Agosto

Cai shimicunata nishpaca, Jesusca paita clavashca soldadocunata Dios perdonachunmi mañajushcanga. Jesusca gentecuna paita llaquichishcamandaca na culira, resentido quidarcachu (1 Ped. 2:23). Jesusmandaca shujcuna llaquichijpi perdonana cashcatami yachajupanchi (Col. 3:13). Shuj gentecunapash, ñucanchi familiacunapash testigo de Jehová cashcamanda ñucanchipa causaita nalicachishpami ñucanchipa contra tucuita ushan. Talvez paicunaca ñucanchicunamanda imapash llullacunata nishpa, shujcunapa ñaupajpi nali quidachishpa o ñucanchi publicaciongunatapash liquishpami ñucanchitaca llaquichi ushanga. “Cangunata macashun” nishpapashmi amenazanga. Shinapash ñucanchicunaca paicunahuan risintirijunapa randica, paicunapash ima horapash Jehovamanda yachajuchunmi Jehovata mañana capanchi (Mat. 5:44, 45). Huaquinbica shujcunata perdonanaca shinllimi caita ushan. Ashtahuanbachaca ñucanchita nalita tratashcajpimi perdonanaca shinlli caita ushan. Shinapash shujcuna nalita rurashcamanda risintirishpa quidanaca ñucanchipallatami nali can (Sal. 37:8). Ñucanchicuna perdonanata decidishpaca ñucanchicunallata ama culirashca, ama risintirishca cachunmi ayudan (Efes. 4:31, 32). w21.04 págs. 8-9 párrs. 3-4

Congregacionmanda pipash expulsai tucujpica expulsai tucushcapa familiacunaca ninandami llaquirin. Caipi pensaripashunchi: Jehová Diosca paipa angelcuna paipa contra tucujpica ¿imashinashi sintirirca? Seguromi Jehová Diosca ninanda llaquirishcanga. Porque chai angelcunaca paipa familiami carca (Jud. 6). Israelitacuna Jehová Diospa llacta cashcamandami paicunataca ninanda juyarca. Shinapash israelitacunaca cutin cutinmi na cazurca. Chaimandami Jehová Diosca ninanda llaquirirca (Sal. 78:41). Shinaca shuj juyashca familia Jehová Diosta sirvinata saquijpica, Jehová Diospashmi ninanda llaquirin. Jehová Diosca ñucanchi imashinapacha sintirijtaca alimi intindin. Chaimandami ñucanchitaca animangapaj, ayudangapaj listo can. Shuj churi o ushi Jehová Diosta sirvinata saquijpica ashtaca taitamamacunami, “¿imapita pandarishcani? ¿Imashata ñuca huahuataca ayudana cashcani?” yashpami pensarin. Shuj huauquiguca cashnami nirca: “‘Ñucami culpata charini’ yashpami pensan carcani. Puñuitapash nali puñui ushan carcanichu” nin. Shuj panigupashmi, “‘¿imapita pandarishcani? Ñucami, ñuca churigumanga Jehovamandaca nali yachachishcani’ yashpami pensan carcani” nin. w21.09 pág. 26 párrs. 1-2, 4

Huaquingunaca, “Bibliamanda yachachingapaca paicunaca na estudiashcachu. Chaimi ñucanchitaca Bibliamanda yachachitaca na ushan” nishpami testigo de Jehovacunataca ricun. Shinapash imapacha pasashcata ali investiganami paicunataca ayudanga. Lucas librota escribingapaca Lucas jariguca, ‘imashinapacha pasashcatami callarimandapacha’ escribi callarirca. Lucasca, Lucas librota pipash liijujpi Jesusmanda imata uyashcacuna “ciertopacha cashcata seguro cachunmi” munarca (Luc. 1:1-4). Berea llactamanda judiocunapashmi chaitallata rurarca. Paicunaca Jesusmanda primera vez ali villaigucunata uyashpaca, Escrituras Hebreas o Antiguo Testamentopi shinapacha nishcata o na nishcatami paicunallata investigarca (Hech. 17:11). Chaitallatami cunanbica gentecunaca rurana can. Testigo de Jehovacuna imata yachachishcataca paicunapa propio Bibliahuanmi chimbapurashpa ricuna can. Shinallata Testigocuna ima horamanda tiashcatapashmi ali investigana can. Shinami shujcuna paicunata pandachingapaj munajpipash na pandachi tucunga. w21.05 pág. 3 párrs. 7-8

Quiquinba congregacionmanda pihuanbash tiempota yalingapaca ¿nachu huasiman invitaita ushapanguiman? Huaquinbica shuj punllacunami ashtahuanbachaca huauquipanicunaca paicunahuan tiempoguta yalichun minishtin. Por ejemplo, na Testigo familiata charij huauquipanicunaca paicunapa familiacuna yanga fiestacunata rurajuj horasmi paicunahuan cachun minishtin. Cutin shujcunaca shuj familia huañushca huata pactajpimi llaquilla sintirin. Chai ratocunami paicunaca paicunahuan cachun minishtin. Paicunahuan tiempoguta yalishpaca paicunamanda preocuparishcatami ricuchipanchi (Filip. 2:20). Shuj huauqui o shuj paniguca ashtaca cosascunamandami talvez sololla sintirita ushanga. Shinapash ñucanchicuna imashina sintirijushcata Jehová Dios yachajtaca seguromi caita ushapanchi. Ñucanchita animangapaca Jehová Diosca ñucanchi huauquipanicunatami utilizan (Mat. 12:48-50). Ñucanchi huauquipanicunata Jehová Dios cushcamanda agradicishcata ricuchingapaca, tucui huauquipanicunata animangapaj, ayudangapaj esforzarishpami Jehová Diosta agradicishcataca ricuchipanchi. Talvez huaquin ratocunaca solollami sintiripashun. Shinapash Jehová Dios ñucanchihuan siempre cashcataca nunca na cunganachu capanchi. w21.06 pág. 13 párrs. 18-20

