatataj nisha nin? Jehová Diosca paipaj ñahuita ñucanchijmanta mana anchuchij shinami paipaj consejocunata practicapi churangacama ayudashpa catinga. Ñucanchijpish Jehová Dios shinami consejota chasquijcunataca practicapi churangacama ayudashpa catina canchij.

17. ¿Isaías 32:​1,2-pi nishca shinaca alli consejota cuj ancianocunaca ima shinataj cancuna?

¹⁷ Cai tucuri punllacunapi causacushcamantami alli consejocunata cunatapish, chasquinatapish yachana canchij (2 Timoteo 3:1). Ancianocunapish, shujtaj huauqui panicunapish ñucanchij minishtirishca horaspi alli consejashpaca ñucanchijta cꞌuyashcatami ricuchincuna. Paicunaca chaquishca pambacunapi yacu llujshicuj shinami cancuna. Paicunapaj consejashcacunapish curita yallimi valishca can (Isaías 32:​1, 2-ta liyipai. Proverbios 25:11). Chaimanta ñucanchijpish alli consejanata, alli consejocunata chasquinatapish yachashpa catishunchij.