52 YACHACHIKUY
¿Imaraykun allin yuyaywan p’achakuna allichakunapas?
Sapankanchismi jujniray gustoyoq kanchis, chhaynan p’achakuypipas, imayna allichakuypipas kanchis. Ichaqa, ¿iman yanapawasunman Jehová Diospa sonqonpaq jina p’achakunanchispaq? Bibliapi kaq yachachikuykunan. Wakinmanta kunan yachasun.
1. ¿Bibliapi kaq mayqen yachachikuykunan yanapawasunman?
Diosta serviqkunaqa “allin jap’iq p’achawan [...], p’enqakuywan allin yuyaywan iman” p’achakunanchis, chaymantapas “Dios sonqo” runakuna jinan limpio purinanchis (1 Timoteo 2:9, 10). Kay tawa yachachikuykunapi piensasunchis. Ñaupaq kaq, Diosta serviqkunaqa “allin jap’iq p’achawanmi” p’achakunanchis. Sapankanchisña jujniray gustoyoq kanchis chaypas, p’achakusqanchisqa imayna allichakusqanchispas adorasqanchis Diosta respetasqanchistan rikuchinan. Iskay kaq, Diosta serviqkunaqa “p’enqakuywanmi” p’achakunanchis, chhaynaqa p’achanchisqa manan t’eqechu ni juch’uychu kanan, manan jujkuna qhawapayawananchispaq jinachu kanan. Kinsa kaq, Diosta serviqkunaqa “allin yuyaywanmi” p’achakunanchis, manan moda nisqaman jinachu comunta imawanpas churakuna. Tawa kaq, imayna p’achakusqanchispas allichakusqanchispas “Dios sonqo” kasqanchistan rikuchinan, sut’i reparaymi chayqa noqanchispi kanan (1 Corintios 10:31).
2. ¿Imaynatan juj iñiqmasikuna qhawarinman?
Libreña kashanchis ima p’achawanpas churakunanchispaq chaypas, allintan piensarinanchis imaynatas jujkuna qhawariwasun chaypi. Manan munasunmanchu p’achakusqanchista rikuspa pipas juj ladoman uyan kutirinanta, ni k’irisqa kananta. Biblian niwanchis: “Sapankanchismi runamasinchispa allinninpaq kaqkunata, paykunata kallpachaq kaqkunatawan ruwananchis”, nispa (leey Romanos 15:1, 2).
3. ¿Imaynatan jujkunata yanapanman imayna p’achakusqanchis?
P’achanchisqa maytachus rishanchis, imatachus ruwashanchis chayman jinan kanan. Juñunakuykunaman rispa Diosmanta willaq rispa iman aswan allin yuyaywan p’achakunanchis. Manan munasunmanchu imayna p’achakusqanchista imayna sumaqchakusqanchistapas rikuspa runakuna mana allinta piensanankutaqa, aswanmi munasunman Bibliamanta willasqanchista sumaqta uyarikunankuta. Chaymi p’achanchiswan ima “salvawaqninchis Diospa yachachikuyninta” sumaqchananchis (Tito 2:10).
ASTAWAN YACHASUNCHIS
Kaypin astawan yachasun imaynatas Diosta serviq runakuna p’achakunanchis allichakunanchispas chayta.
Imaynachus p’achakusqanchismi rikuchinqa autoridadkunata respetanchischus manachus chayta. Jehová Dios sonqonchispi imaynachus kasqanchistaña masta qhawarin chaypas imaynachus p’achakusqanchismi rikuchinqa payta respetanchischus manachus chayta.
4. Jehová Dios respetasqanchista rikuchisun
¿Imaraykun allin yuyaywan p’achakunanchis allichakunanchispas? Leeychis Salmos 47:2 textota, jinaspa jamuq tapuykunaman jina parlariychis:
Noqanchisqa Diospa sutinpi rimaqkunataq kanchis chayqa, ¿imaynatan p’achakunanchis?
