Jehová Diosllami yallitaj cushilla causaita cui tucun

1, 2. a) ¿Gentecunaca cushilla causangapajca imatataj rurashcacuna? b) ¿Cai yachaipica imacunallatataj yachashun?

GENTECUNACA cushilla causangapajca tucui pudishcatami rurashcacuna. Chashnapish ashacamallami cushicushcacuna. Shujtajcunacarin dimastij llaquillami sintirishcacuna. Cai tucuri punllacunapi causacushcamantami Diosta sirvijcunapish maipica llaquilla sintirinchij. Maipicarin mana ahuantaipaj llaquicunatapishmi charinchij (2 Timoteo 3:1).

² Cai yachaipica imacunallamanta llaquilla sintiri tucushcatami yachashun. Shinallataj cutin cushilla sintiringapaj imata rurana cashcatapishmi yachashun. Shinapish puntapica Jehová Dioslla cushi causaita cui tucushcatami yachashun.

JEHOVÁ DIOSLLAMI CUSHI CAUSAITACA CUN

3. ¿Dios rurashcacunata ricushpaca imatataj paimanta yachai tucunchij? (Fotomantapish parlapai).

³ Jehová Diosca cushi Diosmi can. Chaimantami ñucanchijcuna cushilla causachun sumaj cosascunata rurashca. Por ejemplo, cai Allpataca sumaj colorcunahuan, paicunapura pugllanacuj animalitocunahuan, mishqui micunitacunahuanpishmi rurashca. Tucui caicunata rurashpami Jehová Diosca ñucanchijta cꞌuyashcata ricuchin. Chaimantami ñucanchijcunaca cushilla sintirinchij.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. a) ¿Muyundij Allpapi achca llaquicuna tiyajpipish Jehová Diosca imamantataj cushilla sintirin? b) ¿Ñucanchijcuna ima shina sintirishcata yachashpaca Jehová Diosca imatataj ruran? (Salmo16:11).

⁴ Jehová Diosca muyundij Allpapi achca llaquicuna tiyashcataca allimi yachan. Shinapish tucui llaquicunata paillataj ñalla tucuchinata yachashpami achcata cushicun (1 Timoteo 1:11). Chaimi chai punlla chayangacamaca pacienciahuan shuyashpa mana yallitaj llaquirin. Ñucanchij ima shina sintirishcatapish alli yachashpami cushilla causashpa catichun ayudan (Salmo 16:​11-ta liyipai). Cunanca Jesús imamanta cushilla sintirij cashcata ricushun.

5, 6. ¿Jesusca imacunallamantataj cushilla sintirin?

⁵ Jesusca Jehová Diosman rijchajta rurashca cashcamanta, paipish Jehová Dios shina cꞌuyaj, llaquij, gentecunamanta preocuparij cashcamantami cushilla sintirin (Colosenses 1:15; 1 Timoteo 6:15). Shinallataj Jesusca Jehová Dioshuan alli apanacuj cashcamanta, paihuan tucuicunamanta yalli achca tiempota pasashcamantami cushilla sintirin.

⁶ Jesusca paipaj Yaya nishcacunata tucuipi cazushcamantapishmi cushilla sintirin (Proverbios 8:​30, 31; Juan 8:29). Jehová Diospish Jesús cazuj cashcamantami cushilla sintirin (Mateo 3:17).

7. ¿Ñucanchijpish cushilla sintiringapajca imatataj rurana canchij?

⁷ ¿Ñucanchijpish cushilla sintiringapajca imatataj rurana canchij? Jehová Diosmanta ashtahuan yachashpa, paipaj alli amigos tucushpami achcata cushicushun. Shinallataj Jehová Dios shina cꞌuyajcuna, ayudajcuna cashpa, pai munashcacunata cazushpami yallitaj cushicushuna (Salmo 33:12). Shinapish maipica achca tiempotami llaquilla sintirinchij. Chashna sintirishpaca Jehová Dios ñucanchijmanta caruyashcataca mana yuyanachu canchij. Juchayujcuna cashcamanta chashna sintirijcuna cashcata Jehová Dios alli intindishcatapishmi yuyarina canchij (Salmo 103:14). Cunanca imacunallamanta llaquilla sintirijcuna cashcata, ama yallitaj llaquilla sintiringapaj imata rurana cashcatapishmi yachashun.

