¿Imaynatataq yanapakuchwan llumpay wayra-para kaptin?

Tiempopa risqanman hinam aswan wayra-para kan utaq ima sasachakuypas. Ima sasachakuypas pasaruptinqa chaypi iñiqmasinchikkunata yanapaqkunaqa listo hinaspa sumaq organizasqam kanku. Chaypaqmi Diospa llaqtanpi punta apaqkuna enteron pachapi betel wasikunapi encargakuqkunata nirqa sasachakuypi yanapakuqkunamanta cuentallikuqkuna kananpaq.

Yanapakuypi encargakuq iñiqmasinchikkuna ima sasachakuymantapas yacharuspankuqa, chay sasachakuy kasqan lawpi punta apaqkunatam qayanku, chaynapi ima necesitasqankuta yachanankupaq. Imapas nisyu karusqanrayku chaypi yachaq iñiqmasinchikkuna mana yanapanakuyta atiptinqa, betel wasipi encargakuq iñiqmasinchikkunam akllan huk iñiqmasinchikkunata chaypi yanapamunankupaq. Cuentallikuq iñiqmasinchikkunaqa yaqapaschá mañakunmanku wakin iñiqmasinchikkuna chaypi yanapakunankupaq utaq imata qunankupaqpas, utaqmi paykuna rantinmanku chaypi necesitasqankuta hinaspa qunmanku.

Sasachakuypi tarikuq iñiqmasinchikkunata yanapanapaqqa allintam tantiananchik. Manachayqa yanqach imatapas ruwachwan, chaypaq kaq qullqitapas yanqacharuchwanmi, chaykunaqa pasakunman imatapas kikinchikpa munasqanchikman hina yanapanapaq tantiaruptinchikmi.

Betel wasimanta akllasqanku iñiqmasinchikkunam tantianku hayka qullqita necesitasqankuta chaynataq hayka yanapakuqkunata necesitasqankutapas. Paykunaqa rimanankutaqmi chay lawpi autoridadkunawanpas, chaynapi chay autoridadkuna imallawanpas yanapaykunankupaq. Chaynaqa amayá mana nisuchkaptikichikqa qullqitaqa huñuychikchu, ima kawsaytapas huñuychikchu nitaq chaylawmanpas viajaychikchu.

Arí, anchatam kuyanchik iñiqmasinchikkunataqa, chaymi ima sasachakuypipas tarikuptinkuqa tukuyta ruwanchik paykunata yanapaykunanchikpaq (Heb 13:16). Hinaptinqa, ¿imaynatam paykunata yanapachwan? Paykunapaqmi Jehova Diosta mañakunanchik, chaynataq paykunata yanapaqkunapaqpas. Qullqichanchikwanpas yanapachwanmi, chaypaqqa huñunakunanchik wasipim obra mundial nisqan cajachaman qullqichanchikta churachwan. Sapa betel wasipi encargakuq iñiqmasinchikkunam Diospa llaqtanpi punta apaqkunawan sumaq yanapasqa kanku, chaymi yachanku maypi, imaynata qullqita servichikuytapas. Chay sasachakuypi kaq iñiqmasinchikkunata yanapayta munaspaqa Solicitud de voluntario local de diseño y construcción (DC-50) nisqantam huntachinayki.

BRASILPI LLUMPA-LLUMPAY PARAWAN SASACHAKUSQANKU SUTIYUQ VIDEOTA QAWARUSPA, KAY TAPUKUYMANTA RIMARIY:

¿Ima niwaqtaq Brasil nacionpi llumpay wayra-para karuptin Jehova Diospa testigonkuna yanapakusqankumanta?