20 SANSÓN
“Pisi kallpa kashaspa kallpasapaman tukurqan”
SANSONQA ñausamanmi tukupurqan, chaywanpas uyarisharqanmi Filistea runakunaq paymanta millayta rimasqankuta burlakusqankutapas. ¿Imaraykun ñausayapurqan? Payqa mana allinta piensaykuspan maymantachus kallpan jamurqan chayta jujman willarqan. Chaymi paytaqa jap’ispa iskaynin ñawinta orqorqanku, jinaspa makinmanta watasqata carcelman wisq’arqanku, chaypin esclavota jina llank’achirqanku. Chaymantataq Filistea runakunaqa Sansonta asipayarqanku, chayta ruwaspaqa Jehová Diostan asipayasharqanku. Sansonqa yacharqanmi imaraykuchus chhaynapi tarikusharqan chayta. Payqa kallpasapa runan karqan, chaymantataq mana kallpayoq kapurqan. ¿Imatan ruwanan karqan jujmanta kallpayoq kananpaq?
Sansonqa iskay chunka watan Israel llaqtapi juez karqan. Payqa jujniray juezmi karqan Baracmanta, Gedeonmanta, Jeftemantapas. Paykunaqa jatun ejercitotan pusarirqanku Diospa enemigonkunawan maqanakunankupaq, Sansonmi ichaqa mana paykuna jinachu karqan. ¡Sansonqa sapallanmi juj ejército karqan! Jehová Dios paywan kashasqanraykun askha Filistea runakunata wañuchirqan. ¿Imaynapin chhayna kanman karqan?
Juj angelmi juj casarasqa warmi-qhariman rijurirqan. Jinaspa willarqan juj wawayoq kanankuta, chay wawan karqan Sansón, Diosmi munarqan chay wawa nazareo kaspa tukuy tiempo payta servinanta. Chaymi Sansonqa chujchanta mana jayk’aqpas rutuchikurqanchu. Chaymantapas Jehová Diospa munayninman jina kausasqanraykun kallpasapa payqa karqan, chaymi juj kutinpas makillanwan leonta wañuchirqan. Chay kallpawanmi Filistea runakunawanpas maqanakuq. Chay Filistea runakunaqa Diosta mana kasukuq Israel runakunatan ñak’arichisharqanku.
Juj kutinmi Israel runakunaqa Filistea runakunata manchakuspa Sansonta wataruspa paykunaman entregarqanku. Sansonmi ichaqa chay watasqanku waskhata hilota jinalla p’itirparirqan. Chaymantataq waranqa filisteokunata asnoq qhaqllinwan wañuchirqan. Chaymi filisteokunaqa Gaza llaqtapi Sansón kashaqtin pacha paqariyta wañuchinankupaq piensaykurqanku. Sansonmi ichaqa kuska tutata “llaqtaq punkunta, punkuq ladonkunapi iskaynin k’aspikunantinta, k’ullumanta aldabantinta ima khakarqan, jinaspa chayta q’epirikuspa Hebrón llaqtaq chimpanpi orqo patakama” purirqan. Chayqa kasharqan 60 kilómetros jina karun.
Sansonqa askha kutipin rikuchirqan sinchi kallpasapa kasqanta. Chaywanmi sut’ita rikuchirqan Filistea runakunaq diosnin Dagonqa Jehová Diosta serviq contra mana ima ruwaytapas atisqanta. Chaymi Filisteo runakunaqa piensaykurqanku imaynatas Dalilaq yanapayninwan Sansonta atipankuman chaypi.
Sansonqa Dalilamantan enamorasqa kasharqan. Dalilan ichaqa mana tukuy sonqochu paytaqa munakurqan, traicionarqan iman. Filisteokunan Dalilaman qolqeta munachirqanku Sansonta imaraykuchus kallpayoq kasqanta tapunanpaq, payqa aceptarqanmi chayta. Jinan payqa Sansonta tapupayarqan imaynapis kallpan kan chayta, Sansontaq sayk’upuspa willapurqan: “Sichus chujchayta ruturuwankuman chayqa, común runakuna jinallan mana kallpayoq kapuyman”, nispa. Jinan Dalilaqa Sansonta puñurachispa chujchanta rutuchirqan. Jehová Diosqa saqepurqanmi Sansonta, chaymi Sansonqa mana kallpayoq kapurqan. Jinan Filisteo runakunaqa jap’iruspa iskaynin ñawinta orqopurqanku.
