Israelitacunaca Diospa contrami tucurca

Tiempohuan israelitacuna desiertopi cajpica Coré, Datán, Abiram, 250 israelitacunapashmi Moisespa contra tucushpami Moisestaca: “Cangunaca, na ashtahuan ñucanchita mandanachu canguichi”. Mandaj Diospalla tandanajushca israelcunataca, ¿imashpata cangunalla mandashpa causanajunguichi? Jehová Diosca na cangunahuanllachu can, ñucanchicunahuanbashmi can ninajurca. Jehová Diosca chaita uyashpaca ninanda nalicachishpami, israelitacuna paipa contra tucujushcata ricurca.

Moisesca Coré runata y paita catijcunatapashmi: ‘Rupajuj carbonda apangapaj bandejacunata japichi. Chaipica, cayapaca ninata churashpa, Mandaj Diospaj ñaupajpi inciensota churanguichi. Chaipica maijandami Mandaj Dios agllajpimi, chai runaca paipajlla cachun shicanyachishca canga’ nirca.

Cayandi punllaca Corepash, paita catij 250 gentecunapashmi tabernáculo huasipi Moiseshuan tandanajurca. Chaipimi paicunaca sacerdotecunashna inciensota rupachinajurca. Chaita ricushpami Jehová Diosca Moisesta, Aarondaca: ‘Coré runamanda, paita catij runacunamandapash anchurichi’ nirca.

Coré, tabernáculo huasiman rijpica Datán, Abiram y paicunapa familiapash na ringapaj munarcachu. Jehová Diosca israelitacunataca: “Coré, Datán, Abiram causanajuj carpa muyundi ladomandaca anchurichi” nircami. Chaimi israelitacunaca uchalla anchurirca. Cutin Datán, Abiram y paicunapa familiacunaca ‘Ilujshishpa, paicunapa carpa pungupimi shayanajurca’. Chaipimi na cazujcunataca na yashcapi alpa pascarishpa langarca. Shinallata tabernáculo huasipica jahua cielomanda ‘nina Ilujshishpami, inciensota cushnichinajuj 250 runacunata, Coretapash rupachishpa tucuchirca’.

Chai jipaca Jehová Diosca Moisestaca: ‘Paicunapuramandaca, paicunapa taitacunapa cada huasi ucupuramanda shuj vara caspita japingui. Chai vara caspicunapica, paicunapa shuticunata escribingui. Levipa miraicunapa varapica, Aaronba shutita escribingui. Chaicunataca, ñucahuan tuparina jatun carpapi churangui. Chaipillatami, ñucata sirvichun maijanda ñuca agllashca runapa vara caspica sisanga’ nircami.

Cayandipaca Moisesca tucuilla vara caspicunatami israelitacunata ñaupaman pushajcunaman ricuchirca. Aaronba varapica sisashpa, almendra muyucunapashmi fucushca carca. Shinami Jehová Diosca sumo sacerdote cachun Aaronda agllashcata ricuchirca.