Mayo

Jesusca Joseta, Mariatapash siempremi cazun carca. Paica, “ñucami paicunata yali yachani” nishpapash na pensanllu carca. Jesusca rucu churi cashcamanda familiata cuidana, mantinina responsabilidadta charishcataca alimi yacharca. Jesusca paipa taita José carpinteriata yachachishcataca alimi yachajurca. Chaimi familiataca mantinita usharca. Jesuspa taitamamacunaca pai imashina nacirishcata, angelcuna imata nishcatapashmi paimanga parlarianga (Luc. 2:8-19, 25-38). Jesusca chai parlashcahuanllaca na quidarcachu. Chaipa randica paillatami Diospa Shimipi imata nijujta yachajurca. Jesús Diospa Shimimanda alipacha yachashcataca ¿imashinata yachapanchi? Jesusca chaira viñaj cashpallata Jerusalenbi yachachijcuna tapujpica, “aligutapacha yarishpa tigrachijpimi, tucuicuna manllarishpa uyanajurca” (Luc. 2:46, 47). Jesusca 12 huataguta charishpallatami Jehová Dios paipa taita cajtaca ali yacharca (Luc. 2:42, 43, 49). w20.10 págs. 29-30 párrs. 13-14

Jesús huañushpa causarishcapi crinami, huañushcacuna causarinapi tucui shunguhuan crishpa catichun ayudan. Pabloca huañushcacuna causarinamanda parlai callarishpami cai quimsa yuyaicunata nirca: 1) ‘Cristoca, ñucanchipa juchacunamandami huañurca’. 2) “Cristoca pambai tucurca”. 3) Bibliapi nishcashnami ‘quimsa punllacuna’ jipa causachi tucurca (1 Cor. 15:3, 4). Jesús huañushcata, pambai tucushcata, causachi tucushcatapash ¿imatata intindipanchi? Profeta Isaiasca: ‘Cai pachamandami’ Mesiasca anchuchi tucunga. Taita ‘Diosta na manllajcunahuanmi pambai tucunga’ nircami. Ashtahuanbachaca ‘ashtacacunapa juchacunamandami’ Mesiasca huañunga nircami. Cai shimicunaca Jesús ñucanchi juchacunamanda paipa causaita cushpa huañujpimi pactarirca (Is. 53:8, 9, 12; Mat. 20:28; Rom. 5:8). Shinaca Jesús huañushpa, pambai tucushpa, causarishpami ñucanchicunataca juchamanda, huañuimandapash salvaita ushashca. Chaimandami ñucanchi huañushca familiacuna causarijtapash ricupashun. w20.12 págs. 2-3 párrs. 4-6; pág. 5 párr. 11

Apóstol Pabloca judiocunapa sinagoga nishca tandanajuna huasicunapimi villachin carca. Por ejemplo, Tesalónica llactapica quimsa sabadocunatami judiocunaman ‘Dios escribichishca Shimipi imata nijujta yachachijurca’ (Hech. 17:1-3). Apóstol Pabloca huahuamandapacha judío shina viñashca caimandami sinagogapica tranquilo sintirishcanga (Hech. 26:4, 5). Chaimi judiocuna imata crishcata ali intindimanda na manllashpa villachishcanga (Filip. 3:5). Apóstol Pablopa contracuna Tesalónica llactamanda calpachijpi, jipaca Berea llactamandapash calpachijpica apóstol Pabloca Atenas llactamanmi rirca. Chaipi cashpaca cutinmi “tandanajuj huasipica, Judea llactamanda gentecunahuan, Diosta yariashpa causajcunahuan” Diospa Shimimanda ‘parlajurca’ (Hech. 17:17). Cutin mercadopi villachijushpaca shuj shuj gentecunahuanmi tuparirca. Paicunapurapica gentecunapa yachachishcacunata yachachijcuna, na judio gentecunami tiarca. Apóstol Pabloca paicuna ‘nara uyashca’ shimicunatami yachachijurca. Chaimi chai gentecunaca cashna ninajurca: “Ñucanchi nara uyashca shimicunatami villaj shamushcangui” nishpa (Hech. 17:18-20). w20.04 pág. 9 párrs. 5-6

“Nimapa na sirvinichu” nishpaca ama pensapashunchichu. Juchayucuna caimandami tucuicunallata pandarinchi. Shinapash Jesús huañushcamandami Jehová Dios ñucanchicunata paipa ñaupajpi ali ricurichun ayudan (Efes. 1:7; 1 Juan 4:10). Llaquilla cashpaca huauquipanicuna ayudachun mañapashunchi. Huauquipanicunaca ñucanchita consolachingapaj, uyangapapash listomi can (Prov. 12:25; 1 Tes. 5:14). Nigeria llactamanda Joy shuti panigu desanimarishca sintirijushpa imata rurashcata ricupashunchi. Paica ninmi: “Congregacionmanda turiñañacuna na ayudahuashcajpica imachari tucuiman carcani. Paicunapa ayudata ricushpami Jehová Dios ñucata uyashcata cuenta japiparcani. Paicunami shujcunatapash ayudanata yachachihuashca” nishpa. Ñucanchicuna llaquilla cajtaca huauquipanicunaca na siempre yachaita ushanllu. Chaimandami shuj huauquihuan o shuj panihuan imashina sintirishcata parlangapaj ñucanchillata mascana capanchi. w20.12 págs. 23-24 párrs. 7-8

