Yachachinapaq allinta preparakusun
1. ¿Imanasqataq Biblia estudiaqta yanapananchik cheqap yachasqankunata kuyananpaq?
1 Bibliamanta estudiota qonapaqqa allintam preparakunanchik, estudiachisqanchik runa, Jehová Diosta servinanta munaspaqa. Chaypaqqa yanapananchikmi cheqap yachasqankunata kuyananpaq, chaymi kallpanchanqa Diosta servinanpaq (Deu. 6:5; Pro. 4:23; 1 Cor. 9:26). ¿Imaynatam chayta rurachwan?
2. ¿Imaynatam preparakunapaq Diosta mañakuyninchik yanapawachwan?
2 Jehová Diosta mañakuspa preparakuy: Jehová Diosmi runapa sonqonpi cheqap yachachikuytaqa wiñachin, chaymi preparakunanchik Biblia estudiaq iñiyninpi ñawparinanpaq kaqkunamanta Diosta mañakuspa (1 Cor. 3:6; Sant. 1:5). Chayna rurasqanchikqa yanapawasuntaqmi Diosmanta cheqap yachachikuykunata estudiaqpa sonqonman imayna churanapaqpas (Col. 1:9, 10).
3. ¿Imaynatam yanapawasun preparakuspa estudiaqpi piensasqanchikqa?
3 Biblia estudiaqpi piensay: Allinta yachachinapaqqa uyariwaqninchikkunapim piensana, chaynatam Jesuspas rurarqa. Paytam kaqlla tapukuyta iskay kutipi rurarqaku: “¿imata ruraspaytaq wiñay kawsayta haypayman?”, nispa. Jesusñataqmi sapakama runaman imayna kasqankuman hina kutichirqa (Luc. 10:25-28; 18:18-20). Kaymi yachachiwanchik preparakuspaqa estudiaqpi piensanapaq. Chaymi tapukuchwan: ¿Mayqan rikuriq textokunatataq leeyman? ¿Haykatataq yachachiyman? ¿Mayqan yachachikuykunataq entiendenanpaq sasa kanman?, nispa. Estudiaq imakuna tapuwananchikmanta piensaspaqa, allintachá preparakusun kutichinapaq.
4. ¿Imaynatam allinta preparakuchwan?
4 Yachachinaykita estudiay: Estudiachisqanchik qellqata achka kutitaña estudiaruptinchikpas, Biblia estudiaqqa chayllaraqmi estudiachkan. Yachachisqanchikwan sonqonman chayayta munaspaqa, manam estudiaqllatachu ninanchik preparakunanpaqqa, kikinchikraqmi puntataqa allinta preparakunanchik, textokunatapas maskananchik, chaykunataqa rurananchikmi estudiaqpi piensaspa chaynataq imam yachananta marcaspapas (Rom. 2:21, 22).
5. ¿Imaynatam Jehová Diosta qatipakuchwan?
5 Jehová Diosqa munanmi Biblia estudiaq ñawparinanta (2 Ped. 3:9). Ñoqanchikpas sapa estudiachinapaq allinta preparakuspaqa, Jehová Dios hinam ñawparinanta munachkanchik.