Jesusca gentecuna na uyangapaj munajpipashmi na desanimarishpa villachishpa catirca. ¿Imamandata shina rurarca? Ali villaigucunata gentecunaman villachina minishtirishcapacha cashcata yachaimandami shina rurarca. Paica ashtaca gentecunatami ayudangapaj munarca. Shinallata callaripi na uyangapaj munashcacunapash, jipamanga Diospa Reinomanda ali villaigucunata uyana cashcatami ali yacharca. Chaica paipa familiapillatami pasarca. Jesús 3 huata chaupita villachijujpipashmi paipa huauquicunaca paipica na crirca (Juan 7:5). Shinapash Jesús huañushpa causarishca jipaca, paita catijcunami tucurca (Hech. 1:14). Diospa Reinomanda villachijpi picuna ñucanchita uyanataca na yachapanchichu. Huaquingunaca shuj tiempo jipami Bibliamandaca yachajungapaj munan. Cutin cunanbi ñucanchita na uyangapaj munaj gentecunapashmi ñucanchicuna imata rurajta, imashina causajta ricunajun. Chaimi talvez shuj punllaca paicunapash Jehovamanda yachajungapaj munanga y yachajushpaca paicunapashmi “Taita Diosta alabanga”. w21.05 pág. 18 párrs. 17-18

Jesús cai Alpapi cashpaca, paipa discipulocunamanga ishcai cosascunata rurachunmi mandarca. Paica Diospa Reinomanda ali villaicunata gentecunaman villachichunmi mandarca. Chaita pactachi ushachunga Jesusllatami paipa discipulocunamanga imashina villachinata yachachirca (Luc. 8:1). Jesús yachachijushpaca, ali villaicunata gentecuna aliguta chasquijpi o na chasquingapaj munanajujpipash imata rurana cashcatami yachachirca (Luc. 9:2-5). Chashnallata Jesusca caitapashmi nirca: “Tucui llactapi gentecuna uyachunmi, mundo enteropi predicanajunga” nishpa (Mat. 24:14; Hech. 1:8). Chaita mandashca jahuapash, Jesusca paipa discipulocunataca, “ñuca yachachishcacunata gentecuna cazushpa pactachichunmi yachachina canguichi” nishpapashmi mandarca. Cai mandashca importante obraguca, ‘cai pacha tucurimui punllacaman’ cagrijushcatapashmi Jesusca intindichirca (Mat. 28:18-20). Jesusca, apóstol Juanman shuj muscuipishna ricurishpaca, paipa tucui discipulocuna shuj gentecunaman Jehová Diosmanda yachachishpa ayudachun munashcatapashmi intindichirca (Apoc. 22:17). w21.07 págs. 2-3 párrs. 3-4

Cai mundopi gentecunaca siempremi imapipash shujcunata yali cangapaj munashpa shujcunata yalingapaca imatapash rurashpa llaquichinlla. Por ejemplo, shuj jatun negociocunata charij jarica pai ashtahuan charingapaj munaimandami shujcunapi na pensashpa imatapash rurashpa shujcunata llaquichita ushan. O shuj futbolistaca pugllaicunapi ganangapaj munaimandami shujcunataca llaquichita ushanman. Y shuj estudianteca shuj ali universidadman yaicungapaj munaimandami examengunapica trampacunata rurashpa ali notacunata llujchita ushan. Tucui Jesusta ali catijcunaca cashna cosascunata rurana nali cashcataca alimi yachapanchi. Cai cosascunataca Bibliapica ‘nali munaicuna’ ninmi (Gál. 5:19-21). Shinapash congregacionbica na cuenta japijtami cashna comportamientocunataca chari callarinajunchiman. Ñucanchicuna imashina cashcata na cuenta japishpaca, congregaciondami llaquichi ushapanchi. Shinaca punda Diosta sirvijcuna cashna yuyaicuna ama mishachun imata rurashcatami yachajuna capanchi w21.07 pág. 14 párrs. 1-2

Shujcunata ninanda juyanami desanimarishca huauquipanicunata ayudachun ayudanga. Ashtaca huauquipanicunaca desanimarishca huauquipanicunata ayudangapaca paicunapa ladopimi can. Huauquipanicunata ninanda juyaimandami paicunata ayudangapaca tucui usharishcaguta rurangapaj esforzarin (Prov. 12:25; 24:10). Shina rurashpami paicunaca apóstol Pablopa nishca cai shimicunatami pactachinajun: ‘Na catinayanllu nijcunatapash ayudapanguichi. Nara ali shinlli crijcunatapash yachachipanguichi. Pitapash ama ñapash fiñashpa yachachipanguichi’ (1 Tes. 5:14). Desanimarishca huauquipanicunataca paicuna parlajujpi, ali ali uyashpa, shinallata “candaca ninandami juyani” nishpapashmi ashtahuanbachaca ayudaita ushapanchi. Jehová Diosca paipa sirvijcunata ayudangapaj ñucanchicuna imata rurajtapash ali alimi ricujun. Shinallata Proverbios 19:17​pica: “Imagutapash na charij runaguman imagutapash caraj runaca, Mandaj Diosman mañachishcashnami charin. Chashna alita rurashcamandaca, paimanbash tigrachingami” nijunmi. w21.11 pág. 10 párrs. 11-12