Pihuanbash ali amigocuna cangapaca, pundapica paihuan yalingapami tiempota llujchina capanchi. Shinallata pai imashina sintirishcata, paipa causaipi imacunalla pasashcata parlashpapashmi ali amigocuna tucuita ushapanchi. Shinapash Jesuspa ali amigocuna canaca dificilmi caita ushan. Por ejemplo, ñucanchica Jesustaca na ñavi ñavi ricuita ushapanchichu. Apostolcunapa punllacunapipashmi huaquingunaca Jesustaca na ñavi ñavi rijsirca. Chaimandami apóstol Pedroca paicunataca cashna nirca: ‘Jesucristotaca, na ricushca cashpapash, ninandami juyanguichi. Cunambi na ricushpapash, paita crishpami causanajunguichi’ nishpa (1 Ped. 1:8). Shinaca Jesuspa ali amigocuna cangapaca, Jesusta ñavi ñavipacha ricunaca na minishtirinllu. Shinallata, ñucanchica Jesushuanga na parlaita ushapanchichu. Mañanajushpaca ñucanchicunaca Jehová Diostami mañapanchi. Jesuspa shutipi mañashpapash, Jesustaca na mañapanchichu. Jesusca Jehová Diostalla mañana cashcatami yachachirca. Shinami Jehovatalla adorajushcata ricuchipanchi (Mat. 4:10). Jehovatalla adorashpapash, Jesusta juyashcatapashmi ricuchi ushapanchi. w20.04 pág. 20 párrs. 1-3

Punda tiempopi Grecia llactapi carrerapi calpajcunaca nanaita aguantashpa, masqui shaijushca cashpapash calpashpami catin carca. Paicunapa entrenador yachachishcacunapi, paicunapa fuerzapipashmi confiashpa calpana carca. Cutin ñucanchicunataca ¿pita ñaupaman calpanshna catichun ayudan? Jehová Diosmi ñucanchicunataca ayudan. Paimi ñucanchimanga fuerzata cushpa ayudan. Ñucanchicuna Jehová Diospi confiashpa catijpica, paillatami ñucanchitaca ali ali yachachishpa, shinllichishpapash catinga. Apóstol Pabloca ashtaca llaquicunatami aguantana tucurca. Paitaca shuj gentecunaca nalicachishpa rimarca, shinallata llaquichingapami catirianajurca. Gentecuna shina tratashca jahuapash huaquinbica fuerza illajmi sintirirca. Chaimi cashna nirca: ‘Cashahuan tujsijshna ñuca cuerpota nanachihuajun’ nishpa (2 Cor. 12:7, MTQI). Shina llaquicunata charishpapash paica Jehová Diosta sirvinataca na saquircachu. Jehovapimi tucui shunguhuan confiarca (2 Cor. 12:9, 10). Chaimandami Jehová Diosca apóstol Pablotaca tucuipi ayudarca. w20.04 pág. 29 párrs. 13-14

Ñucanchicuna villachinajujpica Jehová Dios, Jesús, angelcunapashmi ñucanchitaca apoyan. Chaica shuj jatun bendicionmi can (2 Cor. 6:1). Paicunami ñucanchi villachinajujpi gentecuna Jesuspa ali catijcuna tucuchun ayudanajun. Apóstol Pabloca, paimandallata, shuj huauquicunamandapash parlashpaca nircami, ñucanchica “Taita Diosta ayudajcunallami canchi” nishpa (1 Cor. 3:9). Villachingapaj llujshishpaca Jesustapashmi ayudanajunchi. Jesusca paipa catijcunamanga nircami: “Ñucapaj yachajujcuna tucuchun cai pachapi causanajuj tucuilla gentecunapajman rishpa, villana canguichi” nishpa. Caitapashmi nirca: Ñucami ‘cangunahuan casha’ nishpa (Mat. 28:19, 20). Chaitaca ama cungapashunchichu. Angelcunapashmi ‘cai pachapi causajcuna causaita causaicaman quishpirichun villachichun’ ayudanajun (Apoc. 14:6). Jehovapash, Jesuspash, angelcunapash ñucanchita apoyanajushcamandami Diospa Reinomanda ali villaigucunata villachinajujpica ashtacacuna aliguman chasquinajushca (Mat. 13:18, 23). Shinapash gentecuna cai ali villaigucunata aliguman chasquichunga ¿pita ayudajushca? Chaitaca cunan punllapa textopimi Jesusca intindichirca. w20.05 pág. 30 párrs. 14-15

Cunan punllacunapica ashtaca ashtaca divorciocuna tiashcamandami familiacunaca ñana tandanajushca can. Shinallata ashtaca familiacunaca paicunapurapash na rijsirinshnami portarin. Shuj consejero familiarca ninmi: “Taitapash, mamapash, huahuacunapash na paicunapura parlarinllu. Paicunaca cada unomi computadorapi, tabletpi, celularpi, videojuegocunata pugllashpa yalin. Chai huasipillata causashpapash na rijsirinshnallatami portarin” nishpa. Ñucanchicunaca na juyarishpa causanajuj gentecunashna cangapaca na munapanchichu. Chaipa randica congregacionmanda huauquipanicunata, ñucanchi familiatapashmi ashtahuan juyana capanchi (Rom. 12:10). Griego shimipi ‘huauquipurashna juyarina’ nishpaca congregacionmanda huauquipanicunata ñucanchi familia ucupuracunatashna juyana cashcatami shina nijun. Congregacionmanda ñucanchi huauquipanicunapashmi ñucanchi familia can. Paicunata juyashpami Jehová Diostaca shujlla shina tandanajushpa sirvi ushapashun (Miq. 2:12). w21.01 pág. 20 párrs. 1-2

