Marzo

Paraíso alpagupica pobre gentecuna, llaquicunapash na tiajpimi nimata na manllashpa causan cashca. Chaitami Génesis libropa callari capitulocunapica ricuchin. Adanbash, Evapash libre causaitami charirca. Paicunaca ungüi illaj, micunamanda, trabajomandapash na preocuparishpami causarca. Huañuitapash na huañuna carcachu. Shina causaitaca cunanbi gentecunaca yaitallapash na yai ushanllu (Gén. 1:27-29; 2:8, 9, 15). Caitami yarina capanchi. Jehová Diosllami tucuita decidita ushan. Jehová Diosmi tucuita rurarca. Paillami Tucui Ushaita charij Taita Dios can (1 Tim. 1:17; Apoc. 4:11). Angelcunapash, cai Alpapi gentecunapash na tucuita decidi ushanllu. Jehová Dioslla Tucuita Mandaj caimandami gentecunapa ima ali cajta, imata minishtijta ricushpa mandai ushan. Chaitami yarina capanchi. Callarimandapachami Jehová Diosca gentecunapa ima ali cajta ricushpa paipa mandashcacunata cushca. w18.04 pág. 4 párrs. 4, 6

Diablopa mundopi causana shinlli cashcata, aguantachun Jehová Dioslla ayudai ushashcataca alimi yachapanchi (2 Cor. 4:7, 8). Jehovata na rijsi gentecunapi pensaripashunchi. Paicunapaca Jehovapa ayudata na charimandami cai mundopi causanaca ashtahuan shinlli can. Chaimi ñucanchicunaca Jesushna paicunata llaquishpa juyaihuan ‘ali villaicunata’ villachingapaj esforzaripanchi. Pacienciahuan Bibliamanda yachachipashunchi. Ñucanchica Bibliamanda yachachishcacunataca alimi yachapanchi. Shinapash shujcunaca Bibliamanda yachachishcacunataca tal vez primera vezmi uyanajunga. Shinallata shuj gentecunaca paipa crishcacunata saquingapaca na munanllu. Paicunaca paicunapa crishcacunata saquishpaca familiata, costumbrecunata, paicunapa comunidadta ladoman saquinajunchi yashpami pensarin. Pitapash paipa crishcacunata saquichun ninapa randica Bibliapa yachachishcacunata alicachichunrami ayudana capanchi. Shina rurajpica paipa panda crishcacunata saquingapashchari. Pipash paipa panda crishcacunata saquichunga tiempomi minishtirin (Rom. 12:2). w19.03 pág. 22 párr. 10; págs. 23, 24 párrs. 12, 13

Jehová Diosca Jesusta cushichirca, paita ninanda juyashcatapashmi ricuchirca. Jehová Dioshnami ñucanchicunapash shujcunata cushichingapaj, paicunata juyashcata ricuchingapaj esforzarina capanchi (Juan 5:20). Shuj juyashca ali amigo o familia imagutapash rurashcamanda felicitajpi, ñucanchita juyashcata ricuchijpica cushillami sintiripanchi. Shinallatami huauquipanicunata, ñucanchi familiatapash cushichina, paicunata juyashcata ricuchina capanchi. Shina rurashpaca paicuna Jehovapi tucui shunguhuan crichun, Jehová Diosta ama saquichunmi ayudashun. Taitamamacunapashmi huahuacunata cushichingapaj, paicunata juyashcata ricuchingapaj esforzarina can. Shinami huahuacuna Jehovata tucui shunguhuan sirvichun ayudanga. “Canmandami ninanda cushijuni” nishpaca Jehová Diosca paipa munaita Jesús pactachinata seguro cashcatami ricuchijurca. Jehová Diosca Jesuspimi confiarca. Shinallatami, ñucanchicunapash shamuj punllacunapi Jehovapa munaita Jesús pactachinata tucui shunguhuan confiana capanchi (2 Cor. 1:20). Jesús Jehová Diosta tucui shunguhuan sirvishcapi pensarishpami paimanda ashtahuan yachajungapaj, paipa chaquita catingapaj munapanchi (1 Ped. 2:21). w19.03 pág. 8 párr. 3; pág. 9 párrs. 5, 6

Pipash shuj valishca regalota carajpica tucui shunguhuanmi agradicinchi. Jehová Diosca israelitacunata Egiptomanda llujchishpami shuj regalota caraj cuenda libre causaita curca. Shinapash Egiptomanda llujshishca huaquin quillacuna jipallami, Egiptomanda micunacunata munashpa Jehová Dios carashca micunamanda quejari callarirca. Egipto llactaman cutin tigrangapami munanchi ninajurca. Israelitacunapaca pepinocunata, sandiacunata, puerro nishcacunata, cebollacunata, ajoscunata micunami Jehová Diosta adoranamandaca ashtahuan yali valishca carca. Chaimi Jehová Diosca israelitacunahuanga ninanda culirashcanga (Núm. 11:5, 6, 10; 14:3, 4). Caimandaca ¿imatata yachajupanchi? Jesuspa causaita cushpami Jehová Diosca tucuicunaman shuj libre causaita curca. Chai causaita valichishpa causachunmi apóstol Pabloca Jesusta ali catijcunataca animarca (2 Cor. 6:1). w18.04 págs. 10, 11 párrs. 6, 7

