Jehova Diospa llaqtanpi punta apaqkunapa cartan

Kuyasqayku wawqi-panillaykuna:

Jehova Diosta yupaychaqkunaqa bibliatam anchata kuyanchik. Bibliallam imam kaqta willawanchik, hinaspapas ­allinninchikpaqmi yachachiwanchik, chaypitaqmi yachanchik Jehova Dios kuyawasqanchikmanta (Salmos 119:105; Lucas 1:3; 1 Juan 4:19). Munanchikmi runamasinchikkunapas bibliapi kaq sumaq yachachikuykunata riqsinankuta. Chaymi kusikuywan quykiku kay: Bibliamanta yachanaykipaq qillqata. Willasqaykikuyá kay qillqa imayna ruwasqa kasqanmanta.

Kay qillqaqa warmakunapaqmi ruwasqa kachkan. Yuyayniyuqkunatapas yanapanqam bibliamanta astawan yachanankupaq. Bibliaqa llapanchikpaqmi qillqasqa kachkan, chayraykum kay qillqapas bibliamanta yachachisqanrayku kusisqa kawsakunapaq yanapawasun.

Kay qillqaqa Diospa unanchasqanmantapacha runakunawan imakuna pasasqanmantam willawasun. Chay willakuykunamanta mana sasachakuspalla entiendenapaq ruwasqam kachkan, hinaspapas imakuna pasakusqanman hinam qatinasllanpi qillqasqa kachkan.

Sumaq dibujonkunam yanapawasun sapa yachachikuyninpi willawasqanchik runakuna imayna tarikusqankumanta allinta entiendenapaq.

Willawasuntaqmi Jehova Diosta kasukuq hinaspa mana kasukuq runakunamantapas. Paykunamantam yachasun imata ruwanapaq hinaspa imata mana ruwanapaqpas (Romanos 15:4; 1 Corintios 10:6). Kay qillqaqa chunka tawayuqpim rakinasqa kachkan. Sapa rakiyninpa qallariyninpim imakuna yachananchikmanta willakuykuna kachkan.

Warmaykikuna kaptinqa paykunawan kuskam sapa yachachikuyta leeruspa dibujonkunamanta rimariwaqchik. Leewaqchiktaqmi chaypi rikuriq bibliapa lliw textonkunatapas. Warmaykita yanapay bibliapa yachachisqankuna kay qillqapa willakusqankunawan imayna tupasqanta entiendenanpaq. Chaynata ruwaspaykim yuyayniyuqkunatapas yanapawaq.

Munanikum kay qillqa allin sunquyuq runakunata yanapananta, chaynapi Diosman asuykunankupaq, Diospa palabranmanta yachanankupaq hinaspa yachasqankuman hina kawsakunankupaqpas. Chaynata ruwaspam paykunapas Jehova Diosta yupaychanqaku, hinaspam llaqtanpi kanqaku.