¿Evolución nisqawanchu Dios tukuy kausaqta kamarqan?

¿Imaninmi Biblia?

Manan. Bibliaq nisqanman jinaqa Diosmi runatapas imaymana clase animalkunatapas plantakunatapas kamarqan (Génesis 1:12, 21, 25, 27; Apocalipsis 4:11). Chaymantapas Bibliapin willawanchis llapa runakuna Adán, Evaq wawankuna kasqanchista (Génesis 3:20; 4:1). Bibliaq yachachisqanman jinaqa Diosqa manan “evolución” nisqawanchu tukuy imatapas kamarqan. Cienciaq nisqanman jinaqa, plantakunapas animalkunapas juj chhikantaqa cambiankun sayayninkupi colorninkupi ima. Chay nisqanwanqa Bibliaq nisqanpas tupanmi.a

• ¿Imaninkun wakin runakuna?

• ¿Evolución nisqa yachachikuy tupanchu Bibliaq nisqanwan?

• Animalkunapas plantakunapas maypipas yachakusqankurayku, ¿nisunmanchu “evolucionmi” nispa?

¿Imaninkun wakin runakuna?

Evolución teística nisqaqa imaymanakunamantan rimashan. Encyclopædia Britannica nisqanman jina, selección naturalb nisqawansi Diosqa tukuy imaymanatapas pusarin.

Evolución teística nisqaqa kaykunatan yachachillantaq:

• Kay tiempopi plantakunata animalkunata rikusqanchisqa jujniraymi ñaupaq tiempopiqa karqanku.

• Askha watakunaq pasasqanman jinan animalkunaqa sapaq animalkunaman tukupun, plantakunapas sapaq plantakunaman tukupun. Chaytan macroevolución nispa nikun.

• Tukuy imapas cambiananpaqqa Diosmi ruwan.

¿Evolución nisqa yachachikuy tupanchu Bibliaq nisqanwan?

Manan. Sichus Dios evolución nisqawan tukuy imaymanatapas kamanman karqan chayqa, Bibliapi Diospa kamasqanmanta willasqanqa manachá cheqaqpunichu kanman. Jesusmi ichaqa Génesis qelqamanta rimaspaqa cheqaq kasqanta rikuchirqan (Génesis 1:26, 27; 2:18-24; Mateo 19:4-6). Chaymantapas Bibliaqa willanmi Jesús janaq pachapi kashaspa Papanta “tukuy imaymana” kamaypi yanapasqanta (Juan 1:3). Chhaynaqa Bibliaq yachachisqanman jinaqa Diosqa manan evolución nisqawanchu tukuy kausaqtapas kamarqan.

Animalkunapas plantakunapas maypipas yachakusqankurayku, ¿nisunmanchu “evolucionmi” nispa?

Manan. Bibliaqa manan willanchu maykamachus animalkuna plantakunapas juj chhikanta cambiankuman, jayk’a kutitachus cambiankuman chaytapas. Diospa kamasqan plantakunapas animalkunapas cambiankumanmi juj chhikanta mirasqankuman jina otaq maypipas yachakusqankuman jina. Chayta rikuspan wakin runakuna ninku: “Chayqa evolucionmi”, nispa; ichaqa cambiankuña juj chhikanta chaypas, manan chayraykuchu mana reqsisqa sapaq plantaman tukupunku otaq sapaq animalman tukupunku.