Ñuca munashcashna vistirinataca na saquingapaj munashpami na progresai usharcani

EILEEN BRUMBAUGHMI PAIPA CAUSAIMANDA PARLAN

ÑUCACA Antigua Orden de Hermanos Bautistas Alemanes nishca religionmanmi pertenicircani. Chai religiondaca dunkers nishpapashmi rijsin carca. Cai religionga amish y menonitas nishca religiongunaman parecidomi carca. Dunkers nishca religionga año 1708​pimi Alemania llactapi tiai callarirca. Chai tiempopimi gentecunaca Taita Diosmanda ashtahuan yachajuna munaita charishpa shuj shuj grupocunata callarichirca. The Encyclopedia of Religion libroca ninmi: “Gentecunaca Cristopa evangeliomanda yachajunatami minishtinajun nishpami crin carca” nin. Chaita crimandami ñuca religionmandacunapash shuj shuj llactacunaman misionerocunata cachashpa cai religionda mirachirca.

Shinami año 1719​pica cai religionmanda shuj grupoca Estados Unidos Pensilvaniaman chayamurca. Chai grupopa liderca Alexander Mackmi carca. Tiempohuanga shuj shuj iglesiacunapimi chai grupoca dividirirca. Alexanderpa yachachishcacunata catishpapash cada iglesiami diferenteta crin carca. Ñucaca shuj uchilla iglesiamanmi pertenicin carcani. Chaipica casi solo 50purallami can carcanchi. Ñucanchipaca Bibliata liina y iglesiapi imata mandashcata cazunami importantepacha carca.

Ñuca familiaca tucui shunguhuanmi cai religiondaca catin carca. Ñucapa bisabuelomanda callarishpami chai religiondaca catishcanchi. Ñucaca 13 añosta charishpami bautizarircani. Y carrocunata, tractorcunata, telefonocunata, radiocunata, cocinacunata, refrigeradoracunata y shuj cosascunatapash na utilizana cashcatami yachajurcani. Huarmicunaca sencillo sencillotami vistirin carcanchi. Ajchatapash na ruturishpami umataca siempre imahuanbash taparin carcanchi. Cutin jaricunaca largo barbascunahuanmi carca. Ñucanchi yaipica, mundomanda gentecunami a la moda ropacunata churajushpa, maquillarishpa y joyascunata churajushpa orgulloso cashcata ricuchin nin carcanchi. Chaimi ama paicunashna cangapaj ninanda esforzarin carcanchi.

Shinallata ñucanchi iglesiapica Bibliata respetachunmi yachachin carca. Chaimi ñucanchipaca micuna espiritual carca. Cada tutamandatami nara desayunashpallata salapi tandanajun carcanchi. Chaipimi ñuca taitaca Bibliapa shuj capítulo enterota liishpa huaquin yuyaicunata yachachin carca. Chai jipaca pai oracionda rurajujpimi ñucanchica tucuicuna cungurishpa uyan carcanchi. Ña ultimopica ñuca mamitami padrenuestro oracionda rezan carca. Cada tutamandata shina ruranataca siempremi shuyajun carcani. Porque chai horascunapimi familia enterota tandanajushpa Taita Diosmanda yachajun carcanchi.

Indiana Delphi pueblo lladollapimi shuj fincapi causan carcanchi. Chaipi fucushcatami, shujlla caballo aisajuj carretapi churashpa pueblopi jatungapaj rin carcanchi. Callecunapi y huasin huasinmi jatushpa purin carcanchi. Shinllita trabajashpami Taita Diosta sirvinchi yan carcanchi. Chaimandami ninanda trabajan carcanchi. Solo domingotallami na trabajan carcanchi. Porque chai punllaca trabajanaca prohibidomi carca. Shinapash fincapica ashtaca trabajomi tiarca. Chaimandami domingota na trabajanaca difícil carca.

Cazararcani y huahuacunatapashmi charircani

Año1963​pi ña 17 añosta charishpami James shuti runaguhuan cazararcani. Paipashmi ñuca religionmandallata carca. Paipa familiaca paipa bisabuelopa tiempomandapachami chai religionda catin cashcarca. Ishcandimi chai religiondaca tucui devoción catin carcanchi. Ñucanchi iglesiami único, verdadero iglesia can yan carcanchimi.

