Julio

Jehová Dios ñucanchi mañaicunata contestachunga, Jesuspa ali amigocunami cana capanchi. Mañanajushpaca “Jesuspa shutipimi mañanchi” nishpallaca na quedanachu capanchi. Jehová Dios ñucanchi mañaicunata contestangapaj Jesusta imashina utilizajtami intindina capanchi. Jesusca paipa catijcunataca nircami: “Ñuca shutipi ñuca Taitata imaguta mañajpipash carashallami” nishpa (Juan 14:13). Jehová Diosmi ñucanchi mañaicunata uyan. Shinapash paipa munaita pactachichunga paipa Churi Jesusmanmi autoridadta cushca. Ñucanchi mañaicunata nara contestashpallatami Jehová Diosca ñucanchicuna Jesuspa consejocunata pactachijujta o na pactachijujta ricun. Jesusca nircami: “Cangunata shujcuna ima nalita rurashcata cungajpica, jahua pachapi tiajuj cangunapaj Taitami, cangunapaj juchacunatapash anchuchinga. Ashtahuangarin cangunata imatapash nalita rurajcunata na perdonajpica, cangunapaj Taitapash, canguna rurashca juchacunataca na anchuchingachu” nishpa (Mat. 6:14, 15). Jehová Dioshna, Jesushnallatami ñucanchicunapash shujcunataca tratana capanchi. w20.04 pág. 22 párr. 6

Apóstol Pabloca gentecuna imacunamanda parlangapaj munashcata ricushpami parlai callarin carca. Por ejemplo, Listra llactamanda gentecunaca Diospa Shimimandaca casi nimata na yacharcachu. Chaimandami paicunaman villachingapaca paicuna rijsishca yuyaicunamanda parlan carca. Paicunamanga granocunata cozechanamanda, cushilla causanamandami parlan carca. Ali yachachingapami paica intindirinalla, rijsishca chimbapuraicunata churarca. Villachinajushpaca ñucanchicunapashmi gentecuna imata ruranajujta ricushpa villachina capanchi. Gentecuna imamanda parlangapaj munashcata yachangapaca ¿imatata rurana capanchi? Paicuna tal vez alpapi trabajajujta, camisata bordajujta, yamdata chijtajujta, imagutapash jatunajujtami ricuna capanchi. Shinami paicunahuan parlai callari ushapashun (Juan 4:7). Paicunapa churajushca ropapashmi maimanda cashcata, imapi trabajajta, ima pugllaita gushtashcatapash ricuchin. w20.04 pág. 11 párrs. 11-12

Imamandapash yapata preocuparij huauqui o panica cada punllami pihuanbash parlanataca manllaihuan causan. Shinallata ista o ashtaca gentecunahuan yalinatapash na gushtanllu. Shina manllaita charishpapash tandanajuicunaman, asambleacunamanbash ringapaj esforzarin. Huaquinbicarin na rijsishca gentecunahuan parlana shinlli cajpipash villachingapapashmi llujshin. Quiquin shina sintirijushpaca, na quiquinlla shina yalijupanguichu. Tauca huauquipanicunami shina llaquita charin. Ñucanchi usharishcaguta Jehová Diospa rurajpi pai cushilla sintirijtami siempre yarina capangui. Jehová Diosta sirvishpa catijuimandami pai ayudajushcata, fuerzata cushpa catijushcatapash ricuita ushapangui (Filip. 4:6, 7). Masqui salud nali cashpapash, imamandapash yapata preocuparishpa llaquilla sintirijushpapash Jehovata tucui shunguhuan sirvijuimandami, Jehová Dios cushilla cajtaca seguropacha cana capangui. Cunanbi ashtaca huauquipanicunaca ñucanchi saludhuanga nalimi canchi. Shina llaquicunahuan causanajushpapash aguantashpami catinajunchi (2 Cor. 4:16). Jehová Diospa ayudahuanllami para siempre causaita tucuicunallata chasquingacaman calpashpa catipashunchi. w20.04 pág. 31 párrs. 20-21

Cai juyailla mundo Alpaguta rurashcata ricushpaca Jehová Dios alipacha yachaj Dios cashcatami ricupanchi (Heb. 3:4). Ashtaca ashtaca planetacuna tiashpapash cai mundo Alpapillami causaica tian. Cai mundo Alpaca shuj barcopi gentecuna junda rijunshnami can. Shinapash barcota cai mundo Alpahuan chimbapurashpa ricujpica cai mundoca shujpachami can. Por ejemplo, barcopi rij gentecuna micunata, yacuta, oxígeno nishca samaita paicunallata rurashpa, basuratapash na shitashpaca ¿causashpa cati ushanmanllu? Na. Chai gentecunaca uchallami huañunman. Cai mundo Alpagupica ashtaca millón gentecuna, plantacuna, animalcunami tian. Jehová Diosca ñucanchi Alpa oxigenota charichun, micunata, yacutapash charichunmi rurashca. Caicunaca minishtirishcapacha caimandami nimahora na tucuringa. Shinallata cai mundo Alpapi ashtaca ashtaca basuracuna tiashpapash cai mundopica na jundanllu. Cai Alpaca juyaillagu, causanayaimi can. Cai Alpaguta rurashpaca Jehová Dios cai Alpapi tiashcacuna ismushpa cutin alpaman tigrachunmi rurarca. w20.05 pág. 20 párrs. 3-4

