QARANPI KAQ YACHACHIKUY: ¿IMANASQATAQ LLUMPAY ÑAKARIYKUNA KAN? ¿HAYKAPITAQ TUKUNQA?
Inocente runakunam wañunku
Noelle sutiyoq warmachaqa kuyakuqllañam karqa hinaspa dibujaytam gustaq. Payqa wasinpa qepa law pationman lloqsiruspanmi piscinaman qonqayllamanta urmaykuspan wañururqa, tawa watachayoq kananpaq iskay semanallaña faltachkaptin.
Estados Unidos nacionpim Connecticut nisqanku llaqtapi 2012 diciembre 14 punchawninpi huk escuelapi 26 warmachakunata wañurachirqaku, wakinpa sutinmi karqa Charlotte, Daniel, Olivia, Josephine . . . Chay warmachakunaqa karqaku soqta watachayoq wakinñataq qanchis watachayoq. Pampasqanku punchawmi presidente Barack Obama chay warmachakunapa sutinta leespan llakisqallaña uyariqninkunaman nirqa: “Kayna desgraciakunaqa tukunanñam”, nispa.
Irak nacionmantam 18 watayoq Bano sutiyoq sipas familianpiwan Noruega nacionman 1996 ripukurqaku, chay sipastam amistadninkuna suticharqaku Sol nispa. Ichaqa llakikuypaqmi 2011 julio 22 punchawpi hukkunata mana kuyapayaq runa Banotaqa wañurachirqa 77 runakunatawan kuskata, chay runam burlakuspan nirqa: “Pampachaykuwaychik [. . .] astawanraq mana wañuchisqaymanta”, nispa.
Chayna llakikuypaq noticiakunamantam enteron pachapi uyarikun. Chaymantapas Allpantinpim achka runakuna llumpayta ñakarinku accidentekuna, wañuchinakuykuna otaq guerrakuna chaynataq hatun desgraciakuna kasqanwan, inocente runakuna qonqayllamanta wañuptinkuqa, ¡mayna llakikuypaqmi!
Chayna desgraciakuna kaptinmi wakinqa Diosman tumpaspanku piensanku payqa runakunapi mana reparasqanmanta. Wakinñataqmi piensanku ñakarisqanchikta qawaspanpas mana yanapawasqanchikmanta. Hukkunañataqmi piensanku ima desgraciapas pasananpaqqa destinasqaña kasqanmanta. Runakunaqa tukuy imaynanpatam rimanku. ¿Imataq yanapawachwan chaykunamanta allinta yachanapaq? Qatiqnin yachachikuykunapim Jehova Diospa Palabranwan yachasun imanasqa ñakariykuna kasqanmanta chaynataq imayna chinkachisqa kananmantapas.