Jesusca Diospa Reinomandami villachirca

Bautizarishca jipallami Jesusca: “Jahua cielopi Taita Diospa Gobiernoca ñami chayamushca” nishpa villachi callarirca. Jesús Galilea llactaman, Judea llactaman rijpica paipa discipulocunapashmi paihuan rirca. Jesús Nazaret puebloman tigrashpaca sinagoga huasipimi, Isaías escribishca rollocunata pascashpa cashna liirca: ‘Jehová Diosmi ñucamanga paipa espíritu santota cushpa ali villaicunata tucui gentecunaman predicachun agllahuashca’ nircami. Shina nishpaca ¿imatata ningapaj munarca? Gentecunaca Jesús milagrocunata rurajtami ricungapaj munarca. Shinapash Jesusca milagrocunata rurangapallaca na espíritu santotaca chasquircachu. Ashtahuanbachaca Diospa Reinomanda ali villaicunata villachingapami espíritu santotaca chasquirca. Chaimandami Jesusca: ‘Taita Dios escribichishca profeciaca cunanmi pactarijun’ nirca.

Jesusca mar de Galileaman rishpami chaipi chuscu jaricuna pescadocunata japinajujta ricurca. Paicunataca Jesusca: “Ñucata catihuaichi, ñucami cangunataca pescadocunata japishpa tandachinshna, gentecunata tandachinata yachachisha” nirca. Chai jaricunaca Pedro, Andrés, Santiago, Juanmi carca. Paicunaca pescadota japishpa trabajanata saquishpami Jesusta catishpa rirca. Shinami Jehová Diospa Reinomanda tucuilla Galilea llactapi villachingapaj rirca. Sinagoga huasicunapi, mercadocunapi, callecunapipashmi villachirca. Maiman rijpipash ashtaca gentecunami catinajurca. Jesús villachijushcataca tucui ladocunapimi yachaj chayarca. Siria llacta carupi cajpipash, chaipipashmi yachaj chayarca.

Jipamanga Jesusca paipa discipulocunamanmi, ungushcacunata jambichun, ayacunata llujchichunbash poderta curca. Shujcunaca shuj shuj llactacunapi, pueblocunapi villachingapami cumbarca. Shinallata Diosta sirvij huarmicunapashmi Jesusta, paipa discipulocunatapash ayudanajurca. Paicunapurapica María Magdalena, Juana, Susana y shuj huarmicunapashmi carca.

Jesusca paipa discipulocunaman yachachishca jipami villachichun cacharca. Galilea llactapi villachinajujpimi, ashtacacuna Jesuspa discipulocuna tucushpa bautizarinajurca. Ashtaca gentecunami Jesusta catijcuna tucungapaj munarca. Chaimandami Jesusca paicunataca cosechangapaj listo pambahuan compararca. Jesusca: “Jehová Diostaca, cozechadorcunata ashtahuan cachamupai nishpa rogana canguichi” nirca. Chai jipaca, paipa discipulocunamanda 70puracunata agllashpami ishcai ishcai villachichun Judea llactaman cacharca. Paicunaca tucuicunamanmi Diospa Reinomanda villachinajurca. Shinallata tucuicunami ima pasashcata Jesusmanga parlangapaj munanajurca. Shina villachinajushcataca Diabloca na jarcaita usharcachu.

Jesusca pai cieloman tigrashca jipapash paipa catijcuna villachishpa catichunmi tucuita listo saquirca. Jesusca: Diospa Reinomanda ali villaicunataca tucuicunaman villachinguichi. Diospa Shimimanda yachachishpa bautizanguichi nirca.