CAI MUNDOPICA ACHCA PROBLEMACUNAMI TIYAN

2 | Cambaj cullquita alli utilizai

¿CAITA RURANACA IMAMANTATAJ MINISHTIRISHCA CAN?

Achca gentecunaca cada punllami minishtirishca cosascunata charingapaj sinchita trabajancuna. Cai mundopi ashtahuan problemacuna tiyashcamantami minishtirishca cosascunata charinaca ashtahuan sinchi can. ¿Imamanta?

Problemacuna tiyan lugarcunapica micunapish, arriendocunapish ashtahuan caromi tucun.
Achcacunami trabajo illaj saquirincuna. Cutin trabajota charijcunamanca ashallata pagancuna.
Terremotocuna, acapanacuna, shujtaj llaquicuna tiyajpica achca gentecunami negociocuna illaj, huasicuna illaj, paicuna charishca cosascuna illaj saquirishcacuna. Chaimantami achca gentecunaca probrezapi urmashcacuna.

¿Caitaca yacharcanguichu?

Cullquita alli utilizanata yachashpaca llaquicuna japijpipish chaicunahuan chꞌimbapuranaca jahuallami canga.
Llaquicuna tiyan horaspica sueldocunapish, huaquichishca cullquipish, charishca cosascunapish menosmi valinga.
Cushilla causanata, familiahuan tandalla causanataca cullquihuan mana randi tucunchijchu.

¿Imatataj rurai tucungui?

Bibliapica: “Micunata, churanata charishpaca chaicunallahuan cushilla cashunchij” ninmi (1 Timoteo 6:8).

Cushilla causangapajca mana tucui ñucanchij munashcacunata charinachu canchij. Ashtahuanpish minishtirishcacunata ña charishpaca cushillami causai tucunchij. Mana tanto cullquita charishpaca chaitami yuyarina canchij.

Cushilla causangapajca minishtirishca cosascunallatami randina canchij. Na minishtishca cosascunata o caro cosascunata randinata yachashpaca ashtahuan problemacunatami charishun.

PROBLEMACUNAHUANCA CHꞌIMBAPURAI TUCUNCHIJMI: Huaquin consejocuna

Llaquicuna japijpi cullquita alli utilizasha nishpaca cai consejocunata cati

AMA TANTO GASTAICHU

Ama tanto gastaichu

Mana minishtirishca cosascunapica cullquita ama gastaichu. Cashna tapuri: “¿Shuj carrota charinata minishtinichu? ¿Micuna cosascunata ama tanto randingapaj ñucallataj chaicunata tarpui tucunichu?”.
Imata randigrishpaca cashna tapuri: “¿Caitaca minishtinichu? ¿Pagangapajca cullquita charinichu?”.
Can causashca llajtapi gobierno o shujtaj organizacioncuna ayudacunata cujpica chaicunata utilizai.

“Ñuca familiahuanca imacunallapi cullquita gastacushcata ricurcanchij. Chaimi paseangapaj o shujtaj diversioncunapi ama tanto cullquita gastanata decidircanchij. Shinallataj yanungapajpish micuna cosascunapica ña mana tanto gastarcanchijchu” (Gift).

CULLQUITA IMA SHINA UTILIZANATA ALLI YUYAI

Cullquita ima shina utilizanata alli yuyai

Bibliapica: “Imatapish alli yuyarishpa chai yuyai trabajaj runaca causaipaj charintajmi. Ashtahuanpish yuyarishcahuan ucui jahua imatapish rurajcunaca, ashtahuan huajchayashpami catincuna” ninmi (Proverbios 21:5). Ama tanto gastangapajca imacunallata randigrishcata alli yuyashpa anotai.

Puntapica chai quillapi mashna cullquita ganashcata escribishpa churai.
Qꞌuipaca chai quillapi ima gastocunata charigrishcata escribishpa churai.
Chai jahuaca mashna cullquita ganashcata, mashna gastocunata charishcatapish ricui. Yalli gastacushcata ricushpaca ña mana tanto gastanachu cangui.

“Cada quillapimi mashna ganashcata, mashna gastacushcata anotanchij. Qꞌuipaman imapi gastanapi o ima llaquicuna shamunapi yuyashpami asha cullquita huaquichishpa charinchij. Chashnami, qꞌuipamanca imataj tucushun nishpa mana tanto sustarinchij” (Carlos).

AMA DIBI TUCUNGUI / CULLQUITA HUAQUICHI

Ama dibi tucungui / cullquita huaquichi

Pudishpaca prestamocunata ama rurangui. Ima minishtishcata randingapajca cullquita huaquichi.
Qꞌuipaman chai rato minishtishcata randingapaj cada quilla asha cullquita huaquichishpa churai.

SINCHITA TRABAJAI / TRABAJOTA CUIDAI

Bibliapica: “Tucui yuyaihuan imatapish rurajpica, japinapish tiyanmi” ninmi (Proverbios 14:23).

Sinchita trabajai / trabajota cuidai

Cambaj trabajohuan cushicui. Can munashcapi mana trabajashpapish can charishca trabajitomanta cullquita ganacushcapi yuyai.
Trabajopi canman mingashcacunata tucuita pajtachingapaj esforzari. Chashnami trabajomanta mana llujchishpa cachanga. Pero llujchishpa cachajpipish shujtaj trabajotaca jahuallami tari tucungui.

“Ñuca munashcapi mana trabajashpapish, ñuca munashca shina mana pagajpipish imapipish trabajangapajmi esforzarini. Ñucapajman trabajachun munashca shinami sinchita trabajangapaj, alli trabajashcata ricuchingapaj esforzarini” (Dimitri).

¿Trabajota mashcacunguichu?

Trabajota mashcacushcata huillai. Empresacuna empleadocunata mashcacushcata mana huillajpipish chaiman cayashpa tapui. Cambaj familiaman o amigocunamanpish trabajota mashcacushcata huillai.
Imapipish trabajailla. Huaquinpica can munashca shina trabajotaca mana japinguichu.