Shamuj punllacunapi llaquicunata aguantangapaca ¿imatata cunanmandallata ruraita ushapanchi? Jehová Dioshuan ali amigo cashcamandami ashtahuanbachaca contento cana capanchi. Jehová Diosmanda ashtahuan yachajushpami paipi ashtahuan feta charipashun. Shinami Gog de Magog o ashtaca tandajushca llactacuna ñucanchita llaquichijpica, Jehová Dios ñucanchita salvanataca seguro capashun. Cunan punllapa textopi shimicunata nishpaca Davidca, Jehová Diospi tucui shunguhuan confiashcata, imata minishtishpapash paipa ayudata mascashcata, shina rurashcamanda Jehová Dios paita nunca na saquishcatami ricuchijurca. David joven cashpaca Goliat shuti jatun jatun runahuanmi macanajungapaj shayarirca. Chaipica, “cunanga, Mandaj Diosmi candaca ñuca maquipi churanga” nircami (1 Sam. 17:46). Jipamanga Davidca rey Saultami sirvishpa causajurca. Shinapash rey Saúl Davidta envidiaimandami ashtaca viajecunata huañuchingapaj munarca. Shinapimi Jehová Diosca, Davidta siempre cuidarca (1 Sam. 18:12). Davidca, Jehová Dios pai joven cajpi cuidashcamandami, rucuyajpipash paita cuidashpa catinataca seguro carca. w22.01 pág. 6 párrs. 14-15

Jehová Diosca paipa shutita alipi quidachingapaj y gentecunapa bienba imagutapash rurashpapash na musparishpaca imatapash ruranllu. Por ejemplo, Jehová Dios cai Alpata rurajushpaca, asha ashami imagutapash rurarca. Bibliapi caimanda parlashpaca, Taita Diosmi cai Alpa “mashnata medinatapash” ricurca ninmi. Shinallata cai Alpa ‘callaricuna ima jahuapi tiajujta, esquinapi churana rumitapash churarca’ ninmi (Job 38:5, 6). Jehová Diosca paipa rurashcacuna imashina quidashcata ricushpa pensaringapapashmi tiempota llujchirca (Gén. 1:10, 12). Angelcuna Jehová Dios tucuita asha asha rurajta ricushpaca ¿imashinashi sintirishcanga? Bibliapica, ‘Taita Diospaj churicunaca tucuillami ninanda cushijunajurca’ nijunmi. ¿Imatata yachajupanchi? Jehová Diosca cai Alpata, estrellacunata y gentecunata rurangapaca ashtaca ashtaca huatacunata parashcatami yachajupanchi. Chai jipaca tucui imashina ‘aligupacha’ quidashcata ricungapami tiempoguta llujchirca (Gén. 1:31). w21.08 pág. 9 párrs. 6-7

Jesús parlashca chimbapuraipica, shuj amomi nara de viaje rishpallata paipa quimsa esclavocunaman negociocunata rurachun talento culquiguta cushcata parlan. Amoca paicuna rurai ushashcata ricushpami shujmanga 5 talentota, caishujmanga 2 talentota y chaishujmanga shuj talentota curca. Ishcai esclavocunaca paicunaman mingashcata alipacha pactachishpami culquitapash ashtahuan mirachirca. Pero shuj esclavoca paiman cushca talento culquihuanga nima nimata na rurarcachu. Chaimi paipa amoca paitaca dispidirca. Primer y segundo esclavocunaca paicunaman mingashca trabajo importante cashcatami intindirca. Chaimandami paicunapa amota sirvingapaca shinllita trabajarca. Shina shinllita trabajaimandaca, paicunaman mingashca culquigutaca ishcai viajeta ashtahuanmi mirachirca. Shinllita, aliguta trabajashcamandaca, paicunapa amohuanmi cushijuita usharca. Shinallata amoca paicunaman ashtahuan responsabilidadcunatami curca. w21.08 pág. 21 párr. 7; pág. 22 párrs. 9-10

Jehová Diosca pipash huañuchi tucuchunga na munanllu. Chaimandami cunangaman gentecuna arripintirichun saquishca (2 Ped. 3:9). Pero Jehová Diosca na siemprechu pacienciahuan shuyajungalla. Jehovata na cazungapaj munajcunaca Moisespa tiempopi faraonshnallatami ninanda llaquichi tucunga. Faraondaca Jehová Diosca nircami: “Cunanga candapash, cambaj gentecunatapash, ninan llaquichinahuan llaquichingapajmi ñuca maquita chutasha. Shina rurajpimi, cai pachamandaca anchuchi tucungui. Napacha llullashpami nini: Ñuca ushaita cambi ricuchingapaj, shinallata ñuca shutipash tucui cai pachapi uyarijuchunmi, candaca churarcani” nishpa (Éx. 9:15, 16). Tucuripica tucui llactamanda gentecunami Jehová Dioslla shujlla Dios cashcata yachaj chayanga (Ezeq. 38:23). Cunan punllapa textopica Jehová Dios tucui llactacunapi causajcunata chujchuchinatami parlajun. Shina rurashcamandami faraonshnallata Jehová Dioslla mandana derechota na cazujcunataca Jehová Diosca tucuchitapacha tucuchinga. w21.09 págs. 18-19 párrs. 17-18