¿CUTIN CUSHILLA SINTIRINGAPAJCA IMATATAJ RURANA CANCHIJ?

8. ¿Problemacunata, llaquicunata charishpaca ima shinataj sintirinchij?

⁸ 1. Llaquicuna japijpimi llaquirinchij. Maipica huajcha cashcamanta, catirashpa llaquichishcamanta, ungüi japishcamanta, yuyajyashcamantami llaquilla sintirinchij. Shinallataj sinchi tamyacuna tiyashcamanta, yallitaj usia punllacuna tiyashcamanta o cashna laya shujtaj llaquicuna tiyashcamantami llaquilla sintirinchij. Shuj pushaj huauqui ima nishcata ricushun. Paica: “Achca problemacunata, llaquicunata charishcamantami sololla achca llaquilla sintirircani. Ñuca yaya mamahuan, ñuca huauquihuan mana tiempota pasai tucushcamantapishmi llaquilla sintirircani. Chaimi ñucata pi mana ayudai tucushcata yuyarcani” nircami. Paipaj yaya mamapish, paipaj huauquipish chuscu huatallapimi huañurcacuna. Chaipicarin paica ashtahuanmi llaquilla sintirirca. Ñucanchijpish cashna laya llaquicunata charishpaca shungupipish, yuyaipipish llaquillami sintirinchij (Proverbios 15:13).

9. ¿Cutin cushilla sintiringapajca imatataj rurana canchij? (Jeremías 29:​4-7, 10).

⁹ ¿Cutin cushilla sintiringapajca imatataj rurana canchij? Diosta mana sirvij gentecunaca tucui imapish alli llujshijllapimi cushilla causai tucunchij nincunami. Shinapish ñucanchijca llaquicunata charishpapish cushilla causai tucushcatami yachanchij. Por ejemplo, Jehová Diosca Babiloniaman prezu shina apashca judiocunataca sinchi llaquicunata charishpapish chaipi imalla charishcacunahuan cushilla causachunmi animarca (Jeremías 29:​4-7, 10-ta liyipai). ¿Ñucanchijpish caimantaca imatataj yachanchij? Ñucanchijpish llaquicunata charishpapish ñucanchij charishca alli cosascunahuan cushilla causashpa catingapajmi esforzarina canchij. Shinallataj Jehová Dios ñucanchijllata mana saquishpa, ayudashpa catina cashcatami yuyarina canchij (Salmo 63:7; 146:5). Cunanca pani Efihuan ima tucushcata yachashun. Paica shuj accidenteta charishmantami cunanca ña mana puri tucun. Chaimantami paica: “Ñuca llaqui tucujpica Jehová Diospish, ñuca familiapish, huauqui panicunapishmi ñucataca achcata ayudarca. Paicunaman agradicishcata ricuchingapajmi cushilla cangapaj esforzarini” nircami.

10. ¿Llaquicunata charishpapish cushilla cangapajca imatataj yuyarina canchij?

¹⁰ Maipica ñucanchij o ñucanchij familiami llaquicunata charin. Ñucanchij munashca shina mana causashpapish cushillami causai tucunchijb (Salmo 126:5). Pani Mariamanta yachashun. Paica precursorami can. Mariaca: “Llaquicunata charishpaca shungupi nanarishpami huacanchij. Ima shina sintirishcatapish Jehová Diosmanmi huillana canchij. Paica ñucanchij cushilla causashpa catichunmi ayudanga. Shinallataj Dios cusha nishcacunapi yuyarishpami cushilla causai tucunchij” nircami. Ñucanchij sinchi llaquicunata charishpapish chai llaquicunahuan para siempre mana causana cashcatami yuyarina canchij. Por ejemplo, ñucanchij chaqui sarushcacunaca allpapimi saquirin. Pero tamyajpica chai chaqui sarushcacunaca tucuimi chingarin. Chai shinallatajmi Jehová Diosca ñucanchij llaquicunataca ñalla tucuita chingachinga.

