32 ELISEO
“Mandaj Dioslla, pai ricuchun paipa ñavita pascapai”
PROFETA Eliseo y paipa sirvijpashmi Dotán llactapi carca. Chai llactaca Israel llactapa shuj pambapi, shuj loma jahuapimi carca. Shinallata chai llactapa muyundipica jatun pircacunami tiarca. Shuj punllaca Eliseopa sirvijca tutamandata jatarishpami Siria llactamanda ashtaca soldadocuna paicunapa caballocunahuan, carretacunahuan chayamushcata ricurca. Paicunaca tutami Dotán llactamanga chayamushcarca. Paicunaca Jehovapa profeta Eliseota japingapami chaipi carca. Eliseopa sirvij runaguca ninanda manllarishpami paicuna jatun peligropi cashcata villangapaj Eliseopaman calpashpa rirca.
Eliseoca ñami shuj viajecunapash shina peligropi cashcarca. Huaquin huatacuna huashamanmi Jehová Diosca Eliastaca Eliseota yachachichun cacharca. Jehová Diosca Eliaspa randi Eliseo profeta tucuchunmi chaita rurarca. Chai punllamandapachami Eliseoca Eliashuan ayudarishpa rey Acabhuan, paipa huarmi Jezabelhuan y paicunapa churi Ocoziashuanbash enfrentarina tucurca. Paicunaca nalicuna cashpami Jehovapa profetacunata huañuchingapaj munarca. Shuj punllaca na yashcapimi jahua cielopi ninashna brillajun caballocunahuan shuj carreta ricurirca. Chai carretami Eliastaca paipa amigo Eliseomanda shicanyachirca. Chai jipaca Eliasca shuj shinlli huairapimi jahua cieloman apai tucurca. Eliseoca paipa amigo Eliastaca talvez nunca más ñana ricushcangachu. Shinapash Elías yachachishca cosascunata pactachishpami Eliseoca Jehovapa profetacunata ñaupaman pushashpa Israel llactapi Baal yanga diosta adoranata tucuchingapaj esforzarirca (2 Rey. 2:15).
Jehová Diosca ashtaca milagrocunata rurachunmi Eliseomanga poderta curca. Por ejemplo, shuj viajeca Eliseoca Siria llactamanda ashtaca soldadocunata mandaj Naamán runatami jambirca. Rey Ben-Hadadca Naamandaca ninandami alicachin carca. Pero Eliseo Naamán runata jambijpipash Ben-Hadadca agradicinapa randica, Israel llactahuan macanajungapami soldadocunata cachashpa catirca. Shinapash Jehová Diosca Ben-Hadadpa soldadocuna israelitacunahuan macanajungapaj maiman rinataca cutin cutinmi Eliseomanga villarca. Shinaca Ben-Hadadca israelitacunata na llaquichita ushashcamandami ninanda culirashpa paipa sirvijcunataca: “Ñuca imata ruranataca ¿pita paicunaman villajun?” nishpa tapurca. Shina tapujpimi sirvijpuramanda shuj runaca cashna nirca: “Jatun mandaj ñuca amolla. Dios ima nishcata villaj, Israel llactapi causajuj Eliseomari, Israel llactata jatun mandajman villajun. Can puñuna pacalla ucupi imata parlajushcatapash tucuitami villajun” nircami. Chaimandami profeta Eliseo Dotán llactapi cashcata yachaj chayashpaca Ben-Hadadca paita japichun paipa soldadocunata cacharca.
Ashtaca ashtaca soldadocuna shamujpimi Eliseo y paipa sirvijpash imatapash na rurai ushanshna ricurirca. Shinapash Eliseoca na paicunalla cashcataca alimi yacharca
Siria llactamanda soldadocunataca Eliseopa sirvijmi primeroca ricurca. Chaipimi Eliseopaman calpashpa cashna nirca: “Aij, ñucata mandajlla. Cunanga ¿imatashi rurashun?” nishpa. Eliseoca paipa sirvij ninanda manllajujta ricushpami paita shinllichingapaca: “Ama manllaichu” nirca. Chai jipaca: “Ñucanchimi, paicunatapash ashtahuan yali ashtacacuna canchi” nircami. Chai shimicunaca cunangamanmi ñucanchitaca ayudashpa, animashpa catin. Shinapash Eliseoca paipa sirvijhuan ishcaillami carca. Sirio soldadocunata mishangapaca nimata na rurai ushanmanllu carca. Chaimandami Eliseopa sirvijca na crishpa Eliseopa shimicunataca uyajushcanga. Chai jipaca Eliseoca: “Mandaj Dioslla, pai ricuchun paipaj ñavita pascapai” nishpami Jehovata mañarca.