Futbolta pugllaj shuj equipopi pensaripashunchi. Shuj equipopi paicunapura ali llevarishpaca ganaita ushanmi. Shinapash nalita llevarishpaca na fácil ganaita ushanllu. Shina cuendami ñucanchi shungu ima munashcata, ima pensashcata, imashina sintirishcata Jehovatalla tucui shunguhuan sirvingapaj ocuparishpaca, shuj equipopi paicunapura ali llevarishcashnami caita ushanga. Diabloca ñucanchi ishcai shungu tucushpa Jehovata na cazushpa, shungu munashcata rurachunmi munan. Shinapash Jehovataca tucui shunguhuanmi sirvina capanchi (Mat. 22:36-38). Ñucanchi shunguta Diablo pandachichunga na saquinachu capanchi. Ñucanchicunapash rey Davidshnami mañaita ushapanchi: “Canba shutita manllashpa causangapaj shujlla shunguta charichun ayudahuayari” nishpa. Chai mañashcata ñucanchi causaipi pactachingapaj esforzaripashunchi. Cada punllapa imapash decisiongunata agllagrijushpaca Jehovapa shutita manllashcata o respetashcata ricuchipashun. Shina rurashpami ñucanchicunaca testigo de Jehovacuna cashcatapash ricuchita ushapashun (Prov. 27:11). Chaimi tucui ñucanchicunapash profeta Miqueas nishcashna, “ñucanchita Mandaj Taita Diostami, causaita causaicaman cazushpa purinajushun” ni ushapashun (Miq. 4:5). w20.06 pág. 13 párrs. 17-18

Mundo enteromanda gobiernocuna, jahua lado llactata jatun mandajpash Jehovata sirvijcunata llaquichi callarijpimi Jehová Diosca ninanda culiranga. Chaipimi Armagedón guerraca callaringa (Apoc. 16:14, 16). Chaimi jahua lado llactata jatun mandajpa, paita apoyaj llactacunapapash ‘tucurimui chayamujpica, maijan ayudajtapash na charinga’ (Dan. 11:45). Paicunami Magog shuti llactacuna can. Daniel 12:1​pica jahua lado llactata mandajta, paita apoyajcunatapash imashina tucuchi tucunatami parlajun. Shinallata Jehová Diosta sirvijcunata imashina salvanatapashmi parlajun. Cai textopi Miguel nishpaca Jesusmandami parlajun. Jesusmi huata 1914​pi Jehová Diospa Reinopi mandai callarirca. Chai huatamandami Jehovata sirvijcunata ‘ayudajushca’. Ñallami Jesusca Armagedón guerrapi Jehovapa contracunata tucuchinga. Cai guerratami profeta Danielca ‘nara tiashca jatun llaqui huatacuna’ canga nirca (Apoc. 6:2; 7:14). w20.05 págs. 15-16 párrs. 15-17

Joseca esclavo cashpa, carcelpi cashpaca paipa causaita cambiangapaca imatapash na rurai usharcachu. Shinapash ama llaquilla sintirichunga Josetaca ¿imata ayudarca? Paica paipa punda causaita yariashpa llaquiyajunapa randica esclavo cajpi o carcelpi cajpi paiman mingashca trabajocunata ali pactachingapami esforzarirca. Jehovata sirvinataca nunca na saquircachu. Chaimi Jehová Diosca Josetaca bendiciarca (Gén. 39:21-23). Cai mundopi nali gentecunaca ñucanchicunataca Josetashnallatami yangamanda llaquichita ushan. Huaquinbicarin ñucanchi huauquipanicunallatami llaquichita ushan. Shinapash Jehová Dios ñucanchipa shuj jatun pacajuna rumishna cashcata ricushpaca na desanimarishpami paita sirvishpa catishun (Sal. 62:6, 7; 1 Ped. 5:10). José tal vez 17 huatata charijpimi Jehová Diosca chai muscuicunata paimanga ricuchirca. Joven cajpillata chai muscuita ricuchishpaca Jehová Dios jovengunapi confiashcatami ricuchin. Cunanbica ashtaca jovengunami Joseshnallata Jehová Diospica tucui shungu confian. Huaquingunaca paicunapa crishcacunamandami carcelpipash churai tucushca (Sal. 110:3). w20.12 pág. 16 párr. 3; pág. 17 párrs. 5, 7

