21 SAMUEL
Juj waynachan Diospa nisqanta mana manchakuspa willarqan
SAMUELQA Jeftepa ususin jinan, Sansón jinan karqan. ¿Imaraykun chayta ninchis? Tayta-mamankuq ejemplonmi paykunataqa vidankupi yanaparqan. Chaymi Samuelqa Jeftepa ususin jina tukuy tiempo Jehová Diosta servirqan (1 Sam. 2:11). Sansón jinataqmi “wañunankama Diospaq t’aqasqa nazareo” karqan (Juec. 13:7). Chaymantapas paykuna jinan mana manchakuq kanan karqan.
Samuelpa mamitanqa Anan karqan, paymi Diosman prometesqa wawan tukuy tiempo yupaychana karpapi servinanpaq. Chaymi Anaqa wawachan yaqa kinsa watachanpi kashaqtin Siló llaqtapi Diospa wasinman aparqan. Chaywanpas Anaqa sapa watanmi Samuelta visitaq, jinaspa mosoq p’achata apaq. Samuelqa sacerdote Elita yanapaspan Jehová Diosta servisharqan, chay tiempopaqqa Eliqa kuraqñan kasharqan. Chaymantapas yaqapaschá Samueltaqa Diospa wasinpi llank’aq warmikuna cuidarqanku.
Diospa wasinpin ichaqa qhelli ruwaykunata ruwasharqanku. Sacerdote Elí rikusharqanña chaykuna ruwasqankuta chaypas, manan imatapas ruwarqanchu. ¿Imarayku? Wawankunan chay mana allinkunata ruwasharqanku, paykunan karqanku Hofniwan Finehaswan. Paykunaqa Diospa wasinpi llank’aq wakin warmikunawanmi puñuqku. Chaymantapas manan munasqanman jinachu Jehová Diosta servisharqanku. Hofniwan Finehaswanqa runakunaq Diosman apamusqanku sacrificiotan sacerdoteta yanapaqkunawan allin kaqninta suwachimuqku, puchuqllantañan Jehová Diosmanqa qoqku. Sacerdote Eliqa allintan yacharqan chaykunata wawankuna ruwashasqankuta, chaywanpas munayllatan paykunataqa rimapayarqan. Wawankunan ichaqa mana kasukurqankuchu. Chhaynaña pasasharqan chaypas, Samuelqa allintan wiñasharqan, paytaqa runakunapas Jehová Diospas wiñasqanman jinan astawan munakusharqanku. Jehová Diosqa munasharqanmi chay mana allin ruwaykuna corregiyta, jinan Samuelta ajllarqan paypa rantinpi rimananpaq.
Juj kutinmi Samuelta juj kunka rijch’arichirqan. Samuelqa sacerdote Elí wajamunanpaqmi piensarqan, jinan usqhaylla rirqan Elipa kasqanman, jinaspa nirqan “kaypin kashani” nispa. Elitaq nirqan: “Manan noqaqa wajamuykichu, phaway puñukamullay”, nispa. Eliqa kuraqñan karqan, ñausan karqanpas. Chhaynatan Samuelqa iskay kutitawan Eliman rirqan. Chaypin Eliqa repararqan Samueltaqa Jehová Dios rimapayamushasqanta. Jinan Eliqa yachachirqan imatas ninman jujmanta Jehová Dios rimapayamuqtin chayta. “Kaypin kashani Jehová Diosníy, noqaqa kamachiykin kani, uyarishaykin” nispan ninan karqan.
Jujmantan Jehová Diosqa Samuelta rimapayamullarqantaq, “¡Samuel, Samuel!” nispan nimurqan. Jinan Samuelqa Elipa nisqanman jina nirqan: “Kaypin kashani Diosníy, noqaqa kamachiykin kani, uyarishaykin”, nispa. Chaypin Jehová Diosqa Samuelman willarqan imaynas Siló llaqtapi mana allin ruwaykunata correginan karqan chayta. Elitapas castigananmi karqan Hofnitawan Finehastawan mana wanachisqanmanta. Arí, Jehová Diosmi Elita, familianta, mana kasukuq churinkunatawan castiganan karqan. Tukuy chaykunatan Samuelqa Eliman willanan karqan.