Diabloca, Jehová Dios llulla cashcatami Evamanga nijurca. Chai llullacunata nishpami Satanasca, Diablo tucurca. Evaca, Diablo paita umachichunmi saquirca (1 Tim. 2:14). Evaca Jehová Diospi confianapa randica, Diablotarami crirca. Shina rurashpaca paipa causaipi nalitapacha rurashcatami ricuchirca. Jehovata na cazushpami, ama micunguichu nishca yuramanda micurca. Pai micushca jipaca paipa cusa Adanmanbashmi curca (Gén. 3:6). Diablo shina nijujpi Eva imata ni ushashcapi pensaripashunchi. Evaca cashnami nita ushanman carca: “Candaca na rijsinica. Jehová Dios ñuca Taitataca alipachami rijsini. Paitaca ninandami juyani. Paipimi tucui shunguhuan confiani. Paimi ñucanchimanga tucui tucuita carashca. ¿Imashpata Jehová Diosmandaca cashnapacha llullacunata nijungui? Ama molestahuaichu” nishpa. Shina nishpaca Jehovata tucui shunguhuan juyashcatami ricuchinman carca. Chaita uyashpaca Jehová Diosca ninandami cushijunman carca (Prov. 27:11). Shinapash Adanbash, Evapash Jehová Diosta tucui shunguhuan juyashcataca na ricuchircachu. Chaimi Jehovamanda Diablo llullacunata nichun saquirca. w20.06 pág. 4 párrs. 10-11

Jehovata sirvinajushcamandami panigucunataca felicitana capanchi. Ashtaca panigucunaca Tandanajui Huasicunata shayachishpa, Jatun Tandanajui Huasicunata cuidashpapashmi ayudanajun. Huaquingunaca shuj shuj shimicunapimi villachinajun. Shujcunaca Betelpipashmi huaquin punllacunata ayudanajun. Shinallata shuj panigucunaca llaqui apashca pushtucunapimi ayudanajun. Cutin huaquingunaca publicaciongunata traducishpami ayudanajun. Shuj panigucunaca precursoracuna, misioneracunashnami sirvinajun. Cazada panigucunaca paicunapa cusacuna congregacionbi ashtahuan ayudashpa catichunmi paicunapa cusacunataca apoyan (Efes. 4:8). Ashtaca ‘ashtaca huarmigucuna’ Diospa Reinomanda ali villaigucunata villachinajujtaca ancianocunaca alimi yachan. Ancianocunaca experienciata charij panigucuna shuj jovenlla panigucunata ayudai ushashcatapashmi ali yachan (Tito 2:3-5). Caicunata ricushpami tucui panigucunata agradicina cashcata, juyaihuan tratana cashcatapash yachajupanchi. w20.09 págs. 23-24 párrs. 13-14

Huaquin huauquipanicuna Jehová Diosmanda caruyashca cajpipash, paita tucui shunguhuan sirvishcata, paita sirvingapaj imacunatalla rurashcatapash nimahora na cunganllu (Heb. 6:10). Jehová Dios paita sirvijcunata imashina cuidajta, juyajta ricuchingapami profeta Isaiasca shuj chimbapuraita churarca. Paica nircami: “Paica, llamata michinshnami, paipaj llamagucunata michijunga. Huahua llamagucunatapash, paipaj rigrapi churashpami, marcashpa apanga” nishpa (Is. 40:11). Congregacionman shuj huauqui o shuj pani ñana shamujujta ricushpaca ¿imashinata ñucanchita ali Michij Jehová Diosca sintirin? Jesús caimanda parlashpami paipa catijcunataca cashna tapurca: ‘Cangunaca ¿imata yanguichiman? 100 llamacunata shuj runa charijpi, shuj llamagu chingajpica, ¿nacha 99 llamacunata chai urcupi saquishpa, chai chingashca llamagutara mascangapaj rinman? Na llullashpami cangunataca cashna nini: “Chai chingashca llamaguta tarishpaca, chai na chingashca 99 llamamandapash yalimi chai llamaguta tarishcamanda ninanda cushijunman”’ nishpa (Mat. 18:12, 13). w20.06 págs. 19-20 párrs. 8-9

Jehovata sirvina shuj jatun bendición caimandami paita ali sirvingapaj ninanda esforzaripanchi (Sal. 27:4; 84:10). Shuj huauqui Jehovapa organizacionbi ashtahuan sirvingapaj munashpaca alitami rurajun. Shinapash congregacionbi ña anciano o siervo ministerial cashpaca na jariyashcaca purijunachu can (Luc. 17:7-10). Chai huauquicunaca na jariyashpa tucui shunguhuan shujcunata ayudangapami munana can (2 Cor. 12:15). Bibliapica Jehovata huaquin sirvijcuna jariyashcacuna tucushcatami parlan. Por ejemplo, Diótrefes jarica congregacionbi shujcunata mandangapaj munaimandami jariyashca tucurca (3 Juan 9). Uzías jarica orgulloso caimandami paipa munai inciensota rupachingapaj Diospalla shicanyachishca ucuman yaicurca (2 Crón. 26:16-21). Shinallata Absalón jarica rey tucungapaj munaimandami gentecunataca jahua shungulla ali tratan carca (2 Sam. 15:2-6). Imashinami cai ejemplocunapi ricupanchi Jehová Diosca jariyashca gentecunataca nimamanda na alicachinllu (Prov. 25:27). Jariyashca gentecunaca imahorapash na cushilla causanllu (Prov. 16:18). w20.07 pág. 4 párrs. 7-8