Tucuicunallatami ali tratachun, juyachun munapanchi. Shinapash gentecuna ñucanchita na juyajpi, nali tratajpimi llaquilla sintiripanchi. Shina sintirimandami huaquinbica imapapash na sirvinichu nishpa pensai callarishcanchi. Jehová Diosca alimi yachan ñucanchicunata ali tratachun munashcata (Sal. 33:5). Jehová Diosca tucuicunatallatami juyaihuan tratan. Chaitaca tucuicunallatami seguro cana capanchi. Chaitaca punda tiempopi israelitacunaman paipa leyta Moisesman cushpami juyashcata ricuchirca. Moisesman cushca Leycunamanda yachajushpaca Jehová Dios ñucanchicunata juyashcatami cuenta japipanchi (Rom. 13:8-10). Moisesman cushca Leycunapica ¿imashinata juyaihuan yachachishcata ricuchirca? Jehová Diosca imata rurashpapash siempremi juyaihuan rurashcata ricuchin (1 Juan 4:8). Moisesman cushca Leycunaca 600 yali leycunami carca. Shinapash chai leycunamandaca ishcai leycunami ashtahuanbachaca minishtirishca carca: Taita Diosta juyana, shuj gentecunatapash juyana (Lev. 19:18; Deut. 6:5; Mat. 22:36-40). Chai Leycunaca Taita Dios ninan juyaj cashcatami ricuchinajurca. w19.02 págs. 20, 21 párrs. 1-4

Jobca shuj huarmicunataca respetohuanmi tratan carca (Job 31:1). Paica shuj huarmicunata nali munaihuan ricujuna nali cashcataca alimi yacharca. Cunanbica nali mundopi causanajuimandami, lluchulla huarmicunata, lluchulla jaricunata telepi o imapipash jaicata ricurinlla. Ama ricungapaca ¿imatata rurashun? Job cuendami nalicuna ricurijpica uchashpa cambiana capanchi. Shinallata cazarashcacunaca Jobshnami shuj huarmita o shuj jarita munashpaca na ricujunachu capanchi (Mat. 5:28). Shinaca cada punlla tucuipi Jehovata sirvingapaca nalicunata ama ricungapaj o nalicunapi ama pensarijungapami esforzarina capanchi. Shinallata Jobca paipa charishca culquipi, pai charishca cosascunapica na confiarcachu. Chaimi paica cashna nirca, chai cosascunapi confiashca cashpaca “llaquichi tucuimanmi carcani” nishpa (Job 31:24, 25, 28). Cunanbi gentecunaca ashtaca culquita, ashtaca cosascunata charina munaillami causan. Ñucanchicunaca Bibliapi mandashcata yachajuimandami culquita charinamanda, ashtaca cosascunata charinamandaca na ansiarishpa causapanchi. Shinami tucuipi Jehovata sirvishpa cati ushapanchi (Prov. 30:8, 9; Mat. 6:19, 20). w19.02 págs. 6, 7 párrs. 13, 14

Imata rurashpapash Jesusca juyaita charishcatami ricuchirca. Jesusca Jehová Dioshna ñucanchita juyaj cashcatami ricuchirca (1 Juan 4:8-10). Juyaimandami ñucanchimanda huañungapaj munarca. Chaimi ungidocuna cashpa, ‘shuj llamagucunamanda’ cashpapash Jehovapash, Jesuspash ñucanchita juyashcata ricupanchi (Juan 10:16; 1 Juan 2:2). Shinallata Jesusca ¿imashinata juyashcata ricuchirca? Paica pai huañuna tuta paipa catijcunahuan ashalla micunata rurashpami paicunata juyashcata ricuchirca. Imashinami yachajupashcanchi ungidocunataca, pai huañuna punllata yarichun ashtaca cosascunata rurana canguichi nishpaca Jesusca na mandarcachu. Chaipa randica ashalla micunata rurachunmi mandarca. Cai tucui huatacunapica ungidocunaca Jesús huañushca punllataca cada huata tandanajushpami yarin. Huaquingunacarin carcelpi cashpapashmi shina yarishca (Apoc. 2:10). Paicunaca Jesuspa mandashcata cazuimandami shina rurashca. Jesusta catijcunaca tandanajuita na ushashpapash Jesús huañushca punllataca cada huata yaringapami esforzarishca. w19.01 pág. 24 párrs. 13-15

