Leeqkunaq tapukusqan
¿Jayk’aqkaman allin willakuykunata willasun?
Jesusmi nirqan: “Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa”, nispa (Mat. 24:14). Kay versiculopi 6, 13 versiculokunapipas “tukukuy” nisqa palabraqa griego simipiqa télos nikunmi. Chaypiqa rimashan Armagedón guerrapi Satanaspa kamachikusqan pacha jujpaqkama chinkachisqa kapunanmantan (Apo. 16:14, 16). Chhaynaqa, chay tiempo chayamunankaman allin willakuykunataqa willashallasun. Kayqa ñaupaqpiqa manan chhaynatachu entiendekurqan, kunanqa jujniraytan chayqa entiendekapun.
Ñaupaqpi entiendesqanchisman jinaqa, allin willakuykunataqa willananchis karqan llapa pantasqa religionkuna chinkachisqa kapuqtin manchay ñak’ariy tiempo qallarinankaman (Apo. 17:3, 5, 15, 16). Manchay ñak’ariy tiempo qallariqtin jina “Jehová Diospa khuyapayanan wata” nisqa tiempo tukukapunanpaq iman piensarqanchis (Isa. 61:2). Chaymantapas manchay ñak’ariy tiempopiqa manaraq chay tiempo qallarishaqtin Jehová Diosta tukuy sonqo serviqkunalla salvasqa kanankupaqmi piensakurqan. Chhaynataqa piensakurqan imachus ñaupa tiempo Judío runakunawan pasarqan chayta rikuspan. 607 watapi Jerusalén llaqta thunisqa kapuqtinqa, ñaupaqmantaña mat’inkupi marcata chaskiqkunallan salvasqa karqanku. Chay marcataqa chaskirqanku Jehová Diosta kasukuspa millay kausayta cheqnikuqkunallan (Ezeq. 5:11; 9:4). Ichaqa chhaynata entiendekusqanqa manan tupanchu Mateo 24:14 textopi Jesuspa nisqanwan. Chay textopi nisqanman jinaqa, yaqachuna manchay ñak’ariy tiempopiqa wakin runakunaqa atinqakuraq Diospa llaqtanman jaykumuyta. Arí, kay millay kausay Armagedón guerrapi manaraq jujpaqkama chinkachisqa kashaqtinqa atinqakuraqsuna Diosman kutirikuyta.
Mateo 24:14 textota aswan allinta entiendekusqanqa yanapawanchismi Apocalipsis 16:21 textopi nisqanta astawan entiendenanchispaqpas, chaypin rimashan jatuchachaq chijchimanta. Kay textokunata allinta t’aqwirispaqa reparasunmi imaynas iskaynin textoqa allinta tupan chayta. Sapanka texton rimashan imaynatas Diospa gobiernonmanta willakuyta runakuna chaskikunqaku chaymanta. Apóstol Pabloq nisqan jina, “salvasqa kayman rishaqkunapaqqa” allin willakuykunaqa, “kausay q’apay” jinan. Diospa enemigonkunapaqmi ichaqa allin willakuykunaqa mana allin willakuykuna, paykunapaqqa “wañuy q’apay” jinan (2 Cor. 2:15, 16). Paykunaqa chay allin willakuykunata cheqnikusqankuwanmi rikuchinku millay kausay apasqankuta, Satanaspa kamachinkuna kasqankuta, pisi tiempollamanta chinkachisqa kanankuta ima (Juan 7:7; 1 Juan 2:17; 5:19).
Chaymantapas Apocalipsis 16:21 textopi rijch’anachiypi willasqan chay jatun chijchiqa “manchakunapaqpunis kanqa”. Chhaynaqa manchay ñak’ariy tiempopiqa yaqachuna mana jayk’aq willakusqanta jina Diospa sutinta willakunqa, chhaynapi llapa runakuna pichus Jehová Dios kasqanta allinta yachanankupaq (Ezeq. 39:7). Chhaynaqa, llapa pantasqa religionkuna chinkachisqa kasqan qhepaman, ¿kanqaraqchu allin willakuykuna willasqanchista sumaq q’apayta jina qhawariq runakuna? ¿Kanqaraqchu noqanchiswan kuska Diosta serviyta munaq runakuna? Arí, yaqachuna kanqakuraq. Yaqapaschá chay runakunaqa yuyarinqaku Jehová Diospa testigonkuna askha watakunaña pantasqa religionkuna chinkachisqa kanankuta willasqanchista.
Yaqa chhaynan pasarqan Egipto llaqtapipas chunka castigokuna kasqan qhepamanpas. Jehová Dios “Egiptopi llapa yanqa dioskunata castigasqan” qhepamanmi “askha waj llaqtayoq runakuna” Diospa llaqtanwan kuska lloqsimpurqanku (Éx. 12:12, 37, 38). Paykunaqa chunka milagrokunamanta Moisespa willasqan junt’akusqanta rikuspapaschá Diospa partenmanta churakurqanku.
Llapa pantasqa religionkuna chinkachisqa kapuqtin pillapas Diospa partenmanta churakunqa, jinaspa kay pachapiraq kashaq Jesuspa wayqenkunata yanapanqa chayqa, Diosqa ovejachanta jinan paytaqa qhawaripunqa (Mat. 25:34-36, 40). Ichaqa chaypaqqa manaraq Armagedón guerra qallarishaqtinmi Diospa partenmanta churakunanku, chay ratupin kay pachapiraq kashaq ajllasqa iñiqkunapas janaq pachaman ripunqaku.
Kay yachachikuymi sut’ita rikuchiwanchis Jehová Diosqa may munakuq, may khuyapayakuq Dios kasqanta. Bibliapi nisqan jina, “payqa manan munanchu pipas wañunantaqa, aswanmi munan lliupas juchankumanta pesapakuspa payman kutirikunankuta” (2 Ped. 3:9).