Jesusmanda, paipa yachachishcacunamanda apóstol Pedrota, Juandapash catiriashpa llaquichijpipash, paicunaca tucui shunguhuanmi villachishpa catirca (Hech. 4:18-21; 5:27-29, 41, 42). Chai punllacunapica Jesusta ali catijcunaca Diospa Reinomanda na pinganayachishpami villachirca. Shinami paicunata catijcunamanda ashtahuan yalimi tauca gentecunata ayudarca. Por ejemplo, Jesuspa huaquin ali catijcunaca Bibliapa huaquin librocunatami escribirca. Chai escribishcacunami cunanbipash ashtaca ashtaca gentecunata ayudajun. Shinallata paicunaca Diospa Reinomandami villachirca. Ñallapachami cai Reinoca mundo enterota mandanga (Mat. 24:14). Apostolcunapa punllacunapica romanocunaca ninanda catiriashpami llaquichirca. Shinapash paicunata catiriashpa llaquichijcunaca cunanbica huañushcami can. Cutin Jesusta ali catijcunaca cunanbica cielopimi Jesushuan mandanajun. Paicuna cai Alpapi cashpaca Diospa Reinomandami villachin carca. Jesusta ali catijcunata catiriashpa llaquichijcuna causarishpaca, chai Reino mandashcacunatallatami cazuna canga (Apoc. 5:10). w20.07 pág. 15 párr. 4

Jehová Diospa nishcacunapica Abrahanga tucui shunguhuanmi crin carca. Chaimi Mesías, Jehovapa Reinopi mandanataca ali yacharca. Chaimi Jesús cai Alpapi cashpaca judiocunataca nirca: “Cangunapaj ñaupa taita Abrahamga, cai pachaman ñuca shamujpi, ricunata yachashpami cushijurca. Ña shamujta ricushpaca, ninandami cushijurca nijurcami” (Juan 8:56). Abrahanba familia ucupuramanda jatun mandajcuna llujshishpa Jehovapa Reinopi mandana cashcataca paica alimi yacharca. Jehová Dios paipa nishcacunata pactachingacamanga Abrahanga tucui shunguhuan crishpami catirca. Jehovapa Reino mandanata shuyajushcataca ¿imashinata Abrahanga ricuchirca? Abrahanga ni maipi na causangapaj quedarcachu. Shinallata maijan reytapash na apoyarcachu. Pai rey tucungapapash na munarcachu. Chaipa randica Jehovatami cazurca. Paipa nishcacuna pactarinatapashmi tucui shunguhuan crirca. w20.08 pág. 3 párrs. 4-5

Jehovapa Reinopi Jesús mandajujpica: “Ñucaca huañujunimi” nishpaca pipash na ninajungachu (Is. 33:24). Gentegucunata Jehová Dios causachishpaca sano cuerpohuanmi causachinga. Shina causachishpapash jucha illaj cuerpohuanga nara causachingachu. Jucha illaj cuerpohuan ñucanchita causachijpica ñucanchi juyashca familia o amigocunapash na rijsita ushanmanllu. Jehovapa Reinopi mil huatacunata Jesús mandajujpimi tucuilla gentegucuna asha asha jucha illaj cuerpota chari callaringa. Chai jipaca Jesusca chai Reinotaca paipa Taita Jehovamanmi tigrachinga (1 Cor. 15:24-28; Apoc. 20:1-3). Gentegucuna causarijpica cushillami sintiripashun. Cushijuimanda ¿huacaitachu huacashun? Cushijuimanda ¿Jehovata agradicishpachu canticocunata candagripanchi? Imata ruraitapash na atinaringachu. Shinapash gentegucunata Jehová Dios causachinata yachashpaca Jehovata, Jesustapash ninandami juyashpa catipashun. w20.08 págs. 16-17 párrs. 9-10

Apóstol Pabloca na cazarashpa Jehovata sirvishpa catita ushanaca alipachami can nirca (1 Cor. 7:8-9). Shina nishpaca na cazarashcacunaca na sirvinllu nishpaca na nircachu. Imashina ricupanchi Pabloca joven Timoteotami importante ruraicunata pactachichun agllarca. Timoteoca na cazarashcachu carca (Filip. 2:19-22). ¿Imapita na pensarina capanchi? Cazarashca o na cazarashca cashcamandalla Jehovapa mingashcataca pipash alipacha pactachi ushanmi nishpaca na pensarinachu capanchi (1 Cor. 7:32-35, 38). Cazaranata o na cazaranataca ni Jesuspash ni Pablopash na nircachu. Shinaca cazaranamanda o na cazaranamandaca ¿imatata yuyana capanchi? La Atalaya del 1 de octubre de 2012 huata revistapica cashnami nin: “Cazarashpa o na cazarashpapash Jehová Diospa ñaupajpica alimi ricurin. [...] Na cazarashpa quidajtaca Jehová Diosca nalicachishpaca na ricujunllu”. Shinaca congregacionbi na cazarashca huauquipanicunata respetapashunchi. w20.08 pág. 28 párrs. 8-9

Huaquin llactacunapica gentecunaca Diospa Reinomanda villachijpica cushijushpami aliguman chasquin. Shinapash shuj llactacunapica Taita Diosmandapash, Bibliamandapash huaquingunallami uyangapaj munan. Ñucanchi territoriopi imashina gentecuna tiajpipash Jehová Diosca ñucanchicuna villachishpa catichunmi munan. Jehová Dios caicamanllami villachishpa catina canguichi ningacamanmi villachishpa catina capanchi. Jehová Diosca ima punllacamanlla villachina cashcataca ñami agllashcalla charin. Chaipimi “tucurimuica chayamunga” (Mat. 24:14). Tucurimui punllacunapi imashina gentecuna tianata, imacunalla pasana cashcatapashmi Jesusca paipa catijcunamanga villarca. Chaicunata ricushpami tal vez paipa catijcunaca villachinataca ladoman saquinga nircami. Chaimi paicunataca “rijcharianshnami chapariana canguichi” nirca (Mat. 24:42). Cunanbipash Noepa punllacunapishnami gentecunaca paicunapa munaita rurashpa causanajun. Chaimi Diospa Reinomanda villachijpica na uyangapaj munan (Mat. 24:37-39; 2 Ped. 2:5). Shinapash ñucanchicunaca Jehovapa mingashcataca pactachingapapachami munapanchi. w20.09 pág. 8 párrs. 1-2, 4

