9 SIFRÁ, PUA, AMRAM, JOKÉBED, MÍRIAM
Jehová Diospi iñisqankuraykun Moisesta cuidarqanku
JOSEPA wañupusqanmantaqa 60 wata masñan pasarqan. Egiptopi runakunaqa qonqapurqankun imaynatas Jehová Diosqa Josewan yarqaymanta paykunata salvarqan chayta. Chaymantapas chay tiempopaqqa juj faraonñan Egiptopi kamachikusharqan. Payqa nishutan cheqnikuq Israel runakunata, manchakusharqantaqmi askhayanankumantapas. Jehová Diosmi ichaqa Israel runakunata bendecisharqan, chaymi askhaman tukupusharqanku. Chayraykun Egipto runakunaqa Israel runakunata esclavota jina llank’achirqanku, nishutan sufrichiqkupas. Chaywanpas Israel runakunaqa astawanmi yapakusharqanku.
¿Imatan faraón ruwarqan chayta rikuspa? Warmikunata onqochiqkunawanmi rimarqan. Paykunan karqanku Sifrawan Puawan. Paykunatan kamachirqan nacemuq llapa qhari wawakunata wañuchinankupaq. ¿Imaynan chay warmikuna kashankuman karqan? ¿Imatan ruwankuman karqan? Chay iskaynin warmikunaqa runata manchakunankumantaqa Diostan manchakurqanku, chayraykun faraonpa kamachisqanta mana kasukurqankuchu. Chaymi Bibliapas nin: “Chay onqochiq warmikunan ichaqa mana kasukurqankuchu Egipto reypa kamachisqanta, aswanmi Diosta manchakusqankurayku jinallata qhari wawakunata kausachirqanku”, nispa. Paykunaqa tukuy atisqankutan ruwarqanku qhari wawakunata salvanankupaq. Chayta yachaspan faraonqa sinchita phiñakurqan, chaywanpas chay warmikunaqa pakallapin chayta ruwayta qallarirqanku. Chay ruwasqankumantan Jehová Diosqa chay iskaynin warmikunata bendecirqan, chaymi wawakunayoq kapurqanku.
Sichus wawata onqochiq warmikunapas, Moisespa tayta-mamanpas, hermananpas runata manchakunkuman karqan chayri, ¿iman pasanman karqan Moisés wawallaraq kashaqtin?
Faraonqa imachus munasqan mana ruwakusqanta reparaspan juj kamachikuyta orqomurqan. Paymi nirqan: “Llapa chayraq naceq hebreo qhari wawakunata Nilo mayuman wijch’uykuychis”, nispa. Chayta yachaspan Amramwan Jokebedwanqa mana ima ruwaytapas atirqankuchu. Paykunaqa ñan iskay wawayoqña kasharqanku, paykunan karqan Miriamwan Aaronpiwan. Chaymantan Jokebedqa jujmanta onqoq rijurirqan, paykunaqa allintan yacharqanku chay wawanku qhari kaqtinqa wañuchisqa kananta. Chhaynapunitaqmi karqan, chaymi paykunaqa tukuy atisqankuta ruwarqanku chay wawankuta pakanankupaq, manaña pakayta atispankutaq Jokebedqa papiro canastata jap’ispa breawan llut’arqan, jinaspa chay ukhuman kinsa killachayoq wawanta churaykurqan, chaytataq Nilo mayu cantopi wiñaq t’otora-t’otora chaupiman churaykurqan. Miriammi ichaqa karullamanta qhawasharqan imachus sullk’achanwan pasanqa chayta.