Quiquinba familiamanda pipash expulsai tucushca cajpica ¿llaquillachu sintirijupangui? O huaquin huauquipanicuna animanapa randi, imatapash nalitara nishpa nali sintichijpica ¿imatata rurai ushapangui? Huaquinbica pitapash ayudangapaj munashpapash paicunaman ima nijtaca na atinanchichu. Chaimi huaquinbica pandatara nishpa llaquichita ushapanchiman (Sant. 3:2). Huauquipanicunaca juchayucuna caimandami talvez ñucanchita animangapaj munashpapash, imapash pandata nishpa nali sintichita ushan. Chaimandami ñucanchicunaca apóstol Pablopa consejota yarina capanchi: “Caishujhuan chaishujhuan cazurishpa, shinallata caishujhuan chaishujhuan llaquichirishca cashpapash, perdonarishpami causana canguichi” (Col. 3:13). Expulsashca familiacunata charij huauquipanicunata apoyashpa catipashunchi. Paicunaca cunan horascunami ashtahuanbachaca paicunata juyashcata ricuchichun minishtinajun (Heb. 10:24, 25). Huaquin huauquipanicunaca, expulsashca familiata charij familiacunataca paicunapash expulsai tucushca cajpishnami tratan. Pero ñucanchicunaca na shina canachu capanchi. Expulsashca taitamamacunata charij jovengunaca paicunata animachun, cushichichunmi ashtahuan minishtinajun. w21.09 pág. 29 párrs. 13-14; pág. 30 párr. 16

Shuj joven huauqui shuj mayorlla huauquiguhuan parlashpaca randimandami animarin (Rom. 1:12). Joven huauquica Jehová Dios paipa sirvijcunata siempre cuidan cashcatami cuenta japinga. Y mayorlla huauquiguca shujcuna paita juyashcatami cuenta japinga. Shinallata Jehová Dios paipa tucui causaipi cuidajushcata parlashpaca cushillami sintiringa. Joven cana, ali ricurinaca casi siempremi asha tiempotalla paran. Pero Jehovapa ñaupajpica mayor huauquipanigucunaca cada huatami ashtahuan ali ricurin (1 Tes. 1:2, 3). ¿Imamandata shina nipanchi? Paicunaca cada huatami paicunapa causaipi Jehová Dios ayudachun, cambiashpa catingapaj ayudachunbashmi saquishca. Mayor huauquipanigucunata ashtahuan rijsishpaca ashtahuanmi paicunamandaca yachajupashun. Y shuj valishca tesorocunatashnami ricui ushapashun. Jovenguna mayorgucunata respetajpi, shinallata mayorgucunapash jovengunata valichishpa respetajpimi congregaciongunaca shujllashna tandanajushca can. w21.09 pág. 7 párrs. 15-18

Shujcunata shinllita tratanamandaca cuidarinami capanchi. Ashtahuangarin Jehová Dioshnallata shujcunata ‘ninanda llaquingapami’ esforzarina capanchi (Efes. 2:4). Shujcunata juyashcata, llaquishcataca paicunamanda imagutapash rurashpami ricuchi ushapanchi. Chaimi ñucanchica familiapi, congregacionbi, villachinajushpapash pipash paita animachun minishtijujta yachashpaca ayudana capanchi. Paicunata ayudangapaj munashpaca imapash comprasguta rurashpa, chaiguta carashpa o imashapash ayudashpami paicunata juyashcata y llaquishcataca ricuchi ushapanchi. Shinallata chairalla congregacionman tigramushca huauquipanicunatapashmi animaita, ayudaita ushapanchi. Shinallata gentecunamanga Diospa Reinomanda ali villaigucunata parlashpami animaita ushapanchi (Job 29:12, 13; Rom. 10:14, 15; Sant. 1:27). Shujcunata ayudangapaj munashpaca pi ayudata minishtijujtami pendiente cana capanchi. Shinami shujcunata ayudangapaj ashtaca oportunidadcunata charipashun. Shinallata, ‘ninanda llaquij’ Jehová Diostapashmi ninanda cushichipashun. w21.10 pág. 13 párrs. 20-22

Salmo 23​pica rey Davidca, Jehová Dios paita michij cashcamanda ima cosascuna ashtahuanbacha importante cashcatami ricuchijun. Rey Davidca, Jehová Diosca ‘alitalla rurana ñanbimi pushahuan’ nircami. Jehová Dios rey Davidta tucuipi cuidajushcatami ricuchirca. Davidca, “llullulla jihua pushtucunapimi, [Jehová Diosca] ñucataca samachihuanga” nishpapash, imapash llaquicuna illaj, problemacuna illaj causana cashcataca na nijurcachu. Ashtahuangarin, “can ñucahuan cajpimi, huañui japinalla llandu pugru pambata rijushpapash, ima nalitapash na manllasha” nircami. Rey David “ima [alipash na faltangachu]” nishpaca, Jehová Dios paita cuidajushcamandami parlajurca. Rey Davidca cosascunata charishcamandaca na cushilla carcachu. Ashtahuangarin Jehová Dios paita tucuipi cuidajushcamandami cushilla carca. Paipaca Jehová Diospa ñaupajpi ali ricurina, paipa bendicionda chasquinami ashtahuanbachaca importante carca. Davidpa shimicunaca ashtaca cosascunata charinamanda ama preocuparichunmi ayudan. w22.01 págs. 3-4 párrs. 5-7