Jehová Diospa nisqanta uyarispan Samuelqa puñunanman kutiyapurqan. Illarimuqtintaq Jehová Diospa wasin punkukunata kichaq rirqan. Samuelqa “manchakusharqanmi imachus uyarisqanta Eliman willayta”. Sacerdote Elin ichaqa Samuelta tapurqan Jehová Diospa imachus nisqanta willananpaq. Manchasqa kasqanta reparaspan Eliqa Samuelta nirqan: “Llapallanta sut’inta willaway”, nispa.
Samuelqa waynachallaraq kashaspapas mana manchakuspan sacerdote Eliman willarqan churinkuna castigasqa kananmanta
Samuelpaqqa sasapunichá karqan tukuy chaykunata Eliman willayqa. Yaqapaschá Elitaqa abuelonta jina Samuelqa qhawarirqan. Eliqa sacerdotetaq karqan chayqa, Samuelqa nacionnintinta umalliqta jinapaschá paytaqa qhawarirqan. Chhaynaña kaqtinpas Samuelqa mana manchakuspan, “mana imata pakaspa llapanta willarqan”. Chayta uyarispan Eliqa nirqan: “Kayqa Jehová Diospa munayninmi. Imachus allinpaq qhawarisqanman jina ruwachun”, nispa. Chaywanpas Eliqa manachus jina wawankunataqa wanachinmanchu karqan.
Jehová Diosqa bendecirqanmi Samuelta mana manchakuq kasqanmanta. Bibliaq willasqanman jinaqa “Jehová Diosqa paywanmi kasharqan”. Chaymantapas Samuelqa Diospa profetanmi kapurqan, chaymi “Diosqa Samuelpa imachus rimasqanta lliuta junt’achiq”. Elimanta churinkunamantawan imachus nisqanpas llapallanmi junt’akurqan. Samuelqa askha watakunan israelitakunata iñiyninkupi yanaparqan. Chaymantapas payqa profeta jina juez jinan tukuy sonqowan Jehová Diosta servirqan. Samuelqa Jehová Diospa yanapayninwanmi juch’uychanmantapacha yacharqan mana manchakuq kayta. Payqa wañupunankaman chhaynata Jehová Diosta servirqan, askha bendicionkunatataqmi chaskirqanpas.
Kay textokunata leey
¿Imaniwaqmi?
¿Imakunata ruwaspan Samuel rikuchirqan mana manchakuq kasqanta?
Astawan t’aqwiriy
1. ¿Imaynan karqan Siló llaqta? (w92 1/11 8, 9). A
Todd Bolen/BiblePlaces.com
Imagen A: Ñaupa tiempopi Siló llaqtaq kasqan.
2. ¿Imaynan Samuelpa kausaynin kanman karqan Diosta yupaychana karpapi? (ia 70-71 párrs. 9-13). B
Imagen B
3. ¿Imaraykun Bibliapi nin “Samuelqa [wawallaraq kashaspaqa] manaraqmi Jehová Diosta allintaraqchu reqsirqan” nispa? (1 Sam. 3:7; w02 15/12 8 párrs. 5, 6).
4. ¿Imaynatan Elipa familianmanta Diospa willachisqan junt’akurqan? (it “Elí, I” párrs. 5-7).
Imakunapin yanapawasunman
¿Imaynatan Samuelpa ejemplon wayna-sipaskunata yanapanman. . .
. . . kasukuq kanankupaq? (1 Sam. 3:5).
. . . respetoyoq kanankupaq? (1 Sam. 3:6-10).
. . . ima ruwanankutapas allinta junt’anankupaq? (1 Sam. 3:15). C
Imagen C
¿Imakunapi tarikuspan wayna-sipaskuna mana manchakuspa rimananku? ¿Imaynatan Samuelpa ejemplonta qatikunkuman?
¿Imakunata ruwaspan rikuchillawaqtaq Samuel jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Samuel kausarimpuqtin?
Astawan yachanapaq
¿Imakunapi tarikuspan kuraqkunapas wayna-sipaskunapas mana manchakuq kananku?
Samuelpa tiemponpi runakuna manaña Jehová Diosta kasukuqkuchu chaypas payqa tukuy sonqon Diosta servirqan.
“Samuelqa tukuy sonqon Diosta servirqan” (ijwis yachachikuy 15)