Chayllamanmi faraonpa ususinqa Nilo mayuta bañakuq jaykurqan. Chaypin rikurqan juj canastata, jinan juj warmi kamachinta kacharqan chay canastata apamunanpaq. Chaypin juj munay wawata waqashaqta tarirqan, jinan chay wawata khuyapayaspa uywakapuyta munarqan. Ichaqa yaqapaschá nisharqan “¡pitaq uywapuwanmanri!” nispa. Miriammi ichaqa mana manchakuspa phawaylla faraonpa ususinpa ladonman rirqan. Jinaspa nirqan: “¿Maskhampusaykichu juj hebreo warmita kay wawata uywapunasuykipaq?”, nispa. Faraonpa ususintaq “¡maskharampuway!” nirqan. Chaymi Miriamqa kaq ratu mamanman rirqan. ¡Jokebedqa may kusisqachá kasharqan chayta yachaspaqa! Mana piqpa jark’asqanmi wawanta cuidanan karqan, chay ruwasqanmantaqa pagapunanku imaraqmi karqan. Amramwan Jokebedwanqa tukuy atisqankutachá ruwarqanku chay wawankuman Jehová Diosmanta yachachinankupaqqa. Tiempowanqa wiñarqanmi chay wawankuqa, jinaspa faraonpa ususinman entregapurqanku, payqa Moisés nispan suticharqan.
Jehová Diosqa allin iñiyniyoq mana manchakuq kasqankumantan Amramta, Jokebedta, Miriamtawan bendecirqan. Amramwan Jokebedwanqa allintan yanaparqanku Miriamta Aarontawan Diospaq junt’aq sonqo kanankupaq. Chaymantapas rikurqankun imaynatas Jehová Diosqa Moisesta cuidarqan chayta. Ichaqa manan Bibliaqa willanchu Amramwan Jokebedwan rikurqankuchus icha manachus Moisés imayna runaman tukupusqanta chaytaqa (Éx. 6:20). Miriamwan Aaronwanmi ichaqa rikurqanku imayna runamanchus Moisés tukupurqan chayta. Rikullarqankutaqmi imaynatas Jehová Diospa yanapayninwan imaymanata Moisés ruwarqan chaytapas. Paykunaqa kinsantinkun yanapanakuspa allin iñiyniyoq mana manchakuq kapurqanku. Qatimuq yachachikuypin yachasunchis imayna uywasqas Moisés karqan, imaraykuchus Diosta serviytapas qallarirqan chayta.
Kay textokunata leey
¿Imaniwaqmi?
¿Imakunata ruwaspan Sifrapas, Puapas, Moisespa familianpas rikuchirqanku mana manchakuq kasqankuta?
Astawan t’aqwiriy
1. ¿Imatan ñaupa tiempokunamanta yachaq runakuna ninku Israel runakuna Egiptopi tiyasqankumanta? (g04 8/4 4, 5).
2. ¿Imatan yachaysapa runakuna ninku papiro plantamanta ruwasqa canastamanta? ¿Imaninkun faraón hebreo qhari wawakunata wañuchinankupaq kamachikusqanmanta? (g04 8/4 5, 6). A
Christine Osborne Pictures/Alamy Stock Photo
Imagen A: Kunankamapas ruwashallankun papiro nisqa plantamanta balsakunata.
3. ¿Imayna warmikunan karqanku Sifrawan Puawan, imaynatan Jehová Dios paykunata bendecirqan? (w03 1/11 8 párrs. 3, 4; it “Partera”). B
Imagen B
4. ¿Imaynatan Míriam kuraqña kashaspapas Dios sonqo kasqanta rikuchirqan? (ijwia yachachikuy 7 párrs. 14-18).
Imakunapin yanapawasunman
¿Imatan tayta-mamakuna yachankuman Amrammanta Jokebedmantawan?
¿Imatan kuraq wawakuna yachankuman Miriammanta? C
Imagen C
¿Imakunata ruwaspan rikuchiwaq Sifrá jina Pua jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq kaypi yachasqanchis runakuna kausarimpuqtinku?
Astawan yachanapaq
¿Imatan yachasunman Sifrawan Puawan faraonta mana manchakuspa Diospa munasqanta ruwasqankumanta?
“Jehová Diospa sonqonta kusichiq warmikuna” (w03 1/11 8, 9 párrs. 3-5)
¿Imaynatan Jehová Dios cuidan payta kasukuqkunata?