Cunanbipash Jehovapa yachachishcacunaca panda religionmanda llujshichun, llulla yachachishcacunata saquichun, huañushcacunata ama manllachun, muscuicunapi ama crichun, huairashca nishcacunapi ama crichunbashmi ayudashca. Shamuj punllacunapicarin Jehová Diosca ‘paipa huahuacunatashna punchapamba cachunmi cacharichinga’ (Rom. 8:21). Shinaca quiquinba causaipi imata ruranata ali agllangapaca ¿imatata rurana cangui? Chaipaca Jesuspa yachachishcacunata cazungapami esforzarina capangui. Shinami ‘na llullashpa villaita’ ali rijsingui. Chai villaitami quiquinba causaipi imashina pactachinatapash ali yachangui. Cai mundopi gentecunaca ali causanchi nishpapash na cushilla causanllu. Caya punlla ima tucunataca pipash na yachai ushanllu (Sant. 4:13, 14). Chaimi ‘causaita causanata japingapaj’ esforzarina capangui (1 Tim. 6:19). Jehová Diosca paita sirvichunga na obliganllu. Cada unomi Jehovata sirvinata o na sirvinataca agllana can. Shinapash Jehovapa ali amigo cangapami esforzarina capangui (Sal. 16:5). Pai carashcacunatapashmi alicachina cangui (1 Tim. 6:17). Shinallata cushilla causaita Jehová Dios caranatapashmi tucui shunguhuan confiana capangui (Sal. 16:11). w18.12 pág. 26 párrs. 19, 21

Jehová Diospash, Jesuspashmi cazarashca causaita respetan. Shinallatami Jehová Diosta sirvijcunaca cazarashca causaita respetangapaj esforzarina capanchi. Juchayucuna caimandaca cazarashca causaitaca na respetashpami huaquingunaca causan (Rom. 7:18-23). Punda tiempopi cazarashcacunaca problemacunata charircami. Chaimandami Apóstol Pabloca cashna nirca: “Huarmica, cusataca na jichunachu” o na separarinachu can nishpa. Shinapash huaquingunaca separarircami (1 Cor. 7:10). Huarmicuna imamanda separarishcataca apóstol Pabloca na villarcachu. Cusacuna huainayana juchapi urmashca cajpimanga huarmicunaca divorciarishpa shuj jarihuan cazaraita ushanmanmi carca. Chaimi apóstol Pabloca chai huarmicunataca ama shujcunahuan cazarashpa, paipa cusahuanllata tigrachun mandarca. Paicuna separarishca cashpapash Taita Diospa ñaupajpica cazarashcarami catirca. Apóstol Pabloca consejarcami, cusahuan o huarmihuan imapash problemata charishpa, na huainayana juchapi urmashca cashpaca ali tucunami canguichi nishpa. Shinallata anciano huauquicunapa ayudata mascachunmi mandarca. w18.12 pág. 13 párrs. 14, 15

Jehová Diosca cunanbipashmi ñucanchicuna paipa amigocuna cachun, tucui shunguhuan villachichun munan (Mat. 28:19, 20; Sant. 4:8). Tal vez pipash alita rurajuni yashpami ñucanchicunatapash Jehovata ali sirvinata jarcanman. Pensaripashunchi, ñucanchita trabajachij cashna nishcanman, shuj ali trabajotami quiquinba charini, chai trabajota chasquishpaca ashtaca culquitami ganangui nishpa. Shinapash chai trabajota chasquishpaca tal vez tandanajuicunaman, villachinamanbash ñana rita ushashunllu. Cutin joven cashpaca pensaripai, ashtahuan estudiangapaj shuj becata chasquishpa shuj llactacunaman rina cajpica ¿imatata rurapanguiman? ¿Shina pasajpirachu Jehovata mañashpa, chai temamanda Jehová Dios imata pensajta ricushpa shujcunahuan parlapanguiman? Na, na shina rurapanguimanllu. Chaipa randica cunanmandallatami chaicunamanda Jehová Dios imata pensajta yachajushpa, Jehová Dios munashcashna rurangapaj esforzarina capangui. Quiquinda shina pasajpica imata ruranatami ali yachapangui. Shinallata Jehovata ashtahuan sirvina importante cashcata yaipi charishpami ali decidi ushapangui. w18.11 pág. 31 párr. 18

Salomonga joven cashpami Israel llactamanda rey tucurca. Israelpi mandai callarijujpimi Salomonman muscuipi ricurishpa Jehová Diosca cashna nirca: “Imata ñuca carachun munashpapash, mañahuailla” nishpa. Salomonga joven caimandami Jehovataca cashna mañarca: “Ali yuyaita charij shunguta carahuayari” nishpa (1 Rey. 3:5-10). Salomón shina mañashpaca humilde cashcatami ricuchirca. Chaimi Jehová Diosca Salomondaca ninanda juyarca (2 Sam. 12:24). Salomón imata mañashcata alicachimandami Jehová Diosca paimanga ‘ali yuyaita charij shunguta’ curca (1 Rey. 3:12). Salomón Jehovata tucui shunguhuan sirvijpica Jehová Diosca paita ayudarcami. Salomonga ‘Taita Diospa shutipi mañana huasitami shayachirca’ (1 Rey. 8:20). Jehová Dios ali yachaita cujpimi Salomonga rijsishca rijsishca tucurca. Chaimi Salomonga Bibliapa quimsa librocunata escribirca. Chai librocunamandaca Proverbios librotami escribirca. w19.01 pág. 14 párrs. 1, 2