Jehová Diosta punda sirvijcunataca ashtaca gentecunaca na uyangapaj munarcachu. Por ejemplo, Noé runaguca ashtaca huatacunatami ‘ima ali cajta predicarca’ (2 Ped. 2:5). Chaimandami Noeca pai villachijpica gentecuna uyachun munashcanga. Shinapash Jehová Diosca, Noemanga “gentecunaca uyangami” nishpaca na nircachu. Ashtahuangarin Jehová Diosca arcata rurachun mandashpaca, ‘cambash, cambaj churicunapash, cambaj huarmipash, cambaj churicunapaj huarmicunami arcamanga yaicuna canguichi’ nircami (Gén. 6:18). Jehová Dios rurachun mandashca arcaca na yapa jatunllu carca. Chaimandami Noeca, Diosmanda villachijpi casi ni pipash na uyana cashcata cuenta japishcanga (Gén. 6:15). Y shinami pasarca. Noé villachijpica, ni pipash na uyarcachu (Gén. 7:7). Shinaca ¿gentecuna na uyashcamandachu Jehová Diosca, “Noemi na ali villachishcanga” nishpa pensarca? Na, na shina pensarcachu. Jehová Diospa ñaupajpica Noé runagu Jehová mandashcashna tucuita na shaijushpa pactachishcamandami alipacha villachij tucurca (Gén. 6:22). w21.10 pág. 26 párrs. 10-11

Noemí shina nijta uyashpaca, Rutca ¿imashinashi sintirishcanga? Rutca Noemita ayudangapaca tucui pai usharishcagutami rurashca carca. Chai jahuapashmi Noemica, “Mandaj Diosca, chushaj maquihuanmi tigrachimuhuashca” nirca. Rut paihuan cajpipashmi chai shimicunata nishpaca paitaca na valichishcatashna ricuchirca. Chai shimicunata Rut uyashpaca llaqui llaquimi sintirishcanga. Shina pasajpipash Rutca Noemitaca na saquircachu. Siempremi ayudarca (Rut 1:3-18). Cunan punllacunapica shuj panigu desanimarishca caimandami, ayudangapaj esforzarijujpipash ñucanchitaca imacunatapash nishpa talvez llaquichita ushan. Shina pasajpica, “ñucata na valichishcamandami shina tratahuan” nishpaca na pensanachu capanchi. Ashtahuangarin Jehová Diostami, “chai paniguta ali ayudai ushangapaj ayudahuai” nishpa mañana capanchi (Prov. 17:17). Huaquinbica shuj panigu ayudata minishtijujpi, ñucanchi ayudangapaj munajpipash talvez na munangachu. Shina rurajpipash, paita juyashcamandami paipa ladopi cangapaca tucuita rurapashun (Gál. 6:2). w21.11 pág. 11 párrs. 17-19

Bibliapica santo, jucha illaj canamanda parlashpaca Jehová Diosta adoranapi, ñucanchi causaipi y ñucanchi pensamientocunapipash limpio cana cashcata, shinallata Taita Diosta sirvingapalla separarishca cashcatami ricuchijun. Chaimandami tucuipi santo, jucha illaj, limpio causaita charingapaca, Jehovapa mandashcacunata ñucanchi causaipi pactachina capanchi. Shinallata paita pai munashcashna adorashpa, paihuan ali amigo cashpami, santo, jucha illaj cashcataca ricuchi ushapashun. Jehová Diosca jucha illaj, santo Dios cashpapash ñucanchicuna juchayujcuna cajpipash paipa amigo cachunmi saquishca. Chaimi ñucanchica ninanda cushijupanchi. Jehová Diosca tucuipipacha jucha illaj, santo Diosmi can. Chaimandami cielopica serafín angelcunapash: “Jucha illaj, jucha illaj, jucha illaj tucuita Mandaj Diosmi” can nin (Is. 6:3). Y cai angelcunaca Jehová Dioshuan ali amigo cangapaca paicunapashmi santo, jucha illaj, limpio can. w21.12 pág. 3 párrs. 4-5

Jovengunapaca ali decisiongunata agllanaca ashata shinllimi ricurin. Por ejemplo, colegiomanda profesorcuna o na Testigo familiarcunaca quizás universidadta catichun, shinallata shuj ali trabajota tarichunmi jovengunataca animan. Caicunata pactachingapaca ashtaca tiempomi minishtirin. Cutin shuj partemandaca taitacuna, congregacionmanda huauquipanicunapash Jehová Diosta ashtahuan sirvichunmi jovengunataca animan. Shinaca shuj ali decisionda agllachunga jovengunataca ¿imata ayudaita ushan? Paicunataca Efesios 5:15-17 textota liina y chai shimicunapi pensarinami ali decisiongunata japichun ayudaita ushan. Chai textocunata liishca jipaca: “Jehová Diosca ¿ñuca imata rurachunshi munan? ¿Ima decisionda agllanashi ñucapa tiempota ali utilizachun ayudanga?” nishpami tapurita ushan. Caitami yarina capanchi: “Nali punllacunapimi causanajupanchi”. Y cai mundopi nali cosascuna y Satanaspash ñallami tucuchi tucunga. w22.01 pág. 27 párr. 5