Año 1975​camanga ñami 6 huahuacunata charircanchi. Y 1983​pimi último churiguta charircanchi. Shujlla huarmi huahuagutami charircanchi. Paitaca segundo partopimi charircani. Paipa shutica Rebeccami can. Shinllita trabajashpami, ashagutalla gashtashpa sencilloguta causan carcanchi. Tanto iglesiapi como ñucanchi taitacuna Bibliamanda imata yachachishcatami ñucanchi huahuacunamanbash yachachingapaj esforzarircanchi.

Ñucanchi religionbica, como na gentecunapa shunguta rijsi usharin, gentecuna imashina vistirishcata ricushpami paicuna imashina persona cashcataca yachai usharin ninmi carcanchi. Shinaca, ajchata esponjachijcuna o sencillo ropacunapi jatun estampadocunata churajujcunaca orgullosocunami can ninmi carcanchi. Huaquinbica chai yuyaicunami Bibliapi yachachishcacunamandapash ashtahuan importante can carca.

Ñuca cuñadomi carcelman yaicurca

Año 1960 ña tucurijujpimi ñuca cuñado Jesseca cuartelman na ringapaj munaimanda carcelman apai tucurca. Paipashmi ñuca religionbillata viñashca carca. Paica carcelpimi testigo de Jehovacunataca rijsirca. Testigocunapashmi guerraman rinataca Bibliapica na yachachijunllu nishpa crin carca (Isaías 2:4; Mateo 26:52). Ñuca cuñadoca ashtacatami paicunahuanga Bibliamanda parlashcarca y paicuna ali ali gentecuna cashcatapashmi ricushcarca. Testigocunahuan Bibliata aliguta estudiashca jipami, ñuca cuñadoca testigo de Jehová tucungapaj bautizarirca. Chaita yachaj yachashpaca ninandami culirarcanchi.

Ñuca cuñadoca Bibliamanda imata yachajushcatami ñuca cusamanga parlashcarca. Y ñuca cusaguman seguidomi Villajun revistata y Rijcharipaichi revistacunata cachamun carca. Chai revistacunata liishpami ñuca cusa Jamesca ashtahuan Bibliamanda yachajungapaj munarca. Porque paica aunque Taita Diosta siempre sirvingapaj munashca cashpapash Taita Diosmanda carupimi sintirin carca. Chaimandami Taita Diosman quimirichun ayudaj cosascunataca tucui shunguhuan yachangapaj munan carca.

Ñucanchicunaca amish y menonita nishca religiongunataca mundomanda religiongunami can ninmi carcanchi. Shina cajpipashmi ñuca iglesiamanda ancianocunaca amish y menonitacunapa librocunata liichun mandarca. Ñuca taitaca Testigocunataca na ricunayachinllu carca. Shinallata Villajun y Rijcharipaichi revistacunatapash nunca na liinachu canguichi ninmi carca. Chaimi ñuca cusa chai revistacunata liijujta ricushpaca ninanda culiran carcani. Porque imapash falso yachachishcacunatami cati callaringa yanmi carcani.

Ñuca cusaca ñucanchi iglesiapi yachachishcacunataca ñana crijurcachu. Porque chai yachachishcacunaca Bibliapica na tiajurcachu. Domingota trabajana pecado cashcatapash Bibliapica na yachachijunllu ninmi carca. Por ejemplo, Antigua Ordenga huagracunaman yacuta ufiachinaca na imapash malochu can pero nali jihuata pilanaca nalimi can nishpami yachachin carca. Shinapash iglesiamanda ancianocunaca Bibliapi maipipacha shina yachachijushcataca na ricuchi ushanllu carca. Chaimi ñucapash chai yachachishcacunamandaca dudai callarircani.

Ashtaca huatacunatami Taita Diospa iglesiapi cashcata crishpa causarcanchi. Y chai religionda saquishpa ima pasanatapash alimi yacharcanchi. Chaimi chai religionda saquinaca dificilpacha carca. Pero Bibliamanda cabalta na yachachij religionbi catingapaca ñana munarcanchichu y ñucanchi concienciapipash ñana ali sintirinajurcanchichu. Chaimandami 1983​pica iglesia enteroman ñucanchi cartata liichun, imamanda chai religionda saquijushcata explicashpa shuj cartata escribircanchi. Shina rurashcamandami chai religionmanda llujchishpa cacharca.

Verdadero, ali religiondami tarircani

Chai punllamandapachami verdadero, ali religionda mascai callarircanchi. Imata predicashcata pactachishpa causaj religiondami mascanajurcanchi. Chaimi guerracunapi participaj religiongunamanga na rircanchi. Sencillo ropata churajuj y humildeta causaj gentecunami na mundomanda gentecunashna can yashpami “sencillo” religiongunata mascan carcanchi. Shinami entre 1983 y 1985​pica menonitas, cuáqueros y shuj sencillo religiongunamanbash rishpa llacta enterota purircanchi.

