Pachantinpin nishu ruphay kashan | ¿Imatapas Biblia willashanmanchu chaymanta?

Kay 2022 watapi julio killapin mana jayk’aq ruphaykusqanta kay pachapi ruphaykurqan:

• Servicio de noticias de la CNN nisqapin 2022 wata 25 julio killapi nirqan: “China nacionpin juj willakuy lloqsimun, 70 llaqtakunapis sinchi ruphay kanqa, chaywanqa iskay kutiñas kay killapi chay pasanqa”, nispa.

• The Guardian nisqa qelqapin 2022 wata 17 julio killapi nirqan: “Europa ladopin nishu ruphay kasqanwan campokunata nina ruphaykushan”, nispa.

• The New York Times nisqa qelqapin 2022 wata 24 julio killapi nirqan: “Kay domingo p’unchaymi Estados Unidos wakin llaqtakunapi mana jayk’aq ruphaykusqanta jina nishuta ruphaykurqan. Chayqa mastaqa pasarqan inti lloqsimuy lado lamar-qochaq cantonkunapi uray lado llaqtakunapi iman”, nispa.

Imanisunmanmi chaymanta. ¿Jamuq tiempomanqa manañachu pipas kay pachapi tiyapunqa? ¿Imanishanmanmi Biblia chaymanta?

¿Biblia willarqanñachu chaykuna kananta?

Arí willarqanñan. Jesusmi nirqan: “Runakunan rikunqaku mancharikunapaq jina kaqkunata”, nispa (Lucas 21:11). Sinchi ruphay kasqanqa, campokunata ninaq ruphasqanpas chaypi nisqanwanmi tupashan. Chaykuna pasasqanta rikuspan wakin runakunaqa sinchi mancharisqa kashanku, paykunaqa kay pachata runakuna ch’usaqman tukuchinankupaqmi piensanku.

¿Manañachu kay pachapi kausay kanqa?

Manan chayqa chhaynachu kanqa. Diosqa kay pachataqa kamarqan runakuna chaypi wiñaypaq kausanankupaqmi (Salmos 115:16; Eclesiastés 1:4). Payqa manan jinatachu qhawanqa runakuna kay pachata tukuchinankutaqa. Aswanmi willarqan imaynas “jallp’a pacha malograqkunataqa ch’usaqman” tukuchipunqa chayta (Apocalipsis 11:18).

¿Imatawantaq Diosri ruwanqa? Chaypaq iskay willakuymantawan yachasunchis:

• Isaías 35:1 textopin nin: “Ch’in pampakunan, ch’aki jallp’akunan kusikunqa, aqo pampakunan kusisqa t’ikarinqa, azafrán t’ika jinan t’ikarinqa”, nispa. Chaypi nisqanman jinaqa Diosqa manan munanqachu kay pacha ch’aki kapunantaqa, aswanmi tukuy imata allichapunqa.

• Salmos 65:9 textopin nin: “Qanmi jallp’ataqa sumaqta qhawarinki, allin jallp’amanmi, wanusapamanmi tukuchinki”, nispa. Diosqa munay huertaman jinan kay pachataqa tukuchipunqa.

Kay pachapi sinchi ruphay, sinchi para, sinchi chiripas Bibliaq willasqanman jinan kashan, chayta yachanaykipaq leey “¿Qué dice la Biblia sobre el cambio climático y nuestro futuro?” nisqata.

Bibliapin willashan imaynas llapa imapas allin kapunqa chayta, chaymanta astawan yachanaykipaq leey “¿Quién salvará el planeta?” nisqata.