Cuerpo Gobernantepi sirvij ishqui mushuj huauquicuna

5 DE OCTUBRE de 2024 huatapica Cuerpo Gobernantepi sirvij huauquicunaca shuj alaja huillaitami huillarcacuna. Paicunaca huauqui Jody Jedele, Jacob Rumphtami Cuerpo Gobernantepi sirvichun agllashcata huillarcacuna. Cai ishqui huauquicunaca Jehová Diostaca achca huatacunatami tucui shunguhuan sirvicushcacuna.

Huauqui Jedeleca Estados Unidospi saquirij Misuri llajtapimi huacharirca. Paimanca paipaj yaya mamacunami Jehová Diosmanta yachachirca. Paicuna causan lugarpica mana tanto Testigocuna tiyarcachu. Chaimi Estados Unidospaj chꞌican chꞌican lugarcunamanta caj huauqui panicuna chaipi predicanaman rijcuna carca. Chashnami huauqui Jedelca achca huauqui panicunata rijsi tucurca. Cai huauquicuna tandalla cajta ricushpa, cꞌuyaita ricuchinacujta ricushpami paipish Diosta sirvinata decidirca. Chaimi 15 de octubre de 1983 huatapi bautizarirca. Paica predicanata achcata munashcamantami colegiota tucuchishca qꞌuipaca septiembre de 1989 huatapi precursor regular shina sirvi callarirca.

Huauqui Jedelepaj yaya mamaca paitapish, paipaj panitapish uchillarajcuna cajpimi Betelman pushajcuna carca. Betelta visitanaman rijcuna cashcamantami paipish, paipaj panipish Betelpi sirvina munaita charircacuna. Tiempo qꞌuipacarin ishquindijmi Betelpi sirvircacuna. Huauqui Jedeleca septiembre de 1990 huatapimi Wallkill Betelpi sirvi callarirca. Chaiman chayashpaca puntaca Departamento de Limpiezapimi sirvi callarirca. Cutin qꞌuipaca Departamento Medicopimi sirvirca.

Betel cꞌuchupica español shimipimi congregacioncuna miraricurca. Chai congregacioncunapimi huauquicuna ayudachun minishtirirca. Chaimi huauqui Jedeleca chai congregacioncunamanta shuj congregacionpi sirvi callarirca, español shimitapishmi yachai callarirca. Asha tiempo qꞌuipacarin paipaj circuitollapitaj sirvij Dámaris shuti shuj precursoratami rijsirca. Tiempohuancarin cazarashpami ishquindij Betelpi sirvi callarircacuna.

2005 huatapica paipaj mamata cuidangapaj, paipaj huarmisitapaj yaya mamatapish cuidangapajmi Betelmanta llujshircacuna. Paicunapaj yaya mamacunata cuidacushpapish paicunaca precursores regularescuna shinami sirvircacuna. Huauqui Jedelecarin achca cutincunami Escuela del Servicio de Precursor nishcapi yachachij carca. Shinallataj Comité de Enlaces con los Hospitalespipish, Comité Regional de Construccionpipishmi ayudaj carca.

2013 huatapica cutin tigrami Betelpi sirvichun invitarcacuna. Chaiman chayashpaca Warwickpi saquirij Betelpimi construccionpi sirvi callarircacuna. Shinallataj qꞌuipaca Pattersonpi, Wallkillpimi sirvircacuna. Huauqui Jedeleca Departamento Local de Diseño y Construccionpi, Servicios de Información sobre Hospitales nishcapimi sirvirca. Marzo de 2023 huatapicarin Cuerpo Gobernantepi sirvij huauquicunata ayudachunmi Comité de Serviciopi sirvichun agllarcacuna. Huauqui Jedeleca huaquin mingashcacunata charishcamanta ima shina sintirishcatami parlan. Paica: “Ñucaca mushuj mingashcacunata chasquishpaca chaicunata pajtachinaca huaquinpica dimastij sinchimi can. Sinchi cajpipish Jehová Dios ayudanapi confianami valishca can. Paica pai munashcata pajtachij Diosmi can” nircami.

Huauqui Rumphca Estados Unidospi saquirij California llajtapimi huacharirca. Paipaj mamaca Jehová Diosmantami caruyashca carca. Shinapish pai huahuaraj cajpica paipaj mamaca Jehová Diosmanta yachachingapajmi esforzarirca. Huauqui Rumphca cada huatami paipaj abuelitata visitanaman rij carca. Paipaj abuelitaca tucui shunguhuanmi Yayitu Jehová Diosta sirvij carca. Chaimi Jehová Diosmanta asha yachachij carca. Huauqui Rumphca Yayitu Diosmanta ashtahuan yachanata munashcamantami 13 huatacunata charishpaca Bibliamanta yachachichun mañarca. Paica 27 de septiembre de 1992 huatapimi jovenraj cashpa bautizarirca. Chaita ricushpami paipaj mamapish Yayitu Jehová Diosta cutin tigra sirvi callarirca. Paipaj yayapish, paipaj huauqui panicunapishmi bautizarishpa Jehová Diosta sirvi callarircacuna.

Huauqui Rumphca precursorcuna cushicuihuan Yayitu Jehová Diosta sirvijcuna cashcatami ricurca. Chaimi colegiota tucuchishca huashaca septiembre de 1995 huatapi precursor shina sirvi callarirca. Huata 2000-picarin Ecuador llajtapimi huillajcuna minishtirin lugarpi sirvinaman rirca. Chai llajtapimi Canadá llajtamanta Inga shuti panita rijsirca. Tiempohuancarin paihuanmi cazararca. Cunanlla cazarashca huashaca Ecuador llajtapi saquirij shuj uchilla pueblitopimi shuj grupitopi sirvi callarircacuna. Cunan punllacunapicarin chai grupitoca shuj jatun congregacionmi tucushca.

Tiempo qꞌuipacarin precursores especiales shina sirvichun, superintendente de circuito shina sirvichunmi agllarcacuna. Huata 2011-pica clase 132 de Galaadman richunmi invitarcacuna. Escuela de Galaadpi graduarishca huashacarin chꞌican chꞌican llajtacunapi sirvichunmi cacharcacuna. Paicunaca betelitacuna shina, misionerocuna shina, superintendente de circuito shinapishmi sirvircacuna. Shinallataj huauqui Rumphca Escuela para Evangelizadores del Reinopipishmi yachachirca.

COVID-19 ungüi tiyashcamantami paicunaca Estados Unidos llajtaman tigrarcacuna. Chaipimi paicunataca Wallkill Betelpi sirvichun invitarcacuna. Chai Betelpimi huauqui Rumphtaca Departamento de Serviciopi trabajachun yachachircacuna. Qꞌuipacarin Comité de Sucursalpi sirvichunmi Ecuador llajtapi saquirij Betelman cacharcacuna. 2023 huatapica Warwick llajtapi saquirij Betelpi sirvichunmi aparcacuna. Huata 2024-picarin Cuerpo Gobernantepi sirvij huauquicunata ayudachunmi Comité de Serviciopi sirvichun agllarcacuna. Huauqui Rumphca: “Chꞌican chꞌican lugarcunapi sirvishcamanta parlashpaca maipi sirvishpapish huauqui panicunahuan tandalla Yayitu Jehová Diosta sirvinami tucuimanta yalli ashtahuan valishca can” nircami.

Cai huauquicunapaj ruraicunataca achcatami valoranchij. Shinallataj paicunaca ñucanchijpajca achca valishcami can (Filipenses. 2:29).