Escuelacunapica jatun llaquicunami tiyashca ¿Caimantaca Bibliaca imatataj nin?

24 de mayo de 2022 huatapica Estados Unidos, Uvalde (Texas) nishca uchilla llajtapimi shuj jatun llaqui tiyarca. The New York Times nishca periodicopica shuj runaca pistolahuanmi 19 huahuacunata, ishqui profesorcunata huañuchishcata huillarca. Chaica Robb shuti escuelapimi pasarca.

Cashna llaquicunaca ashtahuanmi mirarishpa caticun. USA Today nishca periodicopica: “Estados Unidos llajtallapimi sarun huataca huaquin escuelacunapica 249 disparocuna tiyashca. 1970 huatamanta cunancamaca chashna llaquicunaca mana tiyashcachu” nircami.

¿Cashna laya jatun llaquicunaca imamantataj tiyan? ¿Cai llaquicunata chꞌimbapurangapajca imataj ayudanga? ¿Cai llaquicuna tucurinataca confiai pudinchijchu? Bibliami cai tapuicunataca cutichin.

¿Imamantataj cai mundopica millai gentecunaca ashtahuan mirarishpa caticun?

•  Bibliapica ‘tucuri punllacunapica familia ucupi cꞌuyaita mana ricuchijcuna, pꞌiña millai’ gentecuna tiyana cashcatami huillarca. Chai gentecuna shujtajcunata llaquichishpa, millaita rurashpa causana cashcata, “ashtahuan ashtahuan millai tucushpa” catina cashcatapishmi huillarca (2 Timoteo 3:1-5, 13). Caimanta ashtahuan yachasha nishpaca “¿Predijo la Biblia cómo sería la gente en nuestros días?” nishca temata ricui.

Achca gentecunaca: ‘¿Imamantataj Yaya Diosca cashna jatun llaquicuna tiyachun saquishca?’ nishpami tapurishcacuna. Caimanta Biblia ima nishcata yachangapajca “¿Por qué le pasan cosas malas a la gente buena?” nishcata ricui.

¿Cashna laya jatun llaquicunata chꞌimbapurangapajca imataj ayudanga?

•  ‘Ñaupa quillcachishcacunapi quillcashca shimicunaca ñucanchijta yachachingapaj quillcachishcami can. Ñucanchijca Quillcachishcapi nishca shimicuna cushichishcamantami shamuj punllacunapi Dios cusha nishcacunata shuyacunchij’ (Romanos 15:4).

Bibliapi tiyaj consejocunami cai jatun llaquicunata chꞌimbapurachun ayudanga. Caimanta ashtahuan yachasha nishpaca “¿Acabará algún día la violencia?” nishca temata ricui. Caitaca Rijchari revistapi liyi.

Huahuacunaca noticiacunata uyashpa, ricushpaca yallitajmi sustarincuna. Can yaya mama cashpaca huahuacunata ayudangapajca “El efecto de las noticias en los niños” nishca temata ricui.

¿Millaita rurajcunaca tucuringachu?

•  “Paicunapaj causaitaca umashca canamanta, llaquichij shitashca canamanta quishpichingami” (Salmo 72:14).

•  “Espadacunataca tacashpami, azadonta rurangacuna. Lanzacunatapish hocestami ruranga. Chai punllapica shuj llajtahuan, caishuj llajtahuan jatun macanacuipish mana tiyangachu. Macanacunata yachanapish mana tiyangachu” (Miqueas 4:3).

Gentecunaca millaita rurajcunataca mana tucuchi tucushcacunachu. Pero Yayitu Diosca chaitami ruranga. Jahua pachapi caj Diospaj Gobiernoca tucui llaquichij armacunata, millaita ruraj gentecunatami tucuchinga. Cai Gobierno imata ashtahuan ruranata yachasha nishpaca “Diospaj Gobiernoca tranquilo causaitami cunga” nishca temata ricui.