Achkallay-achkaman Jesus mikuchisqanmanta

32 watapi pascua fiesta manaraq kachkaptinmi Jesuspa apostolninkunaqa willakamusqankumanta pisipasqallaña kutiramurqaku. Chaymi Jesusqa samarinankupaq botewan pusarqa Betsaida sutiyuq llaqtaman, ichaqa chayaykuchkaspankum achkallaña runakunata rikururqaku. Chay runakunaqa mayman risqanta yacharuspankum qatirusqaku. Jesusqa apostolninkunallawanmi samariyta munarqa, chaywanpas llakipayasqanraykum chay runakunataqa yaqa tukuy punchaw Diospa gobiernonmanta yachachirqa, sanoyachirqataqmi unquqkunatapas. Tutaykuchkaptinñam apostolninkuna nirqaku: “Yarqaymantachá kachkanku. Niykuyá kutikuspanku imallatapas mikumunankupaq”, nispa.

Jesusmi ichaqa nirqa: “¿Imapaqraqtaq rinqaku? Qamkunayá imallatapas mikuykachiychik”, nispa. Apostolninkunañataqmi piensarqaku tantata rantimunankumanta, chaymi apostolnin Felipe nirqa: “Achkata rantimuptiykupas manachá kaynaña runamanqa haypanmanchu”, nispa.

Hinaptinmi Jesus tapurqa: “¿Kachkanchu imallapas?”, nispa. Andresñataqmi nirqa: “Pichqa tantawan iskay challwallam kachkan, manam kaynaña runamanqa haypachichwanchu”, nispa. Kaqmantam Jesus nirqa: “Chay tantatawan challwata apamuwaychik”, nispa. Hinaspam chaypi kaq lliw runakunata pichqa chunkatakama hinaspa pachaktakama rakinaruspan tiyaykachirqa. Chaymantam tantatawan challwata hapiykuspan hanaq pachata qawarispan taytanta mañakuykurqa, chaymantañataqmi apostolninkunaman qurqa runakunaman aypunankupaq. Paykunaqa 5.000 masnin runakunamanmi aypurqaku saksanankukama mikunankupaq. Puchuqtapas 12 canastataraqmi huñururqaku mana usunanpaq. ¡Jesusqa Diospa yanapakuyninwanmi runakunaman mikuchirqa!

Runakunaqa Jesuspa chayna ruwasqanta qawaykuspankum kamachiqninku kananta munarqaku. Jehova Diosmi ichaqa manaraq munarqachu kamachiq kananta, chaymi Jesusqa chay runakunata aviaruspan apostolninkunata nirqa botewan Galilea lamar quchanta chimpanankupaq. Payñataqmi taytanwan rimananpaq sapallan urquman rirqa. Jesusqa achka ruwayniyuq kaspanpas tiempochakuqmi taytanta mañakunanpaq.