Huaquin familiacunaca shuj llactacunapi pacajungapaj o trabajota mascangapami rishca. Chai llactacunapimi paicunapa huahuacunaca escuelaman rina tucushca. Shinallata taitacunaca chai llactapi trabajota taringapaca chai llactapi parlaj shimitami yachajuna tucushca. Shinapash ¿chai llactapi yachajushca shimita parlaj congregacionmanllu rina can? Na cashpaca ¿paicunapa propio shimipi parlaj congregacionmanllu rina can? Cusami maijan congregacionman rina cashcatapash decidina can. Familiapi pensarishpami chaitaca decidina can. Chai decisionda cusa agllashca cajpica ñucanchica respetanami capanchi. Shinallata ñucanchi congregacionman shamujpica juyaihuan, aligumanmi chasquina capanchi (Rom. 15:7). w20.08 pág. 30 párrs. 17-18

Jehová Dios ñucanchita ayudachun munashpaca, colegiota o universidadta estudiashcapi, fuerzayu cashcapica na confiarinachu capanchi. Chaipa randica Jehová Dios ayudanapimi siempre confiana capanchi. Chaicunaca Jehovapa ñaupapi valishca cachunga na ayudanllu. Jehovata sirvijcunapurapica ‘cai pachapi alipacha yachajushcacuna, ushaita charijcuna, ninanda alicachi tucushcacunapash na taucacunachu can’ (1 Cor. 1:26). Shinaca Jehovata sirvitaca na ushashachu yashpaca na pensarijunachu capanchi. Chaipa randica Jehová Dios paita sirvichun imashna ñucanchita ayudajtami ricuna capanchi. Huaquinbica ñucanchi crishcacunamandami huaquin gentecunaca burlarin. Shina burlarinajujpica, “uchashpami ama manllashpa paicunahuan parlangapaj ayudahuai” nishpa Jehovata mañanalla capanchi (Efes. 6:19, 20). Shinallata na jambirinalla ungüitachari charipanchi. Chashna llaquipi cashpapash Jehovata mañanataca na saquinachu capanchi. Shinallami paipa munaitapash pactachishpa catita ushashun. Shinaca Jehová Dios ayudanapi tucui shunguhuan confiapashunchi. w20.07 pág. 16 párr. 9

Ñucanchi causaipi Diospa Reinota pundapi churangapaj munashpaca, Abrahanshnallatami ñucanchicunaca sacrificiocunata rurana canchi (Mar. 10:28-30; Heb. 11:8-10). Jehovata sirvimandaca llaquicunata charipashunmi. Ñucanchi tucui causaipi Jehová Diosta sirvishpapashmi llaquicunata charipanchi (Sant. 1:2; 1 Ped. 5:9). Paraisopi causanataca siempremi yarishpa causana capanchi. Cunanbi ashtaca llaquicunata ricushpaca tucuri punllacunapa último punllacunapi causanajushcatami cuenta japipanchi. Shuj punllaca cai Alpataca Jehovapa Reinomi mandanga. ¿Ima bendiciongunatata chaipica charipashun? Ñucanchi familia huañushcacunapash cutin causarijpimi ñucanchica cutin paicunata ricushun. Shinallata Abrahán Jehovapi tucui shunguhuan crishcamandami paita, paipa familiatapash cai Alpapi causachinga. ¿Paicunata chasquingapaj munapanguimanllu? Shinaca Abrahanshnami Jehovata sirvingapaj sacrificiocunata rurana cashpaca, ruranalla capanchi. Shinallata ima llaquicunata charishpapash Jehová ayudanapimi seguro cana capanchi (Miq. 7:7). w20.08 págs. 5-6 párrs. 13-14; pág. 7 párr. 17

Ñucanchi contracuna ñucanchita huañuchijpipash Jehová Dios causachinataca tucui shunguhuanmi cripanchi. Diablo imata rurajpipash Jehová Diosta juyaimanda sirvinataca nimahora na saquinachu capanchi (Rom. 8:35-39). Gentecunata causachishpami Jehová Diosca ali yachaita charij Dios cashcata ricuchin. Chaita ali yachaimandami Diablo imacunahuanbash ñucanchicunata llaquichijujpipash Jehovataca sirvishpa catina capanchi. Jehovata sirvijuimanda pipash huañuchijpica, Jehová Dios ñucanchita causachinataca ¿tucui shunguhuanllu cripanchi? Chaita yachangapaca cashna tapuripashunchi: “¿Imashinata cada punlla Jehovapi confiashcata ricuchipani?” (Luc. 16:10). “¿Ima minishtirishcaguta Jehová Dios cunapichu tucui shunguhuan confiani?” (Mat. 6:31-33). Jehovapi confiashpaca ima llaquicunata charishpapash aguantashpami catita ushapashun (Prov. 3:5, 6). w20.08 págs. 17-18 párrs. 15-16