Santiagoca ¿ima horata Jesuspa ali catij tucurca? Santiagoca, Jesús huañushpa causarishca jipami Jesuspa catij tucurca. Jesús causarishpaca callaripica Santiagomanmi ricurirca. Jipamanmi paipa apostolcunamanbash ricurirca. Chai punllamandami paipa causaica cambiarca (1 Cor. 15:7). Chaimandami Jesuspa apostolcuna Jerusalenbi shuj cuartopi Diospa espíritu santota chasquingapaj chaipi tandanajushca cajpica Santiagopash chaipi carca (Hech.1:13, 14). Jipamangarin Santiagoca chai tiempopi tiaj Cuerpo Gobernantepi sirvina privilegiotapashmi chasquirca (Hech. 15:6, 13-22; Gál. 2:9). Huata 62 nara callarijpillatami Santiagoca, Diospa espíritu santopa ayudahuan ungido huauquicunaman shuj cartatapash escribirca. Cai escribishca shimicunaca cunanbipashmi tucuicunatallata ayudan (Sant. 1:1). Punda tiempopi causashca gentecunamanda estudiashca Josefo shuti jarica: “Santiagotaca shuj sumo sacerdote Anán shuti judiomi huañuchichun ordenda curca” nircami. Santiagoca huañungacamanmi cai Alpapica Jehová Diosta sirvirca. w22.01 pág. 8 párr. 3; pág. 9 párr. 5

Cunan punllapa textomandaca, ima llaquicunata charishpapash Jehová Dios tucuimanda ñucanchita quishpichinataca na shuyana cashcatami yachajupanchi. Jesushnallatami huañuna cashpapash Jehová Diostalla siempre sirvingapaj listo cana capanchi (Mat. 16:24, 25). Shinapash Jehová Diosca ñucanchicuna na aguantai ushanalla llaquicunata apachunga na saquingachu. Chaitaca alimi yachapanchi (1 Cor. 10:13). Shinallata Jesusmandaca ñucanchitapash shuj gentecuna yangamanda llaquichinatami yachajupanchi (1 Ped. 2:19, 20). Gentecunaca ñucanchi imapash nalicunata na rurajpi, Taita Diosmanda cabalguta yachachijpimi ñucanchitaca nalicachishpa ricun (Juan 17:14; 1 Ped. 4:15, 16). Jesusca, Jehová Dios imamanda pai llaquita apachun saquishcataca alimi intindirca. Cutin punda tiempopi Diosta sirvijcunaca paicunata llaquicuna japijpica imamanda Jehová Dios chai llaquicunata charichun saquishcataca na ashta ali intindircachu (Hab. 1:3). Shinapash Jehová Diosca llaquij, juyaj Dios caimandami imamanda shina pensajtapash ali intindishpa paicunataca cushichirca (2 Cor. 1:3, 4). w21.04 pág. 11 párrs. 9-10

Jehová Dios munashcashna juyaihuan, respetohuan paita adorajpica, paica cushijushpami ñucanchi adoraciondaca chasquinga. Ñucanchica Jehová Diosta adorana cashcataca alimi yachanchi. Chaimandami paita aligutapacha adorangapaj munapanchi. Por ejemplo, Jehová Diosta adoranajushcataca paita mañashpami ricuchipanchi. Bibliapica ñucanchi mañaicunataca shuj mishquilla ashnajuj inciensohuanmi comparan. Inciensotaca aliguta preparashpami tabernáculo carpa huasigupi, shinallata jipamanga templo huasipi mishquillagu ashnachun rupachin carian. Shinaca inciensotaca Jehová Diospa ñaupajpi mishquillagu ashnajuchunmi rupachin carian. Ñucanchi mañaicunapash shina cuendallatami can. Shungumanda imagutapash mañajpica, paipa ñaupajpi mishquilla ashnajuj inciensoguta rupachijpishnami ‘cushilla’ sintirin (Prov. 15:8; Deut. 33:10). Jehová Diosca paita juyashcata, paita agradicishcata ricuchishpa mañachunmi munan. Shinallata paica ñucanchicuna imamanda preocuparishcata villachun, imata ñucanchi munashcata villachunmi munan. Chaimandami Jehová Diosta nara mañashpallata imata ningapaj munashcataca ali pensarina capanchi. Shina rurashpaca ali preparashca mishquilla inciensota paipa ñaupajpi rupachij cuendami capashun. w22.03 pág. 20 párr. 2; pág. 21 párr. 7