Diabloca ‘ninanda fiñarishca’ caimandami ñucanchitaca llaquichingapaj munan. Chaimi Diabloca ñucataca na llaquichingachu nishpaca na pensana capanchi (Apoc. 12:12). Ñallami tucuilla Jehovata sirvijcunaca Jehovata tucui shunguhuan sirvijushcata o na sirvijushcata ricuchina tucushun. “Ninan Manllanayai Llaqui” Punllacunaca ñallapachami chayamunga. Bibliapica pundamandapacha ‘cunangaman chashna jatun llaquica’ na tiashca nijunmi (Mat. 24:21). Chai punllacunapica tal vez ñucanchi propio familiacunallatami ñucanchi contra tucunga. Gobiernocunapash tandanajuchun, villachichunbash na saquingachu (Mat. 10:35, 36). Shina llaquicuna shamujpica ¿rey Asá shinachu Jehová Dios ñucanchita ayudanataca tucui shunguhuan confiashun? (2 Crón. 14:11). Chai punllacuna chayamungacamanmi Jehová Diosca paipi tucui shunguhuan crishpa catichun ayudajun. Chaimi Jehová Diosca ‘aliguta cazushpa aliguta yarishpa sirvij esclavota’ churashca. Paicunaca ñucanchicunataca publicaciongunahuan, videocunahuanmi Jehovapi tucui shunguhuan crishpa catichun ayudanajun (Mat. 24:45). Ñucanchicunapashmi Jehovapi tucui shunguhuan crishpa catingapaj esforzarina capanchi (Heb. 10:38, 39). w20.09 pág. 18 párrs. 16-18

Jehová Diosca paipa munaita pactachingapaca paipa poderta utilizashpami maijanbash autoridadta charij gentecunata utilizanlla. Gentecunaca larca yacu maiman richun munashpaca alpata allachishpami yacutaca shuj ladota cachanlla. Shina cuendami Jehová Diosca paipa espíritu santota utilizashpa maijanbash autoridadta charij gentecunapa pensamientota cambiashpa, paipa munaita pactachita ushan. Shinami huaquingunaca Jehovata sirvijcunata ayudangapaj ali desiciongunata agllashca (Esdras 7:21, 25, 26​huan chimbapurashpa ricupangui). Ñucanchicunaca ¿imatata rurai ushapanchi? Tandanajushpa catingapaj, Jehovapa Reinomanda villachishpa catingapami, ‘jatun mandajcuna, shuj mandajcunapash’ ali desiciongunata agllachun Jehovata paicunamanda mañanalla capanchi (1 Tim. 2:1, 2; Neh. 1:11). Apostolcunapa punllacunapishnami, ñucanchicunapash prezu huauquipanicunata Jehová Dios cuidachun tucui shungu mañana capanchi (Hech. 12:5; Heb. 13:3). w20.11 pág. 15 párrs. 13-14

Quiquinhuan Bibliamanda yachajuj bautizarijpica ashtacatami cushijupangui (1 Tes. 2:19, 20). Mushuj bautizarishca huauquipanicunaca ‘ñucanchita alicachishpa escribishca cartacunashnami’ can. Chaimi paicuna bautizarijpica congregacionmanda huauquipanicunaca ninanda cushijupanchi (2 Cor. 3:1-3). 4 huatacunapica cada quillami casi 10 millón gentecuna mundo enteropi Bibliamanda yachajunajushca. Shinallata chai huatacunapillatami cada huata casi 280 milcuna yali bautizarishpa Jesusta catijcuna tucushca. Chai ashtaca gentecunamanda ashtahuan gentecuna bautizarichunga ¿imashinata ayudai ushapanchi? Jehová Diosca gentecuna Bibliamanda yachajushpa Jesuspa catijcuna tucuchunmi tiempota cujun. Chai tiempoca ñami tucurijun. Chaimi Bibliamanda yachajujcunataca uchalla bautizarichun ayudangapaj esforzarina capanchi (1 Cor. 7:29a; 1 Ped. 4:7). w20.10 pág. 6 párrs. 1-2

