Jacob bendecisqa kasqanmanta

Abrahanpa churin Isaacmi 40 watanpi Rebecawan casarakurqa. Paykunaqa anchatam kuyanakurqaku, chaymantapas Rebecaqa mellizotam wachakururqa.

Piwi kaqpa sutinmi karqa Esau, sullkapañataqmi karqa Jacob. Esauqa kaypi-chaypi purispanmi animalkunata hapimuq, Jacobñataqmi wasipi yanapakuq.

Chay tiempopiqa piwi kaqmi taytan wañukuptin achka chakrayuq hinaspa achka qullqiyuq qipaq. Chaymantapas piwi kaqwanmi Jehova Diosqa Abrahanman nisqanta ruwanan karqa, tukuy chaytam niqku “herencia” nispa. Chayna kaptinpas Esauqa Abrahanman Diospa prometesqantam mana kaqpaq hapirqa. Jacobmi ichaqa allinpaq hapirqa.

Huk kutipim Esauqa tukuy punchaw animal hapimusqanmanta llumpay pisipasqa kutiramurqa, hinaspam Jacobpa miskillaña yanukusqanta musyaruspan nirqa: “¡Wañuruchkaniñam yarqaymanta! ¡Puka mikuynikita qaraykamuway!”, nispa. Jacobñataqmi nirqa: “Puntataraq piwi kaynikita quykuway”, nispan. Esaumi nirqa: “¿Imapaqtaq valen piwi kasqayqa? Munaptikiqa qampaqyá kachun”, nispa. Chaynata nispanmi Esauqa mikuyraykulla piwi kasqanta wischupakurqa.

Isaacqa machuyaruspanmi piwi churin Esauta bendecinan karqa, Rebecam ichaqa Jacobta yanaparqa bendecisqa kananpaq. Chayta yacharuspanmi Esauqa llumpayta piñakuruspan wawqinta wañuchiyta munarqa, chaymi Isaacwan Rebecaqa Jacobta nirqaku: “Ayqikuy tioyki Labanpa wasinman. Chaypiyá kamuy wawqikipa piñakuynin pasanankama”, nispa. Labanqa karqa Rebecapa turinmi. Jacobqa tayta-mamanta kasukuspanmi ayqikurqa.