¿Qolqechu imapaqpas juchayoq?
¿Imaninmi Biblia?
Bibliaqa manan ninchu qolqeyoq kayqa mana allinchu nispaqa nitaq ninchu qolqen juchayoq tukuy ñak’ariykuna rijurimusqanmanta nispapas. Wakin runakunan ninku: “Qolqeraykun mana allinkunaqa rijurimun”, nispa. Chay nisqankutan runakuna piensanku Bibliamanta orqonankupaq. Ichaqa, ¿cheqaqchu chay nisqanku? Manan. Aswanpas Bibliaqa ninmi: “Qolqe sonqo kayqa imaymana mana allinkunaq saphinmi”, nispa (1 Timoteo 6:10).
¿Imanintaq Biblia qolqemanta?
Bibliaqa niwanchismi sichus qolqeta allinta utilizasun chayqa ‘waqaychawasunmi’ nispa (Eclesiastés 7:12). Chaymantapas Bibliapiqa allintan riman qoykukuq runakunamanta, qolqenkuwan jujkunata yanapakuqkunamantapas (Proverbios 11:25).
Ichaqa Bibliaqa nillantaqmi mana qolqepi piensaspallachu kausananchista. Hebreos 13:5 texton nin: “Aman qolqe sonqoqa kankichischu, aswanpas imaykichischus kan chayllawan contento kausaychis”, nispa. ¿Imatan chaymanta yachasunman? Qolqetaña necesitanchis kausayninchispi chaypas manan chaychu aswan importanteqa kanan. Chaypaqqa contenton kananchis kapuwallasqanchiswan, sichus kan mijunanchispaq, p’achakunanchispaq, tiyananchispaq wasi ima chayqa kusisqan chaykunawan kananchis (1 Timoteo 6:8).
¿Imaraykun qolqe sonqo kay mana allinchu?
Qolqeta sinchi munapayaq runaqa manan wiñay kausayta chaskinqachu (Efesios 5:5). ¿Imarayku? Qolqeta sinchi munapayayqa idolo adoray jina kasqanrayku (Colosenses 3:5). Qolqeta sinchi munapayaqkunaqa qolqeraykun imaymana juchakunata ruwanku. Chayraykun Biblia sut’ita nin: “Usqhayllaman qhapaqyaqmi ichaqa huchachasqapuni kanqa”, nispa (Proverbios 28:20, Diospa Simin Qelqa). Chaymi wakin runakunaqa qolqerayku runamasinkuta engañanku, maqaspa qolqenkuta suwanku, qolqeta mañakunankurayku runakunata pakanku otaq wañuchinku ima.
Manaña chaykunatachu ruwanchis chaypas qolqeta sinchita munapayaspaqa imaymana sasachakuykunapin tarikusunman. Biblian nin: “Qhapaq kaytapuni munaq runakunan ichaqa tentacionman, trampakunaman, yanqa mana allin munapayaykunaman ima urmanku”, nispa (1 Timoteo 6:9).
¿Imaraykun allinpuni Bibliaq nisqanta kasukuy?
Sichus Diospa nisqanta kasukusun manataq qolqeta tarinanchisraykuchu mana allinkunata ruwasun chayqa, manan p’enqaypichu tarikusun, Jehová Diospas kusisqan kanqa noqanchiswan. Chaymantapas sichus confiasun Diospa yanapayninpi chayqa, paymi prometewanchis: “Manan jayk’aqpas saqesaykichu, manan jayk’aqpas qonqasaykichu”, nispa (Hebreos 13:5, 6). Chaymantapas prometewanchismi: “Junt’aq runaqa askha bendicionkunatan chaskinqa”, nispa (Proverbios 28:20, La Biblia, Traducción del Nuevo Mundo [TNM]).