3 SARA
Huashaman tigrashpa ricungapaca na munarcachu
SARA huarmiguca paipa juyashca cusa Abrahanhuanmi cazarashca carca. Paicunaca pirca muyushca jatun Ur llactapimi causarca. Chai llactaca Éufrates nishca jatun río ladollapimi carca. Chai llactapi causaj gentecunaca ashtaca yanga dioscunatami adoran carca. Shinapash Abrahanga paicunamandaca diferentemi carca. Paipash, paipa huarmigu Sarapash Jehová Diostallami adoran carca. Shinapash shuj punlla na yashcapimi Sara huarmiguca na manllashcata, shinlli feta charishcata ashtahuan ricuchina tucurca. ¿Imamandata chaita rurana tucurca?
Abrahanga paipa huarmi Saramanga Jehová Dios paihuan parlashcatami villarca. Chaita uyashpaca Saraca ninandami cushijurianga. Shinapash Jehová Dios mandashcata cazunaca na fácil cagrijurcachu. Paicunaca paicunapa huasita, familiacunata saquishpami Ur llactamanda shuj caru llactaman rina carca. Shinallata paicunapa sirvijcunandimi camellopi caru caruta rishpa carpa huasicunapi causana tucurca. Shinaca Saraca guardiacunahuan cuidashca, jatun pircacunahuan muyushca llactapica ñana causaita ushagrijurcachu. Patiota, yacuta, shuj minishtirishca cosascunatapash ñana fácil charigrijurcachu. Shinallata imatapash randingapaca ñana rita ushagrijurcachu. Paipa causaica ninandami cambiagrijurca. Shina cajpipash Saraca Jehovapi confiashpami paipa cosascunata japishpa paipa familiamanda, paipa amigocunamanda dispidirirca. Shinami paipa cusa Abrahanhuanga na rijsishca llactaman ri callarirca.
Saraca ashtahuan seguro pushtuman rishun nishpaca Abrahandaca na cutin cutin nijurcachu. Chaipa randica, paipa cusata cazushpami Jehová Dios maiman cachangapaj munajpipash rircalla
Saraca ¿imata ashtahuan rurashpashi shinlli feta charishcata, na manllashcataca ricuchirca? Apóstol Pabloca Saramanda y paipa cusamanda parlashpami: “Paicuna saquishca llactapi cutin cutin pensarinajushca cashpaca, chai llactaman tigrana oportunidadtaca tarinmanmi carca” nirca (Heb. 11:15). Saraca: “Ur llactapi ñuca huasiman tigrashpaca ali, segurami causajuiman” nishpami pensarita ushanman carca. Shinapash chashna pensarinapa randica, na manllashpami paipa huasimanga na tigrarca.
Éufrates nishca riopica micunaguta, shuj cosascunata randingapaca shuj shuj llactacunamanda ashtaca barcocunami tiarca. Shinapash Canaán llactaman chayashpaca Éufrates riopishna chashna barcocuna na tiashcatami Saraca ñapash cuenta japirca. Chaimandami Canaán llactapi shuj jatun yarjai tiai callarijpica chaimanda rina tucurca. Chashna yarjai tiajpipash Sara huarmiguca Ur llactaman tigrashundaca Abrahanmanga na cutin cutin nijurcachu. Ashtahuanbash na quejarishpami paipa cusahuan Egipto llactaman rirca.
Saraca juyalagupachami carca. Chaimandami Abrahanga paipa huarmihuan quidangapaj pipash paita huañuchinata manllarca. Chaimi Abrahanga Sarataca “panimi cani” ningui nirca. Sara chashna nijpipash faraón runaca pai juyaillagupacha cashcata yachaj chayarcallatami. Chaimandami paipa palacioman apamuchun mandarca. Carpa huasicunapi caiman chaiman rishpa causanapa randica, shuj palaciopi causanaca ashtahuan ali, ashtahuan seguromi canman carca. Shinapash Saraca ¿Abrahanda saquishpa faraonhuan ali causanatachu decidirca? Na. Sara paipa cusata na saquishpa na manllashcata ricuchishcamandami Jehová Diosca paitaca salvarca. Asha tiempo jipaca paipa juyashca cusa Abrahanbamanmi tigrarca.a
Jehová Diosca Abrahanmanda shuj jatun llacta llujshina cashcatami prometishcarca. Shinapash chai tiempocamanga Sara huarmiguca shuj churigutallapash na charita ushashcachu carca. Chaimandami paica llaquillapacha carca. Shinapash Sara huarmigu Canaán llactapi huaquin huatacunata causashca jipami Jehová Diosca paitaca bendiciarca. Sara 90 huatacunata charijpipash Jehová Diosca shuj huahuaguta charichun ayudashpami Sarapa munashcata pactachirca. Jehová Diosca: “Chai huahuaguca Isaac shutimi canga” nircami. Isaac shutica “asina” nisha ninmi. Abrahán Sarahuan shuj huahuaguta charigrijushcata yachashpaca primeroca na cierto cangachu yashpapash jipamanga cushijuimandami asirca. Shinallata Jehová Dios chai milagrota rurashcamanda shuj gentecunapash paihuan cushijushpa asinataca Sara huarmiguca segurami carca. Chaimandami Isaac shutita churanaca ali carca.
