Amayá atipachikuychu manchakusqaykiwanqa
1. ¿Imanasqataq wakinkuqa Bibliamanta estudio qallariyta sasachakunku?
1 ¿Sasachakunkichu Bibliamanta estudio qallariyta mana allin yachachiq kasqaykita piensaspayki? Ñawpaq tiempopi Diospa serviqninkunamanta Moiseswan Jeremiaspas piensarqakum Diospa munaynin mana ruray atisqankuta (Ex. 3:10, 11; 4:10; Jer. 1:4-6). Ñoqanchikpas wakinpiqa chaynam tarikuchwan. ¿Imatam rurachwan?
2. ¿Imanasqam wasin-wasin purinallamantaqa kallpanchakunanchik Bibliamanta estudiota qallarinapaq?
2 Yuyarisun, Jehová Diosqa manam mañawanchikchu mana ruray atisqanchiktaqa (Sal. 103:14). Hinaptinqa, runakunaman Bibliamanta willakunapaq hinaspa yachachinapaq kamachiwaspanchikqa, payqa yachanmi chay ruray atisqanchikta (Mat. 28:19, 20). Kay llamkaytaqa Diosqa manamá ancha yachayniyoq otaq imatapas ruray atiq runakuna ruranankupaqchu saqerqa (1 Cor. 1:26, 27). Chaynaqa, wasin-wasin purinallamantaqa kallpanchakunanchikmi kikinchik Bibliamanta estudiota qallarinapaq.
3. ¿Imaynatam Jehová Diosqa yachachiwanchik Bibliamanta estudiota qallarinapaq?
3 Jehová Diosmi yachachiwanchik. Jehová Diosqa yachachiwanchikmi runakunata imayna yachachinapaq (2 Cor. 3:5). Payqa llaqtanwanmi cheqap yachachikuykunata reqsichiwarqanchik, chay yachachikuytaqa manamá kay Pachapi yachayniyoq runakunaqa yachankuchu (1 Cor. 2:7, 8). Bibliapiqa qawanchiktaqmi Jesucristopa imaymana yachachisqankunatapas. Sapa kutitaqmi congregacionkunapi yachachisqa kanchik. Chaymantapas, kapuwanchikmi Bibliamanta qellqanchikkunapas. Rimarisun Yachachiq qellqanchikmanta, kay qellqanchikqa Bibliapa cheqap yachachikuyninkunatam chaylla entiendenapaq hina yachachiwanchik. Hinaptinqa, ¡Bibliamanta estudiota qallariyqa manamá sasachu!
4. ¿Imanasqam mana iskayrayanachu Jehová Dios yanapawananchikmanta?
4 Jehová Diospa yanapakuyninwanmi Moiseswan Jeremiaspas Diospa kamachisqanta rurayta atirqaku (Ex. 4:11, 12; Jer. 1:7, 8). Chaynaqa, Diostayá yanapawananchikpaq mañakusun. Ama iskayrayasunchu yanapawananchikmantaqa, pitapas Bibliamanta estudiota qospaqa paypa munasqantam rurachkanchik. Arí, paymanta cheqap yachachikuykunatam yachachichkanchik (1 Juan 3:22). Hinaptinqa, kallpanchakusunyá Bibliamanta estudiota qallarinapaq. Chaynata ruraspaqa achka kusikuytawan bendicionkunatam tarisunchik.