JOVENCUNA RURASHCA TAPUICUNA
¿Bibliata liyinaca ima shinataj ayudai tucun? Parte 1: Bibliapi tiyaj valishca yuyaicunata mashcai
15 huatata charij Brianaca: “Bibliata liyinataca ñami callarishcani. Pero achca cashcamantami mana liyishpa tucuchinata manchani” ninmi.
¿Canpish chashnallatajchu yuyangui? Chashna yuyashpaca cai yachaimi canta ayudanga.
¿Bibliata liyinaca imamantataj valishca can?
¿Bibliata liyinataca qꞌuillanayachinguichu? Huaquinpica: “Bibliaca achca paginacunata, uchilla letracunatami charin, dibujocunatapish mana charinchu” nishpachari yuyangui. Bibliata liyinaca televisionta ricunahuan, videojuegocunata ricunahuanca mana igualchu can.
Cashna yuyai: Ñaupa tiempopi tiyaj baulpi valishca tesorota tarishpaca ¿manachu pascashpa ricusha ningui?
Bibliaca chai baúl shinami can. Chaipimi valishca yuyaicunata taringui. Chai yuyaicunaca:
Alli desicioncunata japichun.
Cambaj yaya mamahuan alli apanacuchun.
Alli amigocunata tarichun.
Ama yallitaj preocuparichunmi ayudan.
¿Ñaupa tiempopi quillcashca Bibliaca ayudai tucunchu? Bibliaca Dios “Quillcachishca cashcamantami” ayudai tucun (2 Timoteo 3:16). Chaipi tiyaj consejocunaca Diosmantami shamun.
Bibliaca shuj baúl shinami valishca tesorocunahuan junda can. Chaipimi valishca yuyaicuna tiyan.
Bibliata ima shina liyi tucushcata ricui
Puntapica callarimanta tucuricama liyi. Chashna liyishpaca Bibliapi imallamanta parlashcatami ashtahuan intindingui. Bibliata liyingapajca caita rurai:
Bibliaca 66 librocunatami charin. Genesismanta Apocalipsiscamami ordenpi liyi tucungui.
Bibliataca ñaupa punllacunapi imalla tucushcataca ordenpimi liyi tucungui.
Caita rurai: Jesús cai Allpapi cashpa imallata rurashcata ordenpi yachangapajca Guía para el estudio de la Palabra de Dios nishca folletopi sección 4-A-ta ricui.
Ishquipica shuj problemata charishpaca Bibliapi tiyaj historiacunamantami yachai tucungui. Por ejemplo:
¿Alli amigocunata charisha ninguichu? David y Jonatanpaj causaimantami yachai tucungui (1 Samuel, capítulos 18-20). Qꞌuipaca “Cómo encontrar amigos de verdad” nishca hojata jundachi. Chashnami paicunamanta yachashpaca alli amigocunata charinata yachangui.
¿Juchacunapi ama urmangapajca imata rurana cashcata yachasha ninguichu? José juchapi ama urmangapaj imata rurashcata liyi (Génesis, capítulo 39). Qꞌuipaca “Cómo resistir las tentaciones” y “Acusado falsamente” nishca hojacunata jundachi. Chashnami juchacunamanta caruyangapaj imata rurana cashcata yachangui.
¿Yaya Diosta mañanaca ima shina canta ayudai tucushcata yachasha ninguichu? Yaya Dios Nehemiasta ima shina ayudashcata ricui (Nehemías, capítulo 2). Qꞌuipaca “Jehová contestó su oración” nishca hojata jundachi. Chaipica valishca yuyaicunatami yachangui.
Caita rurai: Bibliata liyishpa alli intindingapajca tranquilo pushtuta mashcai.
Quimsapica Bibliamanta shuj historiata o shuj salmota liyi. Qꞌuipaca canta ima shina ayudashcapi yuyai. Cashna tapuri:
¿Jehová Diosca paipaj Shimipica imamantataj caita quillcachirca?
¿Jehová Dios ima laya cashcamantaca imatataj yachani?
¿Ñuca liyishcaca ima shinataj ñuca causaipi ayudai tucun?
Caita rurai: JW.ORG paginapi “Bibliata liyingapaj programa” nishcata ricui. Chaipica Bibliata ima hora liyi callarigrishcata anotai.