Chai tiempopimi testigo de Jehovacunaca ñucanchi fincaman shamushpa visitai callarirca. Ñucanchi fincaca Indiana Camden pueblopimi carca. Testigocunata chasquishpapash siempremi paicunataca Bibliamanda textocunataca King James Version Bibliamanda liipai nin carcanchi. Paicuna guerracunapi na participajta yachashpami paicunataca respetan carcani. Pero yanmi carcani paicunaca na sencillota vistiringapaj munanllu y na cai mundomanda diferente cangapaj munanllu nishpa. Chaimi paicunataca na ashta uyangapaj munan carcani. Orgullosocuna caimandami gentecunaca diferenteta vistirin y charishca cosascunamandami gentecunaca orgullosocuna tucun yanmi carcani.

Salón del Reinoman ñuca cusa huahuacunata pushashpa ri callarijpica ninandami culirarcani. Paica jacu nihuanmi carca. Pero na ringapaj munanllu carcani. Shuj punllaca nihuarcami: “Testigocunapa yachachishcacunahuan na tucuipi de acuerdo cashpapash paicuna imashina tratarijtaca canba ñavihuanbacha ricungapaj rishun” nihuarcami. Ñuca cusaca, paicuna imashina tratarijta ricushpami paicunataca respetan carca.

Shina nijujpillatami, na ashta ringapaj munashpapash ari nircani. Salón del Reinoman rishpaca, sencillo ropaguta y gorroguta churajushpami rircani. Ñuca huahuacunapash sencillo ropaguta churajushpa, lluchu chaquigucunami riparca. Shinapash Testigocunaca saludangapaj quimirishpami ñucanchitaca juyaihuan tratarca. Chaimi ñucaca pensarcani, paicunamanda diferente cajpipashmi ñucanchitaca ali chasquin”.

Juyaihuan tratarijta ricushpaca ninandami gushtarcani. Pero ricuitallami ricun carcani. Chaimi canticocunata candajpipash, na candashpa tianman quidan carcani. Reunionguna tucurijpica, imacunatalla nali ruranajujta y Bibliamanda textocunata imamanda shina yachachijtami cutin cutin tapun carcani. Na aliguman tapujpipash, tucuicunallatami ñucamandaca tucui shunguhuan preocuparin carca. Shinallata chai tapuicunatallata shujta shujta tapujpipash tucuicunallatami lo mismota nin carca. Huaquinbica paicuna imata contestashcataca shuj hojagupimi escribin carca. Chaimi ñucaca chaicunata jipaguman repasan carcani.

Año 1985​pimi Tennessee llactapi Memphis nishca pushtupi ricungapalla testigo de Jehovacunapa asambleaman rircanchi. Ñuca cusaca largo barbastami charirca. Y gulpimi sencillo ropaguta churajushpa rircanchi. Asambleapi cashpa samana horaspica tauca taucacunami saludangapaca quimirin carca. Samangapapash tiempotaca casi na charinllu carcanchi. Paicuna ñucanchita juyaihuan chasquijpi y ñucanchimanda preocuparijta ricushpami ninanda cushijurcanchi. Shinallata paicunaca maijan llactapi cashpapash lo mismotami reuniongunapica yachajun carca. Chaimi paicuna shinapacha unido cajta ricushpaca manllarishpa, cushijushpa ricun carcanchi.

Testigocuna ninanda preocuparijta ricushpami ñuca cusaguca paicunahuan Bibliata estudiai callarirca. Pero ciertota o na ciertota yachachijujta ricungapami paica tucuita ali ali estudian carca (Hechos 17:11; 1 Tesalonicenses 5:​21). Shinami tiempohuanga Bibliamanda cabalta yachajujushcata cuenta japirca. Pero ñucaca todavía ñuca shungu ucupica nara seguro carcanichu. Porque ñucaca alita rurangapaj munashpapash, cai mundopi gentecunashna cangapaca na munarcanichu, ni “moderno” cangapapash na munarcanichu. Pero tiempohuanga Bibliata paicunahuan estudiai callarircanillatami. Shinapash ama umachi tucungapami Bibliapi textocunataca aliguta comparashpa ricun carcani. Chaimi shuj chaquipica King James Version Bibliahuan cutin chaishuj chaquipica Traducción del Nuevo Mundo Bibliahuan tiajun carcani.

¿Imashinata convincirircani?