Huaquin gentecunaca imatapash rurana horas shujcuna cashna o chashna rurana cangui nijuchunga na munanllu. Chaimi cashna nin, “imata ruranatapash ñucallatami ricusha” nishpa. Shina nishpaca paicunallata imatapash decidishpa, paicuna munashcatalla rurashpa causana ali cashcatami ningapaj munan. Chai gentecunaca pipash cutin cutin imata ruranata o shujcunashnami cana cangui nijuchunga na munanllu. Jehová Dioshna pensangapaj esforzarishpapash huaquin cosascunapica ñucanchillatami imata ruranata agllai ushapanchi. Chaimi 2 Corintios 3:17​pica nin: “Jehovapa espirituhuan causajpica huatashcashna cashcamandaca cacharichi tucungami” nishpa. Shinaca ñucanchicuna imashina canata, ñucanchi gushtashca cosascunata ruranatapash ñucanchillatami agllai ushapanchi. Jehová Diosca huaquin cosascunata ñucanchicunallata agllachunmi rurarca. Shina agllai ushashpapash maipash cachunga na causanachu capanchi (1 Pedro 2:16). Shinallata gentecunapa ima ali cajta o ima nali cajtaca Jehová Diosllami ali yachan. Bibliapa nishcacunata cazushpa imatapash decidichunmi Jehová Diosca munan. w18.11 pág. 22 párrs. 5, 6

Bibliapa yachachishcacunata yachajushpami Jehová Diospa munaita pundapi churashpa, charishca cosascunapica ñana yapata preocuparishcanchi. Imata saquishca cashpapash Bibliapa yachachishcacunata yachajuimandami cushilla sintiripashcanchi. Shinapash chairalla llujshishca celularcunata, tabletcunata, computadoracunata randijta ricushpa o charishca cosascunahuan shujcuna cushilla cajta ricushpami shinallata ñucanchicunapash charingapaj munanchiman. Chaita ricushpami ñucanchi charishca cosascunahuan ñana cushilla sintirishpa, ashtaca cosascunata charingapaj munashpa Jehová Diosta sirvinataca ladoman saqui ushanchiman. Cunanga Demas shuti huauquihuan ima tucushcata yaripashunchi. Paica “cai pachapi tiajtalla munashpa” ricuimandami apóstol Pablohuan ñana igual carca, Jehovata sirvinatapash saquirca. Bibliapica Demas huauqui ashtaca cosascunata charingapaj munashcata o apóstol Pablohuan Jehovata ñana sirvingapaj munashcataca na nijunllu. Shinaca ¿imatata caimandaca yachajupanchi? Punda charishca cosascunata cutin charingapaj munashpaca Jehová Diosta sirvinatami saqui ushanchiman. w18.11 pág. 12 párr. 9

Adanbash, Evapash Diablota crishpami chai yuramanda micurca. Chaita crishpa huañuna cashcataca Diabloca alimi yacharca. Shina yachashca jahuapashmi Diabloca millai caimanda Adandapash, Evatapash umachirca. Paicunaca Diablopa nishcata crishpami Jehovata na cazushpa tiempohuanga huañurca (Gén. 3:6; 5:5). Ashtahuangarin, “Taita Dios mandashcata na cazushpami” Adanga juchata rurarca. Chai juchamandami ‘huañuipash tucuicunaman yalirca’ (Rom. 5:12, 14). Shinapash Jehová Diosca gentecuna jucha illaj para siempre causachunmi munarca. Shina cajpipash cunan punllapica “ñucanchi causana punllacunaca, canchis chunga huatacamanllami. Ashtahuangarin ninan shinllicunallami, pusaj chunga huatata” causan. Shina “ninan shinlli cashpapash, llaquita apashpa, llaquinayaita causangapajllami” causan (Sal. 90:10). Chaica shuj llaquimi can. Diablo llullaimandami shina causanajupanchi. Jesusca Diablomandaca cashnami nirca: “Llullashpalla causajmi. Paipica, llullanallami tian” nishpa (Juan 8:44). Diabloca cunangamanmi ‘tucui cai pachapi causajcunata umachijun’ (Apoc. 12:9). Ñucanchicunaca Diablopa trampacunapi urmangapaca na munapanchichu w18.10 págs. 3, 4 párrs. 1-4

Tucuicunahuan ali caj gentecunaca cushillami causan. Chaimi Jesusta catij Santiagoca nirca: “Casilla ali causajcunaca, imatapash cashcatapacha rurashpami, tarpushcata tandachinshna casilla aliguta causanajun” nishpa (Sant. 3:18). Shinaca huauquipanicunahuan o familiapi pihuanbash culirarishca cashpaca, paicunahuan ali tucungapaj ayudahuai nishpami Jehovataca mañana capanchi. Shina rurajpimi ali cualidadcunata ricuchishpa chai problemata arreglachun, cushilla cachunbash Jehová Diosca paipa espíritu santohuan ayudanga. Ñucanchirami tucuicunahuan ali cangapaj esforzarina capanchi. Chaita rurana minishtirishca cajpimi Jesusca cashna nirca: “Taita Diosman imagutapash carangapaj, altarman apashpa ña chayajushpa, cambaj huauqui canda fiñashca purijushcata yaringui. Shina yarishpaca, carangapaj apamushcataca altar ñaupajpi saquishpa, cambaj cumbahuanra ali tucungapaj ringui. Chai jipaca, Diosman carangapaj apamushcataca caragringuilla” nishpa (Mat. 5:23, 24). w18.09 pág. 19 párr. 17