Ñucanchicunaca Bibliata ali utilizangapaca cutin cutinmi yachajushpa catina capanchi. Bibliata ali utilizanata yachajuchunga Tandanajuicunami ayudanga. Shinaca shujcunaman Bibliamanda ali yachachi ushangapaca, ñucanchirami Bibliamanda ali yachajungapaj shuj horariota charina capanchi. Shinallami Jehovata tucui shunguhuan sirvishpa catichun ayudanga. Bibliata liitallaca na liinachu canchi. Chaipa randica liishcapimi cutin cutin pensarina capanchi. Bibliata liijushpa na intindishpaca ali intindingapami publicaciongunapi mascana capanchi. Ali intindishpami shuj gentecunamanbash ali yachachita ushapashun (1 Tim. 4:13-15). Ali prepararishca cashpaca gentegucunaman shuj textotalla liinapa randica Bibliata ali utilizashpami ali yachachita ushapashun. Ñucanchira Bibliata alipacha intindishpaca alipacha yachachijcunami tucuita ushapashun (2 Tim. 3:16, 17). w20.09 pág. 28 párr. 12

Diospa Reinomanda tucui shunguhuan villachichunga Jehová Diosca ashtaca publicaciongunatami cushca. Chai publicaciongunataca liitapash, uyaitapashmi ushapanchi. Shinallata videocunata, Bibliamanda grabashcacunatapashmi charipanchi. JW Broadcasting programatapashmi charipanchi. Internetpi jw.org paginapipash mil yali idiomacunapimi publicaciongunaca tian (Mat. 24:45-47). Diospa Reinomanda tucui shunguhuan villachingapaca Jesuspa ejemplotapashmi catina capanchi. Jesusca villachinataca nimahora na saquircachu (Juan 18:37). Diabloca Jesusmanga “cai pachapi muyundi tucui llactacunatapash, chai llactacuna juyailla cajtapashmi” cusha nirca. Shina nijpipash Jesusca cai alpapi charijyangapaca na munarcachu. Shinallata rey cangapapash na munarcachu (Mat. 4:8, 9; Luc. 9:58; Juan 6:15). Contracuna llaquichingapaj munajpipash na manllarcachu (Juan 8:59). Llaquicunapi cashpaca, cunan punllapa textopi apóstol Pablopa nishcatami yarina capanchi. Shinami villachinataca na saquishun. w20.09 págs. 9-10 párrs. 6-7

Congregaciongunapica panigucunaca ashtacatami ayudanajun. Paicunaca congregacionbi comentashpa, villachishpami ayudan. Shinallata Tandanajui Huasicunatapash arreglashpa, cuidashpami ayudan. Ashtahuangarin shuj huauquipanicunatapashmi ayudan. Congregaciongunapica panigucunataca ninandami juyapanchi. Shinapash ñucanchi panigucunaca huaquin llaquicunatapashmi charin. Huaquingunaca mayorlla taitamamacunatami cuidanajun. Cutin shujcunaca familiacuna na Testigocuna cajpimi llaquicunata charin. Shinallata shuj panigucunaca paicunallami huahuacunata viñachingapaj, mantiningapaj shinllita esforzarinajun. ¿Imamandata ñucanchi panigucunata ayudangapaj esforzarina capanchi? Canllamanda gentecunaca huarmigucunataca na valichishpa, na respetashpami tratan. Bibliapica huarmigucunataca ayudana, respetanami canguichi ninmi. Apóstol Pablo Roma llactamanda congregacionman escribijushpaca Febe panigutaca aliguman chasquipanguichi, imaguta na charijpipash carapanguichi nishpami mandarca (Rom. 16:1, 2). Pablo fariseo cashpaca huarmigucunataca na valichishpami tratashcanga. Shinapash Jesuspa catij tucushpaca Jesushnami huarmigucunataca juyaihuan, respetohuan tratan carca. w20.09 pág. 20 párrs. 1-2

Bibliamanda yachajujcuna Diospa Reinomanda villachina munaita charichunga, paicunataca cashna tapupashunchi: “Diospa Reinomanda yachajushca punllamandapacha ¿imashinata quiquinba causaipica ayudashca? Diospa Reinomandaca ¿nachu shuj gentecunamanbash villachingapaj munapangui? ¿Imashinata shuj gentecunataca ayudaita ushapangui?” nishpa (Prov. 3:27; Mat. 9:37, 38). Jesuspa mandashcataca siempremi yarina capanchi. Chai mandashcataca shuj gentecunamanbash villachishpa paicunapash cazuchunmi yachachina capanchi. Shinallata chai mandashcapica cai ishcai importante yuyaicunatapashmi yachachirca. Primero, Jehovata tucui shunguhuan juyana cashcata. Segundo, gentecunata juyana cashcata (Mat. 22:37-39). Jehovata tucui shunguhuan juyashpaca ñucanchi munaimi shujcunaman na manllashpa villachingapaj munanchi (Sal. 18:1-3; Prov. 29:25). Bibliata yachajujcunataca Jehovata, gentecunata juyanami Diospa Reinomanda na manllashpa villachichun ayudanga. w20.11 pág. 3 párrs. 6-8