Testigocunahuan estudiashpami, ñucanchi Taita Diosca na shuj Trinidad cashcata sino shujlla, único Taita Dios cashcata yachajurcanchi. Shinallata yachajurcanchimi que gentecunaca na huañuj almataca na charishca sino gentecunallata alma cashcata (Génesis 2:7; Deuteronomio 6:4; Ezequiel 18:4, Traducción del Nuevo Mundo [TNM]; 1 Corintios 8:​5, 6). Y shinallata yachajurcanchimi que infierno nishpaca gentecunata rupachina pushtumandaca na parlajushcata sino huañushcacunata pambana pushtumanda parlajushcata (Job 14:13; Salmo 16:10; Eclesiastés 9:​5, 10; Hechos 2:​31). Infiernomanda Biblia imatapacha yachachijta intindishpaca ninandami cushijurcani. Porque ñucapa punda religionbica, infierno imapacha cajtaca nipi na de acuerdo quidanllu carca.

Pero Testigocuna ciertopacha verdadero, ali religión cajtaca na cri usharcanichu. Paicunaca na “sencillota” causanllu yashpami paicunataca mundomanda gentecunatashna ricun carcani. Shina pensashpapash, Jesús mandashcashna Taita Diospa Gobiernomanda tucui gentecunaman predicanajujtaca na negaita usharcanichu. Chaimi ñucaca imata crinatapash na atinashca carcani (Mateo 24:14; 28:​19, 20).

Chai tiempopica Testigocuna juyaita ricuchijpimi paicunamanda ashtahuan yachangapaj munarcani. Congregacionmanda gulpicunami ñuca familiamandaca pendiente carca. Tauca turi ñañacuna visitangapaj shamujpimi paicunaca ali personacuna cajta cuenta japircanchi. Huaquin turiñañagucunaca lecheta y lulunda randij tucushpallapashmi visitangapaj shamun carca. Ñami Bibliata estudianajun nishpa ñanda yalishpa rinallapa randica siempremi visitashpa huasita yalin carca. Paicuna shina visitangapaj shamujpimi paicunata ashtahuan rijsishpa ñucanchimanda ciertopacha preocuparishcata y juyashcataca ñucanchipacha ricurcanchi. Shina visitachunmi ñucanchicunaca minishtinajushcarcanchi.

Shuj congregaciongunamanda turiñañacunapashmi ñucanchitaca ali ali tratan carca. Imashinapacha vistirinata na atinashca purijujpica, ladolla congregacionmanda Kay Briggs ñañagumi visitaj shamuhuarca. Paica sencillotami vistirin carca y maquillarinatapash na gushtanllu carca. Chaimi paihuanga tranquilo, confianza parlai usharcani. Cutin shuj viajeca Lewis Flora turigumi visitaj shamuhuarca. Paipashmi “sencillo” causanata yachachij religionbi viñashcarca. Paica ñuca imashina sintirijujta cuenta japishpami, ñuca ali sintirichun shuj carta de 5 hojasta cachamuhuarca. Ñucata llaquishpa shina escribishcamandaca huacaitapashmi huacarcani. Chai cartagutaca cutin cutinmi liishcani.

O’Dell shuti superintendente turigutami Isaías 3:​18-​23 y 1 Pedro 3:​3, 4​pi shimicunata explicahuai nishpa cashna nircani: “¿Nachu cai textocunapica Taita Diospa ñaupapi ali ricuringapaca sencillo ropaguta churajuna cashcata nijun?”. Chaimi chai turiguca, Isaías 30:20​pi ñuca Biblia imata nijujta yachashpa cashna nihuarca: “Gorroguta churajunaca ¿malochu can? ¿O ajchata shambarinaca pecadochu can?” nishpa tapuhuarca. Ñuca punda religionbica, huarmi huahuacunataca ajchata shambachinmi carcanchi y gorrocunatapashmi huarmicunaca churajun carcanchi. Chaipimi vistirinamanda Biblia imata yachachijujtaca por fin intindircani.

Huarmicuna ajchata ruturinata na totalmente de acuerdo cashpapash asha ashami convincirishpa catijurcani. Chaipica ancianocunami huaquin huarmicunapaca ajchaca largotami viñan y cutin shujcunapaca na largota viñanllu nishpa intindichihuarca. ¿Largo ajchata charishcamandallachu chaishuj huarmicunamandaca ashtahuan mejor can? nishpami tapuhuarca. Shinallata imashina arreglarinata yachachun conciencia imashina ayudajtapashmi intindichihuarca. Y huasipi liichunbashmi informacionda cuhuarca.