Jehová Diosca Eliseopa mañaitaca ñapashmi contestarca. Chaipaca Eliseopa sirvijmanga paicunapa muyundipi ashtaca angelcuna cashcatami ricuchirca. Paicunaca shuj llactacunamanda soldadocunatapash yali shinlli, ashtaca ashtaca angelcunami carca. Bibliapica: ‘Eliseopa muyundipica, caballocunapi tiarishca gentecuna, nina rupajuj carretacuna chai lomapi junda shayanajujtami ricurca’ ninmi.
Siria llactamanda soldadocunaca Jehovapa angelcunataca na ricui usharcachu. Chaimandami Eliseota japingapaca Dotán llactaman rishpa catirca. Eliseoca Jehovataca sirio soldadocunata ciegota saquichunmi mañarca. Jehová Diosca Eliseopa mañashcata uyarcami. Shinapash sirio soldadocunaca ciegopachaca na quidashcangachu. Paicunaca ricuita ushashpapash imata ricujushcata, ima pasajushcata na intindi ushashpami ciegoshna quidarca. Chaimandami Eliseoca: ‘Ñucata catihuaichi, ñucami canguna mascajushca runapaman saquigrisha’ nircami. Shinapash Eliseoca 16 kilómetro caruta rishpami paicunataca Samaria llactaman pusharca. Ña chayashpaca soldadocunapa ñavicunata pascachunmi Jehovataca mañarca. Jehová Dios sirio soldadocunapa ñavita pascajpimi maipi cashcata cuenta japirca. Eliseoca paicunataca Israel llactapa ashtahuan importante pushtumanmi pushashcarca. Israel llactamanda reyca paicunata ricushcandimi huañuchingapaj munarca. Shinapash Eliseoca paicunata llaquishpami: “Micunata carashpa Siria llactaman tigrachun saquipai” nishpa reytaca mañarca. Bibliapica: ‘Chai punllamandapachami Siria llactamanda tandanajushca shuhua runacunaca, Israel llactaman cutinga na shamurcachu’ ninmi.
Eliseoca shinlli feta charishcamandami angelcuna chai ratopi paicunata ayudangapaj chaipi cashcataca seguro carca. Jehovapash y paipa angelcunapash Jehovapa sirvijcunata ayudangapaca siempremi listo can. Eliseoca ashtaca huatacunata Jehovata sirvijushcamandami chaitaca ali yacharca. Jehová Dios paita cuidajushcata yachashpami Eliseoca na manllashcanga. Ñucanchicunapashmi chaita yachashpaca na manllashpa Jehová Diosta sirvita ushapanchi.
Bibliapi ima nijta liipai
2 Reyes 6:8-23
¿Imatata nipanguiman?
Eliseoca ¿imashinata na manllashcataca ricuchirca?
Ashtahuan informacionda mascapai
1. Jehová Dios Eliseota profeta cachun agllajpica Eliseoca ¿imatata rurarca? Paimandaca ¿imatata yachajupanchi? (1 Rey. 19:19-21; it “Eliseo” párr. 2). A
Dibujo A
Dibujo A
2. Eliseoca Eliastaca: “Can charishca espiritumandaca, chaupi yalita cuhuai” nishpami mañarca. ¿Imamandata chashna nishpa mañarca? (2 Rey. 2:9; w03 1/11 31).
3. ¿Imamandata Jehová Diosca siriocunataca na ciertopacha ciegota saquirca nipanchi? (it “Ceguera” párr. 6).
4. Eliseo profeta cashpaca ¿imacunatallata rurarca? (it “Eliseo” párrs. 27-28).
Imata yachajushcapi pensaripai
Angelcunaca ñucanchimandaca nunca na carupichu can. Ñucanchita ayudangapapash siempremi listo can. Chaita yachanaca ¿imashinata ama manllachunga ayudan? B
Foto B
Eliseo paita sirvij runaguta imashina animashcamandaca ancianocuna y tucui ñucanchicunapash ¿imatata yachajuita ushapanchi?
¿Imashinata Eliseopa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Eliseo causarijpica ¿imatata paita tapungapaj munaiman?
Ashtahuan yachajupai
Mushuj responsabilidadcunata chasquij huauquicunaca Eliseomandaca ¿imatata yachajuita ushan?
Eliseopa causaimanda ashtahuan yachajupai.