Sansontaqa molino rumita muyuchispan llank’achirqanku, chay ruwayqa sasapunin karqan. Filisteokunaqa kallpasapa enemigonku makinkupi esclavo jina kasqanmantan kusisqa qaparkachasharqanku. Chaymantapas paykunaqa jatun fiestata ruwarqanku Dagón diosninkupaq. Chaytaqa ruwarqanku jatun templopin, waranqa-waranqa runakunataqmi chaypiqa kasharqanku. Wasi patapipas kinsa waranqa runakunan kasharqanku. Filisteokunaqa “Sansontan carcelmanta orqomurqanku paymanta burlakunankupaq. Jinan sayachirqanku wasiq columnankunaq chaupinpi”. Sansonqa arrepientesqan kasharqan mana allin ruwasqanmanta, chay kutipaqqa chujchanpas ñan jatunña kasharqan.
Sansonqa mana allinta ruwasqanraykun sasachakuypi tarikurqan, chaywanpas chaymantaqa allintan imatapas ruwarqan
Wasiq columnankunata tupaykuspan Sansonqa Jehová Diosmanta mañakurqan kallpanta kutichipunanpaq. Nirqanmi: “Tukuy munayniyoq Señorníy Jehová, amayá qonqawaychu. Diosnilláy, ama jinachu kay, kay kutillatawan kallpaykita qoykuway”, nispa. Jinan qaparispa nirqan: “¡Filistea runakunawan kuska wañusaq!”, nispa. “Jinaspan tukuy kallpanwan chay columnakunata tanqarqan, jinan chay wasiqa” kuyuriyta qallarirqan. Filisteokunaqa manañan imatapas ruwayta atirqankuñachu, chhaynapin chay temploqa llapa runakuna pataman urmaykurqan. Chay kutipin “Sansonqa askha runakunata wañuchirqan, kausashaspa wañuchisqanmantapas astawanraq”.
Askha watakuna qhepamanmi apóstol Pabloqa allin iñiyniyoq Dios sonqo runakunaq sutinkuwan kuskata Sansonpa sutinta qelqarqan. “Pisi kallpa kashaspan kallpasapaman tukurqanku” nispaqa yaqapaschá Pabloqa Sansonpi piensasharqan. Kaypi yachasqanchis jina payqa mana manchakuq valienten karqan (Heb. 11:32-34).
Kay textokunata leey
¿Imaniwaqmi?
¿Imakunata ruwaspan Sansón rikuchirqan mana manchakuq kasqanta?
Astawan t’aqwiriy
1. ¿Imaraykun Sansón nazareolla kasharqan wañusqataña tupaykuqtinpas? (w05 15/1 30, 31).
2. ¿Imaynapin yachanchis Diospa atiyninwan Sansón llaqta punkuta postekunantinta Gaza llaqtamanta Hebrón orqokama apasqanta? (w04 15/10 15 párrs. 7, 8). A
Imagen A
3. ¿Imaraykun nisunman “Dalilaqa yaqapaschá Israel warmi karqan” nispa? (w05 15/3 28 párr. 3).
4. ¿Imaraykun Sansón juj lado ñawillanmanta vengakuyta munarqan? (Jueces 16:28; it “Sansón” párr. 10).
Imakunapin yanapawasunman
Dalilaqa sapa kutillanmi Sansonta tapupayarqan mana willana kaqta willananpaq, paytaq chayta willarqan. ¿Imatan chaymanta umalliqkunapas esposankupas yachankuman? B
Imagen B
Sansonqa mana allintan ruwarqan, chaymantan ichaqa Jehová Dios admiranapaq jina ruwayta ruwachirqan. ¿Yanapawasunmanchu Sansonpa ejemplon imallapipas pantaruqtinchis ama pisipananchispaq?
¿Imakunata ruwaspan rikuchiwaq Sansón jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Sansón kausarimpuqtin?
Astawan yachanapaq
Wawaykikunaman yachachiy imaraykuchus Sansón kallpasapaman tukupurqan chayta.
“Jehová Diosmi Sansonmanqa santo espiritunta qorqan” (ijwis yachachikuy 14)
¿Imakunatawanmi Sansonpa ejemplonmanta yachasunman?