Bibliamanda yachachingapaj prepararijushpaca, Bibliata yachajujmanda, paipa minishtirishca cosascunamandapashmi Jehovataca mañaita ushapanchi. Shinallata paicunapa shunguman chayangapaj ayudahuai nishpapashmi mañanalla capanchi. Bibliamanda yachajujcunataca bautizaringapaj munaita charichunmi ayudana capanchi. Cutin Bibliamanda yachajujca Jehovata mañana, Jehová Dios ima nishcatapashmi yachajuna can. Chaipaca Bibliatami cada punlla liina can (Jos. 1:8; Sal. 1:1-3). Shinallata Jehová Dioshuan parlangapaca, cada punllami mañaca can. Ñucanchicunaca Bibliamanda yachachi callarijushpa, tucuchijushpapash tucui shunguhuanmi paimandapash Jehovata mañana capanchi. Shina mañajta uyashpaca Jehovata tucui shunguhuan mañanata, Jesuspa shutipi mañanatapashmi yachajunga (Mat. 6:9; Juan 15:16). Bibliata cada punlla liishpa, Jehovata mañashpaca paicunallatami ashtahuan Jehová Diosman quimirita ushanga (Sant. 4:8). w20.10 pág. 8 párr. 8; pág. 9 párrs. 10-11

Punda Jesusta catijcunapa tiempopi ordenado, casilla causana nishcaca cunangamanmi Jehovapa organizacionbica pactarijun (Hech. 16:4, 5). Chaitaca ¿imashinata yachai ushapanchi? Maijan llactaman rishpapash Villajun revistataca chai temamandallatami tucuicunallata yachajupanchi. Shinallata Villajun revistata imashna yachachijta, maijan quillamanda cajtapash alimi yachapanchi. Shinaca maijan llactaman rishpapash ñucanchi congregacionbi cashcashnami sintiripanchi. Tucuicunallata shujllashna cashcamandaca ninandami cushijupanchi. Jehovapa espíritu santomi shina tandanajuchun ayudan (Sof. 3:9). Shinaca ¿imatata rurai ushapangui? Tapuripai: “¿Huauquipanicunahuan casilla, tranquilo canatachu ayudajuni? ¿Congregacionbi yachachij huauquicunataca tucuipichu cazujuni? ¿Anciano o siervo ministerial cajpipash huauquipanicunaca ñucapi confianllu? ¿Tandanajuimanga jipayashcachu chayani? Congregacionba ¿imata rurana cajpipash uchashpachu rurani? ¿Huauquipanicunata ayudanata gushtanichu?” nishpa (Sant. 3:17). Cai tapuicunamanda mejorana cashcata yachaj chayashpaca Jehovapa espíritu santota mañapashunchi. Jehová Diosllami ñucanchi causaipi, ruraicunapi cambiachun ayudanga. Chaimi huauquipanicunaca quiquindaca ashtahuan juyanga. w20.10 pág. 23 párrs. 12-13

Bibliaca ñucanchi causaipaca shuj espejoshnami can (Sant. 1:23-25). Casi tucuicunallatami huasimanda nara llujshishpallata ali o nali cashcataca shuj espejopi ricuripanchi. Shinami cambiarina o na cambiarina cashcatapash cuenta japipanchi. Shina cuendami Bibliata cada punlla liishpaca ñucanchi yuyaicunapi, imashina cashcapi “cambiana” cashcata ricupanchi. Shinallata ashtaca huauquipanicunaca Cada Punlla Diospa Shimita Intindingapaj folletota nara maimanbash rishpallatami tutamandata liin. Shinami punlla entero imata rurajushpa, imata pensajushpapash Bibliapa consejocunata yarishpa paicunapa causaipi pactachin. Shinaca cada punlla Bibliata liingapaj, liishcapi pensaringapami tiempoguta llujchina capanchi. Caita ruranaca minishtirishcapachami can. Chaimi paraíso Alpagupi causachun ayudanga. Bibliaca radiografiata llujchij cuendami ñucanchillata imashina cajta ali rijsirichun ayudan. Bibliapa consejocuna ayudachunga humilde canami minishtirin. w20.11 pág. 18 párr. 3; pág. 20 párr. 8