11. ¿Apóstol Pablomantaca imatataj yachai tucunchij?

¹¹ Maipica llaquicunahuan cashpami Jehová Dios ñucanchijhuan mana cushilla cashcamanta ñucanchijta mana bendiciashcata yuyai tucunchij. Chashna yuyai callarishpaca Diosta alli sirvijcuna ima sinchi jarcaicunallahuan chꞌimbapurashcapi yuyashunchij. Por ejemplo, Jesusmi apóstol Pablotaca alli huillaicunata huillachun agllarca. Chai alli huillaicunataca Diosta mana rijsij gentecunaman, jatun mandajcunaman, israelitacunamanpishmi huillachun mandarca (Hechos 9:15). Jesús alli huillaicunata huillachun agllashca cajpipish apóstol Pabloca achca llaquicunatami charirca (2 Corintios 11:​23-27). Apóstol Pablo achca llaquicunata charijpipish Jehová Dios paihuan ña mana cushilla cashcataca mana nisha nircachu. Ashtahuanpish sinchi llaquicunata ahuantachun Jehová Dios ayudashcatami yachanchij (Romanos 5:​3-5). Canpish llaquicunata charishpapish cushicushpami Jehová Diosta sirvishpa catina cangui. Chaimantami Jehová Dios canhuan cushilla cashcata, canta ayudacushcatapish mana cungarina cangui.

12. ¿Ñucanchij munashca shina Diosta mana sirvi tucushpaca ima shinataj sintirinchij?

¹² 2. Ñucanchij rurasha nishcacuna mana pajtarijpimi llaquirinchij (Proverbios 13:12). Jehová Diosta cꞌuyashcamanta, paita agradicishcata ricuchisha nishcamantami tucui pudishcata ruranchij. Shinapish ñucanchij rurasha nishcacunata mana pajtachi tucushpami desanimarinchij (Proverbios 17:22). Holly shuti shuj precursorapi yuyashunchij. Paica: “Ñucaca shujtaj llajtapi huillanaman, Estados Unidos llajtapi mushuj Betelta shayachishpa ayudanaman, Escuela para Evangelizadores del Reinoman rinatapishmi munarcani. Shinapish ñuca causaipi huaquin cambiocuna tiyashcamantami tucui chaicunata mana pajtachi tucushcamanta yallitaj llaquilla sintirircani” nircami. Achca huauqui panicunapish paicuna munashca shina Diosta mana sirvi tucushcamantami achcata llaquirincuna.

13. ¿Ñucanchij rurasha nishcacunata mana pajtachi tucushpaca imatataj rurana canchij?

¹³ ¿Cutin cushilla sintiringapajca imatataj rurana canchij? Jehová Diosca mana pajtachipaj ruraicunata rurachunca mana mañanchu. Ashtahuanpish paipajca cꞌuyaj cana, paita cazuj cana, humilde cana, shujtajcunata ayudajcuna canami tucuimanta yalli valishca can (Miqueas 6:8; 1 Corintios 4:2). Chaimantami imata mana rurai tucushcacunapi yuyashpa catinapaj randica imata rurai tucushcacunapi yuyana canchij.c Por ejemplo, congregacionpimi shuj joventa Diosta ashtahuan sirvichun ayudai tucungui. Mana cashpaca yuyajlla huauqui panicunatami ayudai tucungui. Shinallataj celularman cayashpa, mensajeta cachashpa, chꞌimbapura parlashpami maijanta animai tucungui. Can shujtajcunata ayudangapaj esforzaricujta ricushpami Jehová Diosca can cushilla causachun ayudanga. Shamuj punllacunapicarin tucui ñucanchij rurasha nishcacunata rurashpami Jehová Diosta sirvishun. Párrafo 12-pi parlashca pani Hollyca: “Ñuca llaquilla sintirishpaca Paraíso Allpapi tucui ñuca rurai tucushcata rurashpa Jehová Diosta sirvinapimi yuyarini. Shinallataj Jehová Diosmi tucui ñuca rurasha nishcacunata rurangapaj ayudanga” nircami.