Jesusca paipa catijcunahuan último tutata cai alpapi cashpaca casi 30 viajetami juyaimanda parlarca. Jesusca nircami: “Caishujhuan chaishujhuan juyarishpa causanguichi” nishpa (Juan 15:12, 17). Paicuna juyarishpa causanajujta ricushpami gentecunaca Jesuspa ali catijcuna cashcata cuenta japina carca (Juan 13:35). Shinapash juyani nitallaca na ninachu capanchi. Chaipa randica ruraicunahuanmi huauquipanicunataca juyana capanchi. Chaimi Jesusca cashna nirca: “Maijambash pai juyashca cumbacunamanda huañushpaca, ninandapacha juyashcatami ricuchin. Ñuca imata mandashcata rurashpaca, ñuca juyashca cumbacunami canguichi” nishpa (Juan 15:13, 14). Cunanbi Jehovata sirvijcunaca juyarishpa, shujllashna tandanajushca causaimandami rijsishcacuna capanchi (1 Juan 3:10, 11). Chaimi na ñucanchishnalla viñashca cajpipash, shuj llactamanda cajpi o shuj shimita parlajpipash tucuilla huauquipanicunahuan juyarishpa causanchi. w18.09 pág. 8 párrs. 1, 2

Jehová Diosca paita sirvijcuna paicunapa familiata cuidashpa mantinichunmi munan. Shuj ejemplota ricupashun, ashtaca mamacunaca paicunapa huahuacunata cuidangapami huasipi quedan. Cutin shuj huauquipanicunaca paicunapa taitamamacuna mayorlla cajpimi cuidangapaj quedan. Shinaca maijanbash cashna cuidajushpaca ñucanchi munashcashnaca Jehová Diostaca na sirvi ushashunllu. Shinapash ama llaquiripashunchichu Jehová Diosca ñucanchi familiata cuidajujpica ninandami cushijun (1 Cor. 10:31). Ñucanchi familia ucupi imapash ungüihuan, maijanbash mayorllata na cuidanata charishpaca ¿imatata rurai ushapanchi? Ushashpaca congregacionmanda imapash ungüihuan cajpi o mayorlla huauquipanicuna imagutapash minishtijujta ricushpami ayudanalla capanchi. Shina ayudajpimi, chai huauquipanicunaca Jehová Dios paicunata uyashcata cuenta japinga (1 Cor. 10:24). w18.08 pág. 22 párrs. 3, 5

Joseca Jacobpa juyashca juyashca churimi carca. Chaimi Josepa huauquicunaca José 17 huatacunatalla charijpi paitaca envidiamanda esclavo shina jatushpa cacharca (Gén. 37:2-4, 23-28). Joseca Egipto llactapimi esclavo causarca. Chai jipaca paitaca prezomi churarca. Chaimi 13 huatacunata shina causarca. Paica paipa juyashca taitamandaca caru carupimi carca. Shinaca José ama yapata preocuparichun, ama culira sintirichunga ¿imata paitaca ayudarca? Jehová Dios paita imashina cuidajushcata pensanami Josetaca ayudashcanga (Gén. 39:21; Sal. 105:17-19). Shinallata joven cashpa muscushcacunapi pensarinami Jehová Diospi ashtahuan confiachun Josetaca ayudarianga (Gén. 37:5-11). Joseca siempremi tucui tucuita Jehová Diosman villan carca (Sal. 145:18). Jehová Diosca Josepa mañashcacunata uyashpami paitaca ayudarca. Chaimi ima pasajpipash Jehová Dios paita ayudanataca Joseca seguro carca. w18.10 pág. 23 párrs. 3, 4

Charij o pobre gentecunataca ¿igualchu tratanajupanchi? Diospa espíritu santo yarichijpimi gentecunamanda parlashpaca Salomonga cai punllapa textopi shimicunata nirca. Imashinami ricupanchi na cuidadota charishpaca charij gentecunahuanlla llevarishpami pobre gentecunahuanga na llevarinchiman. Shina ruranaca ¿imamandata nali can? Charij o pobre cajta ricushpara imashina tratanata agllashpaca huauquipanicunahuan shujllashna tandanajushca caitaca na ushashunllu. Discípulo Santiagopa punllacunapipash ñavita ricushpalla trataimandami huaquin congregaciongunapica shujllashna tandanajushca caitaca na ushanajurca (Sant. 2:1-4). Shinaca huauquipanicuna shujllashna tandanajushca cangapami esforzarina capanchi w18.08 pág. 11 párrs. 8-10

Ñucanchi huauquipanicunata juyaihuan tratashpaca Jehová Diostapashmi juyashun. Jehová Diosca tucuilla huauquipanicunatami juyan. Chaimi ñucanchi huauquipanicunata juyaihuan tratana capanchi (1 Tes. 5:15). Jesusca paipa catijcunataca nircami: “Shina juyarishpa causanajujta ricushpami, ñucapaj yachajujcuna cashcataca tucuicuna rijsinajunga” nishpa (Juan 13:35). Malaquías runaguca nircami, huauquipanicunahuan randimanda imashina tratarijtaca Jehová Diosca tucuitami ricujun nishpa (Mal. 3:16). Imashinami ricupanchi Jehová Diosca “paipaj tucushcacunataca rijsinmi” (2 Tim. 2:19, NM ). Chaimi Jehová Diosca ñucanchi parlocunata, ñucanchi rurashcacunatapash tucui tucuita ricujun (Heb. 4:13). Shinaca ñucanchi huauquipanicunata nali tratashcataca Jehová Diosca alimi yachan. Shinallata ñucanchi huauquipanicunata llaquishpa, juyashpa paicunata perdonajpi, paicunata ayudajpi, mingachijpica Jehová Diosca alicachishpami ricun (Heb. 13:16). w18.07 págs. 24, 25 párrs. 15, 17