Apostolcunapa punllacunapica Jesusta ali catijcunataca ninandami catiriashpa llaquichinajurca. Shinapash paicunaca shuj tiempotaca casilla o tranquilomi causanajurca. Chai tiempopica ¿imatata paicunaca ruranajurca? Chai tiempopica paicunaca Diospa Reinomanda villachingapami ninanda esforzarinajurca. Hechos libropica Jesusta catijcunaca ‘Diosta manllashpa causanajurca’ ninmi. Paicuna shina villachinajushcamandami ashtahuan “ashtahuan miranajurca”. Casilla o tranquilo tiempopi tucui shunguhuan villachinajushcamandami Jehová Diosca paicunata bendiciarca (Hech. 9:26-31). Jesusta punda catijcunaca Diospa Reinomanda villachingapaca ninandami esforzarirca. Por ejemplo apóstol Pabloca Éfeso llactapi ali villaigucunata ashtaca gentecuna uyangapaj munajta ricushpami chai llactapi quidangapaj decidirca (1 Cor. 16:8, 9). Jesusta ali catijcunaca ‘Diospa Shimimanda’ ali villaicunata villachingapaj aprovecharca (Hech. 15:30-35). Chaita rurashcamandaca ¿imata pasarca? Cunan punllapa textopimi ima pasashcataca ricuchin. w20.09 pág. 16 párrs. 6-8

Adanga Jehovata na cazuimandami huañurca. Chai juchatallatami paipa huahuacunamanbash yalichirca. Chaimandami ñucanchicunapash huañuna tucupanchi. Shinapash Jehová Dios paipa churi Jesusta causachishcamandami para siempre causaita chasquita ushapashun. Apóstol Pabloca: “Shujlla runamandami, huañushcacunapaj chaupimanda causarinapash callarirca. Imashnami Adán runapaj miraicunaca, tucuicuna huañunajun. Chashnallatami Cristohuan causajcunaca, tucuicuna causachi tucunga” nircami (1 Cor. 15:22). Apóstol Pabloca ¿imamandata “Adán runapaj miraicunaca, tucuicuna huañunajun” nirca? Adanba juchamandami tucuicuna juchayucuna caimanda huañuitapash huañunchi (Rom. 5:12). Adanga ñana ‘causachi tucungachu’. Paica jucha illaj cashpapash, Jehová Diosta paipa munai na cazurca. Chaimi paica Jesús huañushcamandaca imata japinatapash na charin. ‘Runa Aichayu tucushca’ Jesusmi Adanda, shuj gentecunatapash “chivocunashna” cashcata agllashpa tucuchitapacha tucuchinga (Mat. 25:31-33, 46; Heb. 5:9). w20.12 pág. 5 párrs. 13-14

Ñucanchi munashca asignacionda na chasquishpaca, angelcunapa ejemplopimi pensarita ushapanchi. Shuj viajeca Jehová Diosca, rey Acabhuanga ¿imata rurashpashi ali canman? nishpami angelcunataca tapurca. Chai angelcunaca tauca yuyaicunatami nirca. Pero shuj angelpa nishcatallami Jehová Diosca agllarca. Canba nishcami ali llujshinga nircami (1 Rey. 22:19-22). Jehová Dios shina nijpica caishuj angelcunaca ¿“yangami ñuca yuyashcata nishcani” ninajurcachu? Shina ninajushcataca nimaipi na ricupashcanchichu. Angelcunaca humildecuna caimandami Jehová Dioslla alabashca cachun munan (Juec. 13:16-18; Apoc. 19:10). Testigo de Jehová cana, Jehovapa Reinomanda villachinaca shuj jatun bendicionmi can. Imapash privilegiocunata o asignaciongunata charishpapash Jehovapa, shuj huauquipanicunapa ñaupapica humildecuna canami valishcapacha can. Chaimi humilde cashpa catingapaj ayudahuai nishpa Jehovata mañana capanchi. Punda tiempopi Jehovata sirvij humilde gentecunamandapashmi Bibliapi yachajuna capanchi. Shinallata huauquipanicunata tucui shunguhuan usharishcagupi ayudapashunchi (1 Ped. 5:5). w20.12 pág. 26 párrs. 16-17

Umapi churajuna jirrushna o cascoshnaca jipa punllacunapi Jehová Dios ali causaiguta carasha nishcapi crinatami ricuchijun. Jehová Diosca paita cazujcunataca huañuimanda quishpichishpami ashtacata bendicianga (1 Tes. 5:8; 1 Tim. 4:10; Tito 1:1, 2). Jipa punllacunapi ali causaigu tianata crinaca ñucanchipa yuyaicunata, pensamientocunata cuidachunmi ayudan. Chai esperanzaca Jehová Diospa nishcacunapi yaria causachun, llaquicunata charishpapash ama yapata preocuparichunmi ayudan. Chai cascota churajunshna Jehová Diospa nishcacuna ñucanchita ayudachunga, Jehová Dioshna pensangapami esforzarina capanchi. Chaitaca ñucanchi charishca cosascunapi na yapata confiashpa, chaipa randica Taita Diospa nishcacunapi confiashpami ricuchipanchi (Sal. 26:2; 104:34; 1 Tim. 6:17). Diospa espíritu caramushca espada nishpaca Bibliamandami parlanajupanchi. Bibliaca shuj espadashna ninan ushaita charimandami gentecunapa panda yachachishcacunata, nali ruraicunatapash saquichun ayudashca (2 Cor. 10:4, 5; 2 Tim. 3:16, 17; Heb. 4:12). Ñucanchicuna Bibliamanda ali ali yachajushpa, shinallata Jehovapa organización cushca ayudacunatapash ali aprovechashpami, espadata ali utilizajunshna, Bibliata ali utilizanataca yachajunchi (2 Tim. 2:15). w21.03 pág. 27 párr. 4; pág. 29 párrs. 10-11