Saraca ashtaca huatacunata causashcamandami paipa churigu imashina viñashcata, Jehová Diosta juyaj runagu tucushcatapash ricui usharca. Sara huarmigu juyaj, na manllaj mama caimandami paipa churigutaca aliguta cuidarca. Shinallata saquishca cosascunataca nunca na huashaman tigrashpa ricurcachu. Ur llactapi ali causaita charishca cashpapash chaiman tigranataca nunca na pensarcachu. Chaipa randica, Jehová Dios shamuj punllacunapi bendicianatami shuyarca. Sara, paipa familiapash Jehovapa tucui promesacuna imashina pactarijta na ricui ushashca cajpipash Jehovapa promesacunaca pactaringapachami. Chai tiempopimi Jehová Diospa tucui promesacuna pactarijta ricunga.
Bibliapi ima nijta liipai
¿Imatata nipanguiman?
Saraca ¿imashinata na manllashcataca ricuchirca?
Ashtahuan informacionda mascapai
1. Saraca Abrahanbaca taitamandalla panimi carca. Paihuan cazarashpaca ¿alitachu rurarca? (wp17.3 12 párr. 5, nota).
2. Sara huarmigu Ur llactamanda llujshishpaca ¿ima cosascunatallata saquishcanga? (wp17.3 13 párr. 4-14 párr. 2). A
Photograph taken by courtesy of the British Museum
Foto A: Punda tiempo Ur llacta tiashca pushtupimi cai joyataca tarirca.
3. Abrahán runagu Sara paipa huarmi cashcata na villashpaca ¿imamandata alita rurarca? (wp17.3 14 párr. 6-15 párr. 1).
4. Saraca paipa cusa Abrahandaca ninandami respetarca. Shinapash paihuan na deacuerdo cashpaca ¿upallachu quidarca? (g 1/08 29 párrs. 4, 5). B
Dibujo B
Imata yachajushcapi pensaripai
Sara huarmiguta Lotpa huarmihuan comparapai.
¿Imapita igual carca? (Gén. 12:1; 13:5-7; 19:12, 15).
¿Imapita diferente carca? (Gén. 19:17, 26; Luc. 17:28-32).
Paicunapa decisiongunamanda ima pasashcata ricushpaca ¿imatata yachajupanchi?
Saraca juyalagupachami carca. Paipa cusapash charij charijmi carca. Paicunashna causaita charishpaca ¿imatata Saramandaca yachajuita ushapanchi? (Prov. 31:30; 1 Tim. 6:17-19).
¿Imashinata Sarapa ejemplota catishpa na manllashcata ricuchita ushapangui? C
Foto C
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Sara causarijpica ¿imatata paita tapungapaj munaiman?
Ashtahuan yachajupai
Sarapa ejemploca ¿solo cazada huarmicunapallacha? ¿O cusacunapashchu paipa ejemplomandaca yachajuita ushan?
Abrahán y Sara randimanda respetaringapaj imata rurashcata ricupai.
“Cusahuarmicuna, Jehová munashcashna juyarishpa catipaichi” (w23.05 24, 25 párrs. 15-17)
a Jipamanga rey Abimelecpashmi Sara paipa huarmi tucuchun munarca. Shinapash Saraca na manllashpami paipa cusa Abrahán ima nishcata cazurca. Chaimandami Jehová Diosca cutin Sara huarmiguta salvarca.