Armagedonbica picunalla salvarina o na salvarina cashcataca ñucanchicunaca na decidishunllu. Jehová Diosllami chaitaca decidinga (Mat. 25:34, 41, 46). Shinaca paita na cazuj gentecunahuan Jehová Dios imata ruranata decidijpipash ¿Jehová Diospi confiashpa catipashunllu? ¿O “Jehová Diosca nalitami rurashca” nishpaimanllu pensapashun? Jipa punllacunapi Jehová Diospi tucui shunguhuan confiashpa catingapaca cunanmandallatami Jehová Diospi ashtahuan confiangapaj esforzarina capanchi. Paraíso Alpagupi ña causajushpa imashina sintirinapi pensaripai. Chai tiempopica panda religionguna, ashtaca culquitalla charingapaj munaj negociocunapash ñana tiangachu. Cai Alpamanda gobiernocunapash gentecunataca ñana llaquichishpa catingachu. Unguicuna, huañui, payayana, rucuyanapash ñana tiangachu. Satanás y paipa demoniocunapashmi mil huatacunacaman vichai tucunga. Satanaspa culpamanda cai Alpapi tiashca tucui nali cosascunapashmi tucuritapacha tucuringa (Apoc. 20:2, 3). Chai punllacunapica Jehová Diospi confiashcamandaca nunca na arrepintirishunllu. w22.02 págs. 6-7 párrs. 16-17

Jesusca shujcunahuan ali llevaringapaj esforzarishcatami ricuchirca. Shinallata ima problemata charijpipash chai problemacunata uchalla arreglachunmi shujcunata yachachirca. Ashtahuangarin, Taita Dios paicunapa adoracionda chasquichunga imapash problematara huauquicunahuan arreglachunmi Jesusca yachachirca (Mat. 5:23, 24). Apostolcunamanbash “¿maijanshi ashtahuan importante canchi?” nishpa fiñanajunajujpica ama shina fiñarinajuchunga cutin cutinmi yachachirca (Luc. 9:46-48; 22:24-27). Tucuicunahuan casilla ali causaiguta charingapaca fiñanajuicunamanda, macanajuicunamanda jarcarinallaca na suficiente canllu. Ashtahuangarin ñucanchicunami ali tucunata mascana capanchi. Shinami ñucanchi huauquipanicunatapash chaitallata rurachun animaita ushapashun (Filip. 4:2, 3; Sant. 3:17, 18). Cashnami tapurita ushapanchi: “Pihuanbash fiñanajushca cashpa ali tucungapaca ¿imacunatallata rurangapaj dispuesto cani? Shuj huauqui o shuj pani ñucata nali sintichishcamandaca ¿resintirishcachu quidani? ¿Ñucata nali sintichishcacuna disculparichunllu shuyani? Na cashpaca, pai culpata charijpipash ¿ñucara paihuan disculparingapaj dispuestochu cani?” nishpa. w22.03 pág. 10 párrs. 10-11

Ashtaca huatacuna huashamanllatami Bibliapica Jehovata sirvijcunaca cushijushpami shungumanda Jesuspa yachachishcacunataca catinajunga nirca (Sal. 110:3). Chai profeciaca cunan punllacunapimi pactarijun. Cada huatami Jehovata sirvijcunaca paicunapa munai imatapash na cobrashpa, Jehová Diosmanda ashtaca millón horascunata villachinajushca. Paicunapa tiempotaca huauquipanicunata imagupipash ayudangapaj, paicunata animangapami utilizanajushca. Shinallata anciano, siervo ministerial huauquicunaca congregacionbi visita de pastoreota rurashpa, congregacionba discursocunapapash aliguta prepararishpami ashtaca tiempota yalinajushca. Paicunaca Jehová Diosta tucui shunguhuan juyaimanda, gentecunatapash juyaimandami shina ruranajushca (Mat. 22:37-39). Jesusca shujcunamandami ashtahuan preocuparirca. Jesusta catijcunapash paipa ejemplota catingapami esforzaripanchi (Rom. 15:1-3). Jesuspa ejemplota catishpaca ñucanchillatami beneficiarishun. w22.02 pág. 20 párrs. 1-2

Israel llactapica mayoría gentecunami tarpunapi, cozechanapi dedicarin carca. Shinapash tarpushpa cozechashpa trabajajcunaca diariopimi ganan carca. Chaimi shuj trabajadorman chai punlla trabajashcamanda chai punllallata na pagajpica, paipa familiaguman mantiningapami culqui illaj quidan carca. Chaimandami Jehová Diosca: ‘Paica, imagutapash na charij cashcamandami, chai culquihuan micushpa causangapaj randinga’ nirca (Deut. 24:14, 15; Mat. 20:8). Cunan punllacunapi gentecunaca sueldotaca na cada punllaca cobranllu. Ashtahuangarin quillapi shuj viaje o ishcai viajellami cobran. Shinapash Levítico 19:13​pi cushca consejoca cunan punllacunacamanmi ayudan. Huaquin jefecunaca paicunapa trabajadorcunamanga yapa ashalaguta pagashpami paicunamanda aprovecharin. Paicunapa trabajadorcuna chai trabajotalla charimanda, chai trabajopi a la fuerza trabajashpa catinata yachaimandami shina ruran. Shina rurashpaca imagutapash na charijcunata shuhuashpa, paicunapa culquihuan quidajuj cuendallatami can. Shinaca Jesusta catijcunaca trabajadorcunata charishpaca, cai consejotaca yaipimi charina can. w21.12 pág. 10 párrs. 9-10