Masqui carcelpi cashpapashmi apóstol Juanga shujcunamanda preocuparishcata ricuchirca. Por ejemplo, jipa punllacunapi “ima tucunata” huauquipanicuna yachachun Apocalipsis librota escribishpa congregaciongunamanmi cacharca (Apoc. 1:1). Patmos islamanda llujshishca jipaca, Jesuspa causaimandami Juanga escribirca. Shinallata huauquipanicunata shinllichishpa ayudangapami quimsa cartacunata escribishpa cacharca. Ñucanchicunaca apóstol Juanba ejemplota catita ushapanchimi. Chaipaca ñucanchi causaipi gentecunata ayudangapaj tiempota llujchishpami paicunata juyashcataca ricuchina capanchi. Diablo mandajuj cai mundoca ashtahuan charijyangapaj o famoso tucungapami ñucanchi tiempota, fuerzata utilizachun munan. Shinapash ashtaca Testigocunaca Diospa Reinomanda ali villaigucunata gentecunaman villachingapami paicunapa tiempota utilizanajun. w21.01 pág. 10 párrs. 9-10

Jonatanga “ñucami rey Saulpa churi cani, ñucami cati rey cana cani” nishpa Davidhuan culiranmanllami carca (1 Sam. 20:31). Shina ninapa randica, Jehová Dios Davidta rey cachun agllashcatami apoyarca. Shinami Jonatanga humilde, Jehovata cazuj cashcatapash ricuchirca. Shinallata paipa taita Saúl ninanda culirajpipash, Davidtami apoyarca (1 Sam. 20:32-34). Davidta huauquitashna juyashcamandami, Jonatanga Davidtaca na envidiashpa ricurca. Jonatanga flechacunata ali manejaj, alipacha macanajujmi carca. Paipash, paipa taita Saulpash “jatun angatapash yali, ñapash calpajcunami carca. Leongunatapash yali shinllicunami carca” (2 Sam. 1:22, 23). Chaimi Jonatanga ali macanajuj caimandaca jariyanmanlla carca. Shinapash paica Davidta yalimi cani yashpaca na pensanllu carca. Paica Davidpa ali ruraicunatapash cushijushpami ricun carca. Jonatanga David Jehová Diospi confiashcata, na manllaj cashcatapash valichishpami ricun carca. David Goliatta huañuchijpimi, Jonatanga huauquitashna juyai callarirca. w21.01 pág. 21 párr. 6; pág. 22 párrs. 8-9

Tucui Jesusta catijcunataca Jesusmi umashna mandajun. Shinapash Jesusta catij huarmigu cazarashpaca paipa juchayuj cusa umashna mandachunmi saquina can. Chaimandami shuj huauquiguhuan cazaranata pensajushpaca, “familiataca ¿alicha cuidai ushanga? ¿Jehová Diostachu paipa causaipica pundapi churan? ¿Jehová Diosta sirvishpa catingapaj ayudahuangacha?” nishpami tapurina can. Shinallata paniguca. “ñucapash cazarashpaca ¿imapita ayudaita ushani? ¿Imagumandapash ñapashchu culirani? ¿Imagutapash na mitsashpachu pimanbash carani? Jehová Dioshuanga ¿ali amigachu cani?” nishpami pensarina can (Ecl. 4:9, 12). Shuj panigu cazarashca jipa cushilla causangapaj munashpaca nara cazarashpallatami shuj ali decisionda agllana can. Ashtaca millón panigucunaca paicunapa cusagucuna umashna mandachun saquishpami shuj ali ejemplota ricuchishca. Paicunataca felicitanami capanchi. w21.02 pág. 8 párrs. 1-2

Cai último huatacunapica tauca huauquipanicunaca Jehová Diosta ashtahuan sirvingapaj munaimandami shuj shuj shimicunata yachajui callarishca. Chaimandami taucacunaca villachijcunata minishtijuj congregaciongunaman rishca. Chaitaca cada unomi decidina can. Shuj shimita yachajungapaca tauca huatacunami minishtirin. Shinapash cai huauquipanicunaca paicunapa ali ruraicunahuan, experienciahuanmi huauquipanicunataca ninanda ayudan. Chai huauquipanicunataca ninandami alicachina capanchi. ¿Cuerpo de ancianos huauquicunaca anciano o siervo ministerial cachun congregacionbi shuj huauquita agllagrijushpaca chai huauqui shuj shimita ali ali yachajta ricushpachu agllana can? Na. Chaipa randica Bibliapi mandashcacunata tucuita pactachijujta ricushpami anciano o siervo ministerial cachunbash agllana can. Shina agllangapaca shuj shimita parlajta o na parlajtaca na ricujunachu can (1 Tim. 3:1-10, 12, 13; Tito 1:5-9). w20.08 pág. 30 párrs. 15-16

