Mana igualla kaq mellizokunamanta

ISKAYNIN mellizokuna dibujopi rikusqaykiqa manam igualchu, ¿aw? ¿Yachankichu sutinkuta? Flecha hapiqpa sutinmi Esau, oveja michiqpa sutinñataqmi Jacob.

Esauwan Jacobqa mellizokunam karqa Isaacpawan Rebecapa wawa-churinku. Isaacmi llumpayta kuyarqa churin Esauta familian mikunanpaq animalkunata aychapaq hapiq kasqanrayku. Rebecam ichaqa Jacobta kuyarqa hawkalla hinaspa llampu sonqo kasqanmanta.

Abuelonku Abrahamqa kawsakuchkarqaraqmi, chaynaqa musyarichwanmi Jacobqa anchatam munarqa uyariyta Jehová Diosmanta abuelon rimaptin. Abrahamqa 175 watata kawsaruspanmi wañukurqa, mellizokuna 15 watankupi kachkaptinku.

Esaumi 40 watayoq kachkaspam casarakurqa Canaan lawmanta iskay warmikunawan. Chay warmikuna Jehová Diosta mana yupaychaptinku Isaacwan Rebecaqa llakikurqaku.

Huk punchawmi Esauqa wawqen Jacobpaq llumpayta piñakururqa. Isaacpaqmi tiempo chayaramurqa mayor churinta bendecinanpaq. Esauqa Jacobmanta mayor kasqanraykum bendecisqa kayta munarqa. Ichaqa wawqen Jacobman qoykusqaña bendicionta chaskinanpaq derechonta. Iskaynin mozokuna naceruptinmi Jehová Diosqa nirqa: Jacobmi bendecisqa kanqa, nispa. Hinaptinmi chayna pasarqa. Isaacqa churin Jacobtam bendeciykurqa.

Esaumi chayta yacharuspa Jacobpaq piñakururqa. Llumpayta Jacobta cheqniruspanmi wañurachisaqmi nispa rimarqa. Chayta Rebeca yacharuspanmi llumpayta llakikurqa. Chaymi qosan Isaacta nirqa: ‘Imaynaraq kanqa viday sichu Jacobpas Canaan llaqtayoq warmiwan casarakuruptinqa’ nispa.

Chaymi Isaacqa churin Jacobta qayaspa nirqa: ‘Amam Canaan warmiwanqa casarakunkichu. Haran lawtayá riy abueloyki Betuelpa wasinman. Hinaspayá Labanpa huknin warmi churinwan casarakamuy’ nispa.

Jacobqa taytantam kasukurqa hinaspam illayta qallarirqa ayllunkunapa kasqan Haran llaqtaman.