14. ¿Imata rurashpataj llaquilla sintiri tucunchij?

¹⁴ 3. Ñucanchij munashca solota rurashpami llaquirinchij. Huaquin gentecunaca paseanaman rishpa, achca cosascunata randishpa, paicuna munashcata rurashpami cushilla cashcata ricuchingapaj internetpi fotocunata churancuna. Jehová Diosca tucui pai rurashcacunata ricushpa cushilla causachunmi munan. Shinapish achca gentecunaca paicuna munashcacunallata rurashpa cushilla mana causai tucushcatami cuentata cushcacuna. Precursora pani Eva ima nishcata ricushun. Paica: “Ñucanchij munashca solota rurashpaca mana cushilla sintirinchijchu” nircami.

15. ¿Rey Salomonca pai munashcata rurashpapish imatataj cuentata curca?

¹⁵ Rey Salomonca cushilla causanata yuyashpami tucui pai munashcata rurarca. Chaimantami paica achca mishqui micunacunata micurca, achca sumaj musicacunatapish uyarca. Yallitaj cullqui valij, alaja cosascunatapishmi randirca. Pero tucui chaicuna cushi causaita mana cui tucushcatami cuentata curca. Chaimantami rey Salomonca: “Ñahuica ashtahuan ashtahuan ricunachicunllami. Rinrinpish ashtahuan ashtahuan uyanachicunllami” nishpa quillcarca (Eclesiastés 1:8; 2:​1-11). Huaquin gentecunaca achca cullquita charishpa, paicuna munashcata rurashpa cushilla causanatami yuyancuna. Chai yanga yuyaicunaca falso cullqui shina cashcamantami ima cushi causaita mana cun.

16. ¿Ñucanchijllapi yuyanapaj randica imatataj rurana canchij? (Fotomantapish parlapai).

¹⁶ ¿Cutin cushilla sintiringapajca imatataj rurana canchij? Jesusca: “Cujmi chasquijtapish yalli cushicun” nircami (Hechos 20:35). Anciano huauqui Alekospi yuyashunchij. Paica: “Ñucallapi yuyanapaj randica ña tucui pudishcata rurashpami shujtajcunata ayudashpa cushilla sintirini” nircami. Ñucanchijpish ñucanchijllapi yuyanapaj randica pi llaquicunata apacujta ricushpami paicunata animangapaj cꞌuyaihuan uyana canchij. Ñucanchijca paicunapaj llaquicunataca mana chingachi tucunchijchu. Shinapish Jehová Dios paicunata mana saquina cashcata, paicunamanta preocuparij cashcatapishmi yuyachina canchij (Salmo 55:22; 68:19; Salmo 37:28; Isaías 59:1). Shinallataj paita animangapajca micunaman ringapaj, paseanaman ringapaj, paihuan huillanaman llujshingapajmi invitana canchij. Chashna shujtajcunata ayudashpami cushilla sintirishun (Proverbios 11:25).

17. ¿Huiñai huiñaita cushilla causangapajca imatataj rurana canchij? (Salmo 43:4).

¹⁷ Bibliapica Jehová Diosmanta parlashpaca yallitaj cushichij Dios ninmi (Salmo 43:​4-ta liyipai). Chaimantami cushilla causangapajca Jehová Diosta ashtahuan rijsishpa paipajman ashtahuan cꞌuchuyana canchij. Llaquicunata charishpapish Jehová Dios ñucanchijcunata ayudanata yachashpami tranquilos, cushilla sintirinchij. Jehová Diosca ñucanchij amigo cashcamantami huiñai huiñaita cushilla causachun ayudanga (Salmo 144:15).