Rey Saulca Jehová Diostaca na cazurcachu. Shina rurashcamandami Jehová Diosca profeta Samuelta Saulta consejachun cacharca. Shina consejajpipash paica alimanga na chasquircachu. Pai pandarishcata reconocinapa randica shujcunatarami culparca (1 Sam. 15:13-24). Saulca tauca viajecunatami ña shina rurashca carca (1 Sam. 13:10-14). Rey Saulca paipa shungu umachichunmi saquishca carca. Chaimi Jehová Diosca paita na cazushcamanda ñana rey cachun saquirca. Ama Saulshna cangapaca cashna tapuripashunchi: “¿Bibliapa consejocunata na pactachingapaj munashpachu imacunatapash nijuni? Jehovapa mandashcata na cazushpapash ¿imapash na pasahuangachu yashpachu pensarini? ¿Shujcunatarachu imamandapash culpani?” nishpa. Cai tapuicunata ari nishpaca ñucanchi yuyaicunata, ruraicunata cambiana cashcatami ricupanchi. Ñucanchicuna na cambiashpaca ñucanchi shungu pandachichun saquishcatami ricuchinajupanchiman. Shina cajpica Jehová Diosca ñucanchipa amigo cangapapash na munangachu. w20.11 pág. 20 párrs. 4-5

Jovenguna, pita sirvinataca agllanami canguichi. Jehová Dios pi cajta, paipa munai ima cajta, paipa munaita imashina pactachinatapash cangunallatami ali ricuna canguichi (Rom. 12:2). Shinallami cangunapa causaipica Jehovatalla sirvina munaita charipanguichi (Jos. 24:15). Bibliata cada punlla liishpaca Jehovatami ashtahuan juyanguichi. Shinallata paipi tucui shunguhuanmi cripanguichi. Cangunapa causaipi Jehovapa munaita pactachipanguichi. Diabloca jovenguna imata rurai ushashcata ricushpami paicunapa munashcata rurashpa cushilla causaita ushan nishpami crichingapaj munan. Pero maijanbash paicunapa causaipi charijyangapaj o ashtaca cosascunata charingapaj munashpaca ‘ninan llaquicunatami’ charinga (1 Tim. 6:9, 10). Pero Jehovata cazushpa, paipa munaita pundapi pactachinata agllashpaca, ‘tucui imatalla rurashcapash alimi Ilujshinga’ (Jos. 1:8). w20.10 págs. 30-31 párrs. 17-18

Punda Jesusta catijcunapa tiempopi Jesuspa ali villaigucunaca tucuilla gentecuna cushilla causana munaita charichunmi ayudarca. Jesusca paipa ali catijcunataca ñuca imata rurai callarishcata rurashpa catina canguichi nishpami mandarca. Shinallata “cai pacha tucuri manñacaman ñucamanda villagringuichi” nirca (Hech. 1:8). Chai mandashcata pactachingapaca Jehovapa espíritu santotami minishtinguichi nishpami Jesusca nirca (Juan 14:26, TNM; Zac. 4:6). Pentecostés 33 huatapimi Jesusta ali catijcunaca Jehovapa espíritu santota chasquirca. Jehovapa espíritu santo ayudajpimi ali villaigucunata villachi callarirca. Shinami ashalla tiempopica ashtaca ashtaca gentecuna Jesuspa ali catijcuna tucurca (Hech. 2:41; 4:4). Contracuna paicunata llaquichingapaj catirianajujpipash Jesusta ali catijcunaca na manllaita charircachu. Chaipa randica Taita Diostami cashna mañarca: ‘Na manllashpa canba Shimita villachun ushaita carahuai’ nishpa. Shinami paicunaca ‘Diospa jucha illaj espíritu junda cashpa Diospa Shimita na manllashpa villanajurca’ (Hech. 4:18-20, 29, 31). w20.10 pág. 21 párrs. 4-5

Jesusta Jehová Dios causachishcataca ¿imamandata seguro capanchi? Jesús causarishcataca ashtaca gentecunami ricurca (1 Cor. 15:5-7). Jesús causarishcata ricushcacunamanda parlashpaca, apóstol Pabloca apóstol Pedromandami primeroca parlarca. Jesusta huaquin catijcunapashmi Pedroca, Jesús causarishcatami ricurca nirca (Luc. 24:33, 34). Jesús causarishcataca paipa 12 apostolcunapashmi ricurca. Jipamanga Mateo 28:16-20​pi nishcashnami Jesusca Galilea llactapi 5 mil “yali crijcuna tandanajushcamanmi” ricurirca. Shinallata Jesuspa lahuauqui ‘Jacoboman [o Santiagomanmi] ricurirca’. Chai horascamanga Jesús Mesías cashcataca Santiagoca na crishcarcachu (Juan 7:5). Shinapash Jesús causarishcata ña ricushpami crirca. Apóstol Pabloca Jesús causarishcata huata 55​pimi escribirca. Chai tiempopica Jesús causarishcata ricushca huaquin gentecunaca causanajurcarami. Chaimi apóstol Pablopa nishcacunata na seguro cashpaca paicunata tapunalla carca. w20.12 pág. 3 párrs. 5, 7-8

