19 JEFTÉ USUSINPIWAN
Sasaña kaqtinpas junt’arqankun promesa ruwasqankuta
ISRAEL nacionqa jujmantan mana allinpi tarikusharqan. ¿Imarayku? Jehová Diosmanta t’aqakusqankurayku. Jinan Jehová Diosqa jinallata qhawarqan Anmón runakunaq ñak’arichinata, chunka pusaqniyoq watatan paykunata ñak’arichirqanku (Juec. 10:8). Chay qhepamantaq Israel runakunaqa juchankumanta pesapakuspa Jehová Diosman kutiripurqanku, adorasqanku idolokunatapas wijch’upurqankun. Chaykuna qhepallamanmi Anmón runakunaqa Galaad jallp’api juñukurqanku Israel runakunawan maqanakunankupaq.
Chaymi Galaad jallp’amanta umalliqkunaqa Jefteta valekamurqanku maqanakuypi umalliqninku kananpaq. Ñaupaqpin ichaqa Jefteta Galaad jallp’amanta umalliqkuna mana allinta ruwarqanku, yaqachus jina chay umalliqkunaqa familianmanta kankuman karqan. Chayraykun payqa chay llaqtamanta ripurqan. Ichaqa, ¿chayraykuchu Jefté paykunapaq phiñasqa kashanman karqan? Manan. Aswanpas payqa jujmantan maqanakuypi umalliqninku kapurqan. Ichaqa manaraq maqanakuq rishaspan Anmón llaqta reywan thajpi kayta munaspa runankunata kacharqan paywan rimanakamunankupaq, chay reyqa Israel runakunaq wakin jallp’antan jap’ikapuyta munasharqan. Jefteqa allintan yacharqan chay jallp’akunataqa Jehová Dios Israel runakunaman qopusqanta. Chay reymi ichaqa mana uyarikurqanchu aswanmi maqanakuytapuni munasharqan, paytaqa manapunin imawanpas cambiachiyta atirqankuchu.
Jefteqa maqanakuq rinanpaq alistakushaspan Jehová Diosman juj promesata ruwarqan. Paymi nirqan: “Anmón runakunata atipanaypaqchus yanapawanki, chay guerramantataqchus thajpi wasiyman kutimpusaq chayqa, pichus wasiymanta noqata chaskiq ñaupaqta lloqsimuqtan qan Jehová Diosman ruphachina ofrendata jina qopusayki”, nispa. Jefteqa manan chay promesataqa mana allinta piensaykuspachu ruwasharqan, chay ratupaqqa Jehová Diospa espiritunpas paypiñan kasharqan.
¿Imatan Jefté nisharqan “ruphachina ofrendata jina qopusayki” nispa nisqanwan? ¿Juj runatachu ruphachinan karqan? Manan. Jehová Diosqa manan munanchu sacrificiopi pitapas ruphachinataqa (Deut. 18:10, 12). Jefteqa chayta nispaqa rimasharqan wasinmanta ñaupaqta lloqsimuq runa Jehová Diospaq kapunanmantan, ofrenda jinan payman entregasqa kananmantan. Chay runaqa yaqapaschá Siló llaqtapi Diospa wasinpi tukuy tiempo servinan karqan. Payqa yacharqanmi chay promesa ruwasqanta junt’ayqa sasa kananta. Wawanpas jujllataq karqan chayqa, yaqapaschá wasinman chayaqtinqa chay ususin ñaupaqta lloqsimunman karqan.
Chay ratuqa Jefteqa juj jatun maqanakuypin maqanakunan kasharqan. Chaymi payqa runankunata pusarikuspa mana manchakuspa chay maqanakuyman rirqan. Paykunaqa Jehová Diospa yanapayninwanmi chay Anmón runakunata atipamurqanku, iskay chunka llaqtakunatataqmi ch’usaqman tukuchipurqanku. Chaypiqa askha runakunan wañurqanku.
Jefteqa enemigonkunata atipasqanmantan wasinman kutimpurqan. Payqa jujnin kamachin wasinmanta ñaupaqta lloqsimunantapaschá munasharqan. Ichaqa manan chhaynachu karqan, aswanpas munakusqan ususinmi lloqsimurqan tamborta tocaspa tususpa ima. Chayta rikuspan Jefteqa p’achanta llik’ikurqan, jinaspa sonqo nanasqa nirqan: “¡Ay ususilláy ususi! ¿Imatataq kaytari ruwaruwanki? Sonqoymi sinchitapuni nanarushan. [ . . . ] ¡Ay wawalláy, karumanmi kacharpariyki!”, nispa.
