¿Imanasqataq Jesusqa Lazarota mana chayllachu sanoyachirqa?

JESUSMI Jordan mayupa chimpanpi kachkaspan mana allin noticiakunata uyarirqa: Amistadnin Lazarom llumpayta onqochkan. Chayta Jesus uyarispanqa Betania llaqtamantaqa karu-karupim kachkan, Betania lawpimá Lazaroqa panin Martawan hinaspa Mariawan yachanku. Chaywanpas, paykunaqa Jesusmanmi willachimurqaku, karupi kaspanpas turinku Lazarota sanoyachinanta piensaspanku. Jesusqa ñamá huk runatapas sanoyachirqaña (Mateo 8:5-13; Juan 11:1-3).

Ichaqa Jesusqa manamá imatapas ruranchu amistadnin Lazarota chaylla sanoyachinanpaqqa. Bibliaqa ninmi, “iskay punchawtawanraq” qepasqanta (Juan 11:6). ¿Yachayta munawaqchu imanasqam Jesus mana chayllachu sanoyachirqa?a . . . Qawasunchik imatawanraqmi chaymanta rurarqa.

Willasqankumanta iskay punchaw pasaruptinqa, Jesusqa yachanñam Lazaro wañukusqanta, hinaspam apostolninkunata nin: “Hakuchik kutisun Judea lawman”, nispa. Admirakuspankum apostolninkuna nirqaku: “Qayninpallataq chay judiokunaqa rumiwan wañuchiyta munasurqanki ¿chaychu kutiytaraq munachkanki[?]”, nispa. Jesusñataqmi nin: “Amistadninchik Lazaroqa puñuchkanmi, hakuchikyá rikchachimunaypaq”, nispa.

Paykunañataqmi ninku: “Señorllayku, puñuruspaqa sanoyanqachá”, nispa. Hinaptinmi Jesusñataq nin: “Lazaroqa wañukunñam”, nispa. Mana entiendenankupaq hinam kaynataraq nin: “Qamkunaraykum kusikuni mana chaypi kasqaymanta [. . .]. Hakuchikyá payman”, nispa.

Apostol Tomasmi wakiqninta nin: “Rispayá ñoqanchikpas yachachikuqwan wañumusunchik”, nispa. Yacharqakum Jesuspa enemigonkuna paykunatawan kaqlla wañuchiy munanankuta. Chayna kaptinpas kuskankum rirqaku. Iskay punchaw purisqankumantam Lazaropa yachasqan llaqtaman chayarunku, chayqa karqa Jerusalenmanta 3 kilometropim (Juan 11:7-18).

¿Yachankichu imanasqam Jesusqa mana chayllachu rirqa?... Qaway, Jesusqa ñam achka runakunataña ñawpaqpi kawsarichirqa, ichaqa manam unay tiempochu pasarqa kawsarichinanpaqqa (Lucas 7:11-17, 22; 8:49-56). Jesus chayaruptinmi ichaqa Lazaroqa 4 punchawña pampasqa kachkarqa. Chaymi mana pipas ninmanchu karqa Lazaro mana wañusqantaqa.

Martam Jesuspa hamusqanta yacharuspan kallpaylla taripaq rin, hinaspam nin: “Señorlláy, qam kaypi kaptikiqa turillayqa manachá wañunmanchu karqa”, nispa. Jesusmi hawkayachin kaynata nispan: “Turikiqa kawsarimunqam”, nispa. Marta wasinman kutispanmi, Mariata sapallanpi nin: “Yachachikuqqa kaypiñam kachkan, qayasuchkankim”, nispa.

Vecinonkunawan amistadninkunam Mariapa lloqsisqanta qawanku, hinaspam turinpa pampakusqan lawman risqanta piensaspanku qatinku. Mariam ichaqa Jesuswan tupananpaq rin. Mariawan riqmasinkuna waqasqankuta Jesus qawaspanmi, paypas waqarqa. Hinaspanmi llapallanku sepulturaman asuykunku, punkunmi hatun rumiwan tapasqa karqa, Jesusñataqmi nin: “Horqoychik chay rumita”, nispa. Martañataqmi nin: “Señorlláy, ñachá asnarichkanña, tawa punchawñam wañukusqanqa”, nispa.

Runakunañataqmi kasukuspanku rumita asuchinku. Hinaptinmi Jesusqa Diosman orakun, hinaspam agradecekun Lazarota kawsarichinanpaq atiy qonanpaq. Chaymi kallpawan qaparispan nin: “¡Lazaro, lloqsimuy!”, nispa. Hinaptin ¿imataq pasan? Lazarom sepulturamanta lloqsiramurqa. “Makin-chakin watasqa hinaspa uyanpas telawan wankusqa” kaptinmi Jesus nin: “Purinanpaq paskaychik”, nispa (Juan 11:19-44).

¿Entiendenkichu imanasqataq Jesusqa amistadnin yanapaq mana chayllachu rirqa?... Chayta ruraspanmi astawan Jehová Diospa atiyninta qawachirqa. Arí, Jesusqa yacharqamá haykapim chay ruray allin kasqanta, chaymi achka runakuna iñirqaku (Juan 11:45). Qampas, ¿qatipakuwaqchu Jesuspa kayna rurasqanta? . . .

Arí, qamqa manamá pitapas atiwaqchu kawsarichiytaqa. Ichaqa Jesus hinam Jehová Diospa rurasqankunamanta haykapi willayta yachawaq. Yaqapaschá estudiaqmasikiman otaq profesornikimanpas willayta atiwaq. Atiwaqmi escuelaykipipas Jehová Diospa Gobiernon runakunapaq ima rurananmanta willayta. Chaynatam hukkunata yanapanki Jehová Diosta reqsinankupaq, payqa atinmi hinaspa munanmi wañukuq ayllunchikkuna kawsarichiyta.