Jehová Diosllami tucui ushaita charij, tucuita ali yachaj, juyaj Dios can. Chaimi Jehovata tucuipi cazushpa paitalla sirvingapaj munapanchi (Sal. 96:4-6). Shinapash huaquingunaca Jehovata tucuipi cazunapa randica paicunapa munaitara rurashpami Jehovamanda caruyashca. Caín runahuan ima tucushcata ricupashunchi. Paica yanga dioscunataca na adoranllu carca. Paica Jehová Diostalla sirvini nishpami causan carca. Shinapash Caín paipa shungupi nali munaicunatalla charijpimi Jehová Diosca nalicachishpa paitaca ricurca (1 Juan 3:12). Jehová Diosca Caín runamanga cashnami nirca: “Alita rurashpaca, ¿nacha jatunyachi tucunguiman? Nalita rurajpimi, juchaca pungupi chapanshna, canda mandangapaj shuyajun. Chai juchataca, canmi mishana cangui” nishpa (Gén. 4:6, 7). Shina nishpaca, Caín arripintirishpa Jehovatalla cazujpica paillata ayudanatami nijushcanga. Paica Jehová Dios nishcata na cazushpa. w18.07 pág. 15 párrs. 1, 3; pág. 16 párr. 4

Shuj gentecunapash Jesuspa catijcuna tucuchun ayudashpa, Diospa Reinomanda villachishpami michagushna punchayachijushcata ricuchishun (Mat. 28:19, 20). Ñucanchi ruraicunahuanbashmi Jehovata jatunyachinchi. Ñucanchicuna villachijujpica tucui tucuitami gentecunaca ricunajun. Ñucanchicuna cushilla saludajpica ali gentecuna cashcata ricushpami Jehová Diostapash jatunyachinga. Jesusca paipa catijcunataca nircami: “Huasiman yaicushpaca: ‘¿Alillachu capanguichi?’ ninami canguichi” nishpa (Mat. 10:12). Jesuspa catijcuna villachijuj pushtucunapica na rijsi gentecuna chayajpica chasquinllami carca. Ñucanchicuna causaj pushtupica talvez chai costumbretaca nachari charipanchi. Ashtaca gentecunami paicunapa huasiman na rijsi gentecuna chayajpica, manllan o culiraitapash culiran. Shinapash cushilla aliguman saludajpica paicunaca alimi sintiringa. Shinallata predicación publicapi villachijushpaca gentecunahuan cushillami parlana capanchi. w18.06 pág. 22 párrs. 4, 5

Apóstol Pedroca judiocunahuanllami tandanajun carca. Shinapash Jesusta catijcuna na ñavita ricushpalla tucuicunata igual tratana cashcatami Taita Diosca ricuchishcarca. Chaimi apóstol Pedroca Roma llactamanda Cornelio shuti soldadoman villachirca (Hech. 10:28, 35). Chai punllamandapachami apóstol Pedroca na judío gentecunahuan micungapaj o shuj cosascunata rurangapaj tandanajuj carca. Shinapash huaquin huatacuna jipaca apóstol Pedroca, Antioquía llactapi na judío huauquipanicunahuan tandanajushpa micungapaca ñana munarcachu (Gál. 2:11-14). Chaita ricushpami apóstol Pabloca apóstol Pedrotaca rimarca. Apóstol Pablopa nishcataca Pedroca alimi chasquirca. ¿Imamandata yachapanchi? Apóstol Pedroca Asia Menor llactapi judío huauquipanicunamanbash, na judío huauquipanicunamanbash shuj cartata escribishpaca tucuicunamandami alicachishpa parlarca (1 Ped. 1:1; 2:17). Jesuspa chaquita catishpami apostolcunaca “tucui gentecunata” juyanata yachajurca (Juan 12:32; 1 Tim. 4:10). Na ñapash paicunapa yuyaita cambiashca cashpapash Jesusta catijcunaca paicunapa yuyaita cambiarcami. Jesusta punda catijcunaca tucui gentecunata Taita Dios ricunshna ricungapaj esforzarishpami tucuicunata igual tratan carca (Col. 3:10, 11). w18.06 págs. 12, 13 párrs. 15, 16

