¿Manejanatachu saquina cani?

¿Canpish yuyajlla cashcamantachu manejashpa catinata o ña mana manejashpa catinata decidina cangui?

Huaquin llajtacunapica yuyajllacuna cutin tigra licenciata charingapajca ima ungüita mana charinchu nishca doctorpaj certificadotami charina can. Chai llajtapi causaj yuyajlla huauqui panicunaca chai llajtapaj leycunata, policiacuna imalla nishcacunatapishmi cazuncuna (Romanos 13:1). Cambaj llajtapi cai laya leycunata mana charishpapish canllatajmi manejashpa catinata o mana manejashpa catinata alli yuyana cangui.

¿MANEJASHPA CATINA CASHCATA YACHANGAPAJCA IMATATAJ RURANA CANCHIJ?

Instituto Nacional sobre el Envejecimiento nishca organizacionca yuyajllacunataca manejashpa catina cashcata o mana catina cashcata yachangapajca cai tapuicunata rurarichun ninmi:

• ¿Ñanpi tiyaj señalcunataca allichu ricuni?

• ¿Tuta horas manejacushpaca allichu ricuni?

• ¿Carrota manejacushpa espejocunata o shujtaj ladocunata ricungapajca ratochu imata cuyuchi tucuni? ¿Carrohuan callpacushpaca ratochu frenocunata sarui tucuni?

• ¿Allijlla manejacushcamantachu shujtaj carrocuna pasachun mana saquini?

• ¿Achca cutincunachu casi chocashcani? ¿Carrotaca imahuanchu rayashcani? o ¿imapitaj huajtachishcani?

• ¿Mana alli manejacushcamantachu ñucataca policiacuna japishcacuna?

• ¿Carrota manejacushpachu dormirishcani?

• ¿Doctorcuna cachashca jambicunata ubyashcamantachu ña mana alli manejani?

• ¿Ñuca familiacunapish, amigocunapish carrota manejachunca ña manachu munancuna?

Cai tapuicunamanta shujta o ishquita ari nishpa cutichishca cashpaca huaquin cambiocunatami rurana cangui. Por ejemplo, ña mana tantochu manejana cangui. Tutapicarin ña mana manejanachu cangui. Canllatajmi ima shina manejacushcataca alli ricurana cangui. Ima shina manejacushcata yachangapajpish cambaj familiata o cambaj amigocunatami tapuna cangui. Ashtahuan alli manejanata yachangapajpish shuj cursotachari catina cangui. Cutin jahuapi caj tapuicunamanta ishquita o chaita yallita ari nishpa cutichishca cashpaca manejanatami saquina cangui.a

ALLI DECISIONTA JAPINGAPAJCA BIBLIAPAJ CONSEJOCUNATA CATI

Yuyajyashcamantami ña mana joven shinaca manejai tucungui. Chaimantami cambajca ña mana manejashpa catinapi yuyanaca sinchi ricuringa. Shinapish ¿alli decisionta japingapajca Bibliapaj maijan consejocunataj canta ayudai tucun? Bibliapaj ishqui consejocunamanta parlashun.

Ña mana manejai tucushcataca humildadhuanmi reconocina cangui (Proverbios 11:2). Tucuicunami yuyajyashpaca mana alli ricui tucunchij, mana alli uyai tucunchij. Chaquicunatapish, maquicunatapish, umatapish mana rato cuyuchi tucunchij. Chaimantami achca gentecunaca yuyajllacushcamanta lisiarinata manchashpa, angu saltanata manchashpa pelotata pugllanata o shujtaj pugllaicunata saquinata decidishcacuna. Carrota manejaj yuyajllacunapish chaquicunata, maquicunata o umata mana rato cuyuchi tucushcata cuentata cushpami carrota manejanata saquinataca humildadhuan decidishcacuna (Proverbios 22:3). Shujtajcuna ñucanchijmanta preocuparishpa ña mana manejachun nijpica paicuna nishcataca humildadhuanmi uyana canchij (2 Samuel 21:​15-17-tapish ricui).

Accidentecunamanta jarcarishunchij (Deuteronomio 22:8). Yuyajyashcamanta mana alli, mana cuidadohuan manejai tucushpaca cambaj causaita, shujtajcunapaj causaitapishmi llaquipi churai tucungui. O mana cashpaca hasta huañuchi tucunguimi.

Can manejanata saquijpi shujtajcuna canta ña mana respetanapica mana yuyanachu cangui. Ashtahuanpish Jehová Dios canta cꞌuyashcapimi yuyana cangui. Shinallataj humilde, alli yuyaiyuj, shujtajcunamanta preocuparij cashcata ricushpami Jehová Diosca canmanta cushilla sintiringa. Paica canta manataj saquishpami tucuipi ayudasha, cuidasha nin (Isaías 46:4). Chaimantami imata mana manchashpa alli yuyaita cuchun, imatapish alli decidingapaj paipaj espíritu santota cushpa ayudachun mañanalla canchij.