Imata munashcata yaipi charipai
“Tabacota fumajcuna chai viciota saqui ushachunga, chai viciota saquingapapacha decidinami ayudan” (Stop Smoking Now! [¡Deje de fumar ahora!]).
TABACOTA fumana viciota saquingapaj munashpaca, chai viciota saquingapaj decididopachami cana capangui. Pero chaipaca ¿imata ayudanga? Tabacota saquishpa ima beneficiocunatalla chari ushashcata pensarinami ayudanga.
Culquitapashmi ahorrai ushapangui. Cada punlla shuj cajetillata fumajpica, huatapica casi mil dolarmi gashtarin. Nepal llactamanda Gyanu shuti jariguca ninmi: “Ashtaca culquita tabacopilla gashtajushcataca na cuenta japishcarcanichu”.
Ashtahuan cushillami causai callaripangui. Sudáfrica llactamanda Reginaca ninmi: “Tabacota fumanata saquishcamandapachami ali causai callarircani” nishpa. Tabacota fumanata saquishpaca ashtahuan aliguta mutijita usharin, micunagu ima sabor cashcatapash ashtahuanmi sintirin. Y shinallata ashtahuan fuerzatapashmi chariringa.
Quiquinba saludpashmi mejorashpa catinga. “Fumanata saquinaca jari o huarmi cajpipash o ima edadta charijpipash saludpica ninandami ayudan” (Centros para el Control y la Prevención de Enfermedades, de Estados Unidos).
Quiquinbillatapashmi ashtahuan confiaita ushapangui. Dinamarca llactamanda Henning shuti jovenga ninmi: “Tabaco ñucata controlachun na munaimandami chai viciotaca saquircani. Chaita saquishpami aliguta causai usharcani”.
Quiquinba familia y amigocunapashmi beneficiaringa. “Tabacota fumajpica quiquinba ladopi caj gentecunapa saludpashmi afectarin. Huaquin estudiashcacunaca tabacomanda llujshishca cushni ashtaca gentecunatami pulmonbi cancerta cushpa, corazonbi unguita cushpami huañuchishca ninmi” (Sociedad Americana contra el Cáncer).
Taita Diospa ñaupapipashmi ali ricuripangui. ‘Juyashca huauquicuna [...] ñucanchi cuerpota [...] mapayachij cosascunamandaca limpiarinami capanchi’ (2 Corintios 7:1, TNM). ‘Cangunapa cuerpota y cangunapa causaitaca Taita Diosman shuj sacrificiota caranshna cupaichi’ (Romanos 12:1, TNM).
España llactamanda Sylviaca ninmi: “Ñucanchi cuerpota mapayachij cosascunata Taita Diospa na ricunayachin cashcata yachajushpami tabacota saquingapapacha decidircani”.
Shinapash tabacota fumanata saquina munaita charinallaca na suficiente canllu. Familiarcunapa y amigocunapa ayudapashmi minishtirin. Shinapash paicunaca ¿imashinashi ayudaita ushan?