Irquilla cashpa o na jambirinalla ungüihuan cashpaca ali caitaca na usharinllu. Shina sintirishpaca Jehová Dios quiquinda ayudachun paita mañapai. Cunanbica ñucanchita jambingapaca Jehová Diosca na shuj milagrota rurangachu. Shinapash ñucanchitaca consolachishpa, llaquicunata aguantashpa catichunmi ayudan (Sal. 94:19). Por ejemplo, Jehová Diosca huasipi imata rurana cajpipash ayudachunmi huauquipanicunata utilizaita ushan. Huauquipanicuna ñucanchihuan mañachunbashmi utilizaita ushan. Shinallata shamuj punllacunapi paraíso Alpagupi sano cushilla causaita charinamanda parlaj textocunata yarichunbashmi ayudaita ushan (Rom. 15:4). Shinapash huaquinbica ñucanchi munashcashna na villachi ushashcamandami llaquilla sintirita ushapanchi. Panigu Laurelca 37 huatacunatami paipa pulmón nali cashcamanda shuj maquinahuan respiran carca. Shinallata cáncer ungüitapashmi charirca. Paica tauca viajecunatami operarinapash tucurca. Chai jahuapash paipa aicha caragupica na jambirinalla shuj shuj ungüicunatami charirca. Shinapash chai paniguca villachinataca nunca na saquircachu. Paica paita ayudajcunaman, enfermerocunamanmi Jehovamanda villachin carca. Chai paniguca 17 gentecunatami Jehovata rijsichun ayudarca. w20.12 pág. 24 párr. 9; pág. 25 párr. 12

Jerusalén templomanda llujchishpami apóstol Pablotaca paipa contracunaca casi huañuchirca. Chaica casi huata 56​pimi cashcanga. Cayandi punlla Sanedrinba ñaupajman Pablota apajpica cutinmi paipa contracunaca huañuchingapaj munanajurca (Hech. 21:30-32; 22:30; 23:6-10). Shina llaqui apajushpaca cashnami apóstol Pabloca tapuririanga: “Cai llaquitaca ¿ima punllacamanshi aguantaita ushasha?” nishpa. Ciertopachami ayudachun minishtijurianga. Pablotaca ¿picunallata ayudarca? Carcelpi churashca chai tutallatami Jesusca cashna Pablotaca nirca: “Ama manllaichu. Imashnami Jerusalenbi ñucamanda villajurcangui, chashnallata Roma pueblopipash villagrinapachami cangui” nircami (Hech. 23:11). Cai shimicunata uyashpaca Pabloca cushillami sintiririanga. Shinallata Jerusalén llactapi Diosmanda villachishcamandapashmi Jesusca felicitarca. Roma llactaman ali chayachun, chaipi villachichunbash ñucallatami ayudasha nircami. Jesuspacha chai shimicunata nijujta uyashpaca apóstol Pabloca tranquilomi sintiririanga. Shuj taita paipa uchilla huahuaguta cuidajujpishnami Pabloca sintirishcanga. w20.11 pág. 12 párrs. 1, 3; pág. 13 párr. 4

Paraíso Alpagupi causanata shuyanaca ‘barcota jirru charijunshnami’ ñucanchitaca shinllichishpa ayudan. Chaimi llaquicunata o problemacunata charishpapash aguantashpa catita ushapanchi. Llaquicunamandaca jipa punllacunapica ñaña preocuparishunllu. Jehová Diosmi chai llaquicunata cungaitapacha cungachun ayudanga (Is. 65:17). Paraíso Alpagupi llaquicuna illaj, tranquilo causaiguta charinapi pensaripashunchi (Miq. 4:4). Paraíso Alpagupi yaria causangapaca shuj gentecunamanbashmi villachishpa, Jesuspa catijcunata tucuchunbash ayudana capanchi. Shina rurashpaca ñucanchicuna ‘shuyanajushcataca Dios tucuita pactachingacamambachami’ shuyai ushapashun (Heb. 6:11). Cai tucurimui punllacunapi causanajuimandami problemacunata, llaquicunata ashtahuan charipashun. Chaimi yapata preocuparita ushapanchi. Llaquicunahuan cashpapash, ama yapata preocuparingapaj Jehová Diospi confiana minishtirishca cashcatami yarina capanchi. Jehová Diosca “ñucapi confiashpa, tranquilo cashpami shinlli tucuita ushanguichi” ninmi (Is. 30:15). Shinaca ñucanchi ruraicunahuan Jehová Diospa nishcacunapi confiashcata ricuchipashunchi. w21.01 pág. 7 párrs. 17-18

Santiago 5:11​pica Jehová Dios juyaj cashpapash, llaquij cashcatapashmi ricuchijun (Éx. 34:6). Jehová Diosca pai llaquij cashcataca ñucanchi pandarishcacunata perdonashpami ricuchin (Sal. 51:1). Bibliapica llaquinamanda parlashpaca na perdonanamandallachu parlajun. Pitapash llaquishpaca shungumandami llaquipanchi. Llaquimandami pipash sufrijujta ricushpaca ayudangapaj esforzaripanchi. Por ejemplo, shuj mamaca paipa churicunata tucuipimi ayudangapaj munan. Shinapash Jehová Diosca shuj mamatapash yalimi paita sirvijcunataca tucuipipacha ayudangapaj munan (Is. 49:15). Ñucanchicuna llaquicunahuan o problemacunahuan sufrijujta ricushpaca, Jehová Diosca ñucanchita llaquimandami ayudangapaj munan (Sal. 37:39; 1 Cor. 10:13, TNM). Shinaca, ñucanchi huauquipanicunata perdonashpa, paicunahuan na resentirishpami Jehová Dioshna llaquij cashcata ricuchi ushapashun (Efes. 4:32). Ashtahuanbachaca ñucanchi huauquipanicuna llaquicunata charijpi paicunata ayudashpami paicunata llaquishcataca ricuchipashun. Shinami Jehová Dioshna llaquij cashcata ricuchipanchi (Efes. 5:1). w21.01 pág. 21 párr. 5

