‘Kusisamiyoqmi wateqaypi [otaq sasachakuypi]’ qaqata sayaq runaqa
1 Llapa cristianokuna tarikunchis imaymana sasachakuykunapi: onqoypi, qatiykachaypi, wateqaypi, wakchayaypipas (2 Tim. 3:12). Chaykunawanmi Satanasqa predicayninchista pisiyachiyta munan, Diosta servisqanchistapas saqenanchista munan (Job 1:9-11). Chhaynaqa, ¿imaraykun ninchis sasachaykunapi qaqata sayayqa kusichiwanchismi nispa? (2 Ped. 2:9.)
2 Preparakusun sasachakuykunapaq. Jehová Diosqa Bibliapin cheqaq kayta willawanchis; chaypin willakullantaq Jesuspa yachachisqanmanta imayna kawsasqanmantapas. Sichus Jesuspa nisqanta ruwayman churasun chayqa, allin kallpachasqa kasun sasachakuykunata atipananchispaq (Luc. 6:47-49). Chaymantapas chaskillanchistaq kallpachayta iñiqmasinchiskunamanta, huñunakuykunapi, allin yuyayniyoq hunt’aq kamachiq ruwamusqan qelqakunamantapas. Hinaspapas asuykusunmanmi Jehová Diosman mañakuypi (Mat. 6:13).
3 Jehová Diosqa qowallanchistaqmi suyakuyta. Jehová Diospa promesankunapi allinta iñinchis chayqa, suyakuyninchis ‘allin takyasqa’ kanqa, imayna ‘anclapas barcota allinta sayachin hinaraq’ (Heb. 6:19). Ñawpaq tiempopi barcokunaqa manan puriqchu mana anclayoqqa, allin p’unchayña kashaqtinpas. Sinchita wayramuqtintaq barcoq anclanta lamar-qochaman kachayuqku mana qaqa-qaqaman barco haykunanpaq. Chay hinallatataq Diospa promesankunapi iñisqanchispas allinta takyachiwasun sinchi sasachakuykunapi tarikuqtinchis, mayninpiqa ima sasachakuypas qonqayllan chayaramuwasunman. Chhaynan karan Listra llaqtapi. Apóstol Pablowan Bernabepiwanmi chay llaqtapi predicayta qallarishaqtinku lliw runakuna makilla uyariranku, ichaqa Pabloq predicasqanta hark’akuq Judío runakuna chayamuqtintaq kaqpacha runakunaqa Judío runakunata kasukuranku (Hech. 14:8-19).
4 Qaqata sayayqa kusichiwanchismi. Sichus predicashallasunpuni hark’awaqtinchispas chayqa thak kaymi ñoqanchispi kanqa. Kusikunchismi Cristorayku p’enqayta ñak’arisqanchismantaqa (Hech. 5:40, 41). Sasachakuykunapi qaqata sayasqanchismi yanapawasun aswan k’umuykukuq, kasukuq kananchispaq, astawan qaqata sayananchispaqpas (Deu. 8:16; Heb. 5:8; Sant. 1:2, 3). Chaymantapas astawanmi iñisunchis Jehová Diospi promesankunapipas, astawantaq payman asuykusunchis pakaykuwananchispaq (Pro. 18:10).
5 Yachasqanchis hina, sasachakuykunaqa tukukuqllan (2 Cor. 4:17, 18). Chay sasachakuykunapi tarikuspa rikuchinchis may tukuy Jehová Dios munakusqanchista. Sasachakuykunapi qaqata sayaspaqa Satanaspa k’amisqanmanmi kutichinchis. Chayrayku amapuni pisipasunchu. “Kusisamiyoqmi wateqayta muchuq [otaq sasachakuypi qaqata sayaq] runaqa, chaywan probasqa kaspa mana atipachikuqqa wiñay kawsay coronatan chaskinqa.” (Sant. 1:12.)