Imaniwaqtaq, ¿allinchu juñunakuyman rinapaq Diosmanta willaq rinapaqpas imayna p’achakusqanchispi allinta piensariy? ¿Imaraykutaq chhaynata ninki?
5. ¿Imaynatan p’achakunanchis allichakunanchispas?
P’achanchisqa manan nishu valeqraqchu kanan, aswanpas limpion kanan. Imatachus ruwashanchis maypichus kashanchis chayman jinataqmi kananpas. Leeychis 1 Corintios 10:24; 1 Timoteo 2:9, 10 textokunata, jinaspa jamuq tapuykunaman jina parlariychis:
¿Allinchu kanman nishu bolsa p’achawan, nishu thanta p’achawan, t’oqo-t’oqo p’achawanpas churakuy?
¿Allinchu kanman nishu t’eqe p’achawan, juch’uy p’achawanpas churakuy, jujkunaq munapayananpaq, qhawapayananpaq jinapas p’achakuy?
Manaña Moisesman Diospa qosqan kamachikuyman jinachu kausanchis chaypas, chay kamachikuykunan yanapawanchis imaynatas Jehová Diosninchis piensan chayta yachananchispaq. Leeychis Deuteronomio 22:5 textota, jinaspa jamuq tapuyman jina parlariychis:
¿Imaraykun juj warmi mana qhari jinachu p’achakunan ni allichakunanpas, imaraykun qharipas mana chayta ruwananchu?
Leeychis 1 Corintios 10:32, 33; 1 Juan 2:15, 16 textokunata, jinaspa jamuq tapuykunaman jina parlariychis:
Imaynachus p’achakusqanchis munaychakusqanchispas juj runakunata iñiqmasikunatapas phiñachinman chay, ¿jinallachu kananchis icha imatachu ruwananchis? ¿Imarayku?
¿Imaynatan tiyasqayki llaqtapi runakuna p’achakunku, munaychakunku?
¿Allillanchu kanman paykuna jina p’achakuy icha manachu? ¿Imaraykutaq chhaynata ninki?
Jujniray gustoyoqña kanchis chaypas, Jehová Diospa sonqonpaq jinan p’achakunanchis munaychakunanchispas.
WAKIN RUNAKUNAN NINKU: “Noqaqa munasqayman jinan p’achakuni, manan pipas niwananchu imayna p’achakunaytaqa”, nispa.
Personaykiri, ¿imaninkitaq? ¿Imarayku?
IMATAN YACHAMURQANCHIS
Sichus allin yuyaywan p’achakusun, allin yuyaywantaq munay rikukunapaq imatapas ruwasun chayqa, Jehová Diosninchista runamasinchistapas respetasqanchistan rikuchisun.
Yuyarisun
¿Imaraykun Jehová Diospaq jinapuni p’achakunanchis munaychakunanchispas?
¿Bibliapi kaq mayqen yachachikuykunan yanapawasunman imaynata p’achakunanchispaq allichakunanchispaqpas?
¿Yanapanmanchu jujkunata imayna p’achakusqanchis allichakusqanchispas Jehová Diosta reqsinankupaq?
ASTAWAN YACHANAYKIPAQ
Allinta qhawarikuy ima nishansi qanmanta p’achakusqayki chayta. Chaypin yanapasunki kay qelqa.
¿Allinchu kanman cuerpopi imatapas dibujachikuy otaq ima marcatapas churachikuy? Chaymanta kaypi astawan yachay.
“¿Juchachu cuerpopi imatapas dibujachikuy otaq ima marcatapas churachikuy?” (jw.org paginapi leey)
¿Imaynatan Bibliapi yachachikuykuna yanapawanchis rijch’ayninchismanta ama nishuta llakikunanchispaq?
¿Imaynapin juj warmi yacharqan jujkunaq imaynachus allichakusqankuta respetayta? Chayta yachanaykipaq kay qelqata leey.
“Imayna p’achakusqaytan cambiapunay karqan” (¡Rijch’ariy!, 2003 watapi 22 diciembre)