Cusacunaca na trabajopilla yapata empeñarinachu can. Trabajopilla yapata empeñarishpaca paipa familiaman Jehovamanda yachachingapaj, familiata cuidangapaj, consejangapapash na tiempota charingachu. Jehová Diosca ñucanchita juyaimanda, ali causachun munaimandami consejan, disciplinan (Heb. 12:7-9). Jesuspashmi paita catijcunataca juyaihuan Jehová Diosmandaca yachachirca (Juan 15:14, 15). Jesusca shinllita consejashpapash siempremi juyaihuan tratan (Mat. 20:24-28). Paica ñucanchicuna juchayu caimanda pandarijlla cashcataca alimi yachan (Mat. 26:41). Jehová Diospa, Jesuspa ejemplota catij cusaca paipa huarmigu, paipa huahuacunapash juchayucuna cashcataca alimi yachan. Chaimi paica na imagumandapash yapata culiranlla (Col. 3:19). Culiranapa randica, Gálatas 6:1​pi shimicunata yarishpami ‘na fiñashpa, ali shunguhuan’ paipa familiata consejana can. Paipash juchayu cashcatapashmi yarina can. Cusaca Jesushnami paipa familiataca ali ejemplota ricuchishpami ali yachachina can. w21.02 págs. 6-7 párrs. 16-18

Jesús huañushcamandami Jehová Diosca huauquipanicunata, ashtaca gentecunatapash Jesuspi feta churajpica huañuimanda, juchamandapash quishpichishca (Mar. 10:45; Hech. 20:28; 1 Cor. 15:21, 22). Jesús ñucanchimanda huañushca cajpimi, Jehová Diosca Jesustaca congregacionda umashna mandachun saquishca. Chaimandami Jesusca tucuicuna Jehovapa mandashcacunata pactachichun, pai ñucanchicunaman consejocunata cuna derechota charin (Gál. 6:2). Shinapash consejocunatallaca na cunllu. Jesusca tucuicunatami aliguta cuidashpa ricuriajun (Efes. 5:29). Panigucunaca ancianocunapa nishcata uyashpami, Jesuspa autoridadta respetashcataca ricuchin. Huauquicunaca panigucunata respetohuan ali tratashpami Jehová Dios churashca autoridadta respetashcataca ricuchin. Jehová churashca autoridadta tucuicunallata respetashpaca, congregacionbica tucuicunami ali llevarishun. Ashtahuanbash Jehová Diostami alabashun. w21.02 págs. 18-19 párrs. 14-17

Shuj viajeca Davidpash, paipa soldadocunapash rey Saulmanda pacajushca causanajushpami shuj macanajuiman rina tucurca. Shinapimi contracuna shamushpaca paicunapa familiataca gulpita apashpa rirca. Davidca alipacha macanajunata yachajmi carca. Chaimi chai familiacunata contracuna apajpica, “paicunata salvaita ushashunllami” nita ushanman carca. Shinapash chai decisionda japinapa randica, Jehová Diospa ayudatami mascarca. Davidca Jehová Diosta cashnami tapurca: “¿Chai shuhua runacunataca catipashachu?” nishpa. Shina tapujpica, Jehová Diosca “catilla” nircami. Paicunataca mishagringuimi nishpa cacharca (1 Sam. 30:7-10). Shinaca ¿imatata yachajupanchi? Jovenguna, shuj decisionda agllagrijushpaca, nara agllashpallatami cangunapa taitacunahuan o anciano huauquicunahuan parlashpa shuj consejota mañana capanguichi. Paicunaca alipacha consejotami cuita ushan. Jehová Diosca anciano huauquicunapi confiaimandami congregacionda ñaupaman pushachun churashca. Cangunapashmi paicunapica confiaita ushanguichi (Efes. 4:8). Shinaca anciano huauquicunapa ejemplota catishpa, paicunapa consejota uyashpaca ali decisiongunatami agllaita ushapanguichi. w21.03 págs. 4-5 párrs. 10-11

Jesusca Bibliapi nishcacunata na pactachijcunaca arena jahuapi shuj huasita huasichishcashnami can nircami. Shinllita trabajajpipash, arena jahuapi huasichishca huasica shinlli huairahuan tamiajpica urmangallami. Chaica yangallatami canga (Mat. 7:24-27). Shina cuenda, imata yachajushcata ñucanchi causaipi na pactachishpaca yangallatami canga. Llaquicuna shamujpica ñana Jehovapi tucui shunguhuan crishpa catita ushashunllu. Shinapash Bibliapi yachajushcacunata ñucanchi causaipi pactachishpaca ali decisiongunata japishpami tranquilo, cushilla causashun. Jehová Diospipashmi tucui shunguhuan crishpa catishun (Is. 48:17, 18). Llaquicuna ricurijpi Jehová Diosta ama saquingapaca cunanmandami Jehová Diosta tucui shunguhuan mañangapaj, Bibliatapash ali yachajungapaj esforzarina capanchi. Ñucanchipaca tucuimanda yalica Jehová Diosta alabanami ashtahuan importante cana can. Jehová Diosca ñucanchitaca nunca na saquingachu. Pai ñucanchita juyachunbash pipash na jarcaita ushangachu (Heb. 13:5, 6). w21.03 pág. 15 párr. 6; pág. 18 párr. 20