Jeftepas ususinpas Jehová Diosman prometekusqankutan junt’anankun karqan sasaña karqan chaypas
Jeftepa ususinqa allintan yacharqan taytanpa promesa ruwasqanwan vidan cambianan kasqanta. Payqa wañupunankaman tukuy tiempo Jehová Diosta servinan karqan, manan casarakunanchu karqan, manan wawayoqpaschu kanan karqan. Chhayna kayqa mana allinmi karqan Israel warmikunapaqqa. Chhaynaña karqan chaypas Jeftepa ususinqa mana manchakuq valienten karqan, chaymi taytanta nirqan: “Papáy, ñataq Jehová Diosman prometerqankiña chayqa, prometesqaykiman jina noqawan ruway”, nispa. Chaymantapas taytantan valekurqan juj tiempo amigankunawan orqon-orqonta waqaspa purimunanpaq. ¿Imarayku? Casarakuytapas wawakunayoq kaytapas manaña atipusqanrayku.
Sapa watanmi Israel llaqtamanta sipaskunaqa Jeftepa ususinta kallpachaq riqku, watapi tawa p’unchaymi chayta ruwaqku. Diospa wasinpi serviyqa may munaypunichá karqan Jeftepa ususinpaqqa. Chaymantapas yaqapaschá chay tiempoqa Samuelqa Diospa wasinpiña tiyasharqan. ¿Jeftepa ususin imallapipas Samuelta yanapanmanchu karqan? ¿Kallpachanmanchu karqan Jehová Diosta servishanallanpaq? Manan chaytaqa yachakunchu. Ichaqa sichus chayta ruwarqan chayqa, may kusisqachá Jeftepa ususinqa kasharqan. Yachasqanchis jina payqa tukuy sonqonwanmi Jehová Diosta servirqan. Chay tiempopi Diospa wasinpi qhelli ruwaykunataña ruwasharqanku chaypas, Jeftepa ususinqa manan chaykunaman urmarqanchu (1 Sam. 2:22). Bibliaq nisqan jina “Jeftepa ususinqa manan jayk’aqpas pi qhariwanpas puñurqanchu”.
Unay watakuna qhepamanmi apóstol Pablo allin iñiyniyoq runakunaq sutinkuwan kuskata Jeftepa sutinta qelqarqan (Heb. 11:32). Jeftepas ususinpas mana manchakuq valiente kananchispaqmi allin ejemplota saqewarqanchis. Jefteqa Diospa llaqtanraykun imaymanata ruwarqan, ususinpas paytaqa imaymanapin apoyarqan. Iskayninkun Diosman promesa ruwasqankuta junt’arqanku sasaña karqan chaypas.
Kay textokunata leey
¿Imaniwaqmi?
¿Imakunata ruwaspan Jeftepas ususinpas rikuchirqanku mana manchakuq kasqankuta?
Astawan t’aqwiriy
1. ¿Imaraykun nisunman “Anmón runakunaqa manan israelitakunallawanchu maqanakusharqanku aswanpas Jehová Dioswanmi maqanakusharqanku” nispa? (it “Jefté” párr. 6). A
Imagen A: “Israel runakunaqa waj dioskunata wijch’upuspa jujmanta Jehová Diosta adorayta qallarirqanku” (Juec. 10:16).
2. Jacobpas Jehová Diosmanmi promesata ruwarqan, ¿imaynapin Jeftepa ruwasqanwan Jacobpa ruwasqanwan kaqlla? (it “Jefté” párr. 11).
3. ¿Imaraykun Jeftepaq sinchi sasa karqan Diosman promesa ruwasqanta junt’ay? (w17.04 4 párr. 6).
4. Profeta Samuelqa 1180 watapi jinan nacerqan manaraq Jesús jamushaqtin, ¿imaraykun nisunman “Jeftepa ususinwan kuskan Samuelqa templopi Diosta servirqan” nispa? (it “Jefté” párr. 2; qhaway “Qallariypi Diosta serviqkunaq tiemponmanta juezkunaq tiemponkama” nisqata).
Imakunapin yanapawasunman
¿Imaynatan taytakuna Jefté jina wawankuta yanapankuman?
¿Imata ruwaspan Diosta serviqkuna Jeftepa ususinta kallpachaq Israel sipaskuna jina kankuman? B
Imagen B
¿Imakunata ruwaspan rikuchiwaq Jefté jina ususin jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Jeftepas ususinpas kausarimpuqtinku?
Astawan yachanapaq
¿Imatan solterokunapas solterakunapas yachankuman Jeftepa ususinmanta?
Kaypin yachanki imaynatas Jeftemanta ususinmantawan yachay yanapasunkiman Jehová Diosta tukuy sonqo servishanallaykipaq chayta.
“Jehová Diosqa sumaqtan qhawarin paypi iñiqkunata” (w16.04 5-9)