Shujcunapa ayudata mascapai
“Shujlla cajpi, pipash macashpa mishajpica, ishcai tucushpami shinlli tucun” (Eclesiastés 4:12).
SHUJCUNAPA ayudata charishpaca ima cajpipash mishai usharinmi. Shina cuendallatami fumana viciota saquingapaj munajushpaca familiapa y amigocunapa ayudatami mascana capangui.
Fumana viciota saquishca gentecunapa ayudata mascanaca ¿nachu ali canman? Ari, paicunaca quiquinda ali ali intindimandaca ayudangallami. Por ejemplo, Dinamarca llactapi causaj Torben huauquiguca “shujcuna ñucata ayudajpimi ninanda cushijurcani” ninmi. Shinallata India llactapi causaj Abraham huauquigupashmi cashna nin: “Ñuca familia y huauquipanicuna juyaihuan ayudajpimi fumana viciotaca saquita usharcani” nishpa. Shinapash huaquinbica familiapa o amigocunapa ayudallaca na suficiente canllu.
Bhagwandas shuti jariguca ninmi: “27 huatacunatami tabacota fumashpa causarcani. Shinapash Bibliapi ñucanchi cuerpota mapayachin cashcata yachajushpami fumana viciotaca saquingapaj dicidirircani. Chaimi asha asha saquingapaj esforzarircani. Hasta punda charishca amigocunamandapashmi caruyarcani. Chaita saquingapaj munaimandaca doctorcunapa ayudatapashmi mascarcani. Pero ayudacunata mascashpapash saquitapacha saquitaca na ushajurcanichu. Chaimi shuj tutaca mejor oracionda rurashpa Jehová Dioshuan parlarcani. Paimanga chai viciota saquingapapacha ayudahuai nishpa ninanda rogarcani. Shinami chai viciotaca saquita usharcani”
Fumanata saquingapaj esforzarijujpi imapash tentación ricurijpi ama chaipillata cutin urmangapaca, cunanmandallatami ña preparado cana capangui. Cati temapimi imashina prepararinata yachajupashun.
[Recuadro]
¿FUMANATA SAQUINGAPACA PASTILLACUNATACHU UFIANA CANI?
Fumanata yachaj gentecunata ayudangapaca parches de nicotina nishcami tian. Y chaita jatujcunaca ninandami charijyashca. Pero quiquin caita utilizangapaj munajushpaca cai cati tapuicunapi pensaripai.
Chai parcheta utilizashpaca ¿ima beneficiocunatallata charigrini? Huaquin tratamientocunaca fumana ansiata calmachunmi ayudan. Shinapash chaita tratamientota asha tiempogutalla saquijpica chai munaica ashtahuan fuertemi tucun.
Chai parcheca ¿imacunapillashi ñucataca afectanga? Huaquin medicamentocunata ufiajpica lanzachin, depresiondapash cun y hasta suicidarina pensamientocunatapashmi cun. Huaquingunaca tratamiento de reemplazo de nicotina nishca tratamientotami catin. Pero chai tratamientoca fumajuj cuendallatami saludpica afectan. Cai tratamientocunata catij gentecunaca tabacopi tiashca nicotinapaca adictomi tucun.
¿Shuj tratamientocunapash tianlla? Fumanata saquishca gentecunata tapujpica, mayoriami imapash pastillacunata na ufiashpa o imapash tratamientocunata na catishpallatami fumanataca saqui usharcanchi nircami.