Punda siglopi romano soldadocunaca jirru churajunatami churajun carca. Soldadocunapa shunguta o cuerpota espadahuan, flechacunahuan ama chugrichichunmi jarcan carca. Chaimi chai jirru churajunataca cuero cintahuan ali ali huatarina carca. Diospa mandashcacunaca chai jirru churajuna cuendami ñucanchi shunguta cuidachun ayudan (Prov. 4:23). Soldadocunaca jirruhuan rurashca churajunatallami churajun carca. Shinallata ñucanchipa yuyaita catinapa randica, Taita Diospa mandashcacunatami cazuna capanchi. Ñucanchi yuyaicunata catishpaca pandarishunmi (Prov. 3:5, 6). Chaimi Diospa mandashcacuna ñucanchi shungupi cachun ricuriana capanchi. Diospa Shimita tucui shunguhuan alicachinaca alita ‘ruranata jirruta churajunshna’ causachun o Diospa mandashcacunata pactachichunmi ayudan (Sal. 111:7, 8; 1 Juan 5:3). w18.05 pág. 22 párrs. 3, 4, 6; pág. 23 párr. 7

Israelitacunaca ashtaca milagrocunata Jehová Dios rurashcata, Moisés ashtaca huatacunata ñaupaman ali pushajushcatapashmi ricurca. Chaicunata ricushpapash israelitacunaca cutinmi quejari callarirca. Yacuta na charishcamandaca Moisestarami juchachinajurca (Núm. 20:1-5, 9-11). Israelitacuna shina quejarinajujpimi Moisesca ninanda culirarca. Jehovapa mandashcata na cazushpa chai rumita rimanapa randica Moisesca israelitacunata shinllita tacurishpami shuj milagrota ruragrini nirca. Shina nishca jipallami paipa varahuan ishcai viajeta chai rumita huajtarca. Shina huactajpimi ashtaca yacu llujshirca. Moisesca jariyashca, culira caimandami chai ratoca pandarirca (Sal. 106:32, 33). Chaimi Jehová Diosca pai carasha nishca alpacunaman yaicuchunga Moisestaca na saquirca (Núm. 20:12). Moisesmandaca ¿imatata yachajupanchi? Primero, humilde cashpa catingapami esforzarina capanchi. Chaita na rurashpaca nali pensarishpami parlashun o nalicunata rurai callarishun. Segundo, yapata preocuparishca cashpaca na humilde caita ushashunllu. Shinaca llaquicunata o problemacunata charishpapash humilde cangapami esforzarina capanchi. w19.02 pág. 13 párrs. 19-21

Jesuspa mandashcata pactachishpa villachinaca ¿shinllichu can? Na, na shinlli canllu. Jesusca uvas yuramanda parlashca jipaca nircami, Diospa Reinomanda villachishpaca ñuca cuendami cushilla causanguichi nishpa (Juan 15:11). ¿Imamandata Jesusca shina nirca? Imashinami ña ricuparcanchi Jesusca uvas yurashnami cani nirca. Cutin paipa catijcunataca ramacunahuanmi chimbapurarca (Juan 15:5). Ramacunaca verdella cangapami troncomanda yacuta, shuj shuj cosascunatapash aisan. Shinallatami Jesushuan ali amigo cashpa, paipa ejemplota catishpa Jehovapa munaita pactachishpaca Jesús cuenda cushilla causashun (Juan 4:34; 17:13; 1 Ped. 2:21). Hanne shuti paniguca 40 huatacuna yalitami precursora shina sirvijushca. Paica ninmi: “Villachishca jipaca cushillami sintirini. Shina sintirinami Jehovata ashtahuan sirvishpa catichun animahuan” nishpa. Cushilla sintirinami na uyangapaj munaj territoriocunapi villachichunbash ayudanga (Mat. 5:10-12). w18.05 pág. 9 párr. 2; pág. 13 párr. 14

Apóstol Pablomi huauquipanicunataca ashtahuan animashpa ayudarca. Diospa espíritu santo yarichijpimi apóstol Pabloca griegocunaman, romanocunaman villachingapaj rirca. Paicunaca ashtaca yanga dioscunata adorashpami causan carca (Gál. 2:7-9). Apóstol Pabloca ashtaca llactacunapimi villachirca. Cunanbica chai llactacunaca Turquía, Italia, Grecia llactacunami can. Apóstol Pabloca na judío gentecunapurapimi congregaciongunata callarichirca. Na judío huauquipanicunaca ‘paicunapa llactapuracunallata ninanda llaquichijpimi’ animachun minishtirca (1 Tes. 2:14). Tesalónica llactapi chairalla callarishca congregacionmanmi apóstol Pabloca huata 50​pi shuj cartata escribirca. Chai cartapica nircami: “Cangunataca na cungashpami, Taita Diosta pashi nishpa, tucuicunata yariashpa mañanajunchi. Cangunaca, alipacha crishpami, ninan juyaita charishpa, imatapash aliguta rurashpa causanajunguichi” nishpa (1 Tes. 1:2, 3). Shinallata mandarcami: “Ashtahuan aliguta catingapajmi, cangunaca caishuj chaishuj aliguta yarichirina [o animarina, NM ] canguichi” nishpa (1 Tes. 5:11). w18.04 págs. 19, 20 párrs. 16, 17