Imata yachajushcatami pactachi callarircanchi

Imata mascanajushcataca tarircanchimi. Jesusca nircami: ‘Juyarishpa causanajujta ricushpami, ñucapa yachajujcuna cashcataca tucuicuna rijsinga’ (Juan 13:35). Testigo de Jehovacuna ciertopacha juyaita ricuchijtaca seguromi carcanchi. Pero ñucanchi churi Nathan y ñucanchi ushi Rebeccapaca cai tiempoca na facilchu carca. Porque paicunaca ñucanchi punda religionda aceptashpa y chai religionbi bautizarishcacunami carca. Pero ñucanchicuna Bibliata yachachijpi y Testigocuna paicunata ninanda juyajpimi Bibliapi yachachishcacunaca por fin paicunapa shunguman chayarca.

Rebeccaca siempremi Taita Dioshuan ali amiga cangapaj munarca. Chaimi Taita Dios na destinajta yachashpaca ashtahuan facillla Taita Diostaca mañai usharca. Shinallata Taita Diosca na shuj Trinidad cashcata sino shujlla persona cashcata y ciertopacha tiajtami yachajurca. Shinallata paishnalla cai ushashcata yachashpaca ashtahuanmi Taita Diostaca juyarca (Efesios 5:​1). Taita Diosta mañajushpapash, ñana antiguo shimicunata utilizashpa mañana cashcata yachashpaca ninandami cushijurca. Taita Diosta imashina mañana cashcata y gentecuna para siempre shuj paraíso alpagupi causana cashcata yachashpapash Taita Diospa alipacha amigashnami sintirirca (Salmo 37:29; Apocalipsis 21:​3, 4).

Tauca bendiciongunatami charishcanchi

Ñuca y ñucapa cusagu shinallata ñucanchi churigucuna George, Daniel y Johnga año 1987​pi bautizarishpami testigo de Jehovacuna tucurcanchi. Ñucanchi chaishuj churi Harleyca año 1989​pimi bautizarirca y chaishuj churi Simonga año 1994​pimi bautizarirca. Ñucanchi familiaca Jesús mandashcashnami familia entero Taita Diospa Gobiernomanda ali villaicunataca tucui shunguhuan predicanchi .

Ñucanchi churicuna Nathan, George, Daniel, John, Harley y ñucanchi ushi Rebeccaca Estados Unidospi testigo de Jehovacunapa sucursalpimi sirvirca. Georgeca todavía chaipi sirvijunrami. Ña 14 añostami chaipi can. Cutin ñucanchi churi Simonga año 2001​pi estudiocunata tucuchishpami Estados Unidos sucursalpi chairalla sirvi callarirca. Tucuilla ñucanchi churicunami testigo de Jehovacunapa congregaciongunapica ancianocuna o siervo ministerialcuna can. Ñuca cusaca Misuri llactapi Thayer nishca pushtu congregacionbimi anciano can. Cutin ñucaca predicashpami ocupado yalini.

Ñami quimsa nietogucunata charipanchi. Paicunaca Jessica, Latisha y Caleb shuticunami capan. Paicunapa taitamamacuna Jehová Diosta juyachun yachachinajushcata ricushpaca ninandami cushijupanchi. Ñucanchi familiata Jehová Dios paipaman quimirichun ayudashcamandaca ninandami cushijunchi. Shinallata, paipa shutita charij y juyaita ricuchij cristianocunata tarichun ayudashcamandapash cushijushcami capanchi.

Taita Diospa ñaupapi ali ricuringapaj munashpapash, Biblia imata nijta catinapa randi gentecunapa costumbrecunatara catij gentecunataca alimi intindini ushapani. Cunanbica huasin huasin purinchirami. Pero na verduracunata jatushpachu huasin huasin purinchi, sino Taita Diospa Gobiernomanda ali villaicunata predicashpami huasin huasin purinchi. Y shina rurashpaca cushijushcapachami capanchi. Jehová Diospa shutita charij gentecuna ñucanchita juyaihuan, pacienciahuan ayudashcata yarishpaca huacaitapashmi huacanayan.

[Foto]

7 añosta charishpa y ña joven cashpaca cashnami carcani

[Foto]

James, George, Harley y Simonga sencillogutami vistirin carca

[Foto]

Shuj periodicopimi verduracunata jatungapaj rijujta fotota tomahuashcarca

[Reconocimiento]

Journal and Courier (Lafayette, Indiana)

[Foto]

Cunanbica caimi ñuca familia can