Jesusca ashtaca sufrishca jipaca, yacunayachitapashmi yacunayachijushcanga. Chaimandami imapash chai nanaita samachichun minishtijushcanga. Jesusmandaca ñucanchicuna imashina sintirishcata parlana cashcatami yachajupanchi. Jesusca pai imashina sintirishcata parlajpi, “shujcunaca lastimahuanmi ricunga” yashpaimanga na pensarcachu. Ñucanchipash Jesushnallatami pensana canchi. Talvez imata minishtijushcata parlangapaca pinganayachinchimi. Shinapash imapipash ayudachun minishtijushpaca ayudata mañanallami capanchi. Por ejemplo, mayorllagucuna cashpa o asha irquilla cashpaca comprascunata rurangapaj o doctorpaman ringapaj ñucanchita ayudachun mañanallami capanchi. Shinallata desanimarishcaiman sintirijushpaca shuj ancianohuan o experienciata charij shuj huauquihuan o panihuanmi parlanalla capanchi. Paicunapa ali “rimashca shimicunaca” ñucanchitaca ninandami cushichinga (Prov. 12:25). Ñucanchi huauquipanicunaca ñucanchita juyaimandami, ‘llaqui punllacunapipash’ ayudangapaj munan (Prov. 17:17). Shinaca imagupipash ñucanchita ayudachun minishtijushpaca paicunaman villanallami capanchi. Na imatapash nijpica, ñucanchicuna ayudata minishtijushcataca paicunaca na yachai ushangachu. w21.04 págs. 11-12 párrs. 11-12

Ñucanchi causaipica imapash cambiocuna ricurijpica shinllimi caita ushan. Por ejemplo, tiempo completo sirvinajushca huauquipanicunaca huaquinbica shuj asignaciongunatami chasquishca. Cutin shuj huauquicunaca ña mayorlla caimandami paicunapa gushtashca asignaciongunatapash saquina tucushca. Shinaca cashna cambiocunata chasquishpaca llaquillami sintirita ushanchi. Ñucanchi causaipi cambiocuna ricurijpica imata cashpapash Jehová Dios ricushca shinami ñucanchipash ricuna capanchi. Jehová Diosca cunan punllacunapica ashtaca cosascunatami rurajun. Chaicunapi ñucanchipash Jehová Diosta ayudana oportunidadtami charipanchi (1 Cor. 3:9). Jehová Diosca ñucanchitaca siempremi juyashpa catinga. Jehovapa organizacionbi imapash cambiocuna tiashcamanda punda charishca asignaciongunapi pensarishpa llaquirijunapa randica, “cai cambiocunapi yacharingapaj ayudahuai” nishpami Jehová Diosta mañapai (Ecl. 7:10). Ima cambiocuna tiajpipash Jehová Diosta cushilla sirvishpa catipai. w22.03 pág. 17 párrs. 11-12

¿Picunamanda Jehová Diosca paipa ninan juyaitaca ricuchin? Bibliapica, imagutapash ‘ali ruranata’, ‘ali yachajunata’, ‘vinota, aceiteta’, ‘ali yachaita japinatapash’ juyaita usharin ninmi (Prov. 12:1; 21:17; 29:3). Shinapash Jehová Diosca paipa ninan juyaitaca cosascunamanga na ricuchinllu. Ashtahuangarin paipa ninan juyaitaca gentecunamanllami ricuchin. Shinapash Jehová Diosca, paipa ninan juyaitaca ¿tucui gentecunamanllu ricuchin? Na. Paipa ninan juyaitaca, paita sirvijcunaman, paihuan alipacha amigocunamanllami ricuchin. Chaimandami jipa punllacunapipash paipa amigocunamanga ashtaca bendiciongunata cunga. Jehová Diosca tucuicunatami juyan. Chaimandami Jesusca, Nicodemo shuti runagumanga: “Taita Diosca cai mundopi gentecunata ninanda juyashpami, paipa único Churiguta cachamurca. Paipa Churipi crishcata ricuchijcunaca ama shujllapash tucuchi tucuchun, sino para siempre causachunmi paipa Churitaca cachamurca” nircami (Juan 3:1, 16; Mat. 5:44, 45). w21.11 pág. 2 párr. 3; pág. 3 párrs. 6-7

Cai mundopica ashtaca ashtaca llaquicunami tian. Jipa punllacunapipash ashtahuan llaquicunata charishunrami (Mat. 24:21). Tucuicunallatami cai tucui llaquicuna tucurichun shuyanajupanchi. Cai llaquicuna tucurijpica chai llaquicunataca nunca más na yarishunllu (Is. 65:16, 17). Shinapash aguantashpa catingapami esforzarina capanchi. ¿Imamandata chaita rurana capanchi? Jesusca nircami: “Ultimocaman aguantashcacunatallami Taita Diosca salvanga” nishpa (Mat. 24:13). Aguantashpa catichunga shuj huauquipanicunapash llaquicunata aguantanajushcata yachanami ayudanga. Jehová Diosmi tucuicunamanda llaquicunataca ashtahuan aguantashca. Caicunata na yachashca cashpaca caipi pensaripashunchi: Cai mundopica ashtaca llaquicuna, problemacunami tian. Chaica Diablo mandajushcamandami shina can. Jehová Diosca cai mundopi llaquicunata, problemacunata cunanllata tucuchita ushashpapash, paica shuj punllapi tucuchingapami shuyajun (Romanos 9:22). Chai punlla chayangacamanga paipashmi aguantashpa catijun. w21.07 pág. 8 párrs. 2-4