Jehová Diospa ñaupajpi ali ricuringapaca jovengunaca ashtahuan villachingapami esforzarina can. Jesusca villachina minishtirishcapacha cashcatami ricuchirca. Imashinami ricupanchi quiquinba causaipica villachinami ashtahuan importante cana can. Shinaca ¿ashtahuan villachingapaj o precursor shina sirvingapaj esforzarijunguichu? Villachinapi na cushilla sintirishpaca ¿imatata rurai ushangui? Quiquinba crishcacunata shujcunaman ali intindichingapaca ¿imatata rurana cangui? Cai ishcai yuyaicunata rurapangui. Ali prepararingui. Quiquinba crishcacunata shujcunaman parlangui. Shina rurashpaca quiquinllatami cushilla sintiringui. Escuelapi o colegiopi quiquinba cumbacuna imamandata Diospi cringui nishpa tapujpi imata ninata ali prepararingui. Chaipaca Internetpi jw.org paginapi cai tapuimanda ashtahuan informacionda mascangui. Shinallata Jovengunapa 10 tapuicuna nishca folletopi “¿Evolucionbi crinachu cani?” nishca tapuipashmi quiquinba cumbacunaman ali intindichichun ayudanga. w18.04 págs. 29, 30 párrs. 10, 11

Adanbash, Evapash paicunallata imata ruranata agllachun saquishpapash, Jehová Diosca huaquin mandashcacunatami paicunamanga curca. Por ejemplo, causaita charingapaca respirana, micuna, puñuna, shuj cosascunatapashmi rurana carca. Chaicunata rurangapaca Jehová Dios ayudachunmi minishtirca. Jehová Diosca cushilla ali causachunmi paicunamanga tucui minishtishcata curca (Sal. 104:14, 15; Ecl. 3:12, 13). Adanda, Evataca huahuacunata charishpa cai Alpata cuidanguichi nishpami Jehová Diosca mandarca. ¿Chai mandashcata cushpaca Adanbash, Evapash ñana libre causai ushashcatachu ricuchijurca? Na, na chaita ricuchijurcachu. Gentecuna cai Alpata shuj juyailla pushtuta rurashpa, chaipi para siempre causana oportunidadtami Jehová Diosca curca (Sal. 127: 3; Is. 45:18). Shinaca Adanbash, Evapash cazarashpa, huahuacunata charishpami para siempre cushilla causai ushanman carca. w18.04 pág. 4 párrs. 7, 8

Pacienciata charishpaca gentecuna Bibliamanda yachachishcacunata ñapash chasquichunga na shuyashunllu. Por ejemplo, Bibliapica shamuj punllacunapi cai Alpaca shuj juyailla paraíso tucunga ninmi. Ashtaca gentecunaca cai Alpa shuj paraíso tucunataca na yachanllu. Huaquingunaca crinmi, huañushpaca chaipimi tucui tucurin nishpa. Cutin shujcunaca ninmi, ali gentecuna huañushpaca cielomanmi rin nishpa. Shuj huauqui, cai Alpapi para siempre causai tianata shujcunaman imashina intindichijta ricupashunchi. Pundapica, Génesis 1:28​tami liin. Chai jipaca cashnami tapun: ¿Taita Diosca gentecuna maipi, imashina causachunda munarca? nishpa. Shina tapujpimi casi tucuicunaca, Taita Diosca gentecuna cai Alpapi cushilla causachunmi munarca nishca. Shina nishca jipaca chai huauquica Isaías 55:11​ta liishpami cashna tapun: ¿Diospa munaica cambiashcachu? nishpa. Shina tapujpimi gentecunaca na nishca. Tucuchingapaca Salmo 37:10, 11​ta liin. Chai jipaca: “Bibliapi nishca shinaca gentecunaca ¿imashinata shamuj punllacunapica causanga?” nishpami tapun. Chai huauquica shina rurashpami Taita Diosca gentecuna cai Alpapi para siempre causachun munashcata intindichishca. w19.03 pág. 24 párrs. 14, 15; pág. 25 párr. 19

Jehová Diosca Jesús imata yachachishcata uyashpa cazuchunmi munan. Jesusca paita catijcunataca Diospa Reinomanda ali villaigucunata villachichunmi yachachirca. Shinallata ‘rijcharianshnami chapariashpa’ causana canguichi nishpami paicunataca mandarca (Mat. 24:42; 28:19, 20). Ashtahuanbash paita catijcunataca na shaijushpa shinlli tucushpa ñaupaman catichunmi Jesusca mañarca (Luc. 13:24). Shinallata caishujhuan chaishujhuan juyarishpa shujllashna tandanajushca causachun, paipa mandashcacunata cazuchunmi Jesusca mandarca (Juan 15:10, 12, 13). Jesús cushca consejocunaca cunanbipash shinallatami ayudan. Jesusca nircami: “Na llullashpa villajujta cazujcunaca, tucuillami ñuca imata villajujtapash aliguta uyanajun” nishpa (Juan 18:37). ‘Caishujmanda chaishujmanda aguantarishpa catina, tucui shunguhuan randimandami perdonarina capanguichi’ nishca consejota cazushpami Jesusta uyajushcata ricuchinchi (Col. 3:13, NM; Luc. 17:3, 4). Shinallata llaquicunahuan cashpa o na cashpapash, cushijushpa ali villaigucunata villachishpami Jesusta cazunajushcataca ricuchinchi (2 Tim. 4:2). w19.03 pág. 10 párrs. 9, 10