Adanbash, Evapash Diostaca na cazurcachu

Shuj punllaca Eva pailla cajpimi shuj culebra parlashpa cashna tapurca: ‘¿Ciertopachachu Diosca jardinbi tiashca tucui quirucunamandaca na micunachu canguichi nishpa nirca?’ Shina tapujpimi huarmica cashna nirca: “Jardín de Edenbi tiashca quirucunapi fucushcacunataca micuita ushanchimi. Pero jardín chaupipi tiajuj quirupi fucushcataca na micunachu canchi”. Porque Taita Diosca “chai quirumanda micushpaca huañunguichimi” nircami. Shina nijpimi chai culebraca huarmitaca cashna nirca: “Chaica na ciertochu can. Cangunaca nimamanda na huañunguichichu. Chai quirumanda micushpa cangunaca Dioshnami tucunguichi” nircami. ¿Chaica ciertochu carca? Na. Chaica llullami carca. Shinapash Evaca culebratami crirca. Chai yurapi frutata ricujushpallatami micungapaj munarca. Shinami ashata micushpa Adanmanbash chai frutata micuchun curca. Adán Diosta na cazushpaca huañuna cashcataca alimi yacharca. Shina yachashca jahuapash chai frutata micurca.

Chai punllallatami Jehová Diosca Adanda y Evataca imamandata na cazuhuarcanguichi nishpa tapurca. Evaca culebratami culparca. Cutin Adanga Evatami culparca. Jehová Diosca paicuna na cazushcamandami Jardín de Edenmanda llujchishpa cacharca. Shinallata jardín de Edenman Adán y Eva nunca ama yaicuchunmi ishcai angelcunata shayachirca. Shinallata siempre muyujuj punchapamba espadatapashmi chaipica churarca.

Evata llullashpa pandachishcamandami Jehová Diosca culebrataca castigagrijurca. Evahuanga culebrapachaca na parlajurcachu. Jehová Diosca culebracuna parlachunga na rurarcachu. Shuj nali angelmi Evata umachingapaj munashpa culebrata parlachirca. Chai nali angelca Satanás, Diablomi can. Jehová Dios shamuj punllacunapi Diablota tucuchijpica Diabloca gentecunataca ñana umachishpa catingachu.