Ashtaca gentecunaca saludta charishpa, culquita charishpa, familiahuan ali cashpallami cushilla causaita ushanchi yan. Shinapash apóstol Santiagoca chaicunata charishpalla cushilla causanamandaca na parlajurcachu. Ashtahuangarin Diospa espíritu cushilla causaiguta cujpi causanamandami parlajurca. Shinallami ñucanchi causaipi ima llaquicuna japijpipash cushilla cashpa catishun (Gál. 5:22). Jesusta catijcunaca Jesuspa ejemplota catishpa, Jehová munashca shina imatapash pactachinajushcamandami cushilla causapanchi (Luc. 6:22, 23; Col. 1:10, 11). Jehová carashca cushijuica shuj lámpara michagushnami can. Shuj lámpara michaguca imahuanbash ali tapashca cashpaca huairapash, tamiapash na chayanllu. Shina cuendami saludta na charishpa, culqui faltajlla cashpapash, shujcuna ñucanchimanda burlarijpipash, familiacuna Jehovata sirvichun jarcajpipash cushilla cashpa catinchi. Contracuna Jehovapa ruraicunata tucuchingapaj munajpipashmi ashtahuan shinlli tucushpa catinchi. Imapash jarcaicunata aguantashpa catimandami ciertopacha Jesusta ali catijcuna cashcata ricuchipanchi (Mat. 10:22; 24:9; Juan 15:20). Chaimi apóstol Santiagoca cunan punllapa textopi shimicunata escribirca. w21.02 pág. 28 párr. 6

Ama yapata preocuparishpa Jehovapi confiangapaj ayudaj textocunata liijushpaca de memoria yachajungapaj esforzaripangui. Chaipaca Bibliata uyarijta liipangui. Shinallata liijushpaca textocunata anotashpandi ripangui. Chai anotashca textocunata cutin cutin repasapangui. Jehová Diosca Josué runagumanga Diospa Shimita liichun, liishcacunapi siempre pensarichunmi mandarca. Shinami Josueca ali yuyashpa imatapash rurai ushana carca. Jehovapa mandashcacunata yarinami na manllashpa Jehovapi ashtahuan confiachun ayudagrijurca (Jos. 1:8, 9). Imatapash manllajujpica Bibliapi consejocunami ñucanchicuna ama yapata manllachun, tranquilo sintirichunbash ayudaita ushan (Sal. 27:1-3; Prov. 3:25, 26). Tandanajuicunapimi huauquicuna yachachishcata, huauquipanicunapa comentariocunata uyashpa, huauquipanicunahuan parlashpapash ashtahuan animarinchi (Heb. 10:24, 25). Congregacionmanda ñucanchipa amigocunaman ñucanchicuna imashina sintirijushcata villashpapashmi animari ushapanchi. w21.01 pág. 6 párrs. 15-16

Jovenguna, Jehová Diospi tucui shunguhuan confiaimandami bautizariparcanguichi. Jehová Diosca paipa familiaman yaicujpica cushijushpami chasquirca. Chaimandami tucui shunguhuan Jehová Diospi confiashpa catina capangui. Huaquinbica shuj importante decisionda agllagrijushpaca Jehová Diospa ayudata mascanaca facilmi can. Shinapash na shuj importante decisionda agllagrijushpallaca Jehová Diospa ayudata mascanachu capangui. Ashtahuangarin canba causaipi imapash trabajota, imapash pugllaicunata o Jehovata ashtahuan sirvingapaj decisiongunata agllagrijushpapashmi Jehovapa ayudataca mañana capangui. Canbilla confianapa randica Jehovapa consejocunapimi confiana cangui. Chai consejocunatami canba causaipi pactachina capangui (Prov. 3:5, 6). Shina rurashpaca huauquipanicunapa ñaupajpi ali ricurishpami Jehová Diostapash ninanda cushichipangui. Tucuicunallatami juchayu canchi. Chaimandami huaquinbica imagupipash pandarigringui. Shinapash pandarishcamandallaca Jehovata sirvinataca na saquinachu capangui. w21.03 pág. 6 párrs. 14-15

¿Ñucanchipa familiachu Jehová Diosta ama sirvichun jarcaicunata churajun? ¿O villachinata prohibishca llactapichu causapanchi? Shina cashpaca 2 Timoteo 1:12-16, shinallata 4:6-11, 17-22 versocunata liinami ninanda animanga. Caicunataca prezu cashpami apóstol Pabloca escribirca. Cai textocunata nara liishpallatami llaquicunahuan cashcamanda imashina sintirishcata Jehová Diosman villana capanchi. Jipaca apóstol Pablo llaquicunata imashina chimbapurashcamanda yachajushpa, ñucanchi llaquihuan imata ruranata ali yachangapaj ayudahuai nishpa mañapashunchi. Pablo Jesusta catij cashcamanda catiriashpa llaquichi tucuna cashcataca Jehová Diosca ñami villashcarca (Hech. 21:11-13). Apóstol Pablotaca Jehová Diosca ¿imashinata ayudarca? Paipa mañaicunata uyashpa, shinllichishpami ayudarca. Jehová Diosca, Pablota bendicianatapashmi villarca. Pablopa amigocunatapashmi Jehová Diosca Pablota ama saquichun imagupipash ayudashpa catichun animarca. w21.03 págs. 17-18 párrs. 14-15, 19