Lazarota Jesus kawsarichisqanmanta

Lazaro sutiyuq runam panin Mariawan hinaspa panin Martawan Betania llaqtapi yacharqa. Paykunaqa Jesuspa ancha kuyasqan amistadninkunam karqaku. Huk punchawmi Martawan Mariaqa Jesusman Jordan mayupa waklawninpi kachkaptin kaynata willachirqaku: “Ama hina kaspa hamuy. Lazarom llumpayta unquchkan”, nispa. Jesusmi ichaqa mana chayllachu rirqa. Iskay punchawña pasaruptinmi apostolninkunata nirqa: “Hakuchik Betania llaqtaman. Lazaroqa puñuchkanmi, ichaqa rikchachimuqmi risaq”, nispa. Apostolninkunañataqmi nirqaku: “Puñuylla-puñuspanqa allinyanqachiki”, nispa. Chaymi Jesusqa entiendenankupaq nirqa: “Lazaroqa wañukunmi”, nispa.

Betania llaqtaman Jesus chayaruptinqa tawa punchawñam Lazaropa pampakusqanqa karqa. Achka runakunapas Martapatawan Mariapa sunqunku tiyaykachiqmi rirqaku. Jesus chayaykuptinmi Martaqa chaylla kallpaspan nirqa: “Señor, kaypi kaptikiqa manam turiyqa wañukunmanchu karqa”, nispa. Jesusñataqmi nirqa: “Turikiqa kawsarimunqam”, nispa. Martañataqmi nirqa: “Ñuqaqa yachanim wañuqkuna kawsarimuptin paypas kawsarimunanta”, nispa. Hinaptinmi Jesusñataq nirqa: “Ñuqam kani kawsarichiqpas hinaspa kawsakuy quqpas”, nispa.

Chaymantam Martaqa ñañan Mariaman Jesus chayaramusqanmanta willananpaq rirqa. Mariañataqmi kallpaspan Jesuspa kasqanman chayaruspa pampaman kumuykurqa, hinaspam llumpayta waqaspan nirqa: “Señor, kaypi kaptikiqa manam turiykuqa wañukunmanchu karqa”, nispa. Jesusqa llumpay llakisqata qawaykuspam paypas waqakururqa. Mariata qatiq runakunapas Jesuspa waqasqanta qawaspankum nirqaku: “Llumpaytam Jesusqa Lazarota kuyasqa”, nispa. Wakinmi ichaqa nirqaku: “¿Imanasqataq amistadnintaqa mana hampiykurqachu?”, nispa.

Chaymantam Jesusqa Lazaropa pampakusqanman rirqa, chay sepulturaqa karqa rumiwan tapasqa punkuyuq machaymi. Chaymi nirqa: “Wak rumita asuchiychik”, nispa. Martañataqmi nirqa: “Asnarirunñach, ñam tawa punchawniyuqña”, nispa. Chaywanpas rumitam asuchirqaku, hinaptinmi Jesusqa taytanta mañakuykurqa: “Taytáy uyariykuwasqaykimantam agradecekuyki. Ñuqaqa yachanim qamqa haykapipas uyariwasqaykita. Ichaqa kunanmi qam kachamuwasqaykita kaypi kaq runakuna yachanankupaq paykuna uyarichkaptin mañakamuchkayki”, nispa. Hinaspam qaparispan nirqa: “¡Lazaro, lluqsimuy!”, nispa. Hinaptinmi Lazaroqa yuraq telawan wankusqa lluqsiramurqa. Jesusñataqmi nirqa: “Purinanpaq paskaychik”, nispa.

Chayta qawaykuspam achka runakuna Jesuspi iñikurqaku, wakinkuñataqmi fariseokunaman willaq rirqaku. Chay punchawmantapacham fariseokunaqa tantianakurqaku Jesustawan Lazarota wañuchinankupaq. Chaymantapas Jesuspa apostolnin Judas Iscariotem upallalla fariseokunaman rispa nirqa: “¿Imatataq quwankichik qamkunaman entregaykuptiyqa?”, nispa. Hinaptinmi 30 qullqita qunankupaq nirqaku. Chaymantapacham tantiarurqa paykunaman haykapi entregaykuyta.