JOVENCUNA RURASHCA TAPUICUNA
¿Bibliata liyinaca ima shinataj ayudai tucun? Parte 2: Cushicushpa Bibliata liyinata yachai
Will shuti jovenca: “Bibliata ima shina liyinata mana yachashcamantami huaquinpica qꞌuillanayachingui” ninmi.
¿Cushicushpa Biblia ima shina liyinata yachasha ninguichu? Cai yachaimi ayudanga.
Bibliata liyicushpaca can chaipi cashcata shina yuyai
Cai huaquin yuyaicunata rurai:
Bibliamanta maijan historiata estudianata agllai. Ñaupa punllacunapi ima tucushcata shuj Evangeliomanta huaquin versocunata liyi o jw.org paginapi Bibliamanta rezashcacuna nishcata uyai.
Bibliapi tiyaj shuj historiata liyi. Canlla cashpa, cambaj familiahuan o amigocunahuan cashpapish sinchitami liyi tucungui. Shujca Bibliapi tiyaj historiatami liyi tucun. Caishujcunaca historia ucupi tiyaj cꞌaricunamanta o huarmicunamantami liyi tucun.
Cai catij yuyaicunatapish rurai:
Bibliamanta liyishca shuj historiataca shuj dibujopi o huaquin dibujocunapi rurai. Callarimanta tucuricama imalla tucushcata dibujai. Cada dibujopi ima tucucushcata escribi.
Importante yuyaicunata escribi. Por ejemplo, Diosta sirvij shuj runamanta liyicushpaca pai imalla rurashcata, paica cꞌuyaj, llaquij, mana utca pꞌiñarij cashcapi yuyashpa escribi. Chaimanta Yaya Dios paita ima shina bendiciashcapipish yuyai.
Historiataca shuj noticiata laya rurai. Historiapi mashna runacuna tiyashcata ricushpa cada uno imallata rurashcata tapuj laya rurai.
Bibliamanta liyishca historiapi Diosta sirvijcuna mana alli decisioncunata japishcamanta llaquipi urmashcataca ama yuyashpa paicuna chai llaquipi ama urmangapajca imata rurana cashcapi yuyai. Por ejemplo, apóstol Pedropi yuyai. Paica Jesustaca mana rijsinichu nircami (Marcos 14:66-72). Shujtajcuna Pedrota juchachicujpica ¿Jesustaca mana rijsinichu ninapaj randica imatataj rurana carca?
Can munashpaca Bibliamanta liyishca shuj historiata cambaj propio shimicunahuan escribi. Chai historiamanta imata yachai tucushcatapish escribi (Romanos 15:4).
Bibliata liyicushpaca chaipi cashcata shina yuyai.
Investigai
Bibliamanta imata liyicushpaca picunallamanta parlacushcata, maipi cashcata, imata rurashcata tucuita ricushpa alli estudiai. Chashnami valishca yuyaicunata taringui. Huaquinpica shuj o ishqui shimillami valishca yuyaita yachachin.
Por ejemplo, Mateo 28:7-taca Marcos 16:7-huan chꞌimbapurai.
¿Marcosca imamantataj discipulocunaman, “Pedromanpish” Jesusca ñallami ricuringa nishpa escribirca?
¿Caita yacharcanguichu?: Jesús paipaj apostolcunaman chashna nicujpica Marcosca mana chaipichu carca. Apóstol Pedromi paimanca huillashca canga.
Valishca yuyai: Jesusca apóstol Pedrotami cutin ricunata munarca. ¿Pedro chaita yachashpaca imamantataj tranquilo sintirirca? (Marcos 14:66-72). ¿Jesusca ima shinataj apóstol Pedropajca shuj alli amigo cashcata ricuchirca? ¿Canpish ima shinataj Jesuspaj ejemplota catishpa shuj alli amigo cai tucungui?
Bibliata liyicushpaca canpish chaipi cashcata shina yuyai. Qꞌuipaca picunallamanta parlacushcata, maipi cashcata, ima shina cashcata tucuita investigai. Chashnami Bibliata ashtahuan liyinata munangui.