Astawan yachay munaqkunapaq
¿Pikunataq kanku 1 Timoteo 5:21 nisqanpi ‘akllasqa angelkunaqa’?
Apostol Pablom punta apaqmasin Timoteoman kaynata qillqarqa: ‘Ñuqam Diospa qayllanpi, señor Jesucristopa qayllanpi hinaspa akllasqa angelkunapa qayllanpi kamachiki kay kamachikuykunata kasukunaykipaq, [ . . . ] ruwanaykiqa allinta yachaykuspam chaynataq pimanpas mana sayapakuspam’, nispa (1 Tim. 5:21). ¿Pikunataq kanku chay ‘akllasqa angelkunaqa’?
Puntata yachaykusun chay angelkuna pikuna mana kasqanmanta. Pabloqa manam 144.000 hanaq pachapaq akllasqakunamantachu rimachkarqa. Timoteoman qillqasqan tiempopiqa manaraqmi paykunaqa kawsarichisqachu karqaku hanaq pachapi kawsakunankupaqqa. Arí, apostolkunapas chaynataq wakin hanaq pachapaq akllasqakunapas manaraqmi angel hina espirituchu karqaku. Chaynaqa, manamá paykunachu kanku Pablopa rimasqan ‘akllasqa angelkunaqa’ (1 Cor. 15:50-54; 1 Tes. 4:13-17; 1 Juan 3:2).
Chay angelkunaqa manataqmi Noeypa tiemponpi mana kasukuq angelkunachu. Chay angelkunaqa satanasman hukllawakuykuspankum demonioña chaynataq Jesuspa enemigonkunaña rikurirurqaku (Gen. 6:2; Luc. 8:30, 31; 2 Ped. 2:4). Chay angelkunatam hamuq tiempopi Jesusqa 1.000 watapuni ukullay-uku uchkupi presocharunqa. Chaymantañataqmi satanastawan kuskata wiñaypaq chinkachinqa (Jud. 6; Apoc. 20:1-3, 10).
1 Timoteo 5:21 nisqanpi chay ‘akllasqa angelkunamanta’ rimaspanqa nichkantaqmi Diosmantapas chaynataq Jesucristomantapas. Chaymi nichwan chay angelkunaqa hanaq pachapi kaspanku Diospa hinaspa Jesucristopa kamachisqanta ruwasqankuta.
Diosman sunqu angelkunaqa wara-waranqantinmi kachkan (Heb. 12:22, 23). Yaqachusmi angelkunamanqa sapakamaman Dios nin imapi yanapakunanpaq (Apoc. 14:17, 18). Huk kutipi kamachiptinmi chullalla angel 185.000 Asiria soldadokunata wañurachirqa (2 Rey. 19:35). Chaymantapas, Jesuspa nisqanman hinaqa yaqachusmi wakin angelkuna “Diospa gobiernonpi huchallichiqkunatawan mana allin ruwaqkunata qarqunqa” (Mat. 13:39-41). Huk angelkunataqchusmi “akllasqakunata huñunqaku” hanaq pachapiña kanankupaq (Mat. 24:31). Wakin angelkunañataqmi kamachisqa kachkanku maymanña-chaymanña riptinchikpas waqaychawananchikpaq, chaytam nin Salmos 91:11 (Mat. 18:10; tupachiytaq Mateo 4:11 hinaspa Lucas 22:43).
Chaynaqa, 1 Timoteo 5:21 nisqanpi ‘akllasqa angelkunaqa’ yaqachusmi churasqa karqaku iñiqkunata imapipas yanapanankupaq. Chay capitulopim Pabloqa punta apaqkunamanta rimachkarqa chaynataq iñiqkunatapas consejachkarqa punta apaqkunata respetanankupaq. Punta apaqkunatam rimapayarqa congregacionpi imapas ruwayninkuta ‘allinta yachaykuspa chaynataq pimanpas mana sayapakuspa’ ruwanankupaq, rimapayarqataqmi ama chayllaqa imatapas tantianankupaq. ¿Imanasqam Pablopa nisqanta kasukunanku karqa? ‘Diospa, señor Jesucristopa hinaspa akllasqa angelkunapa qayllanpi’ iñiqmasinkuta servisqankuraykum. Chaywanmi Pabloqa nichkarqa Diospas, Jesuspas chaynataq ‘akllasqa angelkunapas’ congregacionta punta apaqkunapa imayna yanapasqankuta qawamusqanta. Pablopa chayna nisqanwanmi yachanchik wakin angelkuna congregacionpi iñiqkunata yanapanankupaq churasqa kasqankuta. Paykunapa llamkayninmi iñiqkunata waqaychay hinaspa Diosmanta willakusqanchikta qaway. Paykunataqmi iñiqkuna ukupi imapas kaptinqa Jehova Diosman willanku (Mat. 18:10; Apoc. 14:6).